An mga Bendisyon kan Maogmang Bareta

“Linahidan ako ni Jehova na magsabi kan maogmang bareta sa mga mahoyo. Isinugo nia ako sa pagpaomay sa mga nasasakitan an puso, . . . sa pagranga kan gabos na nagtatangis.”​—ISAIAS 61:​1, 2.

1, 2. (a) Ihinayag ni Jesus na sia an ano, asin paano? (b) Anong mga bendisyon an itinao kan maogmang bareta na ipinaisi ni Jesus?

 SARONG aldaw nin Sabbath sa kapinonan kan saiyang ministeryo, si Jesus nasa sinagoga sa Nazaret. Segun sa rekord, “itinao sa saiya an balumbon ni propeta Isaias, asin binukasan nia an balumbon asin nakua an lugar na duman nasusurat: ‘An espiritu ni Jehova yaon sa sako, huli ta linahidan nia ako na magpahayag kan maogmang bareta.’” Nagpadagos si Jesus sa pagbasa kan mga sinasabi pa sa hula. Dangan nagtukaw sia asin nagsabi: “Ngonyan an kasuratan na ini na saindo pa sanang nadadangog naotob na.”​—Lucas 4:16-21.

² Sa paaging ini, nagpamidbid si Jesus na sia an ihinulang paraebanghelyo, an parabalangibog kan maogmang bareta asin paradara nin karangahan. (Mateo 4:23) Asin maogmang bareta nanggad an sasabihon ni Jesus! Ipinaaram nia sa mga nagdadangog sa saiya: “Ako iyo an ilaw kan kinaban. An minasunod sako dai nanggad maglalakaw sa kadikloman, kundi magkakaigwa kan ilaw nin buhay.” (Juan 8:12) Sinabi man nia: “Kun kamo magdanay sa sakong tataramon, kamo tunay na sakong mga disipulo, asin mamimidbid nindo an katotoohan, asin an katotoohan mapatalingkas sa saindo.” (Juan 8:​31, 32) Iyo, yaon ki Jesus an “mga tataramon nin buhay na daing katapusan.” (Juan 6:​68, 69) Ilaw, buhay, katalingkasan​—sierto na ini mga bendisyon na dapat pahalagahan na marhay!

3. Anong maogmang bareta an ihinulit kan mga disipulo ni Jesus?

³ Pakatapos kan Pentecostes 33 C.E., ipinadagos kan mga disipulo an gibohon ni Jesus na pag-ebanghelyo.  Ihinulit ninda an ‘maogmang bareta kan kahadean’ sa mga Israelita sagkod sa mga tawo kan mga nasyon. (Mateo 24:14; Gibo 15:7; Roma 1:16) An mga naghimate namidbid si Jehova Dios. Sinda nakatalingkas sa relihiosong pagkaoripon asin nagin kabtang kan bagong espirituwal na nasyon, an “Israel nin Dios,” na an mga miembro igwa nin esperansang mamahala sagkod lamang sa langit kaiba kan saindang Kagurangnan, si Jesu-Cristo. (Galacia 5:1; 6:16; Efeso 3:5-7; Colosas 1:​4, 5; Kapahayagan 22:5) Tunay nanggad na idto mayaman na mga bendisyon!

Pag-ebanghelyo Ngonyan

4. Sa anong paagi inootob ngonyan an sugo na ihulit an maogmang bareta?

⁴ Ngonyan, an linahidan na mga Kristiano, na sinusuportaran nin nagdadakol na “dakulang kadaklan” nin “ibang karnero,” padagos na inootob an makahulang sugo na enot na itinao ki Jesus. (Kapahayagan 7:9; Juan 10:16) Bilang resulta, an maogmang bareta ihinuhulit sa sokol na nungka pang nangyari kaidto. Sa 235 kadagaan asin teritoryo, an Mga Saksi ni Jehova nagluwas tanganing “magsabi kan maogmang bareta sa mga mahoyo . . . , sa pagpaomay sa mga nasasakitan an puso, sa pagbalangibog nin katalingkasan sa mga nabihag asin sa pagpabuklat sa mga mata kan mga bilanggo; sa pagbalangibog kan taon nin marahay na boot ni Jehova asin kan aldaw nin pamalos kan satong Dios; sa pagranga kan gabos na nagtatangis.” (Isaias 61:​1, 2) Huli kaini, an Kristianong pag-ebanghelyo padagos na nagtatao nin mga bendisyon sa dakol asin nin tunay na karangahan sa “mga nasa ano man na klase nin kahorasaan.”​—2 Corinto 1:​3, 4.

5. Mapadapit sa paghuhulit kan maogmang bareta, paano napapalaen an Mga Saksi ni Jehova sa mga iglesia nin Kakristianohan?

⁵ Totoo na an mga iglesia nin Kakristianohan nag-iisponsor nin mga porma nin pag-ebanghelyo. Dakol an nagsusugo nin mga misyonero tanganing gumibo nin mga proselito sa ibang kadagaan. Halimbawa, an The Orthodox Christian Mission Center Magazine nagbabareta dapit sa aktibidad kan mga misyonerong Ortodokso sa Madagascar, timog Aprika, Tanzania, asin Zimbabwe. Minsan siring, sa Iglesia Ortodokso, siring sa iba pang iglesia nin Kakristianohan, an dakulang mayoriya kan mga miembro mayo nin kabtang sa siring na gibohon. Sa kabaliktaran, an gabos na nagdusay na Saksi ni Jehova nagmamaigot na makikabtang sa pag-ebanghelyo. Nasasabotan ninda na an pagbalangibog kan maogmang bareta sarong ebidensia kan pagigin tunay kan saindang pagtubod. Nagsabi si Pablo: “Paagi sa puso an saro naggigibo nin pagtubod para sa katanosan, alagad ta paagi sa ngoso na an saro nagpapahayag sa publiko para sa kaligtasan.” An pagtubod na dai nagpapahiro sa saro garo man sana gadan.​—Roma 10:10; Santiago 2:17.

Maogmang Bareta na Nagtatao nin Daing Sagkod na mga Bendisyon

6. Anong maogmang bareta an ihinuhulit ngonyan?

⁶ An Mga Saksi ni Jehova naghuhulit kan pinakamaogma nang bareta. Binubuksan ninda an saindang Biblia asin ipinaheheling sa mga naghihimate na iinatang ni Jesus an saiyang buhay tanganing tawan an katawohan nin paagi na makadolok sa Dios, nin kapatawadan sa mga kasalan, asin kan paglaom na buhay na daing katapusan. (Juan 3:16; 2 Corinto 5:​18, 19) Ipinapaisi ninda na an Kahadean nin Dios itinindog na sa langit sa irarom kan linahidan na Hade, si Jesu-Cristo, asin na sa dai na mahahaloy hahaleon kaiyan an karatan sa daga asin didirehiran an pagbabalik kan Paraiso. (Kapahayagan 11:15; 21:​3, 4) Bilang kaotoban kan hula ni Isaias, ipinapaaram ninda sa saindang mga kataed na ngonyan na an “taon nin marahay na boot ni Jehova” na an katawohan puede pang maghimate sa maogmang bareta. Nagpapatanid man sinda na sa dai na mahahaloy maabot an “aldaw nin pamalos kan satong Dios” na paparaon ni Jehova an habong magsolsol na mga paragibo nin sala.​—Salmo 37:9-11.

7. Anong eksperyensia an nagpapaheling kan pagkasararo kan Mga Saksi ni Jehova, asin taano ta igwa sinda kan siring na pagkasararo?

⁷ Sa sarong kinaban na nag-aagi nin trahedya asin kalamidad, ini an solamenteng maogmang bareta na igwa nin daing sagkod na mga pakinabang. An mga nag-aako kaiyan nagigin kabtang nin sarong nagkakasararo, pambilog na kinaban na kasararoan nin magturugang na Kristiano na dai tinotogotan an pagkakalaen nin nasyon, tribo, o kamugtakan sa pagbuhay na magin dahelan na sinda magkabaranga. ‘Isinolog ninda an pagkamoot, huli ta iyan sangkap na bungkos nin pagkasararo.’ (Colosas 3:14; Juan 15:12) Naheling ini kan nakaaging taon sa sarong nasyon sa Aprika. Sarong aga an kabiserang  siudad napagmata huli sa baradilan. May mga nagpoprobar na magkudeta. Kan an atension napasiring sa etnikong mga isyu, an sarong pamilyang Saksi krinitisar huli sa pagkupkop sa mga kapwa Saksi na kabilang sa ibang grupong etniko. An pamilya nagsimbag: “Mga Saksi ni Jehova man sana an pinadagos mi sa samong harong.” Para sa sainda, bakong importante an etnikong mga pagkakalaen; an Kristianong pagkamoot​—pagtao nin karangahan sa mga nangangaipo​—an importante. An sarong paryente na bakong Saksi nagkomento: “An mga miembro kan gabos na relihion pinapasaloiban an saindang mga kapwa parasamba. Mga Saksi ni Jehova sana an dai naggibo kaiyan.” Dakol na kaagid na insidente na ibinareta hale sa mga kadagaan na nababanga huli sa guerra sibil an nagpapaheling na an Mga Saksi ni Jehova totoong ‘namomoot sa bilog na kasararoan nin mga tugang.’​—1 Pedro 2:17.

Binabakle kan Maogmang Bareta an mga Tawo

8, 9. (a) Anong mga pagbakle an ginigibo kan mga nag-aako kan maogmang bareta? (b) Anong mga eksperyensia an nagpapaheling kan puersa kan maogmang bareta?

⁸ An maogmang bareta konektado sa inapod ni Pablo na “buhay ngonyan asin sa madatong.” (1 Timoteo 4:8) Iyan bako sanang nagtatao nin makangangalas, seguradong paglaom para sa ngapit kundi nagbubunga man nin mga pagrahay sa “buhay ngonyan.” Bilang mga indibiduwal, an Mga Saksi ni Jehova ginigiyahan kan Tataramon nin Dios, an Biblia, tanganing ioyon an saindang buhay sa kabotan nin Dios. (Salmo 119:101) An sainda mismong personalidad nababago mantang kinukultibar ninda an mga kualidad na arog kan katanosan asin kaimbodan.​—Efeso 4:24.

⁹ Horophoropa an halimbawa ni Franco. Problema nia an pagigin aranggoton. Kun may problema, sia nagbabalinghaw asin nampapasa nin mga gamit. An saiyang agom nakipag-adal nin Biblia sa mga Saksi ni Jehova, asin an saindang Kristianong halimbawa luway-luway na nakatabang ki Franco na masabotan nia na kaipuhan niang magbakle. Nakipag-adal sia sa sainda sa Biblia asin sa katapustapusi ikinapaheling nia an mga bunga kan banal na espiritu na katoninongan asin pagpopogol sa sadiri. (Galacia 5:​22, 23) Saro sia sa 492 na nabautismohan sa Belgium durante kan 2001 taon nin paglilingkod. Horophoropa man si Alejandro. An hoben na lalaking iyan nagin adiktong marhay sa droga na pinababa nia an saiyang sadiri sagkod sa punto na sia nabubuhay na sa basurahan, na pinupurot an ano man na makukua niang ikakapabakal tangani na sustentohan an saiyang pagdodroga. Kan sia 22 anyos na, inimbitaran kan mga Saksi ni Jehova si Alejandro na mag-adal sa Biblia, asin uminoyon sia. Binasa nia an Biblia aroaldaw asin nag-atender sa Kristianong mga pagtiripon. Marikason na lininig nia an saiyang buhay kaya mayo pang anom na bulan, nakapakikabtang na sia sa pag-ebanghelyo​—saro sa 10,115 naggibo kaiyan kan nakaaging taon sa Panama.

 An Maogmang Bareta—Sarong Bendisyon sa mga Mahoyo

10. Sairisay an naghihimate sa maogmang bareta, asin paano nagbabago an saindang pananaw?

¹⁰ Ihinula ni Isaias na an maogmang bareta ihuhulit sa mga mahoyo. Sairisay an mahoyo na ini? Sinda an mga ilinaladawan sa libro nin Gibo na “may tamang tendensia sa buhay na daing katapusan.” (Gibo 13:48) Sinda mapakumbabang mga indibiduwal na manonompongan sa gabos na sektor kan sosyedad na binubuksan an saindang puso sa mensahe nin katotoohan. Nanonodan kan mga siring na an paggibo kan kabotan nin Dios nagtatao nin mga bendisyon na mas nagsosopay kisa ano man na itinatao kan sekular na kinaban. (1 Juan 2:15-17) Pero, paano natataros kan Mga Saksi ni Jehova an puso sa saindang pag-ebanghelyo?

11. Segun ki Pablo, paano maninigo na ihulit an maogmang bareta?

¹¹ Bueno, horophoropa an halimbawa ni apostol Pablo, na nagsurat sa mga taga Corinto: “Ako, kan ako magdian sa saindo, mga tugang, dai napadian sa sobrang pananaram o kadonongan na nagpapahayag kan sagradong hilom nin Dios sa saindo. Huli ta ako nagdesisyon na dai makaaram nin ano man dian sa saindo kundi si Jesu-Cristo, asin na sia ipinako.” (1 Corinto 2:​1, 2) Dai hiningoa ni Pablo na pahangaon an mga nagdadangog sa saiya paagi kan saiyang inadalan. Mayo siang ibang itinokdo kundi an mga katotoohan na ginarantiyahan nin Dios, mga katotoohan na nakasurat ngonyan sa Biblia. Mangnoha man an pagparigon ni Pablo sa boot kan saiyang kapwa paraebanghelyo na si Timoteo: “Ihulit mo an tataramon, gibohon iyan na may pagkasibot.” (2 Timoteo 4:2) Kaipuhan na ihulit ni Timoteo “an tataramon,” an mensahe nin Dios. Nagsurat man si Pablo ki Timoteo: “Gibohon mo an bilog mong makakaya tanganing ikaatubang mo an saimong sadiri na inooyonan nin Dios, sarong paragibo na mayo nin maninigong ikasupog, na ginagamit an tataramon kan katotoohan sa tamang paagi.”​—2 Timoteo 2:15.

12. Paano sinusunod kan Mga Saksi ni Jehova ngonyan an mga tataramon asin halimbawa ni Pablo?

¹² Sinusunod kan Mga Saksi ni Jehova an halimbawa ni Pablo, siring man an saiyang mga sinabi ki Timoteo. Rinerekonoser ninda an puersa kan Tataramon nin Dios asin ginagamit iyan nin tama mantang pinagmamaigotan ninda na ipaheling sa saindang mga kataed an angay na mga tataramon nin paglaom asin karangahan. (Salmo 119:52; 2 Timoteo 3:​16, 17; Hebreo 4:12) Totoo, ginagamit ninda nin tama an mga babasahon sa Biblia tanganing an mga interesado magkaigwa nin dugang pang kaaraman sa Biblia sa kombenyenteng panahon ninda. Alagad pirmeng hinihingoa ninda na ipaheling sa mga tawo an mga tataramon sa Kasuratan. Aram ninda na an ipinasabong na Tataramon nin Dios an mapahiro sa puso kan mga mapakumbaba. Asin an paggamit kaiyan sa arog kaining paagi nagpapakosog man sa saindang pagtubod.

‘Rangahon an Gabos na Nagtatangis’

13. Kan taon 2001, anong mga pangyayari an nagbunga nin lakop na pangangaipo nin pagtao nin karangahan sa mga nagtatangis?

¹³ An taon 2001 nagkaigwa nin mga kalamidad, asin bilang resulta, dakol na indibiduwal an nangangaipo nin karangahan. Kan nakaaging Setyembre naheling an sarong pambihirang halimbawa sa Estados Unidos, kan atakehon kan mga terorista an World Trade Center sa Nueva York asin an Pentagon harani sa Washington, D.C. Nasustohan nanggad an bilog na nasyon kan mga pag-atakeng idto! Sa atubangan nin siring na mga pangyayari, hiningoa kan Mga Saksi ni Jehova na otobon an sugo sa sainda na magtao nin ‘karangahan sa gabos na nagtatangis.’ Ipaheheling nin nagkapirang eksperyensia kun paano ninda ginigibo ini.

14, 15. Paano epektibong nagamit kan mga Saksi sa duwang magkalaen na okasyon an mga teksto tanganing rangahon an mga nagtatangis?

¹⁴ An sarong Saksi na bilog na panahon na paraebanghelyo dinolok an sarong babae sa gilid nin dalan asin hinapot kun ano an opinyon nia manongod sa nakaagi pa sanang mga pag-atake nin terorista. An babae nagpoon na humibi. Sinabi nia na sia namomondo asin mawot nia na kutana makatabang sia minsan paano. Sinabi sa saiya kan Saksi na an Dios interesadong marhay sa sato gabos, asin binasa nia an Isaias 61:​1, 2. Naintindihan kan babae an ipinasabong nin Dios na mga tataramon na ini, na nagsabi na an gabos nasa pagmondo. Inako nia an sarong pulyeto asin nagpasongko sa Saksi sa saiyang harong.

¹⁵ An duwang Saksi na nag-eebanghelyo nanuparan an sarong lalaki na may ginigibo sa saiyang sirongan. Nag-alok sinda na ipaheling sa saiya an mga tataramon nin karangahan base sa Kasuratan  nin huli sa nakaagi pa sanang trahedya sa World Trade Center. Sa saiyang pag-oyon binasa ninda an 2 Corinto 1:3-7, na kaiba an mga tataramon na: ‘An karangahan nagsosopay paagi sa Cristo.’ Inapresyar kan lalaki na an mga kataed niang Saksi nagpapaabot sa iba nin sarong bagay na nakararanga asin nagsabi: “Awot man logod na bendisyonan nin Dios an marahayon na ginigibo nindo.”

16, 17. Anong duwang eksperyensia an nagpapaheling kan puersa kan Biblia sa pagtabang sa mga indibiduwal na namomondo o napupurisaw sa mga trahedya?

¹⁶ An sarong Saksi na nagdadalaw liwat sa mga interesado nanuparan an aking lalaki nin sarong babae na interesado kaidto asin ipinaliwanag nia na sia nagmamakolog sa kamugtakan kan saiyang mga kataed pakatapos kan nakaagi pa sanang trahedya. Napangalas an lalaki na an Saksi nagtao kan saiyang sadiring panahon na dalawon an mga tawo asin aramon an kamugtakan ninda. Sinabi nia na an trabaho nia haroharani sa World Trade Center kan mangyari an pag-atake asin naheling nia an enterong pangyayari. Kan maghapot sia kun taano ta tinotogotan nin Dios an pagdusa, an Saksi nagbasa nin mga teksto sa Biblia, kaiba an Salmo 37:​39, na nagsasabi: “An kaligtasan kan mga matanos gikan ki Jehova; sia an saindang pailihan sa panahon nin kasakitan.” An lalaki maboot na kinumusta man an nagin kamugtakan kan Saksi asin kan saiyang pamilya, inimbitaran sia na bumalik, asin nagpahayag nin odok sa pusong apresasyon sa pagdalaw.

¹⁷ An saro pa sa rinibong nagtatangis na rinanga kan Mga Saksi ni Jehova kaidtong mga aldaw pakalihis kan mga pag-atake nin mga terorista iyo an sarong babae na nanuparan kan mga Saksi mantang dinadalaw ninda an saindang mga kataed. Napurisaw siang marhay sa nangyari asin naghinanyog mantang binabasa ninda an Salmo 72:12-14: “Ililigtas nia an dukha na naghahagad nin tabang, siring man an nagsasakit nin makuri asin an siisay man na mayo nin paratabang. Maheherak sia sa hababa asin sa dukha, asin an kalag kan mga dukha saiyang ililigtas. Gikan sa pan-aapi asin sa kadahasan saiyang tutuboson an saindang kalag, asin an saindang dugo magigin mahalagang marhay sa saiyang mga mata.” Kanigoan kamakahulogan kan mga tataramon na iyan! Pinabasa giraray kan babae sa mga Saksi an teksto asin pinadagos sinda sa saiyang harong tanganing ipadagos an pag-oolay. Kan matapos an pag-oolay, naponan na an sarong pag-adal sa Biblia.

18. Paano tinabangan nin sarong Saksi an saiyang mga kataed kan sia imbitaran na mamibi para sa sainda?

¹⁸ Sarong Saksi an nagtatrabaho sa sarong restawran sa sarong medyo mayaman na komunidad  kun saen an mga tawo kaidto bakong gayong interesado sa maogmang bareta kan Kahadean. Pakatapos kan mga pag-atake nin mga terorista, an komunidad risang natanyog. Kan Biernes na banggi pakatapos kan pag-atake, an manedyer kan restawran inagda an gabos na lumuwas asin magkapot nin mga kandila, na naggigibo nin sarong halipot na toninong na paghorophorop bilang paggirumdom sa mga biktima. Huli sa paggalang sa mga saboot ninda, an Saksi nagluwas asin nagtindog nin toninong sa gilid nin dalan. Aram kan manedyer na sia sarong ministro kan Mga Saksi ni Jehova, kaya pakatapos kan paghorophorop, sia an pinakiolayan kaini na magrepresentar sa gabos sa pamibi. Nag-oyon an Saksi. Sa saiyang pamibi, sinambit nia an lakop na pagmondo alagad sinabi nia na an mga nagmomondo dai kaipuhan na magmondo na dai na nin paglaom. Sinambit nia an panahon na an siring na teribleng mga pangyayari dai na mangyayari asin nagsabi na an gabos puedeng dumayupot nin orog sa Dios nin karangahan paagi sa tamang kaaraman basado sa Biblia. Paka-“Amen,” an manedyer​—kasunod an labing 60 katawo na nasa luwas kan restawran​—nagrani sa Saksi, pinasalamatan sia, asin kinugos sia, na nagsasabi na an pamibi iyo an pinakamagayon na nadangog nia kasuarin man.

Sarong Bendisyon sa Komunidad

19. Anong eksperyensia an nagpapaheling na may mga nakarerekonoser sa halangkaw na pamantayan kan Mga Saksi ni Jehova?

¹⁹ Nangorogna sa mga aldaw na ini—an mga komunidad kun saen aktibo an Mga Saksi ni Jehova nakikinabang sa saindang presensia​—siring kan sabi nin dakol. Paanong dai magigin puersa para sa ikararahay an sarong grupo nin mga tawo na nagpapalakop nin katoninongan, pagkaonesto, asin malinig na moral? Sa sarong nasyon sa Asia Sentral, nanuparan kan mga Saksi an sarong retiradong opisyal kan dating ahensiang panseguridad kan estado. Sinabi nia na kaidto iinasignar sia na mag-imbestigar sa laen-laen na organisasyon nin relihion. Kan magsiyasat sia sa Mga Saksi ni Jehova, naghanga sia sa saindang pagkaonesto asin marahay na gawe-gawe. Hinangaan nia an saindang marigon na pagtubod asin an bagay na an saindang katokdoan basado sa Kasuratan. An lalaking ini nag-oyon na mag-adal sa Biblia.

20. (a) Ano an ipinaheheling kan aktibidad na irineport kan Mga Saksi ni Jehova kan nakaaging taon? (b) Ano an nagpaparisa na kadakol pa an gigibohon, asin paano niato minamansay an satong pribilehio nin pag-ebanghelyo?

²⁰ Base sa nagkapirang eksperyensia na isinaysay sa artikulong ini, hale sa rinibo na puedeng isaysay, malinaw na an Mga Saksi ni Jehova sibot na marhay durante kan 2001 taon nin paglilingkod. a Nakipag-olay sinda sa minilyon na tawo, rinanga ninda an dakol na nagmomondo, asin binendisyonan an saindang pag-ebanghelyo. Igwa nin 263,431 nagsimbolisar kan saindang pagdusay sa Dios paagi sa pagpabautismo. Sa bilog na kinaban, an kabilangan kan mga paraebanghelyo nadagdagan nin 1.7 porsiento. Asin an bagay na 15,374,986 an nag-atender sa taonan na Memorial kan kagadanan ni Jesus nagpaparisa na kadakol pa an gigibohon. (1 Corinto 11:23-26) Magpadagos logod kita sa paghanap sa mga mahoyo na mahimate sa maogmang bareta. Asin sagkod na nagpapadagos an taon nin marahay na boot ni Jehova, padagos logod niatong rangahon an “mga nasasakitan an puso.” Kanigoan kaogmang pribilehio an yaon sa sato! Sierto na inootro niato gabos an mga tataramon ni Isaias: “Siertong gayo na ako magpapakagayagaya ki Jehova. An sakong kalag maggagayagaya sa sakong Dios.” (Isaias 61:10) Padagos logod kitang gamiton nin Dios mantang inootob nia an makahulang mga tataramon na ini: “An Soberanong Kagurangnan na Jehova magpapangyari kan pagsupang nin katanosan asin nin kaomawan sa atubangan kan gabos na nasyon.”—Isaias 61:11.

[Nota sa Ibaba]

Nagigirumdoman daw Nindo?

• Paano nabendisyonan an mga mahoyo paagi sa maogmang bareta na ihinulit ni Jesus?

• Anong mga bendisyon an nakamtan kan mga naghimate sa pag-ebanghelyo kan mga disipulo ni Jesus kan enot na siglo?

• Paano nabebendisyonan paagi sa maogmang bareta an mga naghihimate ngonyan?

• Paano niato minamansay an satong pribilehio na magin paraebanghelyo?

[Mga Hapot Para sa Pag-adal]

 [Tsart sa pahina 19-22]

REPORT KAN 2001 TAON NIN PAGLILINGKOD KAN MGA SAKSI NI JEHOVA SA BILOG NA KINABAN

 (Hilingon an publikasyon)

[Mga ritrato sa pahina 15]

Pirmeng ginigirumdom kan Mga Saksi ni Jehova an saindang paninimbagan na mag-ebanghelyo

[Mga ritrato sa pahina 17]

An mga naghihimate sa maogmang bareta nagigin kabtang nin sarong nagkakasararo, pambilog na kinaban na kasararoan nin magturugang