Magtugang na Nagpatalubo nin Magkalaen na Aktitud

AN MGA desisyon na ginigibo nin mga magurang dai malilikayan na makaapektar sa saindang mga aki. Iyan totoo ngonyan kun paanong totoo iyan kaidto sa tatamnan nin Eden. An rebeldeng iginawe ni Adan asin Eva nagkaigwa nin grabeng epekto sa bilog na katawohan. (Genesis 2:​15, 16; 3:1-6; Roma 5:12) Pero, an lambang saro sa sato igwa nin oportunidad na magpatalubo nin marahay na relasyon sa satong Kaglalang kun gusto niatong gibohon iyan. Ini malinaw na ipinaheling sa kasaysayan ni Cain asin Abel, an enot na magtugang sa kasaysayan nin tawo.

Mayo nin rekord sa Kasuratan na an Dios nakipag-olay ki Adan asin Eva pakatapos na pahaleon sinda sa Eden. Pero, dai naglikay si Jehova na makipag-olay sa saindang mga aki. Hale sa saindang mga magurang, daing duda na naaraman ni Cain asin Abel an nangyari. Naheheling ninda an “mga kerubin asin an naglalaad na espada na naglalabadlabad tanganing bantayan an dalan pasiring sa kahoy nin buhay.” (Genesis 3:24) Naheling man kan mga lalaking ini an pagigin totoo kan deklarasyon nin Dios na an ganot asin kolog tunay na mangyayari sa buhay.​—Genesis 3:​16, 19.

Siertong aram ni Cain asin Abel an mga tataramon ni Jehova sa halas: “Bubugtakan ko nin pakikienemigo sa pag-oltanan mo asin kan babae saka sa pag-oltanan kan saimong banhi asin kan saiyang banhi. Lulugadon ka nia sa payo asin lulugadon mo sia sa bool.” (Genesis 3:15) An aram ni Cain asin Abel manongod ki Jehova an mapangyari sa sainda na mapatalubo an inooyonan na relasyon sa saiya.

An paghorophorop sa hula ni Jehova asin sa saiyang mga kualidad bilang mamomoton na Paratabang seguradong nagpamate ki Cain asin Abel nin pagmawot na oyonan nin Dios. Alagad sagkod saen ninda kukultibaron an pagmawot na iyan? Mahiro daw sinda sono sa saindang natural na pagmawot na sambahon an Dios asin pataluboon an saindang espirituwalidad sagkod sa punto na gumibo sinda nin pagtubod sa saiya?—Mateo 5:3.

An Magtugang Nagdara nin mga Dolot

Sa katapustapusi, si Cain asin Abel nagdara nin mga dolot sa Dios. Iprinesentar ni Cain an mga bunga kan daga, asin si Abel nagdolot nin mga matuang ogbon kan saiyang kahayopan. (Genesis 4:​3, 4) An mga lalaking ini kan panahon na iyan tibaad mga 100 anyos, huli ta si Adan 130 kan sia nagin ama kan ikatolong aki niang lalaki, si Set.​—Genesis 4:25; 5:3.

An saindang mga dolot nag-iindikar na rinerekonoser ni Cain asin Abel an saindang makasalan na kamugtakan asin nagmawot kan pag-oyon nin Dios. Seguradong pinag-isipan ninda minsan paano an panuga ni Jehova may labot sa halas asin Banhi kan babae. Dai sinabi kun guranong panahon asin paghihingoa an itinao ni Cain asin Abel sa pagpatalubo nin aprobadong relasyon ki Jehova. Alagad an reaksion nin Dios sa saindang dolot nagtatao nin pakarorop sa kairairaroming kaisipan kan kada saro.

An nagkapirang intelektuwal nagsusuherir na minansay ni Eva si Cain bilang an “banhi” na magadan sa halas, huling kan namundag si Cain sia nagsabi: “Nangaki ako nin sarong lalaki sa tabang ni Jehova.” (Genesis 4:1) Kun ini man an pagtubod ni Cain, sia biyong nasasala. Sa ibong na lado, an atang ni Abel may kaibang pagtubod. Sa siring, “huli sa pagtubod si Abel nagdolot nin atang sa Dios na orog na mahalaga kisa ki Cain.”​—Hebreo 11:4.

Bako sanang an espirituwal na pakarorop ni  Abel asin an kawaran kaiyan ni Cain an pagkakalaen kan magtugang na ini. May pagkakalaen man sa aktitud. Kun siring, “mantang pinagheheling ni Jehova na may pag-oyon si Abel asin an saiyang dolot, dai nia hineling na may ano man na pag-oyon si Cain asin an saiyang dolot.” Posibleng marhay na paimbabaw sana an pagdolot ni Cain asin basta na sanang iprinesentar iyan. Alagad dai inooyonan nin Dios an pormal sanang pagsamba. Si Cain nagpatalubo nin maraot na puso, asin namansayan ni Jehova na sia may salang motibo. An reaksion ni Cain kan haboan an saiyang atang naghayag kan saiyang tunay na aktitud. Imbes na hingoahon na itama an mga bagay-bagay, “si Cain naanggot na marhay, asin an saiyang lalauogon nagpoon na magmurusdot.” (Genesis 4:5) Ihinayag kan saiyang hiro an maraot na mga ideya asin intension.

Patanid Asin Reaksion

Naaaraman an aktitud ni Cain, hinatolan sia nin Dios, na nagsasabi: “Taano ta naaanggot kang marhay asin taano ta murusdot an saimong lalauogon? Kun ika magibo nin marahay, dai daw magkakaigwa nin pag-omaw? Alagad kun dai ka magibo nin marahay, igwa nin kasalan na naglulukob sa tata, asin ika an minamawot kaiyan; asin ika daw, sa saimong kabtang, makadadaog kaiyan?”​—Genesis 4:​6, 7.

May leksion ini para sa sato. Sa katunayan, an kasalan naglulukob sa tata na andam na sibaon kita. Pero, tinawan kita nin Dios nin libreng kabotan, asin puede kitang pumili na gibohon an tama. Inagda ni Jehova si Cain na ‘gumibo nin marahay,’ alagad dai Nia sia pinirit na magbago. Pinili ni Cain an sadiri niang gusto.

An ipinasabong na pagkasaysay nagpapadagos: “Pakalihis kaiyan si Cain nagsabi ki Abel na saiyang tugang: ‘Magduman kita sa langtad.’ Kaya nangyari na mantang sinda yaon sa langtad sinalakay ni Cain si Abel na saiyang tugang asin ginadan sia.” (Genesis 4:8) Sa siring, si Cain nagin suwayan, daing herak na paragadan. Dai lamang sia nagpaheling ni kadikit na pagbasol kan maghapot si Jehova: “Haen si Abel na tugang mo?” Imbes, sa daing simpatiya asin daing galang na paagi, si Cain nagsimbag: “Inda. Ano ako parabantay kan sakong tugang?” (Genesis 4:9) Ihinayag kan direktang pagputik asin pagdehar na iyan sa responsibilidad an pagigin daing puso ni Cain.

Isinumpa ni Jehova si Cain asin pinalayas sia sa palibot kan Eden. An sumpa na isinabi na para sa daga minalataw na magigin mas sayod sa kaso ni Cain, asin an daga dai mamumunga kun kukultibaron nia iyan. Sia magigin naglalagawlagaw asin dulag sa daga. An reklamo ni Cain sa gabat  kan sentensia sa saiya naghahayag nin kahaditan na babaloson sia sa paggadan kan saiyang tugang, alagad dai sia nagpaheling nin sinserong pagsolsol. Si Jehova nagbugtak nin “sarong tanda” para ki Cain​​—posibleng marhay na sarong solemneng dekreto na naaraman asin sinunod nin iba patin an intension iyo na olangon an paggadan sa saiya huli sa pagbalos.​—Genesis 4:10-15.

Dangan si Cain “naghale sa atubangan ni Jehova asin nag-erok sa daga nin Pagkadulag na nasa sirangan nin Eden.” (Genesis 4:16) Huling nagkua nin agom sa saro sa saiyang mga tugang na babae o sobrina, nagtogdok sia nin sarong siudad na inginaran nia ki Enoc, an saiyang panganay na aki. An gikan ni Cain na si Lamec nagluwas na may madahas na tendensia kapareho kan saiyang maraot na apoon. Alagad an linya kan pamilya ni Cain biyong napara sa Baha kan kaaldawan ni Noe.​—Genesis 4:17-24.

Leksion Para sa Sato

May manonodan kita sa kasaysayan ni Cain asin Abel. Sinadol ni apostol Juan an mga Kristiano na magkaminorootmootan, “bakong arog ki Cain, na naggikan sa maraot asin guminadan sa saiyang tugang.” “An mga gibo [ni Cain] maraot, alagad an sa saiyang tugang matanos.” Si Juan nagsasabi man: “An lambang naoongis sa saiyang tugang paragadan, asin kamo nakakaaram na mayo nin paragadan na igwa pa dian sa saiya nin buhay na daing katapusan.” Iyo, an satong paagi nin pagtratar sa satong mga kapwa Kristiano may epekto sa satong relasyon sa Dios asin sa satong oportunidad sa buhay sa ngapit. Dai niato puedeng ikaongis an siisay man sa satong mga kapagtubod asin kamtan pa man giraray an pag-oyon nin Dios.​—1 Juan 3:11-15; 4:20.

Seguradong pareho an pagkapadakula ki Cain asin Abel, alagad si Cain mayo nin pagtubod sa Dios. Sa katunayan, ipinaheling nia an espiritu kan Diablo, an enot na ‘paragadan asin ama kan kaputikan.’ (Juan 8:44) Ipinaheheling kan iginawe ni Cain na kita gabos may pagpipilian, na isinusuway kan mga nagpipili na magkasala an sadiri ninda sa Dios, asin na si Jehova naggigibo kan saiyang paghokom sa mga habong magsolsol.

Sa ibong na lado, si Abel nagsagibo nin pagtubod ki Jehova. Tunay nanggad, “huli sa pagtubod si Abel nagdolot nin atang sa Dios na orog na mahalaga kisa ki Cain, na paagi sa pagtubod na iyan nag-ako sia nin patotoo na sia matanos, na an Dios nagpatotoo dapit sa saiyang mga balaog.” Minsan mayong sinambit an Kasuratan ni sarong tataramon na sinabi ni Abel, paagi sa saiyang arogan na pagtubod, sia “nagtataram pa giraray.”​—Hebreo 11:4.

Si Abel iyo an enot sa halabang linya nin mga nagdanay na may integridad. An saiyang dugo, na ‘nagkukurahaw ki Jehova hale sa daga,’ dai nalingawan. (Genesis 4:10; Lucas 11:48-51) Kun magibo kita nin pagtubod arog ni Abel, puede man niatong makamit an mahalagang marhay asin nagdadanay na relasyon ki Jehova.

[Kahon sa pahina 22]

AN PARAOMA ASIN AN PASTOR

An pagkultibar kan daga asin pag-ataman sa mga hayop an nagkapira sa enot na itinao nin Dios na mga responsibilidad ki Adan. (Genesis 1:28; 2:15; 3:23) An saiyang aki na si Cain nagin paraoma, asin si Abel nagin pastor. (Genesis 4:2) Minsan siring, mantang an kakanon kan katawohan mga prutas asin gulay sana sagkod kan pagkatapos kan Baha, taano ta mag-aataman nin mga karnero?​—Genesis 1:29; 9:​3, 4.

Tanganing dumakol, kaipuhan kan karnero an pag-ataman nin tawo. Pinatutunayan kan okupasyon ni Abel na inaataman nin tawo an magarong mga hayop na ini poon pa sa kapinonan kan kasaysayan nin katawohan. Dai sinasabi kan Kasuratan kun baga ginagamit kan kaenot-enoteng mga tawo an gatas nin hayop bilang gikanan nin kakanon, alagad dawa an mga gulay sana an kinakakan puedeng gamiton an lana nin karnero. Asin kun magadan an mga karnero, an anit kaiyan nagagamit sa kapakipakinabang na paagi. Halimbawa, tanganing gubingan si Adan asin Eva, tinawan sinda ni Jehova nin “haralabang gubing na anit.”​—Genesis 3:21.

Sa paano man, garo baga rasonableng ipamugtak na sa kapoonpooni si Cain asin Abel nagtitinabangan. Nagpoprodusir sinda nin sarong bagay na kaipuhan kan iba pa sa pamilya tanganing igwa pirme nin gugubingon asin igong makakakan.

[Ritrato sa pahina 23]

“An mga gibo [ni Cain] maraot, alagad an sa saiyang tugang matanos”