Mga Hapot Hale sa mga Parabasa

An instruksion daw nin Dios na nasusurat sa Jeremias 7:16 nangangahulogan na dai puedeng mamibi an mga Kristiano manongod sa saro na hinale sa Kristianong kongregasyon huli ta sia habong magsolsol na parakasala?

Pakatapos ipahayag an saiyang paghokom tumang sa bakong fiel na Juda, si Jehova nagsabi ki Jeremias: “Kun manongod sa saimo, dai ka mamibi para sa banwaan na ini, ni mag-agrangay ka man o mamibi para sainda ni makimaherak ka sa sako, huli ta dai taka hihinanyogon.”​—Jeremias 7:16.

Taano ta binawalan ni Jehova si Jeremias na mamibi para sa mga Israelita? Malinaw nanggad, iyan huli sa saindang hayag na mga paglapas sa saiyang Ley. Hayagan asin daing supog nanggad, sinda ‘naghahabon, nanggagadan asin nagsasambay asin nanunumpa nin putik asin nagdodolot nin atang na aso ki Baal asin nagsusunod sa ibang mga dios.’ Bilang resulta, sinabihan ni Jehova an bakong fiel na mga Judio: “Aalawon ko kamo hale sa sakong atubangan, siring sa pag-alaw ko sa gabos nindong mga tugang, an bilog na gikan ki Efraim.” Tunay nanggad, dai angay para ki Jeremias, o sa siisay pa man, na mamibi na bawion ni Jehova an Saiyang paghokom.​—Jeremias 7:​9, 15.

Kaoyon kaini, nagsurat si apostol Juan manongod sa tamang pamibi sa Dios. Enot, iginarantiya nia sa mga Kristiano: “Minsan ano an satong hagadon segun sa saiyang kabotan, dinadangog nia kita.” (1 Juan 5:14) Dangan, mapadapit sa pamimibi para sa iba, si Juan nagsabi pa: “Kun maheling nin siisay man an saiyang tugang na nagkakasala nin sarong kasalan na dai ikagagadan, sia mahagad, asin sia matao nin buhay sa saiya, iyo, sa mga dai nagkakasala nin ikagagadan. May kasalan na ikagagadan. May labot sa kasalan na iyan na dai ko sinasabi sa saiya na humagad.” (1 Juan 5:16) Nagtaram man si Jesus dapit sa kasalan na “dai ipatatawad,” an boot sabihon, kasalan tumang sa banal na espiritu.​—Mateo 12:​31, 32.

Nangangahulogan daw ini na an gabos na hinale sa Kristianong kongregasyon huli sa pagkakasala  na dai nagsosolsol nakakomiter nin kasalan na ikagagadan asin huli kaini dai maninigong ipamibi? Bako man pirmeng siring kaini an kamugtakan huli ta sa nagkapirang pangyayari an siring na mga paglapas bako man na mga kasalan na “ikagagadan.” An totoo, masakit maaraman kun iyan iyo man nanggad. An sarong tipikong halimbawa iyo si Hadeng Manases kan Juda. Sia nagtogdok nin mga altar para sa falsong mga dios, idinolot an saiyang mga aking lalaki bilang atang, naggibo nin espiritismo, asin binugtakan nin inukit na mga imahen an templo ni Jehova. Sa katunayan, sinasabi kan Biblia na si Manases asin an banwaan naggibo “nin maraot na labi kisa mga nasyon na pinara ni Jehova sa atubangan kan mga aki ni Israel.” Huli kaini gabos, kinastigo ni Jehova si Manases paagi sa pagsubol sa saiya sa Babilonya bilang bihag na nakakadenahan.​—2 Hade 21:1-9; 2 Cronica 33:1-11.

An mga kasalan daw ni Manases, dawa ngani talagang grabe, iyo an klase na ikagagadan? Minalataw na bako, huli ta an pagkasaysay nagpapadagos sa pagsabi manongod sa saiya: “Tolos kan iyan magtao sa saiya nin kasakitan, pinalomoy nia an lalauogon ni Jehova na saiyang Dios asin padagos na nagpakumbabang marhay huli sa Dios kan saiyang mga apoon. Asin padagos siang namimibi sa Saiya, kaya Saiyang tinogotan an saiyang sadiri na pakimaherakan nia asin Saiyang dinangog an saiyang pakiolay asin ibinalik sia sa Jerusalem sa saiyang pagigin hade; asin si Manases nakaisi na si Jehova iyo an tunay na Dios.”​—2 Cronica 33:​12, 13.

Sa siring, dai kita maninigong magkonklusyon tolos na an saro seguradong nakagibo nin kasalan na ikagagadan huli sana ta sia hinale sa kongregasyon. Tibaad harohalawig na panahon an kaipuhan bago mahayag an tunay na kamugtakan nin puso kan indibiduwal. Sa katunayan, parateng sinasabi na an saro sa mga katuyohan kan pagtitiwalag iyo na tanganing makapag-isip-isip an nagkasala asin na logod man na magsolsol patin magbakle.

Huling an tawong iyan mayo na sa kongregasyon, an ano man na pagbago sa puso asin aktitud tibaad maheling primero kan mga harani sa saiya, siring kan agom o mga miembro kan pamilya. An mga nakaheheling kan siring na mga pagbabago tibaad magkonklusyon na an naglapas dai man nakakomiter nin kasalan na ikagagadan. Tibaad mapahiro sinda na mamibi na sia logod man na kumua nin kosog sa ipinasabong na Tataramon nin Dios asin na si Jehova humiro sa kapakanan kan nagkasala kaoyon kan Saiyang kabotan.​—Salmo 44:21; Eclesiastes 12:14.

Minsan ngani an iba tibaad nasa kamugtakan na maheling an igong ebidensia tanganing maniwala na an nagkasala nagsolsol na, an kongregasyon sa pankagabsan tibaad mayo sa siring na kamugtakan. Sinda mariribaraw, mapupurisaw, masisingkog pa ngani kun madangog ninda an saro na namimibi sa publiko manongod sa napapasala. Sa dahelan na ini, an mga napahihirong mamibi manongod sa nagkasala maninigong gibohon iyan sa pribado sana, na ipinapabaya an mga mangyayari pa sa kamot kan responsableng kamagurangan sa kongregasyon.

[Ritrato sa pahina 31]

Pinatawad an grabeng mga kasalan ni Manases kan sia nagpakumbaba sa atubangan ni Jehova

[Picture Credit Line sa pahina 30]

Rineprodusir hale sa Illustrirte Pracht –​ Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s