“Siisay daa Ako Sabi kan mga Tawo?”

PANAHON na naman nin Navidad. An mga tawo sa bilog na globo gustong iselebrar an sarong kumpleanyo. Kiisay na kumpleanyo? Sa Aki daw nin Dios o sa saro sanang debotong Judio na may intension na repormaron an relihion na nangingibabaw sa saiyang lugar kan enot na siglo? Iyan daw kumpleanyo nin sarong parasurog kan mga dukha, sarong rebelde na nagin dakulang huma sa Imperyo nin Roma kaya sia ginadan, o tibaad sarong may kabatidan na idinoon an sadiring kaaraman asin panlaog na kahadean nin kadonongan? May dahelan kamong mag-isip-isip, ‘An totoo, siisay daw si Jesu-Cristo?’

Si Jesus mismo interesado sa simbag nin mga tawo sa hapot na iyan. “Siisay daa ako sabi kan mga tawo?” an hapot nia kaidto sa saiyang mga disipulo. (Marcos 8:27) Taano ta naghapot sia? Dakol an nagpondo na sa pagsunod sa saiya. An iba pa minalataw na naribaraw asin nadesganar pakatapos na haboan nia an saindang paghihingoa na gibohon siang hade. Apuera kaini, kan inangat kan saiyang mga kaiwal, si Jesus dai nagtao nin tanda hale sa langit tanganing patunayan kun siisay sia. Kaya sa pagsimbag sa hapot na iyan, ano an sinabi kan saiyang mga apostol manongod sa kun siisay sia? Sinabi ninda an nagkapira sa lakop na opinyon kan mga tawo: “An iba nagsasabing si Juan Bautista, an iba si Elias, an iba man si Jeremias o  saro sa mga propeta.” (Mateo 16:​13, 14) Dai ninda sinambit an dakol na mapagtatsar na bansag na naglalakop kan panahon na iyan sa Palestina manongod ki Jesus​​—paralanghad, nagdodonongdonongan, falsong propeta, bua pa ngani.

An Dakol na Aspekto ni Jesus

Kun iyan man an ihapot ni Jesus ngonyan, tibaad bagohon nia ngani an pagkahapot kaiyan: “Siisay daa ako sabi kan mga intelektuwal?” Sa giraray, an mga simbag gayod magigin arog kaini: Kadakol nin manlaenlaen na opinyon. “Si Jesus nagin sarong kabayo na sinakayan na nin laen-laen na mga tawo sa kadakol na laen-laen na direksion,” an sabi ni David Tracy kan Unibersidad nin Chicago. Sa nag-aging siglo, nagamit na nin mga intelektuwal an kadakoldakol na komplikadong paagi nin sosyolohiya, antropolohiya, asin literaryo mantang pinoprobaran nindang magpormular nin mga simbag sa hapot na kun siisay talaga si Jesus. Bilang resulta, siisay talaga sa paghona ninda si Jesus?

An nagkapirang intelektuwal nagpapadagos na maghingako na an Jesus sa kasaysayan sarong eskatolohikong propetang Judio na nangangapodan para sa pagsolsol. Minsan siring, pinondo nindang apodon siang Aki nin Dios, Mesiyas, asin Parabalukat. An kadaklan kinukuestion an pagkasaysay sa Biblia kan saiyang langitnon na ginikanan asin kan saiyang pagkabuhay liwat. Para sa iba pa, si Jesus saro sanang tawo na paagi sa saiyang arogan na pamumuhay asin katokdoan pinukaw an nagkapirang relihion na sa kahurihurihi pinagsararo sa Kristianismo. Asin arog kan sinabi sa Theology Today, an iba pa minamansay si Jesus bilang “sarong tatsador, naglalagawlagaw na may kabatidan, o mistikong paraoma; organisador nin komunidad, poetang hippie na kinikritikar an establisadong sosyedad, o dai basta-basta nalolokong probokador na prangkang ipinapahayag an saiyang opinyon sa tahaw nin nagkakariribok, pobre, madaling maanggot sa sosyedad na mga baryo na huri na sa panahon sa Palestina.”

Igwa man nin mas pambihirang mga opinyon. An imahen nin sarong itom na Jesus biglang nagbutwa sa musikang rap, mga gibo nin arte sa siudad, sa bayle pa ngani. * An iba naghohona na si Jesus sa katunayan sarong babae. Kan tig-init nin 1993, naheling kan mga nagbisita sa Eksibisyon sa Orange County sa California an sarong estatuwa ni “Christie,” sarong huba, babaeng “Cristo” na nasa krus. Kan panahon man na idto sa Nueva York, si “Christa”​​—sarong nakapako sa krus na babaeng “Jesus”​​—nakaeksibir. An duwang estatuwa nagin dahelan nin grabeng kontrobersia. Asin kan kapinonan nin 1999, an mga namamakal makakakua nin libro “manongod sa pagkamoot sa lambang saro kan Aking si Jesus asin kan saiyang ayam, si Anghel.” An saindang relasyon ilinaladawan bilang “nakapupukaw nin boot sa espirituwal na paagi asin ipinaheheling kun paanong an aki asin ayam andam na isakripisyo an saindang buhay para sa lambang saro.”

Talaga daw na Mahalaga Iyan?

Taano ta maninigong magin interesado kamo kun siisay si Jesus kaidto asin ngonyan? Sarong bagay huli ta, sa pagkotar ki Napoleon, “si Jesu-Cristo nagkaigwa nin impluwensia asin nagboot sa Saiyang mga nasasakopan minsan mayo an Saiyang naheheling na presensia sa pisikal.” Paagi sa mapuersa niang mga katokdoan asin paagi sa pamumuhay nia, si Jesus mapuersang nakaapektar sa buhay kan binilyon na tawo sa laog nin haros duwang ribong taon. An sarong parasurat angay na nagsabi: “An gabos na hukbo na nagmartsa kasuarin man, asin an gabos na hukbong-dagat na pinundar kasuarin man, patin an gabos na parlamentong nagtukaw sa puesto kasuarin man, an gabos na hade na nagreynar kasuarin man, pagsararoon man dai nakaapektar sa buhay nin tawo sa dagang ini na siring kamapuersa.”

Dugang pa, kaipuhan nindong mamidbid kun siisay si Jesus kaidto asin ngonyan huli ta magkakaigwa sia nin direktang epekto sa saindong ngapit. May oportunidad kamong magin sakop nin sarong inestablisar na langitnon na gobyerno​​—an Kahadean nin Dios sakop ni Jesus. An satong maribok na planeta ibabalik sa kahangahangang pagkalaenlaen nin buhay asin balanseng ekolohiya sa pangengenot ni Jesus. Inaasegurar kita kan hula sa Biblia na pakakakanon an mga nagugutom, aasikasohon an mga dukha, paoomayan an mga may helang, asin bubuhayon liwat an mga gadan kan Kahadean ni Jesus.

Daing duwa-duwa na gusto nindong maaraman kun anong klaseng tawo an mamamayo sa siring na gobyerno na kaipuhan na marhay. An masunod na artikulo matabang saindo na magkaigwa nin pakarorop sa tunay na Jesus.

[Nota sa Ibaba]