An Nagtatao nin Buhay na Tubig Nagbobolos sa Andes

An kalabaan kan Kabukidan nin Andes yaon sa tahaw nin Peru, na binabanga an nasyon sa marang rehion na harani sa dagat sa solnopan asin sarong marambong saka maalingahot na kadlagan sa sirangan. Sa mabukid na gulod na ini nakaistar an labing un-tersio kan 27 milyones na tawo sa Peru. Magsalang yaon sinda sa halangkaw na mga buklod asin bakilid nin Andes o sa garo baga mayo na nin sagkodan sa rarom na mga ampas asin mabungang mga kababan kan mga kabukidan na iyan.

NAOOLANG kan garang-gasangon na kabukidan kan Andes an pasil na paglaog kan mga hale sa luwas. Bilang resulta, an minilyon na nag-iistar dian medyo napapasuway, sa kadaklan dai apektado nin mga pangyayari asin progreso sa luwas kan saindang teritoryo.

Nagkaigwa nin saradit na baryo sa gilid kan mga sapa tanganing makakua nin tubig na kaipuhan nin mga pananom asin pinapastoran na mga llama, alpaca, vicuña, asin karnero. Minsan siring, igwa nin saro pang klase nin mahalagang marhay na tubig na nagbobolos sa Andes​​—an nakarerepreskong espirituwal na tubig hale ki Jehova, “an burabod nin buhay na tubig.” (Jeremias 2:13) Ginagamit nin Dios an saiyang mga Saksi sa pagtabang sa mga tawong yaon sa saradit na baryo sa kalangkawan nin Andes na makua an tamang kaaraman manongod sa saiya asin sa saiyang mga katuyohan.​—Isaias 12:3; Juan 17:3.

Mantang kabotan nin Dios na “an gabos na klase nin tawo makaligtas asin makaabot sa tamang kaaraman sa katotoohan,” an mga ministrong ini naghihingoang marhay na dalawon an masakit aboton na mga komunidad na dara an nagtatao nin buhay na mensahe hale sa Biblia. (1 Timoteo 2:4) An mensaheng ini na basado sa Biblia nagtatao nin kaliwanagan asin noble. Pinatalingkas kaiyan an lokal na mga tawo na sadiosan an puso gikan sa mga superstisyon, kostumbre, asin ideya na nagpangyari na matakot sinda sa mga gadan, maraot na mga espiritu, asin puersa nin naturalesa. Mas importante, an mensaheng ini nagtatao sainda kan mamuraway na paglaom na buhay na daing katapusan sa sarong paraisong daga.

An Paghihingoa

An mga parahulit kan Kahadean na nagdadalaw sa hararayong rehion na ini kaipuhan na gumibo nin dakol na pagliliwat. Tanganing maabot an puso kan mga tawo, an mga paratokdo sa Biblia kaipuhan na tatao nin Quechua o Aymara, an duwang lokal na lenguahe.

An pagpasiring sa mga baryo sa Andes bakong pasil. Dikit an perokaril sa mga lugar na iyan. An transportasyon bakong segurado asin apektado kan maraot na panahon patin palaen na topograpiya. Kun siring, paano nadudumanan kan mga Saksi an mga tawo tanganing paabotan sinda kan mensahe nin Kahadean?

Inako kan makosog an boot na mga parahulit kan maogmang bareta an angat asin naghimate na igwa kan espiritu ni propeta Isaias: “Uya ako! Sugoa ako.” (Isaias 6:8) Naggamit sinda nin tolong harong na de rueda sa pagbiahe pasiring sa mga lugar sa amihanan, sentral, asin timog. Dara an dinosenang karton nin mga Biblia asin babasahon sa Biblia, an maigot na mga payunir, o bilog na panahon na mga ministro, nagsabwag nin mga banhi nin katotoohan sa Biblia sa maboot, mapag-istimar, asin sadiosan an pusong mga tawo na nag-iistar duman.

An mga kurbada kan mga tinampo sa kabukidan nangorognang peligroso. Tanganing makabiahe sa nagkapira sa mga ini, an mga sasakyan kaipuhan na gumamit nin tinampong sigsag. Durante kan siring na pagmaniobra, an sarong misyonero na nagtutukaw sa likod kan auto nagtanaw sa luwas kan bintana asin narisa na an saro sa mga rueda sa likod yaon mismo sa gilid kan ampas na labi sa 190 metros an rarom! Pinirong nia an saiyang mga mata sagkod na makaabante an auto.

An nagkapirang tinampo raraot na asin harayakpit na marhay. Kan nag-aagi sa siring na garang-gasangon na daga, an saro sa harong na de rueda pababa sa sarong hayakpit na tinampo kan masabatan kaiyan an sarong pasakat na trak. An harong na de rueda kinaipuhan na paatrason paitaas sa sarong lugar na an duwa haros dai na puedeng magsabatan.

Minsan siring, an mga resulta kan siring kadesididong paghihingoa nagin marahayon. Gusto daw nindong maaraman pa an manongod sa mga paghihingoang iyan?

“Pagpatubig” sa Danaw nin Titicaca

Yaon sa kababan kan Kabukidan nin Andes 3,800 metros na mas halangkaw sa kapatagan kan dagat, an Danaw nin Titicaca an pinakahalangkaw na katubigan na nasa interior asin nananabigar. An natatakopan nin niebeng mga alitoktok nin bukid, na an nagkapira kaiyan labing 6,400 metros an langkaw, an ginigikanan kan kadaklan kan 25 salog na nagbobolos pasiring sa Danaw nin Titicaca. Huling halangkawon iyan, an klima malipot, asin an mga bakong propiong taga duman kaipuhan na pangganahan an epekto nin kakulangan nin oksiheno sa halangkaw na lugar.

Sarong beses kaidto, sarong grupo nin mga payunir na tataong magtaram nin Quechua asin Aymara  an nagbiahe pasiring sa mga isla nin Amantani asin Taquile sa Danaw nin Titicaca. Dinara ninda an sarong pasale sa slides na an titulo “A Closer Look at the Churches” (sa Bicol, “Sarong Maingat na Pagsiyasat sa mga Iglesia”), sarong prangkang pagsiyasat kan pagkafalso kan Kakristianohan. Paborable an nagin reaksion kaini. Inako nin sarong lalaki an mga tugang asin iinaalok an mahiwas na kuarto sa saiyang harong na puede nindang dagosan asin kun saen puede sindang magtokdo sa Biblia.

An enot na pagtiripon sa Amantani inatenderan nin 100 katawo; an pagtiripon sa Taquile inatenderan nin 140. An pasale ginibo sa Quechua. An sarong mag-agom na dating nag-iistar sa kontinente nagsabi: “Panahon na para magirumdoman nindo kami Mga Saksi ni Jehova. Kami namimibi na kamo dumatong.”

Apuera sa duwang darakulang islang ini, an nagkapira kan kinakalkulong 40 “naglalatawlataw” na isla sa Danaw nin Titicaca napaabotan man kan maogmang bareta. Naglalatawlataw na mga isla? Iyo, an mga ini gibo sa mga totora, mga gaho na nagtutubo sa mas hababaw na mga lugar kan danaw. An mga totora minatubo asin minalangkaw sagkod sa ibabaw kan tubig. Tanganing makagibo nin isla, tinitiriko kan mga taga duman an mga gaho, na nakatanom pa man giraray sa irarom kan danaw, asin sinasaralapid iyan tanganing makagibo nin plataporma. Dangan an plataporma dinudusok nin laboy asin pinapasarig paagi sa pagdugang nin pinutol na mga gaho. An mga tawo nag-iistar sa mga payag-payag na gibo sa gaho na itinogdok sa ibabaw.

An mga Saksi ni Jehova nagkukua nin baroto tanganing makapaghulit sa mga tawo sa mga isla sa Danaw nin Titicaca. An baroto kayang lunadan nin 16 katawo. Pakaduong sa naglalatawlataw na mga isla, an mga Saksi naglalakaw sa plataporma na gibo sa gaho na pabarobalyo sa mga erokan. Sinasabi ninda na parate nindang namamate an kadikit na paghiro sa ibabaw kan tinotongtongan ninda. Ini bakong lugar para sa mga malululaon!

Kun dapit sa populasyon na nagtataram nin Aymara, sinda nag-iistar sa dakol na komunidad asin baryo na yaon sa baybayon patin sa mga peninsula na nakauldot sa danaw. An mga ini mas madaling maabot paagi sa baroto kisa pagbaklay. Gabos-gabos, kinakalkulo na haros 400,000 katawo an nag-eerok sa rehion na pinapaabotan kan mga barotong iyan kan mensahe kan Kahadean. An mga baroto pirmeng gagamiton sa harohalawig pang panahon na maabot.

Paghale kan Espirituwal na Pagkapaha

Si Flavio nakaistar sa baryo nin Santa Lucia, harani sa Juliaca, sa Andes. Sa saiyang Iglesiang Ebangheliko, itinokdo sa saiya an doktrinang kalayo sa impierno. Sa laog nin dakol na taon nabuhay siang may pagkatakot sa siring na daing sagkod na pagpadusa sa kalayo. Parate siang nag-iisip-isip kun paanong an sarong Dios nin pagkamoot puedeng padusahan nin daing talaan an mga tawo sa kalayo. Kan si Tito, sarong bilog na panahon na ministro kan Mga Saksi ni Jehova, nagdalaw sa baryong iyan, dinumanan nia si Flavio.

An saro sa enot na mga hapot ni Flavio iyo an, “Itinotokdo daw kan saimong relihion na an mga tawo pinasasakitan sa kalayo sa impierno?” Si Tito nagsimbag na an siring na ideya ikinaoongis kan Kaglalang asin nagdadara nin katuyawan sa ngaran ni Jehova, an Dios nin pagkamoot. Ginagamit an sadiring bersion kan Biblia ni Flavio, ipinaheling ni Tito sa saiya na an mga gadan mayo lamang nin pakaaram asin na sinda naghahalat sa daganon na pagkabuhay liwat sa pagsakop kan Kahadean nin Dios. (Eclesiastes 9:5; Juan 5:​28, 29) Ini an nagbukas kan isip ni Flavio. Tolos-tolos niang inako an sarong pag-adal sa Biblia asin dai nahaloy nagin bautisadong Kristiano.

Sarong Baryo na Nagpaheling nin Apresasyon

Imahinara kun gurano kanakapupukaw sa boot na darahon an Kasuratan sa mga taga baryo na nungka pa kaidtong nakaheling nin kopya kan Biblia o maghulit sa mga baryo na nungka pang nadangog kan mga tawo an manongod sa mga Saksi ni Jehova o an maogmang bareta na ihinuhulit ninda! Iyan an eksperyensia kan tolong tugang na babaeng payunir​​—si Rosa, Alicia, asin Cecilia​​—na hinulitan an mga baryo nin Izcuchaca asin Conayca, na yaon sa langkaw na labing 3,600 metros sa sentral na Peru.

Pag-abot sa enot na baryo, mayo sinda nin madadagosan.  Nakipag-olay sinda sa lokal na komandante nin pulisiya, na ipinaliliwanag an dahelan kan saindang pagdalaw. An resulta? Tinogotan nia sindang magtorog sa presinto. Kan sunod na aldaw, an mga payunir nakakua nin mas permanenteng madadagosan na nagin sentro kan saindang gibohon.

Dai nahaloy nag-abot an panahon para sa taonan na Memorial kan kagadanan ni Cristo. Nadalaw na kan mga payunir an gabos na harong sa baryo kan Izcuchaca, nakapasakamot na nin dakol na Biblia, asin nakapoon na nin dakol na pag-adal sa Biblia. Bago an Memorial, nanao sinda nin mga imbitasyon para sa okasyon na ini, na ipinaliliwanag an katuyohan kan selebrasyon asin an kahulogan kan mga emblema na ginagamit durante kan pagselebrar. Sarong grupo nin mga tugang an inimbitaran na tumabang sa okasyon, asin saro sa sainda an nagtao kan pahayag. Kanigoan na kagayagayahan na maheling an 50 katawo hale sa sadit na baryong iyan na presente sa espesyal na okasyon na ini! Sa kaenot-enote, nasabotan ninda an totoong kahulogan kan Pamanggihan nin Kagurangnan. Siring man, abaa kahalagang marhay para sa sainda na magkaigwa sinda kan Tataramon nin Dios!

Pakabutas sa Dakulang mga Pagabat

An pagdara kan nakarerepreskong tubig nin katotoohan sa Biblia sa mga bihag kan falsong relihion pirmeng nakagagayagaya. An Pisac sarong kuta kan suanoy na Imperyo nin Inca. Kadaklan kan tawong nag-iistar dian ngonyan natokdoan kan bakong sono sa Kasuratan na katokdoan nin kalayo sa impierno. Sinasabihan sinda kan saindang mga padi na puede sindang makasakat sa langit paagi sana sa pakimaherak kan mga padi para sa sainda.

Natural sana, an siring na mga tawo napapaha sa nakarerepreskong tubig kan katotoohan sa Biblia. Mantang naghuhulit sa harong-harong, si Santiago, sarong bilog na panahon na ministro kan Mga Saksi ni Jehova, nagkaoportunidad na ipaliwanag sa sarong lalaki na an mga matanos nakatalagang mag-istar sa sarong paraisong daga. (Salmo 37:11) Ipinaheling ni Santiago sa Biblia na an mga gadan bubuhayon liwat asin na an katawohan totokdoan sa sangkap na mga dalan ni Jehova na may tinatanaw na buhay na daing katapusan. (Isaias 11:9) Sagkod kan panahon na idto, an tawong iyan debotong Katoliko, nakikisale sa espiritismo, asin nagpapalabilabi sa pag-inom. Ngonyan sia igwa na nin basado sa Bibliang paglaom asin pasohan sa buhay​​—an mag-istar sa Paraiso. Sinolo nia an gabos niang espiritistikong mga garamiton asin puminondo na sa pagburat. Tinipon nia an saiyang pamilya asin inako an sarong pag-adal sa Biblia. Pag-abot nin panahon, idinusay kan bilog na pamilyang iyan an sadiri ninda ki Jehova Dios asin nabautismohan.

Maogmang Inako an Pagigin Mapagpasakat

An mga taga bukid mapag-istimar na marhay. Minsan ngani an saindang mga harong simple sana asin an mga tawo dukha, iinaalok ninda sa saindang mga bisita kun ano an igwa sinda. Bago manodan an halangkaw na mga pamantayan sa Biblia, an kagharong tibaad alokan an sarong bisita nin dahon nin coca tanganing ngutangutaon mantang sinda nag-oolay. Alagad kun magin Saksi na, tibaad sia mag-alok nin sarong kutsarang asukar, na katimbang an halaga kan dahon nin coca sa napapasuway na mga probinsia.

Nakiolay an sarong tugang na lalaki sa sarong misyonero na ibanan sia kaini sa pagdalaw liwat. Pakatapos nin masakit na pagsakat sa tukaron na dalan sa bukid, nag-upak sinda tanganing ipaaram sa kagharong na sinda nag-abot na. Pinadagos sinda sa harong na an atop gibo sa dagami, na kinaipuhan nindang dumuko tanganing makaagi sa hababang entrada. Maingat sindang nagpasiring sa tahaw kan salog na daga, kun saen an ina nagkalot nin labot, linagan nin tamong, asin ibinugtak an saiyang omboy. Huling dai kayang lumuwas, an omboy kontentong nakikiurak asin maogmang naghaharakhatak mantang an mga nasa edad na nag-oorolay. Pakatapos kan saindang maogmang pag-orolay manongod sa mga bendisyon kan Kahadean, ilinuwas kan babae an sarong halangkaw na lalagan na may laog na lokal na inomon. Dai nahaloy pababa na an mga tugang sa gilid kan bukid para songkoon an iba pa.

Abundang Ani

Igwa na ngonyan sa rehion na ini nin mga sanggatos na grupo na napapasuway na may labing sangribo katawo an nakikipag-adal sa Biblia sa mga Saksi ni Jehova. Ipinadadara duman an mga naggradwar sa Paadalan sa Ministeryal na Pagsasanay sa Lima tanganing an mga grupong idto pormahon na magin mga kongregasyon. An mga indibiduwal na tama an kamugtakan nin puso na nabihag kan falsong relihion asin superstisyon sa halawig na panahon nanompongan an katalingkasan paagi sa maogmang bareta kan Kahadean! (Juan 8:32) An saindang pagkapaha sa tubig nin katotoohan pinaninigoan.

[Ritrato sa pahina 10]

Paghuhulit sa “naglalatawlataw” na mga isla sa Danaw nin Titicaca