An Liabe sa Sarong Maogmang Kinaban

“AN SASARONG pinakamakapangyarihan na personahe​—bako sanang sa nakaaging duwang milenyong ini kundi sa bilog na kasaysayan nin tawo​—iyo si Jesus na taga Nazaret,” sabi kan magasin na Time. Kan si Jesus yaon sa daga, naaraman nin rinibong tawo na sadiosan an puso, bako sanang an saiyang kadakulaan, kundi an saiyang pagmakolog sa iba. Huli kaini, bakong makangangalas na gusto ninda siang gibohon na hade. (Juan 6:​10, 14, 15) Pero, siring sa pagkasambit sa naenot na artikulo, sinayumahan ni Jesus na maimbuelto sa politika.

AN REAKSION ni Jesus basado sa kisuerra tolong dahelan: an pagmansay kan saiyang Ama sa mga kapahayagan nin sadiring pagpili kan gusto kan mga tawo, na kaiba an pamamahala nin tawo; an pakaaram ni Jesus na igwa nin makapangyarihan, nakatagong mga puersa na kinokontra dawa an pinakamarahay na mga paghihingoa nin tawo na mamahala; asin an katuyohan nin Dios sa pag-establisar nin sarong langitnon na gobyerno na mamamahala sa bilog na daga. Mantang mas maingat niatong sinisiyasat an tolong puntong ini, maheheling niato kun taano ta nasusudya an mga paghihingoa nin katawohan na gibohon na mas marahay na lugar an kinaban. Maheheling man niato kun paano makakamit an kapangganahan.

Kaya daw nin mga Tawo na Pamahalaan an Sadiri Ninda?

Kan lalangon nin Dios an mga tawo, tinawan nia sinda nin autoridad sa mga hayop. (Genesis 1:26) Alagad an katawohan sakop kan soberaniya nin Dios. Kaipuhan na patunayan kan enot na lalaki asin babae an saindang pagpasakop sa Dios paagi sa makinuyog na paglikay sa bunga nin sarong partikular na kahoy, an “kahoy kan pakamidbid  sa marahay asin maraot.” (Genesis 2:17) Makamomondo, inabuso ni Adan asin Eva an saindang libre ahente moral asin nakisuway sa Dios. An pagkua kan ipinangangalad na bunga bako sanang akto nin paghabon. Iyan pagrebelde sa soberaniya nin Dios. An nota sa ibaba kan Genesis 2:17 sa The New Jerusalem Bible nagsasabi na si Adan asin Eva naghingakong may deretso “sa lubos na independensia sa moral na paagi kaiyan an tawo nagsayumang rekonoseron an saiyang kamugtakan bilang sarong linalang . . . An enot na kasalan sarong pag-atake sa soberaniya nin Dios.”

Huli sa kalabot na seryosong isyu sa moral, tinogotan nin Dios si Adan asin Eva patin an saindang mga gikan na pumili kan sadiri nindang paagi nin pamumuhay, asin nag-establisar sinda kan sadiri nindang mga pamantayan nin tama asin sala. (Salmo 147:​19, 20; Roma 2:14) Sa pundamental, an pag-eksperimento nin tawo sa pagpili kan gusto kun siring nagpoon na. Nagin mapanggana daw iyan? Huli sa bentaha nin pakaaram sa mga nangyari kan nakaaging rinibong taon, masasabi niato na dai! An Eclesiastes 8:9 nagsasabi: “An tawo nagsakop sa tawo sa saiyang ikararaot.” An makamomondong marhay na rekord na ini nin pamamahala sa sadiri nin tawo an nagpapatunay kan pagigin totoo kan Jeremias 10:23: “Aram kong marhay, O Jehova, na bakong kapot nin daganon na tawo an saiyang dalan. Bakong kapot nin tawong naglalakaw dawa an paggiya sa saiyang lakad.” Pinatunayan nin kasaysayan na kun mayo an saindang Kaglalang an mga tawo mayo nin kakayahan na magin mapanggana sa pamamahala.

Si Jesus biyong minaoyon. An independensia sa Dios ikinababalde nia. “Dai ako naggigibo nin ano man sa sakong sadiring kabotan,” sabi nia. “Danay kong ginigibo an mga bagay na nakapaoogma sa [Dios].” (Juan 4:34; 8:​28, 29) Huli kaini, mantang mayo nin autorisasyon hale sa Dios na akoon an pagkahade hale sa mga tawo, dai ngani inisip ni Jesus na akoon iyan. Minsan siring, dai ini nangangahulogan na magabat an boot nia na tabangan an saiyang kapwa tawo. Al kontraryo, ginibo nia an gabos paagi kan saiyang kapangyarihan na tabangan an mga tawo na makamtan an pinakadakulang kaogmahan kan panahon na idto asin sa ngapit. Itinao nia ngani an saiyang buhay para sa katawohan. (Mateo 5:3-11; 7:24-27; Juan 3:16) Alagad aram ni Jesus na “para sa gabos na bagay igwa nin itinalaan na panahon,” kabale an panahon nin Dios na patunayan an saiyang soberaniya sa katawohan. (Eclesiastes 3:1; Mateo 24:​14, 21, 22, 36-39) Pero, girumdomon na sa Eden an satong enot na mga magurang nagpadaog sa kabotan nin sarong maraot na espiritung nilalang na nagtaram paagi sa sarong naheheling na halas. Dinadara kita kaini sa ikaduwang rason kun taano ta si Jesus dai nakilabot sa politika.

An Dai Midbid na Namamahala sa Kinaban

Sinasabihan kita kan Biblia na iinalok ni Satanas ki Jesus “an gabos na kahadean kan kinaban asin an kamurawayan kan mga iyan” bilang karibay nin sarong akto nin pagsamba. (Mateo 4:8-10) Sa pundamental, iinalok ki Jesus an pamamahala sa kinaban​—alagad may mga kondisyon an Diablo. Si Jesus dai nagpadaog sa sugot na ini. Pero, talaga daw na iyan sarong sugot? Talaga daw na puedeng gumibo si Satanas nin siring na labi-labi kadakulang alok? Iyo, ta si Jesus mismo inapod an Diablo na “an namamahala sa kinaban,” asin ilinadawan sia ni apostol Pablo bilang “dios kan sistemang ini nin mga bagay.”​—Juan 14:30; 2 Corinto 4:4; Efeso 6:12.

Siempre, aram ni Jesus na an Diablo mayo nin odok na pagmakolog sa pinakaikararahay nin katawohan. Ilinadawan nia si Satanas bilang “paragadan” asin “an ama nin mga kaputikan asin kan gabos na bakong totoo.” (Juan 8:​44, The Amplified Bible) Siempre pa, an kinaban na “namumugtak sa kapangyarihan” kan siring karaot na espiritu nungkang magigin totoong maogma. (1 Juan 5:19) Alagad, an Diablo dai man magkakaigwa kan autoridad na ini sa panahon na daing talaan. Si Jesus, na saro na ngonyan na makakamhan na espiritung linalang, sa dai na mahahaloy hahaleon si Satanas asin biyong hahaleon an saiyang impluwensia.​—Hebreo 2:14; Kapahayagan 20:1-3.

Aram mismo ni Satanas na an saiyang mga aldaw bilang namamahala sa kinaban marikas nang nauubos. Huli kaini, sia naggigibo nin desesperado, todo-todong paghihingoa tanganing raoton an mga tawo na magin dai na puedeng bakleon, arog kan ginibo nia bago an Baha kan kaaldawan ni Noe. (Genesis 6:1-5; Judas 6) “Herak man kan daga asin kan dagat,” an sabi kan Kapahayagan 12:​12, “huli ta huminilig na dian sa saindo an Diablo, na  may dakulang kaanggotan, sa pakaaram na halipot na sana an saiyang panahon.” An hula sa Biblia asin an mga pangyayari sa kinaban nagpaparisa na nabubuhay na kita sa pagtatapos kan ‘halipot na sanang panahon’ na ini. (2 Timoteo 3:1-5) An pakaginhawa harani na ngonyan.

Sarong Gobyerno na Matao nin Kaogmahan

An ikatolong rason na si Jesus dai nakilabot sa politika iyo na aram nia na sa sarong itinalaan na panahon, eestablisaron nin Dios an sarong langitnon na gobyerno na mamamahala sa daga. Inaapod kan Biblia an gobyernong ini na Kahadean nin Dios, asin iyan an prinsipal na tema kan katokdoan ni Jesus. (Lucas 4:43; Kapahayagan 11:15) Tinokdoan ni Jesus an saiyang mga disipulo na ipamibing dumatong an Kahadean na iyan, huling sa irarom sana kan pamamahala kaiyan ‘magigibo an boot nin Dios sa daga kun paano man sa langit.’ (Mateo 6:​9, 10) Tibaad mag-isip-isip kamo, ‘Kun an Kahadean na ini mamamahala sa bilog na daga, ano an mangyayari sa mga gobyerno na gibo nin tawo?’

An simbag makukua sa Daniel 2:44: “Sa mga aldaw kan mga hadeng idto [na namamahala sa katapusan kan presenteng sistema] an Dios nin kalangitan mapatindog nin sarong kahadean na dai noarin man malalaglag. Asin an kahadean mismo dai itatao sa arin man na ibang banwaan. Iyan an maronot asin matapos kan gabos na ining [gibo nin tawong] kahadean, asin iyan mismo magdadanay sagkod sa mga panahon na daing talaan.” Taano ta kaipuhan na ‘ronoton’ kan Kahadean nin Dios an mga pamamahala sa daga? Huli ta iiniinsistir kan mga ini na ipadagos an laban sa Dios na espiritu nin pagpili kan gusto na pinalalakop ni Satanas poon pa sa hardin nin Eden. Apuera sa pagsarongat sa pinakaikararahay nin katawohan, an mga nagmamaigot na ipadagos an espiritung iyan nakikipagbanggaan sa Kaglalang. (Salmo 2:6-12; Kapahayagan 16:​14, 16) Huli kaini, dapat na ihapot ta sa satong sadiri, ‘Kita daw para sa o tumang sa pamamahala nin Dios?’

Kiisay na Soberaniya an Pipilion Nindo?

Tanganing matabangan an mga tawo na gumibo nin may kabatidan na pagdedesisyon manongod sa pamamahala, isinugo ni Jesus an saiyang mga disipulo na ihulit an “maogmang baretang ini kan kahadean . . . sa bilog na ineerokan na daga para sa pagpatotoo sa gabos na nasyon” bago dumatong an katapusan kan presenteng sistema. (Mateo 24:14) Sairisay ngonyan an midbid sa bilog na kinaban sa paghuhulit kan Kahadean nin Dios? An Mga Saksi ni Jehova. Sa katunayan, haloy nang nakalaag sa tutob kan magasin na ini an mga tataramon na “Nagpapahayag kan Kahadean ni Jehova.” Ngonyan, mga anom na milyon na Saksi sa labing 230 kadagaan an nagtatabang sa mga tawo sa pagkua nin tamang kaaraman manongod sa Kahadean na iyan. *

Mga Bendisyon Para sa mga Sakop kan Kahadean

Ginigibo pirme ni Jesus an mga bagay sono sa paagi nin Dios. Huli kaini, imbes na magdesisyon na magin independiente asin magmaigot na suportaran o pakarhayon an nag-eeksister na sistema nin mga bagay paagi sa politika, sia naghingoang marhay sa pagpaoswag kan intereses kan Kahadean nin Dios, an solamenteng solusyon sa mga  problema sa kinaban. Huli sa saiyang kaimbodan sia binalosan nin sarong mamuraway na trono sa langit bilang an mismong Hade kan Kahadean na iyan. Kanigoan karahay na premyo para sa pagpasakop nia sa Dios!​—Daniel 7:​13, 14.

Minilyon ngonyan na nag-aarog ki Jesus sa pag-enot sa Kahadean nin Dios asin sa pagpasakop sa kabotan nin Dios an makamit man nin sarong marahayon na regalo​​—an pribilehio na magin daganon na sakop kan Kahadean nin Dios. (Mateo 6:33) Sa pagsakop kan mamomoton na pamamahala kaiyan, dadarahon sinda sa pagkasangkap nin tawo, na may esperansang mabuhay na daing katapusan. (Kapahayagan 21:​3, 4) Sinasabi kan 1 Juan 2:17: “An kinaban maagi sana asin siring man an mawot kaiyan, alagad an naggigibo kan kabotan nin Dios magdadanay sagkod lamang.” Kun pinara na si Satanas asin an saiyang mga parasunod asin an daga ginibo nang sarong lakop sa globong paraiso na mayo na nin nakababangang nasyonalismo, maraot na sistema nin komersio, asin falsong relihion, kanigoan kanangongorog na kagayagayahan na matada digdi sagkod lamang!​—Salmo 37:29; 72:16.

Iyo, an Kahadean nin Dios an totoong liabe sa sarong tunay nanggad na maogmang kinaban, asin an mensaheng nag-aanunsiar kaiyan angay nanggad na apodon na maogmang bareta. Kun dai pa nindo nagigibo iyan, sa sunod na magbisita sa saindong harong an saro sa mga Saksi ni Jehova, taano ta dai nindo akoon an maogmang baretang ini na dinadara sa saindo?

[Nota sa Ibaba]

[Mga Ritrato sa pahina 7]

Itinokdo ni Jesus na sa irarom kan areglo kan Kahadean nin Dios, an kinaban magigin marahayon na lugar