“An Bendisyon ni Jehova—Iyan an Nakapayayaman”

GABOS kita gustong mabendisyonan. An The American Heritage College Dictionary nagsasabi na an mga bendisyon nagpapaoswag nin “kaogmahan, marahay na kamugtakan, o kaginhawahan.” Mantang si Jehova an Paratao nin “lambang marahay na balaog asin lambang sangkap na regalo,” an lambang tunay, nagdadanay na bendisyon naggigikan sa satong mamomoton na Kaglalang. (Santiago 1:17) Abunda niang binebendisyonan an bilog na katawohan, dawa an mga dai nakamimidbid sa saiya. Si Jesus nagsabi manongod sa saiyang Ama: “Pinasisirang nia an saiyang aldaw sa maraot asin sa marahay asin pinapaoranan nia an matanos asin bakong matanos.” (Mateo 5:45) Minsan siring, si Jehova nagpapaheling nin espesyal na pagmakolog sa mga namomoot sa saiya.​—Deuteronomio 28:1-14; Job 1:1; 42:12.

An salmista nagsurat: “Si Jehova mismo dai isasayuma an ano man na marahay sa mga naglalakaw na daing sala.” (Salmo 84:11) Iyo, an mga naglilingkod ki Jehova igwa nin mabungang marhay, makahulogan na buhay. Aram ninda na “an bendisyon ni Jehova​​—iyan an nakapayayaman, asin dai nia iyan dinadagdagan nin kakologan.” An Biblia nagsasabi man: “An mga binebendisyonan [ni Jehova] an magmamana kan daga.” (Talinhaga 10:22; Salmo 37:​22, 29) Kanigoan an magigin bendisyon na iyan!

Paano niato maaako an bendisyon ni Jehova? Sarong bagay, kaipuhan niatong kultibaron an mga kualidad na nakapaoogma sa saiya. (Deuteronomio 30:​16, 19, 20; Miqueas 6:8) Maheheling niato ini sa halimbawa kan tolong lingkod ni Jehova kan suanoy na panahon.

Binebendisyonan ni Jehova an Saiyang mga Lingkod

Si Noe sarong marahayon na lingkod nin Dios. Sa Genesis 6:​8, mababasa niato: “Si Noe nakakua nin biyaya sa mga mata ni Jehova.” Taano? Huli ta si Noe makinuyog. An pagkasaysay nagsasabi: “Si Noe naglakaw sa kaibanan kan tunay na Dios.” Sinuportaran ni Noe an matanos na mga prinsipyo ni Jehova asin sinunod an saiyang mga pagboot. Sa panahon na an kinaban ruminuro pasiring sa kadahasan asin kabikoan, napahiro si Noe na ‘gibohon an segun sa gabos na ipinagboot sa saiya nin Dios. Siring nanggad an ginibo nia.’ (Genesis 6:​9, 22) Bilang resulta, sinabihan sia ni Jehova na magtogdok ‘nin dahong para sa pagligtas kan kasararo sa harong [ni Noe].’ (Hebreo 11:7) Sa paaging ini, si Noe asin an saiyang pamilya​​—patin paagi sa sainda an rasa nin tawo​​—nakaligtas sa pagkalaglag kan henerasyon na iyan. Asin si Noe nagadan na may paglaom na buhayon liwat tanganing magkaigwa kan oportunidad na buhay na daing sagkod sa paraisong daga. Kanigoan kanagsosopay na mga bendisyon an naako nia!

Si Abraham igwa man nin mga kualidad na nakapaogma ki Jehova. An pangenot sa mga ini iyo an pagtubod. (Hebreo 11:8-10) Binayaan ni Abraham an sarong komportableng buhay sa Ur asin sa huri sa Haran huli ta sia igwa nin pagtubod sa panuga ni Jehova na an saiyang banhi madakol asin magigin sarong bendisyon para sa gabos na nasyon. (Genesis 12:​2, 3) Sa ibong nin halawig na mga taon nin pagbalo, an saiyang pagtubod binalosan kan mamundag an saiyang aking si Isaac. Paagi sa saiya, si Abraham nagin an apoon kan pinili nin Dios na nasyon, an Israel, asin sa kahurihurihi kan Mesiyas. (Roma 4:19-21) Dugang pa, sia an “ama kan gabos na igwa nin pagtubod,” asin sia inapod na “katood ni Jehova.” (Roma 4:11; Santiago 2:23; Galacia 3:​7, 29) Kanigoan kamakahulogan an saiyang buhay, asin abaa kaabunda siang binendisyonan!

 Estudyare man an maimbod na tawong si Moises. Lataw sa saiyang mga kualidad an apresasyon nia sa espirituwal na mga bagay. Tinalikdan ni Moises an gabos na kayamanan sa Egipto asin “nagpadagos na marigon na garo baga nakaheheling kan Saro na dai naheheling.” (Hebreo 11:27) Pakalihis nin 40 taon sa Midian, nagbalik sia sa Egipto na gurang na asin uminatubang sa pinakadakulang kapangyarihan kan panahon na idto, si Faraon, tanganing hagadon an katalingkasan kan saiyang mga tugang. (Exodo 7:1-7) Naheling nia an sampulong damat, an pagbanga kan Dagat na Pula, asin an paglaglag sa mga hukbo ni Faraon. Ginamit sia ni Jehova tanganing itao an Ley sa Israel asin mangoltanan sa Saiyang pakipagtipan sa bagong nasyon. Sa laog nin 40 taon, pinangenotan ni Moises an nasyon kan Israel sa kaawagan. An saiyang buhay igwa nin tunay na katuyohan, asin nakamtan nia an makangangalas na nagsosopay na mga bendisyon sa paglilingkod.

Mga Bendisyon sa Presenteng Panahon

Pinatutunayan kan mga kasaysayan na ini na an buhay kan mga naglilingkod sa Dios totoong makahulogan nanggad. Mantang pinatatalubo kan banwaan ni Jehova an mga kualidad na arog kan pagkuyog, pagtubod, asin pag-apresyar sa espirituwal na mga bagay, binebendisyonan sinda nin igo.

Paano kita binebendisyonan? Bueno, mantang minilyon sa Kakristianohan an nag-aagi nin espirituwal na gutom, kita “mag-oogma huli sa karahayan ni Jehova.” (Jeremias 31:12) Paagi ki Jesu-Cristo asin sa “fiel asin may diskresion na oripon,” si Jehova nagtagama nin abundang suplay nin espirituwal  na kakanon na nagtatabang sa sato na magdanay sa “dalan na pasiring sa buhay.” (Mateo 7:​13, 14; 24:45; Juan 17:3) An pakikiasosyar sa satong Kristianong kasararoan nin magturugang saro pang nagsosopay na bendisyon. Sa mga pagtiripon asin sa iba pang mga okasyon, an makaibanan an kapwa mga parasamba na nagpapaheling nin pagkamoot asin maigot na naghihingoang isolog an “bagong personalidad” saro nang gikanan nin dakulaon na kaogmahan. (Colosas 3:8-10; Salmo 133:1) Minsan siring, an pinakadakula niatong bendisyon iyo an mahalagang marhay na pribilehio nin pagkaigwa nin personal na relasyon ki Jehova Dios asin an pagsunod sa mga lakad kan saiyang Aki, si Cristo Jesus.​—Roma 5:​1, 8; Filipos 3:8.

Sa paghorophorop sa siring na mga bendisyon, marerealisar niato kun gurano man nanggad kahalagang marhay kan satong paglilingkod sa Dios. Tibaad nasa isip niato an parabola ni Jesus manongod sa nagbibiaheng negosyante na naghahanap nin de kalidad na mga perlas. Si Jesus nagsabi manongod sa tawong ini: “Kan sia makakua nin sarong perlas na dakulaon an halaga, napaduman sia asin ipinabakal tolos an gabos niang sadiri patin binakal iyan.” (Mateo 13:46) Daing duwa-duwa na iyan an namamatean niato manongod sa satong relasyon sa Dios, sa satong pribilehio nin paglilingkod sa saiya, sa satong Kristianong pakikiasosyar, sa satong Kristianong paglaom, asin sa gabos na iba pang bendisyon na konektado sa satong pagtubod. Mayo na nin iba pang mas mahalagang marhay sa satong buhay.

Magtao ki Jehova

Huling rinerekonoser niato na si Jehova an Paratao nin lambang marahay na regalo, an satong puso napahihiro na ipaheling an pag-apresyar sa mga bendisyon na naaako niato. Paano niato magigibo iyan? An sarong paagi iyo an pagtabang sa iba na makamtan an kaparehong mga bendisyon na  ini. (Mateo 28:19) Sa labing 230 nasyon, an Mga Saksi ni Jehova sibot sa pagdalaw sa saindang kataraed tanganing gibohon mismo iyan. Mantang ginigibo ninda iyan, ginagamit ninda an saindang limitadong personal na mga rekurso​—panahon, kosog, asin materyal na mga rogaring​​—tanganing tabangan an iba na “makaabot sa tamang kaaraman sa katotoohan.”​—1 Timoteo 2:4.

Estudyare an mga payunir na nag-iistar sa Glendale, California, E.U.A. Kada Sabadong aga, nagbibiahe sinda nin mga 100 kilometros ida y buelta tanganing dalawon an sarong pederal na presohan. Dawa ngani pira sanang oras an nagagamit ninda kada pagdalaw sa mga preso, dai nanluluya an saindang boot. An saro sa sainda nagsasabi: “Nakakokontentong marhay an paglilingkod sa pambihirang teritoryong ini. Ginigibo mi iyan na may dakulang kagayagayahan. Kadakol kan interesado kaya depisil na maasikaso iyan. Sa presente, inaadalan mi an limang tawo, asin apat pa an naghagad nin pag-adal sa Biblia.”

An maigot na Kristianong mga ministro naoogmang ialok an saindang paglilingkod na daing bayad tanganing gibohon an nagliligtas-buhay na trabahong ini. Ipinababanaag ninda an aktitud ni Jesus, na nagsabi: “Inako nindong daing bayad, itao man nindong daing bayad.” (Mateo 10:8) Minilyon sa bilog na kinaban an nagsasagibo kan kaparehong paglilingkod na daing kaimotan, asin bilang resulta, kadakol na sadiosan an puso an naghihimate asin nagigin mga disipulo. Sa nakaaging limang taon sana, haros 1.7 milyones an nagdusay kan saindang buhay ki Jehova. An pag-asikaso sa mga pangangaipo kan nagpapadagos na paghiwas na ini naghahagad nin pagprodusir nin mga Biblia asin basado sa Bibliang mga publikasyon siring man kan pagtogdok nin bagong mga Kingdom Hall asin iba pang lugar nin pagtiripon. Saen hale an kuartang masuplay kan mga pangangaipong ini? Enterong hale sa boluntaryong mga donasyon.

Huli sa maluyang kamugtakan sa ekonomiya sa nagkapirang parte kan kinaban, dakol an nasasakitan na itao an pangenot na mga pangangaipo sa buhay kan saindang mga pamilya. Segun sa magasin na New Scientist, ginagamit sa kakanon kan sarong bilyon na tawo an kisuerra 70 porsiento kan entrada kan saindang pamilya. Dakol sa satong Kristianong mga tugang na lalaki asin babae an yaon sa siring na situwasyon. Kun dai tatabangan kan mga kapagtubod, talagang dai ninda kayang magkaigwa kan mga bagay na arog kan Kristianong mga publikasyon o presentableng mga Kingdom Hall.

Siempre, dai man iyan nangangahulogan na an mga siring kontento nang ipapasan sa iba an saindang pasan. Alagad kaipuhan ninda an tabang. Si Moises, kan ineenkaminar an mga Israelita na magtao nin materyal na mga donasyon bilang paagi nin pagpasalamat ki Jehova sa naaako nindang mga bendisyon, nagsabi: “An regalo kan kamot nin lambang saro maninigong magin kasokol kan bendisyon ni Jehova na saimong Dios na itinao nia sa saimo.” (Deuteronomio 16:17) Huli kaini, kan naheling ni Jesus an sarong balo na nagkontribwir nin “duwang saradit na sinsilyo na kadikiton an halaga” sa templo, inomaw nia sia sa saiyang mga disipulo. Ginibo nia kun ano an makakaya nia. (Lucas 21:​2, 3) Kaagid kaiyan, an mga Kristiano sa mas dukhang mga kamugtakan naggigibo kun ano an makakaya ninda. Asin kun kulang, mahihipnoan iyan kan mga kontribusyon hale sa mga kapwa Kristiano na bako man na gayong dukha sa materyal.​—2 Corinto 8:13-15.

Kun kita nagtatao sa Dios bilang balos sa siring na paagi, importante na igwa kita nin tamang motibo. (2 Corinto 8:12) Si Pablo nagsabi: “Gumibo an lambang saro nin oyon sa napagdesisyonan nia sa saiyang puso, bakong sa maraot na boot o sa kapiritan, huli ta an Dios namomoot sa maogmang paratao.” (2 Corinto 9:7) Paagi sa sueltong pagtatao na hale sa puso, sinusuportaran niato an teokratikong pagpahiwas na nangyayari na ngonyan sagkod dinudugangan an sato mismong kagayagayahan.​—Gibo 20:35.

An pakikikabtang sa gibohon na paghuhulit asin pagtao nin boluntaryong mga kontribusyon an duwang paagi na makapagtatao kita ki Jehova bilang balos sa mga bendisyon na itinatao nia sa sato. Asin kanigoan kanakaparirigon sa boot na maaraman na mawot ni Jehova na itao an saiyang bendisyon sa dakol pang sinserong tawo, na sa presente tibaad dai sia midbid! (2 Pedro 3:9) Kun siring, padagos niatong gamiton an satong mga rekurso sa paglilingkod sa Dios tanganing manompongan an mga sadiosan an puso asin tabangan sinda na mapatalubo an mga kualidad na arog kan pagkuyog, pagtubod, asin pag-apresyar. Paagi kaiyan, kakamtan ta an kagayagayahan nin pagtabang sa sainda na ‘namitan asin helingon na si Jehova marahay.’​—Salmo 34:8.

[Kahon sa pahina 28, 29]

Mga Paaging Pinipili nin Iba sa Pagtao nin

MGA KONTRIBUSYON SA PAMBILOG NA KINABAN NA GIBOHON

An dakol nagtatagama, o nagbabadyet, nin kantidad na ibinubugtak ninda sa mga kahon nin kontribusyon na may nakasurat na “Contributions for the Worldwide Work​​—Matthew 24:14.”

Kada bulan ipinadadara kan mga kongregasyon an kantidad na ini magsalang sa pankinaban na opisina prinsipal sa Brooklyn, Nueva York, o sa lokal na sangang opisina. An boluntad na mga donasyon na kuarta puede man na direktang ipadara sa Treasurer’s Office, Watch Tower Bible and Tract Society of the Philippines, P.O. Box 2044, 1060 Manila, o sa sangang opisina na naglilingkod sa saindong nasyon. An mga alahas o iba pang mahalagang bagay puede man na idonar. An sarong halipot na surat na nagsasabing iyan sarong direktang regalo maninigong iiba sa mga kontribusyon na ini.

AREGLO SA KONDISYONAL NA DONASYON

An kuarta puedeng idonar paagi sa sarong espesyal na areglo na dian, kun magkaigwa nin personal na pangangaipo an nagdonar, an donasyon ibabalik sa saiya. Para sa dugang na impormasyon, makikomunikar tabi sa Treasurer’s Office sa adres na sinabi sa enotan.

PAGPLANO PARA SA PAG-ABULOY

Apuera sa direktang mga regalo na kuarta asin kondisyonal na mga donasyon na kuarta, igwa nin iba pang mga paagi nin pagtao para sa kapakinabangan kan paglilingkod sa Kahadean sa bilog na kinaban. Kabale digdi an:

Seguro: An Watch Tower Society puedeng gibohon na benepisyaryo nin polisa sa seguro sa buhay o nin plano sa pagretiro/pension.

Mga Deposito sa Bangko: An mga deposito sa bangko, sertipiko nin deposito, o indibiduwal na deposito sa pagretiro puedeng ipagkatiwala sa o bayadan sa Watch Tower Society pagkagadan kan nagdeposito, kaoyon sa lokal na mga kahagadan sa bangko.

Aksiones Asin mga Bono: An aksiones asin mga bono puedeng idonar sa Watch Tower Society bilang direktang regalo.

Daga Asin Harong: An ikapapabakal na daga asin harong puedeng idonar sa Watch Tower Society magsalang paagi sa pagtao nin direktang regalo o paagi sa pagreserba sa nagdonar nin propiedad sagkod na nabubuhay, na puedeng magpadagos na mag-istar dian sagkod na sia nabubuhay. Paaramon an sangang opisina sa saindong nasyon bago ibalyo an ano man na daga asin harong.

Mga Testamento Asin Kabuhayan na Ipinagkatiwala: An propiedad o kuarta puedeng ipamana sa Watch Tower Society paagi sa sarong testamento na ginibo sa legal na paagi, o an Watch Tower Society puedeng gibohon na benepisyaryo nin sarong kontrata sa kabuhayan na ipinagkatiwala. An kabuhayan na ipinagkatiwala na an nakikinabang sarong relihiosong organisasyon puedeng magtao nin nagkapirang bentaha sa pagbuhis.

Siring sa ipinaririsa kan terminong “pagplano para sa pag-abuloy,” an klaseng ini nin mga donasyon natural sanang nagkakaipo nin pagplano kan nagdonar. Tanganing tabangan an mga indibiduwal na gustong pakinabangon an pambilog na kinaban na gibohon kan Mga Saksi ni Jehova paagi sa sarong klase nin pagplano para sa pag-abuloy, an Sosyedad nag-andam nin sarong brosyur sa Ingles asin Kastila na may titulong Charitable Planning to Benefit Kingdom Service Worldwide. Isinurat an brosyur bilang simbag sa dakol na hapot na naresibi mapadapit sa mga regalo, testamento, asin kabuhayan na ipinagkatiwala. Igwa man iyan nin dagdag na makakatabang na impormasyon sa pagplano manongod sa daga, pinansial, asin buhis. Asin dinisenyo iyan tanganing tabangan an mga taga Estados Unidos na nagpaplanong magtao nin espesyal na regalo ngonyan o magwalat nin pamana pagkagadan sa pagpili kan pinakamarahay asin episienteng paagi na kinokonsiderar an saindang pampamilya asin personal na mga kamugtakan. Puedeng makakua kan brosyur na ini paagi sa direktang paghagad nin kopya sa Sangang Opisina kan Mga Saksi ni Jehova.

Pakatapos na mabasa an brosyur asin magkonsulta sa Sangang Opisina kan Mga Saksi ni Jehova, dakol an nakatabang sa mga Saksi ni Jehova sa bilog na kinaban asin kadungan kaiyan, ginagamit sa pinakalubos na paagi an mga benepisyo sa buhis huli sa paggibo kaiyan. An Sangang Opisina kan Mga Saksi ni Jehova maninigong paaramon kan asin makaresibi nin kopya nin ano man na may koneksion na dokumento dapit sa arin man kan mga areglong ini. Kun kamo interesado sa arin man sa mga areglong ini sa pagplano para sa pag-abuloy, maninigo nindong paaramon an Sangang Opisina kan Mga Saksi ni Jehova, magsalang paagi sa pagsurat o telepono, sa adres na nakalista sa ibaba o sa opisina kan Mga Saksi ni Jehova na naglilingkod sa saindong nasyon.

SANGANG OPISINA KAN MGA SAKSI NI JEHOVA

Watch Tower

186 Roosevelt Avenue

San Francisco del Monte

1105 Quezon City

Telepono: (02) 411-6090