Matakot ki Jehova Asin Otobon an Saiyang mga Togon

“Matakot ka sa tunay na Dios asin otobon mo an saiyang mga togon. Huli ta ini iyo an bilog na katongdan nin tawo.”​—ECLESIASTES 12:13.

1, 2. (a) Paano an takot puedeng magprotehir sa sato sa pisikal? (b) Taano an madonong na mga magurang ta naghihingoang itadom sa saindang mga aki an nakararahay na takot?

“KUN an kosog nin boot isinasapeligro an buhay, an takot pinoprotehiran iyan,” an sabi ni Leonardo da Vinci. An pag-isog-isog, o ragap na kosog nin boot, binubuta an tawo sa peligro, mantang an takot pinagigirumdom sia na mag-ingat. Halimbawa, kun kita marani sa tampi nin sarong ampas asin maheling kun gurano kararom kan puedeng bagsakan ta, an kadaklan sa sato natural sanang sumibog. Kaagid kaiyan, an nakararahay na takot bako sanang nagpapatalubo nin marahay na relasyon sa Dios, siring kan nanodan ta sa sinundan na artikulo, kundi nagtatabang man na protehiran kita sa danyos.

² Minsan siring, an pagkatakot sa dakol na peligro sa presenteng aldaw dapat na manodan. Palibasa an sadit na mga aki daing pakaaram dapit sa mga peligro nin koryente o trapik sa siudad, sinda puedeng madaling maaksidente nin grabe. * An madonong na mga magurang naghihingoang itadom sa saindang mga aki an nakararahay na takot, na pinatatanidan sinda nin paorootro dapit sa mga peligro sa palibot. Aram nin mga magurang na an takot na ini puede nanggad na magligtas sa buhay kan saindang mga aki.

3. Taano asin paano kita pinatatanidan ni Jehova manongod sa espirituwal na mga peligro?

³ Si Jehova igwa nin kaparehong pagmakolog sa satong ikararahay. Bilang mamomoton na Ama, tinotokdoan nia kita paagi sa saiyang Tataramon asin sa saiyang organisasyon tanganing pakinabangon an satong sadiri. (Isaias 48:17) An kabtang kan programang ini nin pagtotokdo nin Dios kalabot an pagpapatanid sa sato nin “paorootro” manongod sa espirituwal na natatagong mga peligro tanganing mapatalubo ta an tamang pagkatakot sa siring na mga peligro. (2 Cronica 36:15; 2 Pedro 3:1) Sa bilog na kasaysayan dakol na espirituwal na kapahamakan an nalikayan kutana asin dakol na pagdusa an naolang ‘kun pinatalubo sana kutana kan mga tawo an puso nindang ini na matakot sa Dios asin otobon an saiyang mga togon.’ (Deuteronomio 5:29) Sa “delikadong mga panahon [na ini] na masakit pakibagayan,” paano niato mapatatalubo an satong puso na matakot sa Dios asin makalikay sa espirituwal na peligro?​—2 Timoteo 3:1.

 Rumayo sa Maraot

4. (a) Anong pagkaongis an maninigo na pataluboon nin mga Kristiano? (b) Ano an namamatean ni Jehova manongod sa makasalan na gawe-gawe? (Helingon an nota sa ibaba.)

⁴ An Biblia nagpapaliwanag na “an pagkatakot ki Jehova nangangahulogan nin pagkaongis sa maraot.” (Talinhaga 8:13) An sarong leksiko sa Biblia ilinaladawan an pagkaongis na ini na “sarong emosyonal na aktitud sa mga tawo asin mga bagay na sarongat, ikinauuyam, dai gusto asin habo nin saro na magkaigwa nin koneksion o relasyon dian.” Kaya kabale sa diosnon na takot an panlaog na paghabo o pagkabalde sa gabos na maraot sa pagheling ni Jehova. * (Salmo 97:10) Itinutulod kita kaiyan na lumikay sa maraot, kun paanong masibog kita hale sa tampi nin sarong ampas kun mag-alarma an satong natural nang pagkatakot. “Sa pagkatakot ki Jehova an saro minarayo sa maraot,” an sabi kan Biblia.​—Talinhaga 16:6.

5. (a) Paano ta mapakokosog an satong diosnon na takot asin an satong pagkaongis sa maraot? (b) Ano an itinotokdo sa sato kan kasaysayan kan nasyon nin Israel mapadapit digdi?

⁵ Puede niatong pakosogon an nakararahay na takot asin pagkaongis na ini sa maraot paagi sa pag-estudyar sa dai malilikayan na nakadadanyar na mga resulta nin kasalan. Sinisierto sa sato kan Biblia na aanihon ta an satong itinanom​—baga man kita nagtatanom segun sa laman o segun sa espiritu. (Galacia 6:​7, 8) Sa dahelan na ini malinaw na ilinadawan ni Jehova an dai malilikayan na mga resulta nin pagbasangbasang sa saiyang mga togon asin pagbaya sa tunay na pagsamba. Kun mayo an proteksion nin Dios, an sadit, bukas sa pagsalakay na nasyon nin Israel biyong mapapasa kapangyarihan kutana kan maringis asin poderosong kataraed. (Deuteronomio 28:​15, 45-48) An makaturotristeng kinaabtan kan pakisuway kan Israel detalyadong isinurat sa Biblia “para sa pagpatanid” tanganing kita magkaleksion asin magpatalubo nin diosnon na takot.​—1 Corinto 10:11.

6. Ano an nagkapirang halimbawa sa Kasuratan na puede niatong horophoropon tanganing makanood nin diosnon na takot? (Helingon an nota sa ibaba.)

⁶ Apuera sa nangyari sa nasyon nin Israel sa kabilogan, an Biblia igwa nin mga eksperyensia sa tunay na buhay nin mga indibiduwal na dinaog nin pag-imon, inmoralidad, kahanaban, o kapalangkawan. * An nagkapira sa mga tawong ini dakol nang taon na naglingkod ki Jehova, alagad sa sarong importanteng panahon sa saindang buhay, an saindang pagkatakot sa Dios bakong igo an kosog, asin mapait an inani ninda. An paghorophorop sa siring na mga halimbawa sa Kasuratan puedeng magpakosog kan satong desisyon na dai na paggibohon an kaparehong mga sala. Makamomondo nanggad kun halaton pa  niato na kita umagi nin personal na trahedya bago isapuso an hatol nin Dios! Sarongat sa komun na paniniwala, an eksperyensia​—nangorogna sa pagpagusto sa sadiri​—bakong iyo an pinakamarahay na paratokdo.​—Salmo 19:7.

7. Siisay an iniimbitaran ni Jehova sa saiyang piguratibong tolda?

⁷ An saro pang mapuersang dahelan na kultibaron an diosnon na takot iyo an satong pagmawot na ingatan an satong relasyon sa Dios. Natatakot kita na mapaanggot si Jehova huli ta pinahahalagahan tang marhay an saiyang pakikikatood. Siisay an ibinibilang nin Dios na katood, saro na saiyang iimbitaran sa saiyang piguratibong tolda? Solamente an saro “na naglalakaw na daing sala asin naggigibo nin katanosan.” (Salmo 15:​1, 2) Kun pinahahalagahan ta an pribilehiadong relasyon na ini sa satong Kaglalang, kita mag-iingat na lumakaw na daing sala sa saiyang pagheling.

8. Paano binaliwala kan nagkapirang Israelita kan kaaldawan ni Malaquias an pakikikatood sa Dios?

⁸ Makamomondo, an nagkapirang Israelita kan kaaldawan ni Malaquias binaliwala an pakikikatood sa Dios. Imbes na matakot asin tumao nin onra ki Jehova, sinda nagdolot nin may helang asin pilay na mga hayop sa saiyang altar. An kadaihan ninda nin diosnon na takot naheling man sa saindang aktitud sa pag-agom. Tanganing makaagom nin mas hoben na mga babae, saindang idiniborsio an mga agom na babae kan saindang pagkabarobata nin huli sa saradit na dahelan. Sinabihan sinda ni Malaquias na ikinaoongis ni Jehova an “pagdidiborsio” asin na an saindang traydor na aktitud isiniblag sinda sa saindang Dios. Paano hehelingon nin Dios na may pag-oyon an saindang mga atang mantang an altar piguratibong natatahoban nin mga luha​—an mapait na mga luha kan saindang binayaan na mga agom? An siring na hayag na dai paggalang sa saiyang mga pamantayan nagpahiro ki Jehova na maghapot: “Haen an pagkatakot sa sako?”​—Malaquias 1:6-8; 2:13-16.

9, 10. Paano niato ikapaheheling na pinahahalagahan ta an pakikikatood ni Jehova?

⁹ Ngonyan, naheheling man ni Jehova an kakologan sa puso kan dakol na daing sala na agom asin aki na kinolgan na marhay kan paslo asin inmoral na mga agom na lalaki asin ama o nin mga agom na babae asin ina pa ngani. Seguradong ikinamomondo nia iyan. An katood nin Dios mamansayon an mga bagay-bagay kapareho kan pagmansay dian nin Dios asin magmamaigot na pakosogon an saindang relasyon mag-agom, isikwal an kinabanon na kaisipan na nagbabasangbasang sa importansia kan bungkos nin pag-agoman, asin ‘dumulag sa pakikisaro.’​—1 Corinto 6:18.

¹⁰ Sa relasyon mag-agom siring man sa iba pang kabtang kan satong buhay, an pagkaongis sa gabos na maraot sa pagheling ni Jehova, kaiba an hararom na pag-apresyar sa saiyang pakikikatood, magbubunga kan pabor asin pag-oyon ni Jehova. Si apostol Pedro marigon na nagsabi: “Sa katotoohan ako nakaiisi na an Dios daing ipinaoorog, kundi sa lambang nasyon an tawo na natatakot sa saiya asin naggigibo nin katanosan saiyang inaako.” (Gibo 10:​34, 35) Dakol kitang halimbawa sa Kasuratan na nagpapaheling kun paano an diosnon na takot nagpahiro sa mga indibiduwal na gibohon an tama sa laen-laen na masakit na kamugtakan.

Tolo na Natakot sa Dios

11. Sa anong mga kamugtakan ipinahayag si Abraham na “may takot sa Dios”?

¹¹ May sarong tawo sa Biblia na personal na sinabi ni Jehova na saiyang katood​—an patriarkang si Abraham. (Isaias 41:8) An diosnon na takot ni Abraham nabalo kan ipadolot sa saiya nin Dios bilang atang an saiyang solong aki, si Isaac, na paagi sa saiya ootobon nin Dios an saiyang panuga na an gikan ni Abraham magigin sarong dakulang nasyon. (Genesis 12:​2, 3; 17:19) Makakapasar daw an “katood ni Jehova” sa makolog sa boot na pagbalo na ini? (Santiago 2:23) Kan mismong ibingat na ni Abraham an saiyang kutsilyo tanganing gadanon si Isaac, an anghel ni Jehova nagsabi: “Dai mo ibingat an saimong kamot tumang sa aki asin dai mo sia gibohan nin ano man, huli ta ngonyan aram ko nang ika may takot sa Dios ta dai mo man lamang isinayuma an saimong aki, an saimong bugtong na aki, sa sako.”​—Genesis 22:10-12.

12. Ano an nagmotibar sa diosnon na takot ni Abraham, asin paano niato ikapaheheling an kaparehong espiritu?

¹² Minsan ngani pinatunayan na kaidto ni Abraham na sia natatakot ki Jehova, sa pangyayaring idto ipinahayag nia an saiyang diosnon na takot sa pambihirang paagi. An pagigin andam nia na iatang si Isaac bako sana nanggad na pagpaheling nin may paggalang na pagkuyog. Si Abraham minotibar nin absolutong pagtitiwala na ootobon kan saiyang langitnon na Ama an Saiyang panuga paagi sa pagbuhay liwat ki Isaac kun kinakaipuhan. Siring kan isinurat ni Pablo, si Abraham “biyong kombensido na an . . . ipinanuga [nin Dios] kaya man niang gibohon.”  (Roma 4:16-21) Kita daw andam na gibohon an kabotan nin Dios dawa kun iyan naghahagad nin dakulang mga pagsasakripisyo? Igwa daw kita nin lubos na kompiansa na an siring na pagkuyog magbubunga nin panhaloyan na mga pakinabang, sa pakaaram na si Jehova iyo “an parabalos sa mga maigot na naghahanap sa saiya”? (Hebreo 11:6) Iyan an tunay na pagkatakot sa Dios.​—Salmo 115:11.

13. Taano ta tama sanang masabi ni Jose na sia sarong tawo na “natatakot sa tunay na Dios”?

¹³ Siyasaton ta an saro pang halimbawa nin diosnon na takot sa gibo​—an halimbawa ni Jose. Bilang oripon sa pamilya ni Potifar, si Jose aroaldaw na napaatubang sa pangigipit na magkomiter nin pagsambay. Minalataw na mayo nin paagi na malikayan niang maheling an agom na babae kan saiyang kagurangnan, na sige-sige an paggibo nin inmoral na mga alok sa saiya. Sa katapustapusi, kan ‘kaptan sia’ kan babae, sia “duminulag patin luminuwas.” Ano an nagtulod sa saiya na ensegidang lumikay sa maraot? Daing duda, an pangenot iyo an pagkatakot sa Dios, an pagmawot na likayan an pagkomiter kan “dakulang karatan na ini asin totoong magkasala tumang sa Dios.” (Genesis 39:7-12) Tama sanang masabi ni Jose na sia sarong tawo na “natatakot sa tunay na Dios.”​​—Genesis 42:18.

14. Paano ipinabanaag kan pagkaherak ni Jose an tunay na pagkatakot sa Dios?

¹⁴ Pakalihis nin dakol na taon nakaatubang ni Jose an saiyang mga tugang na lalaki, na daing puso na ipinabakal sia sa pagkaoripon. Pasil sana kutanang gamiton nia an grabeng pangangaipo ninda nin kakanon bilang oportunidad tanganing bumalos sa salang ginibo ninda sa saiya. Alagad an maringis na pagtrato sa mga tawo dai nagpapabanaag kan pagkatakot sa Dios. (Levitico 25:43) Sa siring, kan maheling ni Jose an igong prueba kan pagbago nin puso kan saiyang mga tugang, maheherakon na pinatawad nia sinda. Arog ni Jose, an satong diosnon na takot pahihiroon kita na daogon kan marahay an maraot, siring man popogolan kita na maholog sa sugot.​—Genesis 45:1-11; Salmo 130:​3, 4; Roma 12:17-21.

15. Taano an iginawe ni Job ta nakapaogma sa puso ni Jehova?

¹⁵ Si Job saro pang marahayon na halimbawa nin saro na natakot sa Dios. Si Jehova nagsabi sa Diablo: “Isinentro mo daw an saimong puso sa sakong lingkod na si Job, na mayo nin siisay man na nakaaagid sa saiya sa daga, lalaking daing katuyawan asin matanos, na natatakot sa Dios asin naglilikay sa maraot?” (Job 1:8) Sa laog nin dakol na taon, an daing katuyawan na iginawe ni Job nakapaogma sa puso kan saiyang langitnon na Ama. Si Job natatakot sa Dios huli ta aram nia na iyan an tamang gibohon asin an pinakamarahay na paagi nin pamumuhay. “Uya! An pagkatakot ki Jehova​​—iyan an kadonongan,” an ikinagsing ni Job, “asin an pagtalikod sa karatan pakasabot.” (Job 28:28) Bilang may agom, si Job dai nagtao nin salang atension sa hoben na mga babae, ni nagtanom sia nin mga intension na pagsambay sa saiyang puso. Minsan ngani mayaman, habo niang magtiwala sa kayamanan, asin isinikwal nia an gabos na klase nin idolatriya.​—Job 31:​1, 9-11, 24-28.

16. (a) Sa anong mga paagi ipinaheling ni Job an mamomoton na kabootan? (b) Paano ipinaheling ni Job na dai nia isinayuma an pagpapatawad?

¹⁶ Minsan siring, an pagkatakot sa Dios nangangahulogan nin paggibo nin marahay siring man nin paglikay sa maraot. Sa siring, si Job nagpaheling nin maboot na interes sa mga buta, mga pilay, asin mga dukha. (Levitico 19:14; Job 29:​15, 16) Nasasabotan ni Job na an “siisay man na isinasayuma an mamomoton na kabootan sa saiyang sadiring kapwa, babayaan man nia dawa an pagkatakot sa Makakamhan sa gabos.” (Job 6:14) Puedeng kaiba sa pagsayumang magtao nin mamomoton na kabootan an pagsayumang magtao nin kapatawadan o pagtanom nin raot nin boot. Sa pagboot nin Dios, si Job namibi para sa tolo niang kairiba, na nagtao sa saiya nin grabeng kamondoan. (Job 42:7-10) Puede daw niatong ipaheling an kaparehong espiritu nin pagpapatawad sa sarong kapagtubod na tibaad nakakolog sa sato minsan paano? An sinserong pamibi para sa saro na nakakolog sa sato makatatabang nin dakula sa sato na mahale an hinanakit. An mga bendisyon na nakamit  ni Job huli sa saiyang diosnon na takot nagtatao sa sato nin patanaw sa ngapit kan ‘dakulaon na karahayan na iningatan ni Jehova para sa mga natatakot sa saiya.’​—Salmo 31:19; Santiago 5:11.

Pagkatakot sa Dios Kontra sa Pagkatakot sa Tawo

17. Ano an puedeng gibohon sa sato kan pagkatakot sa mga tawo, alagad taano ta halipot an pananaw kan siring na pagkatakot?

¹⁷ Mantang an pagkatakot sa Dios puedeng magtulod sa sato na gibohon an tama, an pagkatakot sa tawo puedeng paluyahon an satong pagtubod. Sa dahelan na ini, kan ineenkaminar an mga apostol na magin maigot na mga parahulit kan maogmang bareta, sinabi sa sainda ni Jesus: “Dai kamo matakot duman sa mga minagadan kan hawak alagad dai nakagagadan kan kalag; kundi matakot kamo sa saiya na nakalalaglag kapwa kan kalag asin hawak sa Gehenna.” (Mateo 10:28) An pagkatakot sa mga tawo halipot an pananaw, an ipinaliwanag ni Jesus, ta dai puedeng raoton nin mga tawo an satong mga paglaom sa buhay sa ngapit. Apuera kaini, kita natatakot sa Dios huli ta aram niato an saiyang makangingirhat na kapangyarihan, na kun ikokomparar dian, an puersa nin gabos na nasyon daing kamanungdanan. (Isaias 40:15) Arog ni Abraham igwa kita nin absolutong kompiansa sa kapangyarihan ni Jehova na buhayon liwat an Saiyang fiel na mga lingkod. (Kapahayagan 2:10) Sa siring, sinasabi niato na may kompiansa: “Kun an Dios nasa kampi niato, siisay an matumang sa sato?”​—Roma 8:31.

18. Sa anong paagi binabalosan ni Jehova an mga natatakot sa saiya?

¹⁸ Baga man an nagkokontra sa sato sarong kapamilya o sarong maton na kaeskuela, manonompongan ta na “sa pagkatakot ki Jehova yaon an makosog na kompiansa.” (Talinhaga 14:26) Puede kitang mamibi sa Dios para sa kosog, sa pakaaram na dadangogon nia kita. (Salmo 145:19) Dai noarin man linilingawan ni Jehova an mga natatakot sa saiya. Paagi sa saiyang propetang si Malaquias, inaasegurar nia giraray kita: “Sa panahon na iyan idtong mga nagkakatarakot ki Jehova nag-oorolay-olay, an lambang saro sa saiyang kaibanan, asin si Jehova padagos na nagtao nin atension asin naghinanyog. Asin an sarong libro nin girumdoman pinonan na isurat sa atubangan nia para sa mga natatakot ki Jehova asin para sa mga naghohorophorop sa saiyang ngaran.”​—Malaquias 3:16.

19. Anong klaseng mga takot an mawawara na, alagad arin an magdadanay sagkod lamang?

¹⁹ Harani na an panahon na an gabos na yaon sa daga masamba ki Jehova asin mawawara na an pagkatakot sa tawo. (Isaias 11:9) An takot sa gutom, helang, krimen, asin guerra mawawara na man. Alagad an pagkatakot sa Dios magdadanay sa bilog na panahon na daing sagkod mantang an saiyang fiel na mga lingkod sa langit asin sa daga padagos na ipinaheheling sa saiya an maninigong paggalang, pagkuyog, asin onra. (Kapahayagan 15:4) Mientras tanto, logod na isapuso niato gabos an ipinasabong na hatol ni Salomon: “Dai mauri an saimong puso sa mga parakasala, kundi matakot ka ki Jehova sa bilog na aldaw. Huli ta sa siring magkakaigwa nin ngapit, asin an saimong paglaom dai puputolon.”​—Talinhaga 23:​17, 18.

[Mga Nota sa ibaba]

Nagigirumdoman daw Nindo?

• Paano niato nanonodan na ikaongis an maraot?

• Paano binaliwala kan nagkapirang Israelita kan kaaldawan ni Malaquias an pakikikatood ni Jehova?

• Ano an manonodan ta ki Abraham, Jose, asin Job manongod sa pagkatakot sa Dios?

• Arin na takot an dai noarin man hahaleon, asin taano?

[Mga Hapot Para sa Pag-adal]

[Ritrato sa pahina 19]

An madonong na mga magurang itinatadom sa saindang mga aki an nakararahay na takot

[Ritrato sa pahina 20]

Kun paanong an takot irinarayo kita sa peligro, an diosnon na takot irinarayo kita sa maraot

[Ritrato sa pahina 23]

Pinapagdanay ni Job an saiyang pagkatakot sa Dios dawa kan kaatubang an tolong falsong katood

[Credit Line]

Hale sa traduksion nin Biblia na Vulgata Latina, 1795