Ano an Gigibohon Nindo Kun May Pagsaginsagin?

SA HARDIN nin Getsemani, duminolok si Judas Iscariote ki Jesus asin “mamomoton na marhay na hinadokan nia sia.” Ini pinagkatodan nang kapahayagan nin mamomoton na kapadangatan. Alagad an aksion ni Judas pagsaginsagin sana tanganing ipamidbid si Jesus sa mga nag-arabot kan banggi tanganing dakopon sia. (Mateo 26:​48, 49) Si Judas sarong parasaginsagin​​—sarong tawo na nagsasaginsagin, saro na itinatago an saiyang maraot na mga motibo sa likod nin sarong maskara nin sinseridad. An terminong Griego na trinadusir na “parasaginsagin” nangangahulogan na “saro na minasimbag” asin nangangahulogan man na sarong aktor sa entablado. Pag-abot nin panahon, an termino nanonongod na sa siisay man na nagsasaginsagin tanganing mandaya sa iba.

Ano an reaksion nindo sa pagsaginsagin? Naaanggot daw kamo, halimbawa, kun naheheling nindo na ineenkaminar kan mga nagpoprodusir nin sigarilyo an paninigarilyo sa ibong nin medikal na ebidensia na an saindang produkto nakadadanyar? Napipikar daw kamong marhay sa pagsaginsagin kan mga nangangataman na minamaltrato an mga ipinaniwala sa saindang pangangataman? Nakokolgan daw kamo kun an sarong katood na sa paghona nindo tunay idto palan bako man? Paano kamo naaapektaran kan pagsaginsagin sa relihion?

“Herak Man sa Saindo . . . mga Parasaginsagin!”

Estudyare an kamugtakan sa relihion na nag-eeksister kan si Jesus yaon sa daga. An mga eskriba asin Fariseo nagsagin maimbod na mga paratokdo kan Ley nin Dios, alagad an totoo pinapano ninda nin mga katokdoan nin tawo an isip nin mga tawo na irinarayo an atension sa Dios. Maingat na iiniinsistir kan mga eskriba asin Fariseo an aktuwal na nasusurat na ley, alagad inignoro ninda an pundamental na mga prinsipyo na nagpapabanaag nin pagkamoot asin pakikidamay. Sa publiko nagsasagin sindang deboto sa Dios, alagad sa pribado pano sinda nin karatan. An saindang mga gibo nungkang kaoyon kan saindang mga sinasabi. An saindang obheto sa paggibo nin mga bagay iyo an “pagpaheling sa mga tawo.” Kapareho sinda kan “mga lolobngan na pinaputi, na sa luwas magayonon na paghelingon alagad sa laog pano kan mga tolang nin mga gadan asin nin gabos na klaseng karigsokan.” Pusoan na ibinubuyagyag an saindang pagsaginsagin, paorootrong sinabi sa sainda ni Jesus: “Herak man sa saindo, mga eskriba asin mga Fariseo, mga parasaginsagin!”​—Mateo 23:​5, 13-31.

Kun nabuhay na kamo kan panahon na idto, arog kan ibang mga tawo na sadiosan an puso tibaad kamo talagang mababalde kan siring na pagsaginsagin sa relihion. (Roma 2:21-24; 2 Pedro 2:1-3) Alagad totogotan daw nindo an pagsaginsagin kan mga eskriba asin Fariseo na papaiton an boot nindo sagkod na haboan na nindo an gabos na relihion, kaiba an itinokdo asin inotob ni Jesu-Cristo asin kan saiyang mga disipulo? Bako daw na iyan makadadanyar sa saindo?

An mapagsaginsagin na gawe-gawe sa kabtang kan relihiosong mga tawo tibaad italikod kita sa relihion huli sa pagkabalde. Minsan siring, an reaksion na ini maolang man sa sato na maheling an sinseridad kan tunay na mga parasamba. An mismong mga olang na itinogdok niato para sa proteksion tumang sa pagsaginsagin puedeng, sa katunayan, italikod kita sa tunay na mga katood. An satong reaksion sa pagsaginsagin, kun siring, maninigo na magin rasonable asin timbang.

“Pagdanayon na Buklat an Saindong mga Mata”

Enot, kaipuhan na manodan niatong mamidbid an mga parasaginsagin. Bako ini pirmeng pasil. Nanodan ini kan sarong pamilya na dakulaon an nawara sa sainda. An ina nasa koma. Sa pagsangat nin  demandang kapabayaan tumang sa ospital kun saen ini nangyari, an pamilya nagbayad nin sarong abogado na saro man na parahulit sa lokal na simbahan. Minsan ngani nagbayad an ospital nin $3.4 milyones bilang bayad sa pakikiareglo, an mamondong pangyayari sa pamilya nadagdagan. An ina nagadan na dukhang-dukha, asin mayo nin kuartang pambayad sa pagpalobong sa saiya. Taano? Huli ta ibinulsa kan abogado an kadaklan sa kuarta. Mapadapit sa abogadong ini, an sarong magasin sa ley nagsabi: “Kun ihinuhulit nia an klase nin gawe-gawe na ginigibo nia . . . , an saiyang mensahe magigin arog kutana kaini: mambiktima kita.” Paano niato mapoprotehiran an satong sadiri sa mga tawong arog kaiyan?

“Pagdanayon na buklat an saindong mga mata,” an sadol na itinao ni Jesus sa mga napapaatubang sa pagsaginsagin sa relihion kan kaaldawan nia. (Mateo 16:6; Lucas 12:1) Iyo, kaipuhan niatong magin mapagmaan. May mga tawo na tibaad maghingakong igwa nin pinakanobleng mga obheto asin mapaheling nin sinseridad, alagad kaipuhan niatong gumamit nin rasonableng pagmaan asin dai basta-basta tubodon an lambang tawo. Bako daw na maingat niatong beberepikaron an satong mga kuartang papel kun aram ta na may nagsisirkular na palsipikadong kuarta?

An mga parasaginsagin naglataw dawa sa laog kan tunay na Kristianong kongregasyon. An disipulong si Judas nagpatanid manongod sa sainda, na nagsasabi: “An mga ini an mga gapo na natatago sa irarom kan tubig sa saindong mga bangkete sa pagkamoot mantang sinda nakikikakan sa saindo, mga pastor na nagpapakabasog sa sainda man sana na dai nin takot; mga panganoron na dai nin tubig na ipinapadpad nin mga doros; mga kahoy sa paghinanapos nin tigrakdag, alagad dai nin bunga.”​—Judas 12.

An ‘pagpadanay na buklat kan satong mga mata’ nangangahulogan na maglikay na madaya nin sarong tawo na nagsasagin mamomoton alagad an totoo sadiri sana an iniintindi asin nagpapalakop nin mga opinyon na bakong basado sa Tataramon nin Dios. Siring sa garanggasangon na gapo na yaon sana sa irarom kan toninong na tubig, an siring na tawo puedeng magin dahelan nin espirituwal na pagkabagbag kan mga bakong listo. (1 Timoteo 1:19) An parasaginsagin tibaad manuga nin dakol na espirituwal na karepreskohan alagad saro palan na ‘panganoron na dai nin tubig’​​—na mayong ikakataong oran. Siring sa kahoy na daing bunga, an sarong manloloko mayo nin tunay na Kristianong mga bunga. (Mateo 7:15-20; Galacia 5:19-21) Iyo, kaipuhan niatong magin mapagbantay tumang sa siring na mga manloloko. Pero, kaipuhan na gibohon ta iyan na dai nagigin suspetsoso sa mga motibo nin lambang tawo.

“Dai Kamo Maghokom”

Kanigoan kapasil para sa bakong sangkap na mga tawo na itokdo an mga depekto kan ibang mga tawo mantang iniignoro an sadiri nindang depekto! Pero, an inklinasyon na ini ginigibo kitang madaling maimpluwensiahan nin pagsaginsagin. “Parasaginsagin!” sabi ni Jesus. “Haleon mo nguna an pasagi sa saimong sadiring mata, dangan malinaw mong maheheling kun paano hahaleon an dagami sa mata kan saimong tugang.” Marahay na himateon niato an saiyang hatol: “Dai kamo maghokom tanganing dai man kamo hokoman; huli ta an paghokom na ihinohokom nindo, iyo man an ihohokom sa saindo . . . Kun siring, taano ta naheheling mo an dagami sa mata kan saimong tugang, alagad dai mo hinohorophorop an pasagi na nasa sadiri mong mata?”​—Mateo 7:1-5.

Kun an iba kun beses naggigibo nin mga bagay na garo baga mapagsaginsagin, kaipuhan kitang mag-ingat na dai magdalidaling apodon sindang mga parasaginsagin. Halimbawa, si apostol  Pedro “ruminayo asin isinuway an sadiri nia” sa Hentil na mga kapagtubod sa Antioquia tanganing paoyonan an mga bisita na may Judiong pinaghalean hale sa Jerusalem. Si Bernabe ‘nadara man ni Pedro asin kan iba pa sa pagsaginsagin na ini.’ Ginibo ini ni Pedro sa ibong kan katunayan na nagkapribilehio siang magbukas kan dalan tanganing an mga Hentil makalaog sa Kristianong kongregasyon. (Galacia 2:11-14; Gibo 10:24-28, 34, 35) Alagad an pagkadarinas na ini sa parte ni Bernabe asin Pedro seguradong dai sinda ipinapareho sa mga eskriba asin Fariseo o ki Judas Iscariote.

“An Saindo Logod na Pagkamoot Mayo nin Pagsaginsagin”

“Kun kamo naggigibo nin karahayan sa ibang mga tawo,” an sadol ni Jesus, “dai kamo magtangdan nin mga paratrumpeta sa enotan nindo​​—siring sa mga aktor sa drama sa mga sinagoga asin tinampo na sinisierto na hahangaan sinda nin mga tawo.” (Mateo 6:​2, Phillips) “An saindo logod na pagkamoot mayo nin pagsaginsagin,” an isinurat ni apostol Pablo. (Roma 12:9) Inenkaminar nia an hoben na si Timoteo na magkaigwa nin “pagkamoot na gikan sa malinig na puso . . . patin gikan sa pagtubod na mayo nin pagsaginsagin.” (1 Timoteo 1:5) Kun an satong pagkamoot asin pagtubod tunay​​—na dai naatian nin kaimotan asin panloloko​​—an iba magtitiwala sa sato. Kita magigin gikanan nin tunay na kosog asin pamparigon sa boot sa mga nakapalibot sa sato. (Filipos 2:4; 1 Juan 3:​17, 18; 4:​20, 21) Asin orog sa gabos, mapapasato an pag-aprobar ni Jehova.

Sa ibong na lado, an pagsaginsagin sa katapustapusi ikagagadan kan mga nagsasagibo kaiyan. Sa katapustapusi, an pagsaginsagin mahahayag. “Mayong tagong hilom na dai mabubuyagyag,” sabi ni Jesu-Cristo, “asin sekreto na dai maaaraman.” (Mateo 10:26; Lucas 12:2) An madonong na si Hadeng Salomon nagsabi: “An tunay na Dios mismo dadarahon an lambang klase nin gibo sa paghokom mapadapit sa lambang hilom na bagay, kun baga iyan marahay o maraot.”​—Eclesiastes 12:14.

Mientras tanto, taano ta totogotan niato an pagsaginsagin kan iba na maapektaran kita sagkod sa punto na nawawaran na kita kan tunay na pagkamoot nin tunay na mga katood? Puede kitang magmaan na dai nagigin sobra kasuspetsoso. Asin tunay nanggad, pagdanayon ta an sato mismong pagkamoot asin pagtubod na mayo nin pagsaginsagin.​—Santiago 3:17; 1 Pedro 1:22.

[Mga Ritrato sa pahina 22, 23]

Tinogotan daw kutana nindo an pagsaginsagin kan mga eskriba asin Fariseo na italikod kamo ki Jesu-Cristo asin sa saiyang mga disipulo?