“Magherilingan Kita sa Kahadean nin Dios”

“Mahal na Katood! Rupert, ngonyan sinentensiahan akong magadan. Dai ka mamondo para sako. Ipinapaabot ko an sakong pagkamoot sa saimo asin sa gabos na yaon sa harong. Magherilingan kita sa Kahadean nin Dios.”

KAN Hunyo 8, 1942, isinurat ni Franc Drozg an mga tataramon na ini pirang minuto bago sia badilon kan mga soldados na Nazi. Taano ta ginadan sia?

Segun sa mga rekord sa Museo kan Liberasyon Nasyonal sa Maribor, Slovenia, an 38 anyos na panday na ini nagsayuma na umayon sa Wehrmannschaft, sarong paramilitar na detachment kan Alemania sa Slovenia na sakop kan mga Aleman. Sia sarong Bibelforscher, o Estudyante sa Biblia, na apod kaidto sa Mga Saksi ni Jehova sa lugar na iyan. Minagaweng kaoyon kan Isaias 2:​4, habo niang sumuportar sa paghihingoa sa guerra kan Nazi, na ipinahahayag an sadiri nia bilang sakop kan Kahadean nin Dios.​—Mateo 6:33.

Sa saiyang ginikanan na banwaan sa Ptuj, midbid si Franc bilang maigot na parabalangibog kan maogmang bareta kan Kahadean nin Dios. (Mateo 24:14) Sa ibong nin dakol na kasakitan, ihinulit nia an maogmang bareta na mayo nin ontok sagkod na sia inaresto kan Mayo 1942.

Dakol na Eslovenong Saksi ni Jehova an pinaglamag kaidto nin grabe kan mga Nazi. Si Franc an saro sa pinakaenot sa sainda na ginadan huli sa saiyang relihiosong mga kombiksion. Arog kan enot na siglong mga Kristiano, pinakosog sia kan mga tataramon na: “Kita kaipuhan na lumaog sa kahadean nin Dios paagi sa dakol na kasakitan.” (Gibo 14:22) An saiyang pagtubod sa pagigin totoo kan langitnon na gobyernong iyan risang-risa sa saiyang pangultimong mga tataramon, “Magherilingan kita sa Kahadean nin Dios.”

[Picture Credit Lines sa pahina 32]

Franc Drozg: Retrato kan Archive-Museum of National Liberation Maribor, Slovenia; surat: An orihinal nakalaag sa Museum of National Liberation Maribor, Slovenia