Mga Pararaot nin mga Poon nin Kahoy

KAIDTONG mga panahon kan Biblia, an mga poon nin kahoy ibinibilang na mahalagang mga produktong ipinagnenegosyo. Halimbawa, kan si Abraham nagbakal nin lugar na lolobongan kan saiyang namomotan na agom, si Sara, an mga poon nin kahoy nasa lista kan kontrata para sa pagbago sa kagsadiri kan propiedad.​—Genesis 23:15-18.

Siring man ngonyan, an mga poon nin kahoy pinahahalagahan na marhay, asin ikinokonsentrar an dakulang internasyonal na atension sa pagpreserbar nin mga kadlagan. An librong State of the World 1998 nagsasabi: “Minsan ngani an dakol na tawo sa mga nasyon sa amihanan nagmamalasakit sa mga kadlagan sa tropiko, tibaad dai ninda aram na an mga kadlagan na templado an klima na nasa sadiri nindang nasyon an pinakawatakwatak asin pinakanadadanyaran sa gabos na klase nin kadlagan.” Ano an nagsasapeligro sa kamugtakan nin mga kadlagan sa amihanan na mga nasyon na iyan sa Europa asin Amerika del Norte? Itinotokdo kan dakol na tawo an pagpalod sa mga kadlagan, alagad igwa nin ibang mga puersa na dai gayo risang nagraraot sa mga poon nin kahoy, nin pasarosaro. Ano iyan? An polusyon sa aire asin oran na may asido. An mga nagpapaating ini puedeng luway-luway na paluyahon an mga poon nin kahoy, na nagpapangyari na madaling tamaan an mga ini nin mga peste asin helang.

Sa laog nin dakol nang dekada, an mga espesyalista sa ekolohiya asin iba pang nahahadit na mga siudadano nagpatanid na kaipuhan na protehiran an sistema nin ekolohiya kan daga. Kan mga taon nin 1980, pakatapos na siyasaton kan mga sientista sa Alemania an mga epekto sa palibot kan polusyon sa aire asin oran na may asido, nagkonklusyon sinda: ‘Kun dai gigibohan nin medyos, sa mga taon 2000, an mga tawo mahanga na sana sa mga kadlagan sa daan na mga retrato asin sa pelikula.’ Marahay sana ta makosogon an kakayahan kan daga na bagohon an sadiri kaya sagkod sa presente napaglabanan kaiyan an danyos na sinabi bago pa.

Pero sa katapustapusi, an Dios an magibo kan pinakadakulang kabtang tanganing preserbaron an satong sistema nin ekolohiya. “Binabaribi nia an mga bukid hale sa saiyang mga kuarto sa itaas” asin “pinapatubo an berdeng doot para sa mga hayop, asin mga tinanom para sa mga kaipuhan nin katawohan.” Asin sia nanuga na ‘lalaglagon an mga naglalaglag kan daga.’ (Salmo 104:​13, 14; Kapahayagan 11:18) Kanigoan kamakangangalas kun an mga nag-eerok sa daga makakamtan na an sarong kinaban na mayong polusyon sagkod lamang!​—Salmo 37:9-11.