Kaipuhan Nindo an Pinatood na Konsensia

Iyan nagbabanaag nin sarong dai malilingawan na aldaw para sa mga pasahero asin tripulante kan Air New Zealand Flight 901 pasiring sa Antartika. Andam na an mga kamera, asin nangingibabaw an magayagayang kamugtakan mantang an DC-10 nagdadangadang na sa puting kontinente para sa kahangahangang tanawon na maheheling sa hababang paglayog kan eroplano.

AN KAPITAN, sarong piloto sa laog na nin 15 taon, nakatipon na nin 11,000 na oras nin pagpalupad nin eroplano. Bago maglayog, maingat na ilinaog nia sa komputer kan eroplano an plano sa pagbiahe, na dai nag-aaram na sala an coordinates na itinao sa saiya. Naglalayog sa sarong panganoron sa langkaw na dai ngani nin 600 metros, an DC-10 buminangga sa ibabang bakilid kan Bukid nin Erebus, na guminadan sa gabos na 257 nakasakay.

Kun paanong an mga eroplano ngonyan nagsasarig sa mga komputer tanganing giyahan sinda sa kaitaasan, an mga tawo tinawan nin konsensia tanganing giyahan sinda sa saindang dalan nin buhay. Asin an grabeng trahedya sa Flight 901 puedeng magtokdo sa sato nin mapuersang mga leksion manongod sa satong konsensia. Halimbawa, sa kaparehong paagi na an pagigin ligtas kan biahe nin eroplano nakadepende sa tama an pagpunsionar na sistema sa nabigasyon asin eksaktong mga giya, an satong espirituwal, moral, asin pisikal pa ngani na ikararahay nakadepende man sa sarong naghihimateng konsensia na ginigiyahan nin tamang moral na mga giya.

Makamomondo, sa kinaban ngonyan, marikas na nawawara o dai iniintindi an siring na mga giya. “Dakol kitang nadadangog ngonyan na si Nonoy dai tataong bumasa, dai sia tataong sumurat, asin nadedepisilan siang makua an Pransia sa mapa,” sabi kan sarong Amerikanong edukador. “Totoo man na si Nonoy nadedepisilan na mamidbid an kalaenan kan tama sa sala. Kabale sa dai pakabasa asin pakasurat saka pagigin dai tataong magkuenta, dapat na idugang ta sa kadakoldakol na problema sa edukasyon an grabeng karibarawan sa moral.” Sinambit man nia na “an mga hoben ngonyan nabubuhay sa malibog na moral. Hapota an saro sa sainda kun baga may mga bagay na ‘tama asin sala,’ asin bigla kamong mapapaatubang sa sarong nariribaraw, dai makagirong, ninenerbios, asin nahahadit na indibiduwal. . . . An pagkaribaraw na ini naggagrabe imbes na magrahay sa oras na magkolehio na sinda.”

An sarong dahelan kan pagkaribaraw na ini iyo an moral na relatibismo, sarong lakop na punto de vista na an mga pamantayan nagkakalaenlaen segun sa personal o kultural na mga gusto. Imahinara an mangyayari kun an mga piloto magnanabigar, bakong paagi sa itinalaan na mga giya, kundi paagi sa naggigiyang mga senyal na naghihiro nin daing kasiertohan asin kun beses enterong nawawara pa! Daing duda na an grabeng mga kapahamakan na arog kan nangyari sa Bukid nin Erebus magigin ordinaryo na sana. Kaagid kaiyan, huling binayaan an itinalaan na mga pamantayan sa moral, inaani kan kinaban an makamomondo asin naglalakop na kasakitan asin kagadanan mantang an mga pamilya nagkakabaranga huli sa pagtraydor asin minilyon an nagdudusa huli sa AIDS o iba pang mga helang na ikinaoolakit paagi sa pagdodorog.

An moral na relatibismo tibaad garo pagigin eksperyensiado sa kinaban, alagad an totoo an mga parasunod kaiyan kapareho kan suanoy na mga taga Ninive na dai nakaaaram kan “saindang toong kamot sa saindang wala.” An mga nagsasagibo nin moral na relatibismo kapareho kan apostatang mga Israelita na nagsasabing “an marahay maraot asin an maraot marahay.”​—Jonas 4:11; Isaias 5:20.

Kaya saen kita puedeng dumolok para sa malinaw, bakong malibog na mga ley asin prinsipyo na mapatood sa satong konsensia na magin seguradong giya? Nanompongan nin minilyon na an Biblia an eksaktong makapaninigo sa pangangaipong  iyan. Poon sa moralidad sagkod sa tamang ugale sa trabaho asin poon sa pagpatood sa mga aki sagkod sa pagsamba sa Dios, an Biblia daing linalaktawan na importante. (2 Timoteo 3:16) Napatunayan na iyan biyong masasarigan sa nag-aging mga siglo. Huling an mga pamantayan sa moral kan Biblia inestablisar kan mismong pinakahalangkaw na autoridad, an satong Kaglalang, iyan may halaga para sa gabos na tawo. Huli kaini, mayo kitang rason na mamuhay na dai naaaraman kun ano an tama asin sala.

Minsan siring, ngonyan na mga aldaw an saindong konsensia sinasalakay nin orog kisa kasuarin man kaidto. Paano iyan posible? Asin paano nindo maiingatan an saindong konsensia? An madonong na gibohon iyo na aramon an ginigikanan kan pananalakay asin an saiyang mga taktika. Totokaron an mga ini sa masunod na artikulo.