Siisay an Mapasuhay sa Sato sa Pagkamoot nin Dios?

“Kun para sa sato, kita namomoot, huli ta sia enot na namoot sa sato.”​—1 JUAN 4:19.

1, 2. (a) Taano ta mahalaga sa sato an maaraman na kita namomotan? (b) Kiisay na pagkamoot an pinakakaipuhan niato?

GURANO daw kahalaga sa saindo an maaraman nindo na kamo namomotan? Poon sa pagkaomboy sagkod sa pagkanasa edad na, an mga tawo nagtatalubo sa pagkamoot. Napagmasdan na daw nindo an sarong omboy na mamomoton na karga-karga kan ina kaiyan? Sa parate, ano man an nangyayari sa palibot kaiyan, mantang an omboy nagheheling sa naghuhuyom na mga mata kan ina kaiyan, iyan pamugtak an boot, toninong sa mga takyag nin ina na namomoot sa saiya. O nagigirumdoman daw nindo an kamugtakan nindo durante kan kun beses maribok na mga taon nin pagkabarobata? (1 Tesalonica 2:7) Kun beses, tibaad dai nindo maaraman kun ano an gusto nindo o dawa ngani masabotan kun ano an namamatean nindo, pero kanigoan kahalaga an maaraman nindo na kamo namomotan kan saindong ama asin ina! Bako daw na nakatatabang an maaraman na puede nindong irani sa sainda an ano man na problema o hapot? An totoo, sa bilog na buhay, an saro sa nakalalabi sa gabos na pangangaipo niato iyo an kamotan kita. Inaasegurar kan siring na pagkamoot na kita may halaga.

² An nagdadanay na pagkamoot kan mga magurang nin saro nagkokontribwir nanggad sa tamang pagtalubo asin pagkatimbang. Pero, an pagkaigwa nin kompiansa na kita namomotan kan satong langitnon na Ama, si Jehova, orog nanggad na mahalaga para sa satong espirituwal asin emosyonal na ikararahay. An nagkapirang nagbabasa kan magasin na ini tibaad dai nagkaigwa nin mga magurang na tunay na nagmamakolog sa sainda. Kun totoo iyan sa saindo, magpakapusoan kamo. Dawa kun mayo an pagkamoot nin magurang o kun iyan kulang, an maimbod na pagkamoot nin Dios an mahipno.

3. Paano inasegurar giraray ni Jehova sa saiyang banwaan an saiyang pagkamoot sa sainda?

³ Paagi sa propeta niang si Isaias, sinabi ni Jehova na an sarong ina puedeng ‘makalingaw’ sa saiyang nagsususong omboy, alagad sia dai makalilingaw sa saiyang banwaan. (Isaias 49:15) Kaagid kaiyan, si David kompiadong nagsabi: “Enkaso bayaan ako kan sakong sadiring ama asin kan sakong sadiring ina, si Jehova mismo an maampon sa sako.” (Salmo 27:10) Kanigoan kanakaaasegurar giraray! Ano man an saindong kamugtakan, kun kamo igwa na nin dusay na relasyon ki Jehova Dios, maninigo na pirme nindong girumdomon na an pagkamoot nia sa saindo nakalalabing marhay kisa kan pagkamoot nin siisay man na tawo!

Magdanay Kamo sa Pagkamoot nin Dios

4. Paano inasegurar giraray sa mga Kristiano kan enot na siglo an pagkamoot nin Dios?

⁴ Kasuarin nindo enot na naaraman an pagkamoot ni Jehova? Posibleng marhay na an naeksperyensiahan nindo medyo kapareho kan sa mga Kristiano kan enot na siglo. An ika-5 kapitulo kan surat ni Pablo sa mga taga Roma magayon na ilinaladawan kun paano naaraman kan mga parakasala, na dati siblag sa Dios, an pagkamoot ni Jehova. Sa bersikulo 5, satong mababasa: “An pagkamoot nin Dios pinabolos na sa satong puso paagi sa banal na espiritu, na itinao sa sato.” Sa bersikulo 8, idinagdag ni Pablo: “Ipinamimidbid nin Dios an saiyang pagkamoot sa sato sa paagi na, mantang kita mga parakasala pa, si Cristo nagadan para sa sato.”

5. Paano nindo nasabotan kun sagkod saen an pagkamoot nin Dios?

⁵ Sa kaagid na paagi, kan iatubang sa saindo an katotoohan gikan sa Tataramon nin Dios asin nagpoon kamong gumibo nin pagtubod, an banal na espiritu ni Jehova nagpoon na maghiro sa saindong puso. Sa paaging ini nagpoon na masabotan nindo an kadakulaan kan ginibo ni Jehova sa pagsugo kan saiyang namomotan na marhay na Aki tanganing magadan para sa saindo. Sa siring tinabangan kamo ni Jehova na maaraman kun gurano man nanggad an pagkamoot nia sa katawohan. Kan marealisar nindo na, minsan ngani kamo namundag bilang makasalan na siblag sa saiya, pinangyari ni Jehova na an mga tawo ikapahayag na matanos na igwang oportunidad na mabuhay na daing katapusan, bako daw  na napahiro an puso nindo? Bako daw na nakamate kamo nin pagkamoot ki Jehova?​—Roma 5:10.

6. Taano ta kun minsan tibaad makamate kita na garo harayo ki Jehova?

⁶ Huling nadagka sa pagkamoot kan saindong langitnon na Ama asin huling binago nindo an saindong buhay tanganing akoon nia, idinusay nindo an saindong buhay sa Dios. Igwa na kamo ngonyan nin pakipagkatoninongan sa Dios. Pero, kun minsan daw nakakamate kamo na garo harayo ki Jehova? Puede iyan na mangyari sa siisay man sa sato. Alagad pirmeng girumdomon na an Dios dai nagbabago. An saiyang pagkamoot danay asin dagos-dagos arog kan saldang, na nungkang minapondo sa pagpaabot kan mainit na mga sinag nin liwanag kaiyan sa daga. (Malaquias 3:6; Santiago 1:17) Sa ibong na kampi, kita puedeng magbago​—dawa ngani temporaryo. Mantang nag-iitok an daga, an kabanga kan planeta natatahoban nin kadikloman. Kaagid kaiyan, kun kita marayo sa Dios, dawa sa limitadong paagi, tibaad manlipot kita sa satong relasyon sa saiya. Ano an puede tang gibohon tanganing itanos an situwasyon na iyan?

7. Paano makatatabang sa sato an pagsiyasat sa sadiri tanganing magdanay sa pagkamoot nin Dios?

⁷ Kun nakakamate kita nin pagkasuhay sa pagkamoot nin Dios, maninigo tang hapoton an satong sadiri: ‘Binabaliwala ko daw an pagkamoot nin Dios? Ako daw luway-luway na medyo ruminayo sa buhay asin mamomoton na Dios, na nagpapaheling sa laen-laen na paagi nin pagluya nin pagtubod? Itinotorohok ko daw an sakong isip sa “mga bagay kan laman,” imbes na sa “mga bagay kan espiritu”?’ (Roma 8:5-8; Hebreo 3:12) Kun duministansia kita ki Jehova, puede kitang gumibo nin mga paagi tanganing itanos an mga bagay-bagay, na bumalik sa dayupot, nagpapaogmang relasyon sa saiya. Sinasadol kita ni Santiago: “Rumani kamo sa Dios, asin sia marani sa saindo.” (Santiago 4:8) Isapuso an mga tataramon ni Judas: “Mga namomotan, paagi sa pagpakosog sa saindo man sana sa saindong kabanalbanaleng pagtubod, asin pamimibi na igwa kan banal na espiritu, magdanay kamo sa pagkamoot nin Dios.”​—Judas 20, 21.

An Naliwat na mga Kamugtakan Dai Nakaaapektar sa Pagkamoot nin Dios

8. Anong mga pagkaliwat an puedeng biglang mangyari sa satong buhay?

⁸ Dakol na pagliliwat an puedeng mangyari sa satong buhay sa sistemang ini nin mga bagay. Narisa ni Hadeng Salomon na “an panahon asin pagkanorongod nangyayari sa [sato] gabos.” (Eclesiastes 9:11) Bigla na sana, tibaad maliwat nin biyo an satong buhay. Sarong aldaw marahay an satong salud, sa sunod na aldaw tibaad grabe an kamatean niato.  Sarong aldaw garo baga permanente na an satong sekular na trabaho, sa sunod na aldaw mayo na kitang trabaho. Daing patanid, an sarong namomotan puedeng biglang magadan. An mga Kristiano sa sarong kadagaan tibaad matoninong an mga kamugtakan sa haloy-haloy na panahon, dangan, bigla na sanang nagkakaigwa nin maringis na paglamag. Tibaad sinasahotan kita nin putik, asin huli kaini, kita nag-aagi nin inhustisya. Iyo, an buhay bakong permanente o biyong segurado.​—Santiago 4:13-15.

9. Taano ta marahay na estudyaran an sarong kabtang kan Roma kapitulo 8?

⁹ Kun mangyari sa sato an makamomondong mga bagay, puedeng magpoon kitang makamate na binayaan, na naghohona pa ngani na nagluya na an pagkamoot nin Dios sa sato. Huling puedeng mangyari sa sato gabos an siring na mga bagay, marahay na estudyaran ta nin maingat an nakararangang marhay na mga tataramon ni apostol Pablo na nasusurat sa Roma kapitulo 8. An mga tataramon na iyan para sa linahidan nin espiritung mga Kristiano. Pero, sa pundamental aplikado man iyan sa mga kabilang sa ibang karnero, na ipinahayag na matanos bilang mga katood nin Dios, arog ki Abraham kaidtong mga panahon bago kan mga Kristiano.​—Roma 4:20-22; Santiago 2:21-23.

10, 11. (a) Anong mga sahot kun beses an ginigibo kan mga kaiwal tumang sa banwaan nin Dios? (b) Taano ta mayo man talaga nin saysay sa mga Kristiano an siring na mga sahot?

¹⁰ Basahon an Roma 8:​31-​34. Naghahapot si Pablo: “Kun an Dios nasa kampi niato, siisay an matumang sa sato?” Totoo, tumang sa sato si Satanas asin an saiyang maraot na kinaban. Tibaad may kaputikan na sahotan kita kan mga kaiwal, dawa sa mga korte kan nasyon. An nagkapirang magurang na Kristiano sinahotan nin pagkaongis sa saindang mga aki huli sa dai pagtogot na sinda umako nin medikal na pagbolong na nagbabalga sa ley nin Dios o dai pagtogot na sinda makikabtang sa paganong mga selebrasyon. (Gibo 15:​28, 29; 2 Corinto 6:14-16) An ibang fiel na Kristiano putik na inakusaran nin sedisyon huli ta habo nindang gumadan nin kapwa tawo sa guerra o magpartisipar sa politika. (Juan 17:16) An nagkapirang paratumang nagpalakop nin mapagbalobaging kaputikan sa media, na may kaputikan pa nganing sinasahotan an Mga Saksi ni Jehova nin pagigin peligrosong kulto.

¹¹ Alagad dai paglingawan na kan kaaldawan kan mga apostol, may nagsabi: “Kun dapit sa sektang ini naaaraman mi na sa gabos na lugar iyan pinaglilibak.” (Gibo 28:22) Igwa daw talaga nin saysay an putik na mga sahot? An Dios an nagpapahayag na matanos sa tunay na mga Kristiano, basado sa saindang pagtubod sa atang ni Cristo. Taano ta mapondo si Jehova sa pagkamoot sa mga nagsasamba sa saiya pakatapos niang itao sa sainda an pinakamahal na regalong ikatatao nia​—an saiya mismong namomotan na marhay na Aki? (1 Juan 4:10) Ngonyan na si Cristo binuhay na liwat hale sa mga gadan asin pinatukaw na sa too nin Dios, aktibo niang dinedependeran an mga Kristiano. Siisay an tamang makakapahimutik sa pagdepensa ni Cristo sa mga parasunod nia o mapangganang makakukuestion sa paborableng paghusgar nin Dios sa mga fiel sa saiya? Mayo!​—Isaias 50:​8, 9; Hebreo 4:​15, 16.

12, 13. (a) Anong mga kamugtakan o sirkunstansia an dai makapasusuhay sa sato sa pagkamoot nin Dios? (b) Ano an katuyohan kan Diablo sa pagtao nin mga kasakitan sa sato? (c) Taano an mga Kristiano ta biyong nanggagana?

¹² Basahon an Roma 8:​35-​37. Apuera sa sato, igwa daw nin siisay man o ano man na makapasusuhay sa sato sa pagkamoot ni Jehova asin kan saiyang Aki, si Cristo Jesus? Puedeng gamiton ni Satanas an saiyang mga kampon sa daga tanganing tawan nin dakol na problema an mga Kristiano. Sa nakaaging siglo, dakol sa satong Kristianong mga tugang na lalaki asin babae an madahas na pinaglamag sa dakol na kadagaan. Sa nagkapirang lugar ngonyan, an mga tugang ta aroaldaw na napapaatubang sa kasakitan sa pagbuhay. An iba namamatean an kolog nin gutom o mayo nin igong gubing. Ano an katuyohan kan Diablo sa pagpangyari kan masakit na mga kamugtakan na ini? Kisuerra sa sarong kabtang, katuyohan nia na desganaron an tunay na pagsamba ki Jehova. Gusto kitang papaniwalaon ni Satanas na luminipot na an pagkamoot nin Dios. Minsan siring, totoo daw iyan?

¹³ Arog ni Pablo, na kinotar an Salmo 44:​22, pinag-adalan ta an nasusurat na Tataramon nin Dios. Nasasabotan ta na dahel sa ngaran nin Dios kaya nangyayari an mga bagay na ini sa sato, na saiyang mga “karnero.” Kalabot an pagkasantipikar kan ngaran nin Dios asin an pagkabindikar kan saiyang unibersal na soberaniya. Huli sa mayor na mga isyung iyan kaya tinogotan nin Dios an mga kasakitan, bakong huli ta dai na nia kita namomotan. Ano man an tibaad makamomondong mga kamugtakan, nakaseseguro kita na an pagkamoot nin Dios sa saiyang  banwaan, kaiba an lambang saro sa sato, dai nagliwat. An ano man na garo baga pagkadaog na tibaad agihan ta maluwas na kapangganahan kun papagdanayon ta an satong integridad. Kita pinakokosog asin sinususteniran kan garantiya na dai mapuputol an pagkamoot nin Dios.

14. Taano ta kombensido si Pablo sa pagkamoot nin Dios sa ibong kan mga kasakitan na puedeng agihan nin mga Kristiano?

¹⁴ Basahon an Roma 8:​38, 39. Ano an nakakombensir ki Pablo na mayo nin ano man na makapasusuhay sa mga Kristiano sa pagkamoot nin Dios? Daing duda na an personal na mga eksperyensia ni Pablo mantang nasa ministeryo nagpasarig kan saiyang kombiksion na an mga kasakitan dai makaaapektar sa pagkamoot nin Dios sa sato. (2 Corinto 11:23-27; Filipos 4:13) Siring man, aram ni Pablo an dapit sa daing sagkod na katuyohan asin nakaaging mga ginibo ni Jehova sa Saiyang banwaan. Madadaog daw kan kagadanan mismo an pagkamoot nin Dios sa mga maimbod na naglingkod sa saiya? Dai nanggad! An siring na mga fiel na nagagadan magpapadagos na buhay sa sangkap na memorya nin Dios, asin bubuhayon nia sinda liwat sa itinalaan na panahon.​—Lucas 20:​37, 38; 1 Corinto 15:22-26.

15, 16. Isaysay an pirang bagay na nungkang makapapopondo sa Dios sa pagkamoot sa saiyang fiel na mga lingkod.

¹⁵ Ano man na remalaso an tibaad itao sa sato kan buhay sa presente​—baga man nakadadanyar na aksidente, ikagagadan na helang, o pagbagsak nin ekonomiya​—daing makakaraot sa pagkamoot nin Dios sa saiyang banwaan. An makapangyarihan na mga anghel, arog kan suwayan na anghel na nagin si Satanas, dai makaiimpluwensia ki Jehova na pumondo sa pagkamoot sa saiyang debotong mga lingkod. (Job 2:3) Tibaad bawalan, ibilanggo, asin maltratohon nin mga gobyerno an mga lingkod nin Dios asin tibaad apodon sinda na “tawong hinahaboan.” (1 Corinto 4:13) An mayo nin marahay na basehan na pagkaongis na iyan kan mga nasyon tibaad makaimpluwensia sa mga tawo na tumangon kita, alagad dai kaiyan pangyayarihon an Soberano kan uniberso na bayaan kita.

¹⁶ Bilang mga Kristiano, dai kita kaipuhan na matakot na an arin man kan inaapod ni Pablo na “mga bagay na yaon na digdi ngonyan”​—an mga pangyayari, kamugtakan, asin situwasyon sa presenteng sistemang ini nin mga bagay​—ni an “mga bagay na madatong pa” sa ngapit puedeng makaraot kan pagkamuya nin Dios sa saiyang banwaan. Minsan ngani kinakalaban kita kan daganon asin langitnon na mga kapangyarihan, yaon an maimbod na pagkamoot nin Dios tanganing sumustenir sa sato. “An kalangkawan ni an kararoman” dai makakaolang sa pagkamoot nin Dios, siring kan idinoon ni Pablo. Iyo, mayo nin tibaad makadesganar sa sato, ni ano man na puedeng makaimpluwensia nin labi sa sato, an makapasusuhay sa sato sa pagkamoot nin Dios; ni an arin man na ibang linalang makakaraot sa relasyon kan Kaglalang sa saiyang fiel na mga lingkod. An pagkamoot nin Dios nungka na nasusudya; iyan daing katapusan.​—1 Corinto 13:8.

Pahalagahan Sagkod Lamang an Mamomoton na Kabootan nin Dios

17. (a) Taano ta “orog karahay kisa buhay” an pagkaigwa kan pagkamoot nin Dios? (b) Paano ta ipinaheheling na pinahahalagahan ta an mamomoton na kabootan nin Dios?

¹⁷ Gurano kahalaga sa saindo an pagkamoot nin Dios? Arog daw ki David an saboot nindo, na nagsurat: “Huli ta an saimong mamomoton na kabootan orog karahay kisa buhay, pag-oomawon ka kan sakuya mismong mga ngabil. Sa siring pag-oomawon taka sa bilog na buhay ko; sa saimong ngaran iiitaas ko an sakong mga palad”? (Salmo 63:​3, 4) Totoo nanggad, igwa daw nin ano man na iinaalok kan  buhay sa kinaban na ini na orog karahay kisa pagkamit kan pagkamoot asin maimbod na pakikikatood nin Dios? Halimbawa, an pag-aaabot daw sa halangkaw an sueldong sekular na karera orog karahay kisa pagkaigwa nin katoninongan nin isip asin kaogmahan na ibinubunga nin dayupot na relasyon sa Dios? (Lucas 12:15) An nagkapirang Kristiano napaatubang sa pagpili na talikdan si Jehova o magadan. Nangyari iyan sa dakol na Saksi ni Jehova sa mga kampo de konsentrasyon kan Nazi durante kan Guerra Mundial II. Apuera sa pipira sana, pinili kan Kristianong mga tugang niato na magdanay sa pagkamoot nin Dios, na andam na magadan kun kaipuhan. An mga maimbod na nagdadanay sa saiyang pagkamoot makakokompiar na akoon hale sa Dios an daing katapusan na ngapit, sarong bagay na dai ikatatao sa sato kan kinaban. (Marcos 8:34-36) Alagad orog pa ngani sa buhay na daing katapusan an kalabot.

18. Taano ta kawiliwiling marhay an buhay na daing katapusan?

¹⁸ Minsan ngani imposibleng mabuhay sagkod lamang kun mayo si Jehova, probaring imahinaron kun magigin anong klase an labi-labi kahalawig na buhay kun mayo an satong Kaglalang. Iyan mayo nin halaga, mayo nin tunay na katuyohan. Tinawan ni Jehova an saiyang banwaan nin nakakokontentong gibohon sa huring mga aldaw na ini. Kaya makatitiwala kita na kun si Jehova, an Dakulang Paramukna, magtao na nin buhay na daing katapusan, iyan magigin pano nin kawiliwili, kapakipakinabang na mga bagay na satong manonodan asin gigibohon. (Eclesiastes 3:11) Gurano man na pagsiyasat an gigibohon niato sa mga milenyong madatong, nungka niatong marororop nin lubos “an rarom kan mga kayamanan asin kadonongan patin kaaraman nin Dios.”​—Roma 11:33.

An Ama May Kapadangatan sa Saindo

19. Anong panhuring pag-asegurar giraray an itinao ni Jesu-Cristo sa saiyang mga disipulo?

¹⁹ Kan Nisan 14, 33 C.E., durante kan saiyang ultimong banggi kaibanan an saiyang 11 fiel na apostol, dakol na sinabi si Jesus tanganing pakosogon sinda para sa mangyayari sa ngapit. Sinda gabos nagdanay sa kaibanan ni Jesus sa saiyang mga kasakitan, asin personal nindang namatean an pagkamoot nia sa sainda. (Lucas 22:​28, 30; Juan 1:16; 13:1) Dangan inasegurar giraray sinda ni Jesus: “An Ama mismo may kapadangatan sa saindo.” (Juan 16:27) An mga tataramon na iyan sierto nanggad na nakatabang sa mga disipulo na masabotan an kapadangatan sa sainda kan saindang langitnon na Ama!

20. Ano an determinado nindong gibohon, asin sa ano kamo makakokompiar?

²⁰ An dakol na buhay pa ngonyan fiel na naglingkod ki Jehova nin dakol na dekada. Daing duda, bago an katapusan kan maraot na sistemang ini nin mga bagay, dakol pang pagbalo an aatubangon niato. Nungkang togotan na dahel sa mga pagbalo o kasakitan na iyan pagdudahan na nindo an maimbod na pagkamoot nin Dios sa saindo. Dai puedeng pasobrahan an katunayan na ini: Si Jehova may kapadangatan sa saindo. (Santiago 5:11) Padagos logod na gibohon kan balang saro sa sato an satong kabtang, na maimbod na sunodon an mga pagboot nin Dios. (Juan 15:8-10) Logod na gamiton niato an lambang oportunidad na omawon an saiyang ngaran. Maninigo tang pakosogon an satong desisyon na padagos na dumayupot ki Jehova sa pamibi asin pag-adal kan saiyang Tataramon. Ano man an nakatagama sa masunod na aldaw, kun ginigibo ta an satong pinakamakakaya na paogmahon si Jehova, kita magdadanay na matoninong, lubos na nagkokompiar sa saiyang dai nasusudyang pagkamoot.​—2 Pedro 3:14.

Ano an Isisimbag Nindo?

• Tanganing mapagdanay an satong espirituwal asin emosyonal na pagkatimbang, nangorognang kaipuhan niato an pagkamoot niisay?

• Anong mga bagay an nungkang makapapopondo ki Jehova sa pagkamoot sa saiyang mga lingkod?

• Taano ta “orog karahay kisa buhay” an pakaeksperyensia kan pagkamoot ni Jehova?

[Mga Hapot Para sa Pag-adal]

[Mga Ritrato sa pahina 13]

Kun nakakamate kita na napapasuhay sa pagkamoot nin Dios, puede tang itanos an mga bagay-bagay

[Ritrato sa pahina 15]

Nasabotan ni Pablo kun taano ta pinaglalamag sia