Tunay na Pagtubod—Posible Pa daw Iyan?
Tunay na Pagtubod—Posible Pa daw Iyan?
“An pagtubod sarong buhay, pusoan na kompiansa sa biyaya nin Dios, seguradong gayo asin nakasisiertong marhay kaya itataya dian kan may pagtubod an saiyang buhay nin sangribong beses.”—MARTIN LUTHER, 1522.
“Kita haros biyong yaon na sa sarong sekular na sosyedad na an Kristianong pagtubod asin mga gibo haros mayo na.”—LUDOVIC KENNEDY, 1999.
AN MGA punto de vista sa pagtubod nagbabago nin bigla asin risang marhay. Kan nakaagi, an pagtubod sa Dios lakop. Ngonyan na mga aldaw, sa kinaban nin pagkamapagduda asin pagdusa, an tunay na pagtubod sa Dios asin sa Biblia marikas na nawawara.
Tunay na Pagtubod
Para sa dakol, an “pagtubod” nangangahulogan sana nin pagkaigwa nin relihiosong paniniwala o pagsunod sa sarong porma nin pagsamba. Minsan siring, segun sa pagkagamit sa Biblia, an “pagtubod” sa pundamental nangangahulogan nin lubos na tiwala—biyo, dai natatanyog na kompiansa sa Dios asin sa saiyang mga panuga. Iyan sarong kualidad na tanda nin sarong disipulo ni Jesu-Cristo.
Sarong beses, si Jesu-Cristo nagtaram manongod sa pangangaipo na mamibi asin “dai mag-ontok.” Sa paggibo kaiyan, sia nagpalataw nin hapot manongod sa kun baga an tunay na pagtubod talagang maeksister sa satong kaaldawan. Sia naghapot: “Kun dumatong na an Aki nin tawo, talaga daw na makukua nia an pagtubod [na ini] sa daga?” Taano ta nagpalataw sia kan siring na hapot?—Lucas 18:1, 8, nota sa ibaba.
Nawarang Pagtubod
Dakol na bagay an puedeng magin dahelan na mawara nin mga tawo an ano man na pagtubod na tibaad yaon sa sainda. Kabilang sa mga iyan an makolog na mga pangyayari asin kasakitan nin buhay sa aroaldaw. Halimbawa, si Propesor Michael Goulder sarong padi sa parokya sa Manchester, Inglaterra, kan mangyari an grabeng pagbagsak nin eroplano sa Munich kan 1958 kun saen dakol an nagadan sa grupo kan Manchester United putbol. Sa sarong programa sa telebisyon na BBC, sinabi kan parabareta na si Joan Bakewell na si Goulder “nakamateng daing maginibo kan maheling kun gurano an kamondoan kan mga tawo.” An sarong resulta iyo na “nawara an saiyang pagtubod sa sarong Dios na nag-iinterbenir sa kaaabtan nin tawo.” Sinabi ni Goulder
an saiyang paniniwala na “an Biblia bakong . . . an tataramon nin Dios na dai nasasala” kundi, imbes, “an tataramon nin tawo na puedeng masala, na tibaad may nagkapirang kabtang kaiyan na ipinasabong nin Dios.”Kun beses an pagtubod naaalang na sana. Iyan an nangyari sa parasurat asin parabareta sa radyo na si Ludovic Kennedy. Sinabi nia na poon sa pagkaniaki “pabalikbalik an mga pagduwaduwa asin kadaihan [nia] nin kasegurohan [manongod sa Dios] asin nag-orog an dai [nia] paniniwala.” Garo baga mayong makatao saiya nin nakakokontentong simbag sa saiyang mga hapot. An pagkagadan sa dagat kan saiyang ama an sarong dai linalaoman na pangyayari na nakapaluya nin grabe sa dati nang maluyahon na pagtubod. An mga pamibi sa Dios na “ingatan kami sa mga peligro sa dagat asin sa kadahasan kan kalaban” dai sinimbag kan an kinombertir na pampasaherong barko na linulunadan kan saiyang ama sinakyada asin rinaot kan mga bapor de guerra kan mga Aleman durante kan Guerra Mundial II.—All in the Mind—A Farewell to God.
An siring na mga eksperyensia bakong pambihira. An “pagtubod,” an sabi ni apostol Pablo, “bakong sadiri nin gabos na tawo.” (2 Tesalonica 3:2) Ano sa paghona nindo? Posible pa daw an tunay na pagtubod sa Dios asin sa saiyang Tataramon sa kinaban na paorog nang paorog an pagigin mapagduda? Siyasaton an sinasabi kan masunod na artikulo dapit sa temang ini.