“Aldaw nin Pagpabaya sa Ibang Relihion”

NAPUKAW an interes sa pakikipag-olay sa mga Saksi ni Jehova, an prinsipala nin sarong eskuelahan sa Polandia nagtalaga nin “Aldaw nin Pagpabaya sa Ibang Relihion” para sa saiyang eskuelahan. Isinuherir nia na mag-andam an boluntaryong mga estudyante​​—mga Katoliko, Budista, asin mga Saksi ni Jehova​​—nin halipot na presentasyon tanganing ipaaram sa mga estudyante an saindang mga paniniwala asin gibohon. Tolong tinedyer na Saksi ni Jehova an tolos-tolos na nagboluntaryo.

Pag-abot kan aldaw na iyan, an enot na nagtaram iyo an 15 anyos na si Malwina. Sa sarong kabtang, sia nagsabi: “Dakol sa saindo an nakakamidbid na samo bago pa kami pumoon na mag-adal sa eskuelahan na ini huli ta nagsosongko kami sa saindong mga harong. Nagngangalas gayod kamo kun taano ta padagos ming ginigibo iyan. Huli iyan sa pagsunod mi sa halimbawa ni Jesu-Cristo, an Kagpundar nin Kristianismo. Ihinulit nia an maogmang bareta kan Kahadean nin Dios saen man may tawo. Ginibo man iyan kan mga apostol asin iba pang enot na Kristiano. Sa dakol na lugar, an mga Saksi ni Jehova nagtatagal nin masakit na mga pagbalo sa pagtubod, alagad maogma kami na sa satong eskuelahan nakakamtan mi an katoninongan, na gabos kamo may kabtang. Nagpapasalamat kami saindo para dian!”

Sa pagtatapos kan saiyang presentasyon, si Malwina nagsabi: “May saro pang rason kun taano ta nagsosongko kami sa saindong harong. May pagmakolog kami sa saindo. An Biblia nagsasabi na dai na mahahaloy an katawohan makaeeksperyensia nin mga pangyayari na makatatanyog sa kinaban. Kaya sa masunod na pagtoktok mi sa saindong pinto, tabi magtao nin panahon na maghinanyog. Boot niamong sabihon sa saindo kun paano kita puedeng mabuhay na sararo sagkod lamang sa sarong paraiso sa daga.”

An sunod na nagtaram iyo si Mateusz, 15 anyos man. Sinabihan ni Mateusz an mga nagdadangog sa saiya na sa nakalihis na mga taon, ginamit kan Mga Saksi ni Jehova an manlaenlaen na paagi tanganing ilakop an maogmang bareta. Halimbawa, kan 1914​—durante kan peryodo nin silensiong mga pelikula​​—ipinadadalan kan mga Saksi an “Photo-Drama of Creation,” sarong pelikula asin presentasyon sa mga slide na may kasabay na tanog.

 Tinokar ni Mateusz an kabtang kan radyo sa pagpalakop kan mensahe nin Kahadean asin dangan isinaysay an daing kaagid na programa sa komputer na multilanguage electronic phototypesetting system (MEPS) na ginibo kan Mga Saksi ni Jehova. Isinaysay man nia kun paano nakatabang an Mga Saksi ni Jehova sa pag-impormar sa mga doktor manongod sa mga pamamaagi sa pagbolong na dai naggagamit nin dugo. “Ngonyan, marahay an sinasabi kan bantog na mga doktor na Polaco dapit sa samong paninindogan asin idinodoon na kada taon nagdadakol an mga pasyente na bakong Saksi na inooperaran na dai minagamit nin dugo,” sabi nia.

Si Mateusz nagtapos sa pagsaysay manongod sa konstruksion nin mga Kingdom Hall asin nagsabi: “Boot daw nindong bisitahon an samong Kingdom Hall? An paglaog daing bayad, asin mayo nin kuartang kinokolekta.” Nagtataram manongod sa convention center sa Sosnowiec, si Mateusz nagsabi: “Maninigo nindong maheling an dakula asin kapakipakinabang na estrukturang ini. Taano ta dai kita magduruman nin iriba? Igwa kaming suhestion, asin an satong katood na si Katarzyna an masabi sa saindo manongod kaiyan.”

Sunod, an 15 anyos na si Katarzyna entusiastikong nagsabi: “Maogma mi kamong inaako na magbisita sa Sosnowiec para sa pandistritong kombension kan Mga Saksi ni Jehova. Totokaron an mga temang may labot sa mga hoben.” Sinambit man ni Katarzyna an mayor na selebrasyon para sa mga Kristiano​—an Memorial kan kagadanan ni Jesu-Cristo. Inenkaminar nia an mga naghihinanyog sa saiya: “Kan nakaaging taon labing 14 milyones katawo an nag-atender sa selebrasyon na iyan sa bilog na kinaban. Taano ta dai kamo umiba sa samo sa masunod?”

Pagkatapos kan presentasyon ninda, irinegalo ni Malwina, Mateusz, asin Katarzyna sa mga paratokdo an librong Jehovah’s Witnesses​​—Proclaimers of God’s Kingdom kaiba an duwang videocassette na tinotokar an mga tinutubod asin aktibidad kan Mga Saksi ni Jehova. * May pag-apresyar na inako iyan kan mga paratokdo asin nangako na gagamiton ninda iyan sa mga klase sa historya.

Sa pagtatapos kan sesyon, tinugtog kan 12 anyos na si Martyna sa gabos na nagkatiripon an awit na may titulong “Nagpapasalamat Kami Saimo, Jehova.” An mga Saksing hoben na ini ‘nagpakapusoan paagi sa saindang Dios’ asin nagtao nin marahayon na pagpatotoo. (1 Tesalonica 2:2) Kanigoan karahay na halimbawa para sa hoben na mga Saksi sa gabos na lugar!

[Nota sa Ibaba]

[Ritrato sa pahina 26]

Si Katarzyna nagpipili nin mga teksto para sa presentasyon

[Ritrato sa pahina 26]

Si Malwina nag-aandam kan presentasyon pirang aldaw bago ipresentar iyan sa eskuelahan