Igwa daw nin Ano Man na Paglaom na Maligtas?

An ika-20 siglo inapod na saro sa pinakamadugong mga siglo na inagihan nin katawohan kasuarin pa man. An krimen, mga guerra, etnikong iriwal, pagdodroga, pandadaya, asin kadahasan nangorognang lakop durante kan nakaaging pirang dekada. Idugang pa digdi an kolog asin pagdusa na resulta nin helang, pagkagurang, asin kagadanan. Siisay an dai naghihimuyawot na makabutas sa darakulaon na problema na yaon sa kinaban ngonyan? Mantang hineheling niato an ngapit, igwa daw nin ano man na paglaom na maligtas?

PENSARA an bisyon na ipinaniwala ki apostol Juan kaidtong mga 2,000 na taon na an nakaagi. Sia nagsurat: “Uya! An tolda nin Dios nasa mga tawo, asin sia mag-eerok sa kaibanan ninda, asin sinda magigin saiyang mga banwaan. Asin an Dios mismo masasakaibanan ninda. Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagsuriyaw ni kolog. An enot na mga bagay nakalihis na.” (Kapahayagan 21:​3, 4) Siring man si propeta Isaias naghula: “Totoong hahalonon nia an kagadanan sagkod lamang, asin papahidon nanggad kan Soberanong Kagurangnan na Jehova an mga luha sa gabos na lalauogon. Asin an langhad sa saiyang banwaan hahaleon nia sa bilog na daga, huli ta si Jehova mismo an nagtaram kaiyan.”​—Isaias 25:8.

Imahinara na sana kun ano an magigin kahulogan kan kaotoban kan mga panuga nin Dios! An katawohan kakaldahon, o ililigtas, sa pan-aapi asin kadahasan, sa mga dahelan nin pagdusa asin kasakitan. Tara, dawa an helang, pagkagurang, asin kagadanan dai na kita pasasakitan! An Tataramon nin Dios, an Biblia, nanunuga nin buhay na daing katapusan sa irarom nin sangkap na mga kamugtakan sa daga. (Lucas 23:43; Juan 17:3) Asin makukua iyan kan gabos na nagmamawot kaiyan. “An kabotan [nin Dios] iyo na an gabos na klase nin tawo makaligtas asin makaabot sa tamang kaaraman sa katotoohan.”​—1 Timoteo 2:​3, 4.

Pero, tanganing makinabang sa mga panuga nin Dios, kaipuhan niatong masabotan an kabtang ni Jesu-Cristo sa satong kaligtasan asin gumibo nin pagtubod sa saiya. Si Jesus mismo nagsabi: “An Dios  namoot na gayo sa kinaban na itinao nia an saiyang Aking bugtong, tanganing an lambang naggigibo nin pagtubod sa saiya dai mapahamak kundi magkaigwa nin buhay na daing katapusan.” (Juan 3:16) Itinotokdo an prinsipal na kabtang ni Jesu-Cristo sa mga bagay na ini, si apostol Pedro nagsabi: “Mayo nin kaligtasan sa siisay pa man na iba, huli ta mayo na nin ibang ngaran sa sirong nin langit na itinao sa mga tawo na sukat makaligtas sa sato.” (Gibo 4:12) Sinadol ni apostol Pablo asin kan saiyang kaibaibang si Silas an sarong sinserong naghahapot: “Tumubod ka sa Kagurangnan na Jesus asin ika maliligtas, ika asin an saimong kairiba sa harong.”​—Gibo 16:​30, 31.

Iyo, si Jesu-Cristo “an Pangenot na Ahente nin buhay,” asin an kaligtasan posible sana paagi sa saiya. (Gibo 3:15) Alagad paanong an sarong tawo puedeng magin nanggad pangenot na persona sa pagligtas sa sato? An pagkaigwa nin malinaw na pakasabot sa saiyang kabtang mapadapit digdi maninigong magpakosog kan satong paglaom na maligtas.

 [Picture Credit Lines sa pahina 2]

Pahina 3: Mga eroplanong pambomba: Retrato kan USAF; nagugutom na mga aki: UNITED NATIONS/J. FRAND; nasosolong bapor de guerra: Retrato kan U.S. Navy