Hula ni Isaias—Liwanag Para sa Bilog na Katawohan I

Kasumpay kan Kapitulo Dies: An Panugang Sarong Prinsipe nin Katoninongan

An “Dakulang Liwanag”

17. Paano suminirang an sarong “dakulang liwanag” sa Galilea?

¹⁷ Pero, kumusta man an pagsambit ni Mateo dapit sa sarong “dakulang liwanag” sa Galilea? Kotasyon man ini sa hula ni Isaias. Si Isaias nagsurat: “An banwaan na naglalakaw sa kadikloman nakaheling nin dakulang liwanag. Kun manongod sa mga nag-eerok sa daga nin kadikloman, an liwanag mismo suminirang sa sainda.” (Isaias 9:2) Pag-abot kan enot na siglo C.E., itinago kan paganong mga kaputikan an liwanag kan katotoohan. Pinadakula pa kan Judiong mga namomoon sa relihion an problema paagi sa pangangapot sa saindang relihiosong tradisyon na paagi kaiyan “hinalean [ninda] nin halaga an tataramon nin Dios.” (Mateo 15:6) An mga mapakumbaba inapi asin naribaraw, na nagsusunod sa “butang mga parakabit.” (Mateo 23:2-4, 16) Kan si Jesus na Mesiyas lumataw, an mga mata kan dakol na mapakumbabang tawo nabukasan sa makangangalas na paagi. (Juan 1:​9, 12) An gibohon ni Jesus kan yaon pa digdi sa daga asin an mga bendisyon na ibinunga kan saiyang atang angay na ilinaladawan sa hula ni Isaias bilang sarong “dakulang liwanag.”​—Juan 8:12.

18, 19. Anong dahelan para sa dakulang paggayagaya an yaon sa mga naghimate sa liwanag?

¹⁸ An mga naghimate sa liwanag may dakulang dahelan na maggayagaya. Sinabi pa ni Isaias: “Pinadakol mo an mga tawo sa nasyon; pinadakula mo an paggayagaya para kaiyan. Sinda naggayagaya sa atubangan mo arog kan paggayagaya sa tig-anihan, arog kan mga magayagaya kun nagbabaranga sinda nin sinamsaman.” (Isaias 9:3) Bilang resulta kan paghuhulit ni Jesus asin kan saiyang mga parasunod, an mga sadiosan an puso ruminuluwas, na ipinaheheling ninda na sinda nagmamawot na sumamba ki Jehova sa espiritu asin katotoohan. (Juan 4:24) Mayo pang apat na taon, maogmang inako nin kaburunyogan an Kristianismo. Tolong ribo an nabautismohan kan aldaw nin Pentecostes 33 C.E. Dai nahaloy pakatapos kaiyan, “an kabilangan kan mga lalaki nagin mga limang ribo.” (Gibo 2:41; 4:4) Mantang maigot na ipinababanaag kan mga disipulo an liwanag, “an kabilangan kan mga disipulo padagos na nagdakol na marhay sa Jerusalem; asin an dakulang kadaklan nin mga saserdote nagpoon na magin makinuyog sa pagtubod.”​—Gibo 6:7.

¹⁹ Kapareho kan mga naggagayagaya sa abundang ani o mga naoogmang marhay sa pagbaranga nin mahalagang sinamsaman pakatapos nin sarong dakulang militar na kapangganahan, an mga parasunod ni Jesus naggagayagaya huli sa pagdakol. (Gibo 2:​46, 47) Pag-abot nin panahon, pinasirang ni Jehova an liwanag sa tahaw kan mga nasyon. (Gibo 14:27) Kaya naggagayagaya an mga tawo kan gabos na rasa na nabukasan para sa sainda an paagi na makadolok ki Jehova.​—Gibo 13:48.

“Arog kan Aldaw nin Midian”

20. (a) Sa anong mga paagi nagin kaiwal kan Israel an mga Midianita, asin paano tinapos ni Jehova an panhuhuma ninda? (b) Paano tataposon ni Jesus sa ngapit na “aldaw nin Midian” an panhuhuma kan mga kaiwal kan banwaan nin Dios?

²⁰ Permanente an mga epekto kan aktibidad kan Mesiyas, siring kan maheheling niato sa sunod na mga tataramon ni Isaias: “An sakal kan saindang pasan asin an sogkod na nasa saindang mga abaga, an baston kan puersahan na nagpapatrabaho sa sainda, saimong linaglag arog kan aldaw nin Midian.” (Isaias 9:4) Dakol na siglo bago kan kaaldawan ni Isaias, an mga Midianita nakipagkasapakat sa mga Moabita tanganing akiton na magkasala an mga Israelita. (Bilang 25:1-9, 14-18; 31:​15, 16) Paghaloyhaloy, pinatakot kan mga Midianita an mga Israelita paagi sa pananakyada asin pananalakat sa saindang mga baryo asin oma sa laog nin pitong taon. (Hokom 6:1-6) Alagad ta biyong dinaog ni Jehova, paagi sa saiyang lingkod na si Gedeon, an mga hukbo kan Midian. Pakatapos “kan aldaw [na iyan] nin Midian,” mayo nin prueba na an banwaan ni Jehova nagdusa pa giraray sa kamot kan mga Midianita. (Hokom 6:7-16; 8:28) Sa harani nang ngapit, tataposon ni Jesu-Cristo, an orog na dakulang Gedeon, an mga kaiwal sa presenteng aldaw kan banwaan ni Jehova. (Kapahayagan 17:14; 19:11-21) Dangan, “arog kan aldaw nin Midian,” makakamtan an sarong biyo asin nagdadanay na kapangganahan, bakong paagi sa tibay nin tawo, kundi paagi sa kapangyarihan ni Jehova. (Hokom 7:2-22) An banwaan nin Dios nungka nang madusa liwat huli sa sakal nin pan-aapi!

21. Ano an sinasabi kan hula ni Isaias mapadapit sa ngapit nin guerra?

²¹ An mga pagpaheling nin kapangyarihan nin Dios bakong pagpamuraway sa guerra. An binuhay liwat na si Jesus an Prinsipe nin Katoninongan, asin paagi sa pagpoho  kan saiyang mga kaiwal, iiintrodusir nia an daing sagkod na katoninongan. Si Isaias nagtataram ngonyan manongod sa mga garamiton na panmilitar na biyong linalaglag paagi sa kalayo: “An lambang bota kan naglalakaw na may mga kunog-kunog asin an alikboy na pinaligid sa dugo nagin ngani para sa pagsolo bilang pangatong sa kalayo.” (Isaias 9:5) An mga pagkunogkunog dahelan sa pagtamak kan mga bota nin nagmamartsang mga soldados dai na noarin man mamamatean liwat. Dai nang maheheling na madugong mga uniporme nin mga guerrero na buminangis sa pakikilaban. An guerra mawawara na!​—Salmo 46:9.

“Makangangalas na Parahatol”

22. Anong dakol na makahulang ngaran an itinao ki Jesus sa libro nin Isaias?

²² Sa panahon kan saiyang milagrosong pagkamundag, an saro na ipinangaki na magigin Mesiyas nag-ako kan ngaran na Jesus, na nangangahulogan “Si Jehova Kaligtasan.” Alagad may iba pa siang mga ngaran, makahulang mga ngaran na nagsasabi kan saiyang mayor na katongdan asin kan saiyang halangkaw na posisyon. An saro sa siring na ngaran iyo an Emmanuel, na nangangahulogan “Nasa Sato an Dios.” (Isaias 7:​14, nota sa ibaba) Sinasabi ngonyan ni Isaias an saro pang makahulang ngaran: “Namundag sa sato an sarong aki, may itinao sa sato na sarong aking lalaki; asin an sa-prinsipeng pamamahala mamumugtak sa saiyang abaga. Asin an saiyang ngaran aapodon na Makangangalas na Parahatol, Makakamhan na Dios, Amang Daing Sagkod, Prinsipe nin Katoninongan.” (Isaias 9:6) Estudyare an bilog na kahulogan kan dakol na makahulang ngaran na ini.

23, 24. (a) Sa anong paagi na si Jesus sarong “Makangangalas na Parahatol”? (b) Paano maaarog nin Kristianong mga parahatol ngonyan an halimbawa ni Jesus?

²³ An parahatol saro na nagtatao nin hatol, o sadol. Kan uya digdi sa daga si Jesu-Cristo nagtao nin makangangalas na hatol. Mababasa niato sa Biblia na “an mga kadaklan napangalas nin makuri sa saiyang paagi nin pagtotokdo.” (Mateo 7:28) Sia madonong asin may pakikidamay na Parahatol, na igwa nin ekstraordinaryong pakasabot sa naturalesa nin tawo. An saiyang hatol bakong puro pagsagwe o pagkastigo. Mas parate, iyan paagi sa pagtotokdo asin mamomoton na sadol. An hatol ni Jesus makangangalas huli ta iyan pirmeng madonong, sangkap, asin dai nasasala. Kun susunodon, iyan nagbubunga nin buhay na daing katapusan.​—Juan 6:68.

²⁴ An hatol ni Jesus bako sanang bunga kan saiyang matibayon na isip. Imbes, sinasabi nia: “An sakong itinotokdo bako ko, kundi kaidtong nagsugo sa sako.” (Juan 7:16) Arog kaidto ki Salomon, si Jehova Dios an Gikanan kan kadonongan ni Jesus. (1 Hade 3:7-14; Mateo 12:42) An halimbawa ni Jesus maninigong magmotibar sa mga paratokdo asin parahatol sa Kristianong kongregasyon na pirmeng ibasar sa Tataramon nin Dios an saindang pagtotokdo.​—Talinhaga 21:30.

“Makakamhan na Dios” Asin“Amang Daing Sagkod”

25. Ano an sinasabi sa sato kan ngaran na “Makakamhan na Dios” manongod sa langitnon na si Jesus?

²⁵ Si Jesus “Makakamhan na Dios” asin “Amang Daing Sagkod” man. Dai ini nangangahulogan na inaagaw nia an autoridad asin posisyon ni Jehova, na iyo an “Dios na satong Ama.” (2 Corinto 1:2) “Sia [si Jesus] . . . dai nag-isip na man-agaw, an boot sabihon, na sia makapantay sa Dios.” (Filipos 2:6) Sia inaapod na Makakamhan na Dios, bakong Makakamhan sa gabos na Dios. Nungkang inisip ni Jesus na sia an Dios na Makakamhan sa gabos, huli ta sia nagtaram manongod sa saiyang Ama bilang “iyo sanang tunay na Dios,” an boot sabihon, an iyo sanang Dios na maninigong sambahon. (Juan 17:3; Kapahayagan 4:11) Sa Kasuratan, an terminong “dios” puedeng mangahulogan nin “makapangyarihan na saro” o “makosog na saro.” (Exodo 12:12; Salmo 8:5; 2 Corinto 4:4) Bago si Jesus nagdigdi sa daga, sia “sarong dios,” “kabaing nin Dios.” Pagkabuhay nia liwat, sia nagbalik sa mas halangkaw pa nganing posisyon sa kalangitan. (Juan 1:1; Filipos 2:6-11) Dugang pa, an titulong “dios” igwa nin dugang pang kahulogan. An mga hokom sa Israel inapod na “mga dios”​—sarong beses iyan an apod ni Jesus mismo. (Salmo 82:6; Juan 10:35) Si Jesus iyo an Hokom na nombrado ni Jehova, na “nakatalagang maghokom sa mga buhay asin sa mga gadan.” (2 Timoteo 4:1; Juan 5:30) Malinaw nanggad, tama sanang apodon siang Makakamhan na Dios.

26. Taano si Jesus ta maaapod na “Amang Daing Sagkod”?

²⁶ An titulo na “Amang Daing Sagkod” nanonongod sa kapangyarihan asin autoridad kan Mesiyanikong Hade na magtao sa mga tawo kan paglaom na mabuhay na daing sagkod digdi sa daga. (Juan 11:​25, 26) Kagadanan an pamana kan satong enot na magurang, si Adan. Si Jesus, an huring Adan, “nagin espiritung nagtatao nin buhay.” (1 Corinto 15:​22, 45; Roma 5:​12, 18) Kun paanong si Jesus, an Amang Daing Sagkod, mabubuhay sagkod lamang, an makinuyog na katawohan daing sagkod na magkakamit man kan mga pakinabang kan saiyang pagkaama.​—Roma 6:9.

“Prinsipe nin Katoninongan”

27, 28. Anong makangangalas na mga pakinabang an yaon na ngonyan asin sa ngapit pa para sa mga sakop kan “Prinsipe nin Katoninongan”?

²⁷ Apuera sa buhay na daing katapusan, kaipuhan man nin tawo an katoninongan, sa Dios sagkod sa saiyang kapwa tawo. Dawa ngonyan, an mga nagpapasakop sa pamamahala kan “Prinsipe nin Katoninongan” ‘pinulpog na an saindang mga espada na magin tarom nin arado asin an saindang mga budyak na magin mga gunting  na pan-awan.’ (Isaias 2:2-4) Dai sinda nagtatanom sa boot nin pagkaongis huli sa mga pagkakalaen sa politika, teritoryo, rasa, o pagbuhay. Nagkakasararo sinda sa pagsamba sa iyo sanang tunay na Dios, si Jehova, asin sinda nagmamaigot na papagdanayon an matoninong na relasyon sa saindang kapwa, sa laog sagkod luwas kan kongregasyon.​—Galacia 6:10; Efeso 4:​2, 3; 2 Timoteo 2:24.

²⁸ Sa itinalaan na panahon nin Dios, eestablisaron ni Cristo digdi sa daga an katoninongan na magigin lakop sa globo, marigon, permanente. (Gibo 1:7) “An kadakolan kan sa-prinsipeng pamamahala asin an katoninongan magigin daing kasagkodan, sa trono ni David asin sa saiyang kahadean tanganing iyan marigon na patindogon asin tanganing susteniran iyan paagi sa hustisya asin paagi sa katanosan, poon ngonyan asin sagkod sa panahon na daing talaan.” (Isaias 9:7a) Sa pagkapot kan saiyang autoridad bilang an Prinsipe nin Katoninongan, si Jesus dai magamit nin maringis na mga pamamaagi. An saiyang mga sakop dai hahalean nin libreng kabotan asin sasakopon nin puersahan. Imbes, an gabos na gigibohon nia magigin “paagi sa hustisya asin paagi sa katanosan.” Kanigoan kanakagiginhawang pagbabago!

29. Ano an maninigo niatong gibohon kun mawot niatong makamtan an bendisyon na daing katapusan na katoninongan?

²⁹ Huli sa makangangalas na mga kahulogan kan makahulang ngaran ni Jesus, an konklusyon ni Isaias sa kabtang na ini kan saiyang hula nakapupukaw nanggad sa boot. Sia nagsurat: “An mismong kaigotan ni Jehova nin mga hukbo an magibo kaini.” (Isaias 9:7b) Iyo, si Jehova naghihiro na may kaigotan. Mayo siang ginigibo sa daing kaganaganang paagi. Makasesegurado kita na ano man an saiyang ipinanunuga, ootobon nia nin biyo. Kun siring, kun an siisay man nagmamawot na makamtan an daing katapusan na katoninongan, maglingkod sia ki Jehova nin bilog na puso. Arog ni Jehova Dios asin ni Jesus, an Prinsipe nin Katoninongan, an gabos logod na lingkod nin Dios magin “maigot sa marahay na mga gibo.”​—Tito 2:14.

[Mga Hapot Para sa Pag-adal]