Pataluboon an Saindong Puso na Matakot ki Jehova

“Kun pataluboon sana kutana ninda an puso nindang ini na matakot sa sako asin danay na otobon an gabos kong togon.”—DEUTERONOMIO 5:29.

1. Paano kita makasesegurado na maabot an panahon na an mga tawo magkakamit nin katalingkasan sa takot?

AN TAKOT pirmeng yaon sa katawohan sa laog nin dakol nang siglo. An takot sa gutom, helang, krimen, o guerra dahelan nin dai nahahaleng kahaditan nin minilyon na tawo. Sa rason na ini an introduksion sa Unibersal na Deklarasyon kan mga Deretso nin Tawo nagpapahayag kan pagmawot na magmukna nin sarong kinaban kun saen an gabos na tawo magkakamit nin katalingkasan sa takot. * Marahay sana ta an Dios mismo inaasegurar kita na an siring na kinaban madatong​—minsan ngani bakong paagi sa mga paghihingoa nin tawo. Paagi sa saiyang propetang si Miqueas, si Jehova nanunuga sa sato na sa saiyang bagong kinaban nin katanosan, ‘mayo nin siisay man na magpapatakig sa saiyang banwaan.’​—Miqueas 4:4.

2. (a) Paano kita sinasadol kan Kasuratan na matakot sa Dios? (b) Anong mga hapot an puedeng bumangon kun ineestudyaran ta an satong katongdan na matakot sa Dios?

² Sa ibong na kampi, an takot puede man na magin positibong puersa. Sa Kasuratan, an mga lingkod nin Dios paorootrong sinasadol na matakot ki Jehova. Sinabihan ni Moises an mga Israelita: “Si Jehova na saimong Dios an maninigo mong katakotan, asin sia an maninigo mong paglingkodan.” (Deuteronomio 6:13) Pakalihis nin dakol na siglo nagsurat si Salomon: “Matakot ka sa tunay na Dios asin otobon mo an saiyang mga togon. Huli ta ini iyo an bilog na katongdan nin tawo.” (Eclesiastes 12:13) Paagi sa satong paghuhulit, na ginigibo sa pagdirehir kan mga anghel, sinasadol ta man an mga tawo na ‘matakot sa Dios asin pamurawayon sia.’ (Kapahayagan 14:​6, 7) Apuera sa pagkatakot ki Jehova, an mga Kristiano dapat na mamoot sa saiya sa bilog nindang puso. (Mateo 22:​37, 38) Paano niato mamomotan an Dios asin kadungan kaiyan matakot sa saiya? Taano ta kaipuhan na matakot sa sarong mamomoton na Dios? Anong mga pakinabang an nakukua ta sa pagpatalubo nin diosnon na takot? Tanganing masimbag an mga hapot na ini, dapat ta ngunang masabotan an kahulogan kan pagkatakot sa Dios asin kun paanong an klaseng ini nin takot sarong pundamental na kabtang kan satong relasyon ki Jehova.

May Pagkangirhat na Paggalang, Reberensia, Asin Takot

3. Ano an kahulogan kan pagkatakot sa Dios?

³ An pagkatakot sa Dios sarong pagmate na maninigong ipaheling nin mga Kristiano sa Kaggibo sa sainda. An sarong pakahulogan sa takot na ini iyo “an may pagkangirhat na paggalang asin hararom na reberensia sa Kaglalang asin nakararahay na grabeng takot na mapaanggot sia.” Sa siring, an pagkatakot sa Dios nakaiimpluwensia sa duwang mahalagang aspekto kan satong buhay: an satong aktitud sa Dios asin an satong aktitud sa gawe-gawe na ikinaoongis nia. Siempre pa, an duwang aspektong iyan importante asin maninigo na maingat na estudyaran. Arog kan sabi kan Expository Dictionary of New Testament Words ni Vine, para sa mga Kristiano an reberensial na takot na ini ‘sarong nagkokontrol na motibo sa buhay, sa mga bagay na may labot sa espirituwal sagkod moral.’

4. Paano niato mapatatalubo an pakamate nin may pagkangirhat na paggalang asin reberensia sa satong Kaglalang?

⁴ Paano ta mapatatalubo an pakamate nin may pagkangirhat na paggalang asin reberensia sa satong Kaglalang? Kita nangingirhat na may paggalang kun nakaheheling kita nin magayon na tanawon, nakagugulat na busay, o pambihirang pagsolnop nin saldang. Minakosog an pagmate na ini kun satuyang  namamansayan, paagi sa mga mata nin pagtubod, an kamot nin Dios na nasa likod kan siring na mga gibo nin paglalang. Apuera kaini, arog ni Hadeng David, narerealisar niato an sato mismong kasaditan kun ikokomparar sa makangingirhat na paglalang ni Jehova. “Kun naheheling ko an saimong kalangitan, an mga gibo kan saimong mga moro, an bulan asin mga bitoon na saimong hinaman, ano an magagadanon na tawo ta sia ginigirumdom mo?” (Salmo 8:​3, 4) An hararom na may pagkangirhat na paggalang na ini nagbubunga nin reberensia, na nagpapahiro sa sato na pasalamatan asin omawon si Jehova para sa gabos na ginigibo nia para sa sato. Si David nagsurat man: “Ika oomawon ko huli ta sa makangingirhat na paagi makangangalas an pagkagibo sa sako. Makangangalas an saimong mga gibo, na aram na gayo kan sakuyang kalag.”​—Salmo 139:14.

5. Taano ta maninigo kitang matakot ki Jehova, asin ano an marahayon na halimbawa niato mapadapit digdi?

⁵ An pakamate nin may pagkangirhat na paggalang asin reberensia nagpapatalubo nin nakararahay asin may paggalang na takot sa kapangyarihan nin Dios bilang Kaglalang asin sa saiyang autoridad bilang an lehitimong Namamahala sa uniberso. Sa sarong bisyon na naheling ni apostol Juan, “an mga nanggana sa mabangis na hayop asin sa ladawan kaiyan”​—an linahidan na mga parasunod ni Cristo sa saindang langitnon na kamugtakan​—nagpapahayag: “Dakula asin makangangalas an saimong mga gibo, Jehova Dios, an Makakamhan sa gabos. Matanos asin tunay an saimong mga dalan, Hade sa panahon na daing sagkod. Siisay nanggad an dai matatakot sa saimo, Jehova, asin magpapamuraway kan saimong ngaran?” (Kapahayagan 15:2-4) An pagkatakot sa Dios, na gikan sa hararom na reberensia sa saiyang kamahalan, nagmomotibar sa kairibang namamahala na ini ni Cristo sa langitnon na Kahadean na tawan nin onra an Dios bilang an kaharohalangkaweng autoridad. Kun ineestudyaran niato an gabos na nahaman ni Jehova asin an matanos na paagi nin pagdirehir nia sa uniberso, bako daw na igwa kita nin igong dahelan na matakot sa saiya?​—Salmo 2:11; Jeremias 10:7.

6. Taano ta maninigo kitang magkaigwa nin nakararahay na grabeng takot na mapaanggot si Jehova?

⁶ Minsan siring, apuera sa may pagkangirhat na paggalang asin reberensia, maninigo na kaiba sa pagkatakot sa Dios an nakararahay na grabeng takot na mapaanggot sia o pagigin masinuhay sa saiya. Taano? Huling minsan ngani si Jehova “maluway sa pagkaanggot asin mayaman sa mamomoton  na kabootan,” dapat tang girumdomon na “dai nanggad sia magpapalibre sa padusa.” (Exodo 34:​6, 7) Minsan ngani mamomoton asin maheherakon, dai tinotogotan ni Jehova an pagkabakong matanos asin tuyong paggibo nin sala. (Salmo 5:​4, 5; Habacuc 1:13) An mga tuyo asin daing pagsolsol na naggigibo kan maraot sa pagheling ni Jehova asin nagtutumang sa saiya dai puedeng dai mapadusahan. Siring kan sinabi ni apostol Pablo, “makangingirhat na bagay an maholog sa mga kamot kan nabubuhay na Dios.” An nakararahay na grabeng takot na maholog sa siring na situwasyon sa katapustapusi proteksion para sa sato.​—Hebreo 10:31.

“Sa Saiya Kamo Maninigong Mangapot”

7. Ano an mga dahelan niato na magtiwala sa kapangyarihan ni Jehova na magligtas?

⁷ An reberensial na pagkatakot sa Dios asin listong pakamansay sa saiyang makangingirhat na kapangyarihan an naeenot sa pagtitiwala asin kompiansa ki Jehova. Kun paanong an sarong sadang na aki nakamamateng protektado kun yaon sa harani an saiyang ama, kita nakamamate man na tiwasay asin kompiado sa lindong kan naggigiyang kamot ni Jehova. Mangnoha an nagin reaksion kan mga Israelita pakatapos na iluwas sinda ni Jehova sa Egipto: “Naheling man kan Israel an dakulang kamot na ginamit ni Jehova tumang sa mga Egipcio; asin an banwaan nagpoon na matakot ki Jehova asin magtubod ki Jehova.” (Exodo 14:31) An eksperyensia ni Eliseo nagpapatotoo man sa bagay na “an anghel ni Jehova nagkakampo sa palibot kan mga natatakot sa saiya, asin sinda saiyang iliniligtas.” (Salmo 34:7; 2 Hade 6:15-17) An kasaysayan sa presenteng aldaw kan banwaan ni Jehova asin posibleng marhay na an sato mismong personal na eksperyensia nagpapatunay na talagang ginagamit nin Dios an saiyang kapangyarihan sa kapakanan kan mga naglilingkod sa saiya. (2 Cronica 16:9) Sa siring nasasabotan niato na “sa pagkatakot ki Jehova yaon an makosog na kompiansa.”​—Talinhaga 14:26.

8. (a) Taano an pagkatakot sa Dios ta nagpapahiro sa sato na maglakaw sa saiyang mga dalan? (b) Ipaliwanag kun paano kita maninigo na “mangapot” ki Jehova.

⁸ An nakararahay na pagkatakot sa Dios bako sanang nagpapatalubo nin pagtitiwala asin kompiansa sa saiya kundi nagmomotibar man sa sato na maglakaw sa saiyang mga dalan. Kan inaguraron ni Salomon an templo, sia namibi ki Jehova: “[An Israel] matakot [logod] sa saimo paagi sa paglakaw sa saimong mga dalan sa gabos na aldaw na sinda nabubuhay sa ibabaw kan daga na itinao mo sa samong mga apoon.” (2 Cronica 6:31) Bago kaidto, sinadol ni Moises an mga Israelita: “Ki Jehova na saindong Dios kamo maninigo na sumunod, asin sia an maninigo nindong katakotan, asin an saiyang mga togon maninigo nindong otobon, asin sa saiyang tingog maninigo kamong maghinanyog, asin sia an maninigo nindong paglingkodan, asin sa saiya kamo maninigong mangapot.” (Deuteronomio 13:4) Siring kan malinaw na ipinaheheling kan mga bersikulong ini, an pagmawot na lumakaw sa mga dalan ni Jehova asin “mangapot” sa saiya minagikan sa pagtitiwala asin kompiansa sa Dios. Iyo, an diosnon na takot minomotibar kita na kuyogon si Jehova, paglingkodan sia, asin mangapot sa saiya, kun paanong an sarong sadang na aki tibaad literal na kumapot sa saiyang ama na lubos niang pinagtitiwalaan asin pinagkokompiaran.​—Salmo 63:8; Isaias 41:13.

An Pagkamoot sa Dios Pagkatakot sa Saiya

9. Ano an koneksion kan pagkamoot sa Dios asin kan pagkatakot sa Dios?

⁹ Sa punto de vista kan Kasuratan, an pagkatakot sa Dios dai nanggad hinahale an pagkamoot sa saiya. Sa kabaliktaran, an mga Israelita pinagbotan na ‘matakot ki Jehova tanganing maglakaw sa gabos niang dalan asin kamotan sia.’ (Deuteronomio 10:12) Sa siring, an pagkatakot sa Dios asin pagkamoot sa Dios magkakonektar na marhay. An pagkatakot sa Dios pinahihiro kita na maglakaw sa saiyang mga dalan, asin ini man nagtatao nin prueba kan satong pagkamoot sa saiya. (1 Juan 5:3) Lohiko ini huli ta kun namomotan ta an saro, tama sanang natatakot kita na makolgan ta sia. Kinolgan kan mga Israelita si Jehova paagi sa saindang rebeldeng iginawe sa kaawagan. Seguradong habo niatong gumibo nin ano man na ikamomondo man kan satong langitnon na Ama. (Salmo 78:​40, 41) Sa ibong na kampi, huling “ikinaoogma ni Jehova an mga natatakot sa saiya,” an satong pagkuyog asin pagigin fiel nagpapagayagaya sa saiyang puso. (Salmo 147:11; Talinhaga 27:11) An pagkamoot sa Dios pinahihiro kita na paogmahon sia, asin an pagkatakot sa Dios pinopogolan kita na kolgan sia. An mga iyan magkakomplemento, bakong magkasarongatan, na mga kualidad.

10. Paano ipinaheling ni Jesus na sia naogmang marhay sa pagkatakot ki Jehova?

¹⁰ An pamumuhay ni Jesu-Cristo malinaw na nagpapaheling kun paano kita puedeng dungan na mamoot asin matakot sa Dios. Dapit ki Jesus si propeta Isaias nagsurat: “Sa saiya matogdon an espiritu ni Jehova,  an espiritu nin kadonongan asin nin pakasabot, an espiritu nin hatol asin nin kakosogan, an espiritu nin kaaraman asin nin takot ki Jehova; asin maoogma sia sa pagkatakot ki Jehova.” (Isaias 11:​2, 3) Segun sa hulang ini, pinahiro si Jesus kan espiritu nin Dios na matakot sa saiyang langitnon na Ama. Apuera kaini, maririsa ta na an takot na ini, imbes na mapamogol, sarong gikanan nin satispaksion. Nakanompong si Jesus nin dakulang kaogmahan sa paggibo kan kabotan nin Dios asin sa pagpaogma sa saiya, dawa sa pinakamasakit na mga kamugtakan. Kan napapaatubang sa nagdadangadang na paggadan sa hariging pasakitan, sinabi nia ki Jehova: “Bakong an boot ko, kundi an boot mo.” (Mateo 26:39) Huli sa diosnon na takot na ini, si Jehova may pag-oyon na hininanyog an mga pagngayongayo kan saiyang Aki, pinakosog sia, asin ilinigtas sia hale sa kagadanan.​—Hebreo 5:7.

Pakanood na Matakot ki Jehova

11, 12. (a) Taano ta dapat kitang makanood na matakot sa Dios? (b) Paano kita tinotokdoan ni Jesus na matakot ki Jehova?

¹¹ Bakong arog kan natural nang may pagkangirhat na paggalang na namamatean ta kun namamasdan ta an puersa asin kagayonan kan naturalesa, an pagkatakot sa Dios bakong automatiko. Iyan an dahelan na an David na Orog na Dakula, si Jesu-Cristo, makahulang ipinaaabot sa sato an pangagda: “Madia kamo, mga aki, hinanyoga ako nindo; an pagkatakot ki Jehova iyo an itotokdo ko sa saindo.” (Salmo 34:11) Paano kita makanonood ki Jesus na matakot ki Jehova?

¹² Tinotokdoan kita ni Jesus na matakot ki Jehova paagi sa pagtabang sa sato na masabotan an marahayon na personalidad kan satong langitnon na Ama. (Juan 1:18) Ihinahayag kan mismong halimbawa ni Jesus kun ano an kaisipan nin Dios asin kun ano an pagtratar nia sa iba, ta eksaktong ipinabanaag ni Jesus an personalidad kan saiyang Ama. (Juan 14:​9, 10) Apuera kaini, paagi sa atang ni Jesus, nakadodolok kita ki Jehova kun kita namimibi para sa kapatawadan nin satong mga kasalan. An marahayon na kapahayagan na ini kan pagkaherak nin Dios saro mismong mapuersang dahelan na matakot sa saiya. An salmista nagsurat: “Yaon sa saimo an tunay na pagpatawad, tanganing ika katakotan.”​—Salmo 130:4.

13. Anong mga lakdang na sinabi sa libro nin Talinhaga an nakatatabang sa sato na matakot ki Jehova?

¹³ Sinasabi kan libro nin Talinhaga an serye nin mga lakdang na nagpapangyari sa sato na mapatalubo an diosnon na takot. “Aki ko, kun ika mag-aako kan sakong mga tataramon asin magpapahalaga kan sakong mga togon, tanganing magtao nin atension sa kadonongan paagi sa saimong talinga, na ikakiling mo an saimong puso sa pakamansay; dugang pa, kun ika mag-apod sa pakasabot mismo asin ika magkurahaw sa pakamansay, . . . sa siring masasabotan mo an pagkatakot ki Jehova, asin makukua mo an mismong kaaraman nin Dios.” (Talinhaga 2:1-5) Kun siring, tanganing matakot sa Dios, dapat tang pag-adalan an saiyang Tataramon, maigot na maghingoang masabotan an instruksion kaiyan, dangan tawan nin maingat na atension an hatol kaiyan.

14. Paano ta masusunod an hatol na itinao sa mga hade sa Israel?

¹⁴ An lambang hade sa suanoy na Israel pinagbotan na gumibo nin kopya kan Ley asin ‘basahon iyan sa gabos na aldaw kan saiyang buhay, tanganing sia makanood na matakot ki Jehova na saiyang Dios tanganing otobon an gabos na tataramon kan ley.’ (Deuteronomio 17:​18, 19) An pagbasa asin pag-adal sa Biblia siring man kahalaga para sa sato tanganing kita makanood na matakot ki Jehova. Mantang iinaaplikar ta sa satong buhay an mga prinsipyo sa Biblia, luway-luway niatong nakukua an kadonongan  asin kaaraman nin Dios. ‘Nasasabotan ta an pagkatakot ki Jehova’ huling naheheling ta an marahay na mga resulta kaiyan sa satong buhay, asin pinahahalagahan tang marhay an satong relasyon sa Dios. Apuera kaini, paagi sa regular na pakipagtipon sa mga kapagtubod, an mga aki sagkod gurang puedeng maghinanyog sa pagtotokdo nin Dios, makanood na matakot sa Dios, asin lumakaw sa saiyang mga dalan.​—Deuteronomio 31:12.

Maogma an Gabos na Natatakot ki Jehova

15. Sa anong mga paagi na an pagkatakot sa Dios konektado sa satong pagsamba sa saiya?

¹⁵ Base sa nasambitan sa enotan, masasabotan ta na an pagkatakot sa Dios sarong nakararahay na aktitud na maninigong kultibaron niato gabos, huling iyan sarong pundamental na kabtang kan satong pagsamba ki Jehova. Minomotibar kita kaiyan na magtiwala sa saiya nin lubos, na maglakaw sa saiyang mga dalan, asin mangapot sa saiya. Siring kan nagin totoo ki Jesu-Cristo, an pagkatakot sa Dios puedeng magpahiro man sa sato na otobon an satong promesa nin pagdusay ngonyan asin sa bilog na panahon na daing sagkod.

16. Taano ta dinadagka kita ni Jehova na matakot sa saiya?

¹⁶ An diosnon na takot nungkang makangingiri o sobra kamapamogol. “Maogma an gabos na natatakot ki Jehova, na naglalakaw sa saiyang mga dalan,” an asegurasyon sa sato kan Biblia. (Salmo 128:1) Dinadagka kita ni Jehova na matakot sa saiya huli ta aram niang maprotehir sa sato an kualidad na ini. An saiyang mamomoton na pagmakolog maririsa ta sa saiyang mga tataramon ki Moises: “Kun pataluboon sana kutana ninda [kan mga Israelita] an puso nindang ini na matakot sa sako asin danay na otobon an gabos kong togon, tanganing ikarahay ninda asin kan saindang mga aki sagkod sa panahon na daing talaan!”​—Deuteronomio 5:29.

17. (a) Anong mga pakinabang an nakukua ta sa pagkatakot sa Dios? (b) Anong mga aspekto kan diosnon na takot an pag-oolayan sa masunod na artikulo?

¹⁷ Kaagid kaiyan, kun patataluboon ta an satong puso na matakot sa Dios, ikararahay niato iyan. Sa anong mga paagi? Enot sa gabos, an siring na aktitud makapaoogma sa Dios asin idadayupot kita sa saiya. Naaraman ni David base sa personal na eksperyensia na “ootobon nia an mawot kan mga natatakot sa saiya, asin dadangogon nia an agrangay ninda na tabangan, asin sinda saiyang ililigtas.” (Salmo 145:19) Ikaduwa, makikinabang kita sa diosnon na takot huli ta magkakaigwa iyan nin epekto sa satong aktitud sa maraot. (Talinhaga 3:7) Sisiyasaton kan masunod na artikulo kun paano an pagkatakot na ini nagpoprotehir sa sato sa espirituwal na peligro, asin rerepasohon kaiyan an nagkapirang nasa Kasuratan na halimbawa nin mga tawo na natakot sa Dios asin naglikay sa maraot.

[Nota sa Ibaba]

Masisimbag daw Nindo an Minasunod?

• Ano an kahulogan kan pagkatakot sa Dios, asin paano iyan nakakaapektar sa sato?

• Ano an koneksion kan pagkatakot sa Dios asin paglakaw sa kaibanan nin Dios?

• Paano ipinaheheling kan halimbawa ni Jesus na an pagkatakot sa Dios konektado sa pagkamoot sa Dios?

• Sa anong mga paagi niato mapatatalubo an satong puso na matakot ki Jehova?

[Mga Hapot Para sa Pag-adal]

[Ritrato sa pahina 17]

An mga hadeng Israelita pinagbotan na gumibo nin personal na kopya kan Ley asin basahon iyan aroaldaw

[Ritrato sa pahina 18]

An pagkatakot ki Jehova nagmomotibar sa sato na magtiwala sa saiya siring sa pagtitiwala nin sarong aki sa saiyang ama

[Picture Credit Line sa pahina 15]

Mga bitoon: Retrato kan Malin, © IAC/RGO 1991