Nagtitiwala daw Kamo sa Sarong Dios na Tunay?

An sarong ekspedisyon na isinugo kan Museo nin Historya Natural kan Amerika nagbibiahe tanganing pag-adalan an sarong daga sa Artiko na irineport kan eksplorador na si Robert E. Peary na naheling nia mga pitong taon na bago kaini, kan 1906.

HALE sa Cape Colgate sa pinakaporong amihanan-solnopan na kabtang kan Amerika del Norte, naobserbaran ni Peary an garo baga puting mga alitoktok nin sarong harayong daga. Nginaranan nia iyan na Crocker Land bilang paggirumdom sa saro sa mga suminuporta sa saiya sa pinansial. Siertong ogmahon nanggad an mga miembro kan kasunod na ekspedisyon na ini kan makatanaw sinda nin sarong lugar sa enotan na may mga bulod, kababan, asin alitoktok na natatakopan nin yelo! Alagad dai nahaloy naaraman ninda na an hineheling ninda saro sanang imahinasyon na bagay sa Artiko. Nadaya si Peary kan optikong epekto nin atmospera na ini, asin ngonyan nakagamit na sinda nin panahon, kosog, asin rekurso tanganing siyasaton an sarong bagay na bakong totoo.

Ngonyan, dakol na tawo an nagtatao kan saindang debosyon asin panahon sa mga dios na sa pagtubod ninda tunay. Kan kaaldawan kan mga apostol ni Jesus, sinamba an mga dios na arog ni Hermes asin Zeus. (Gibo 14:​11, 12) Ngonyan, an mga dios na sinasamba kan mga Sinto, Hindu asin iba pang relihion sa kinaban may bilang na minilyon. Tunay nanggad, siring kan sinasabi kan Biblia, “igwa nin dakol na ‘mga dios’ asin dakol na ‘mga kagurangnan.’” (1 Corinto 8:​5, 6) Puede daw na magin tunay na mga dios an gabos na ini?

Mga Dios na “Dai Nakapagliligtas”

Halimbawa, estudyare an paggamit nin mga imahen o simbolo sa pagsamba. Para sa mga nagtitiwala sa sainda asin nag-aarang paagi ninda, an mga idolo garo baga mga paraligtas na igwa nin nakalalabi sa tawong kapangyarihan na puedeng balosan an mga tawo o iligtas sinda sa peligro. Alagad totoo daw na sinda makapagliligtas? May labot sa siring na mga bagay, an salmista nag-awit: “An mga idolo kan mga nasyon mga pirak asin bulawan, gibo kan mga kamot nin daganon na tawo. Igwa sindang ngoso, alagad mayo sindang ikataram; igwa sindang mga mata, alagad mayo sindang naheheling; igwa sindang mga talinga, alagad  mayo sindang nadadangog. Mayo man nin espiritu sa saindang mga ngoso.” Tunay nanggad, sinda mga dios na “dai nakapagliligtas.”—Salmo 135:15-17; Isaias 45:20.

Totoo, tibaad ibinibilang kan mga paragibo nin mga idolo na an ginibo kan saindang mga kamot igwa nin buhay asin kapangyarihan. Asin an mga nagsasamba sa mga idolo nagtitiwala sa sainda. “Pinapasan ninda [an idolo],” an sabi ni propeta Isaias, “dinadara ninda iyan asin ilinalaag iyan sa lugar kaiyan tangani na iyan tumindog na daing hiro-hiro.” Idinugang nia: “Sa natitindogan kaiyan dai iyan naghahale. May nag-aagrangay ngani dian, alagad dai iyan minasimbag; hale sa kasakitan nin saro dai sia iliniligtas kaiyan.” (Isaias 46:7) An totoo iyo na an idolo nagdadanay na daing buhay gurano man kasinsero an pagtubod kan mga nagtitiwala dian. An siring na inukit na mga imahen asin minoldeng estatuwa “daing kamanungdanan na mga dios.”—Habacuc 2:18.

An pag-idolo, pagreberensiar, o pagsamba sa mga sikat sa langtad nin aling-alingan, mga sikat sa isport, politikal na mga sistema, asin nagkapirang namomoon sa relihion ordinaryo na man ngonyan. Dugang pa, an kuarta dios para sa dakol. Sa lambang kaso, an mga idolong ini ipinepresentar na igwa nin mga kualidad na mayo man sinda. Dai ninda itinatao asin dai ninda ikatatao an gabos na linalaoman kan mga naniniwala sa sainda. Halimbawa, an kayamanan tibaad garo baga an solusyon sa dakol na problema, alagad mapandaya an kapangyarihan nin kayamanan. (Marcos 4:19) An sarong parasiyasat naghapot: “Paano niato ipaliliwanag an sarong bagay na pinagmamawot na marhay kan kadakoldakol na tawo, asin pinaniniwalaan na remedyo sa gabos, kun makamtan na nagkakaigwa nin dakol na magkakalaen na epekto poon sa nakadedesganar sagkod sa makolog na pangyayari?” Iyo, an pagmamaigot na kamtan an kayamanan tibaad maghagad na isakripisyo nin saro an may tunay na halaga, siring baga nin marahay na salud, nakakokontentong buhay pampamilya, dayupot na pakikikatood, o mahalagang marhay na relasyon sa Kaglalang. An saiyang dios nagigin sanang sarong “idolo nin kaputikan”!—Jonas 2:8.

“Mayo nin Nagsisimbag”

Kamangmangan na apodon na tunay an bako man na tunay. An mga parasamba sa dios na si Baal kan kaaldawan ni propeta Elias nanodan ini sa masakit na paagi. Marigon sindang nagtutubod na si Baal may kapangyarihan na pahiligon an kalayo hale sa langit asin totongon an atang na hayop. Sa katunayan, “padagos sindang nag-aapod sa ngaran ni Baal poon aga sagkod odto, na sinasabi: ‘O Baal, simbaga kami!’” Si Baal daw may mga talinga na puedeng makadangog asin ngoso na puedeng makataram? An salaysay nagpapadagos: “Mayo nin tingog, asin mayo nin nagsisimbag.” Tunay nanggad, “mayo nin pagtao nin atension.” (1 Hade 18:​26, 29) Si Baal bakong tunay, bakong buhay, o aktibo.

Kanigoan kahalaga na mamidbid asin sambahon niato an sarong Dios na tunay! Alagad siisay sia? Asin paanong an pagtitiwala sa saiya kapakipakinabang sa sato?

[Mga ritrato sa pahina 3]

An kaibaiba ni Peary na si Egingwah nagtatanaw sa harayo sa paghanap nin daga

Robert E. Peary

[Credit Lines]

Egingwah: Hale sa librong The North Pole: Its Discovery in 1909 Under the Auspices of the Peary Arctic Club, 1910; Robert E. Peary: NOAA

[Mga ritrato sa pahina 4]

Dakol an nadadaya kan iniidolo sa kinaban na ini