Inako Na daw Nindo “an Espiritu kan Katotoohan”?
Inako Na daw Nindo “an Espiritu kan Katotoohan”?
“Tatawan . . . kamo [kan Ama] nin saro pang paratabang tanganing makaibanan nindo sagkod lamang, an espiritu kan katotoohan.”—JUAN 14:16, 17.
1. Anong importanteng impormasyon an itinao ni Jesus sa saiyang mga disipulo kaidtong huri niang mga oras kaiba ninda sa kuarto sa itaas?
“KAGURANGNAN, saen ka maduman?” Saro iyan sa mga ihinapot sa saiya kan mga apostol ni Jesus kaidtong huring mga oras nia kaiba ninda sa sarong kuarto sa itaas duman sa Jerusalem. (Juan 13:36) Mantang nagpapadagos an pagtiripon, sinabi sa sainda ni Jesus na ngonyan babayaan na nia sinda tanganing bumalik sa saiyang Ama. (Juan 14:28; 16:28) Sia dai na ninda makakaibanan nin personal tanganing tokdoan sinda asin simbagon an mga hapot ninda. Minsan siring, pinakosog nia liwat an boot ninda, na sinasabi: “Makikimaherak ako sa Ama asin tatawan nia kamo nin saro pang paratabang [o, pararanga] tanganing makaibanan nindo sagkod lamang.”—Juan 14:16, nota sa ibaba.
2. Ano an ipinanuga ni Jesus na isusugo sa mga disipulo pagkahale nia?
2 Sinabi ni Jesus kun ano an paratabang na iyan asin ineksplikar kun paano iyan matabang sa saiyang mga disipulo. Sinabi nia sa sainda: “Minsan siring, an mga bagay na ini dai ko sinabi sa saindo kan enot, huli ta kaiba nindo ako. Alagad ngonyan maduman na ako sa nagsugo sa sako . . . Para sa saindong kapakinabangan na ako mahale. Huli ta kun dai ako maghale, an paratabang dai madigdi sa saindo; alagad kun ako paduman, isusugo ko sia sa saindo. . . . Kun an sarong iyan dumatong na, an espiritu kan katotoohan, gigiyahan nia kamo sa gabos na katotoohan.”—Juan 16:4, 5, 7, 13.
3. (a) Kasuarin isinugo “an espiritu kan katotoohan” sa enot na mga Kristiano? (b) Ano an sarong importanteng paagi na an espiritu “paratabang” sa sainda?
3 An panugang ini naotob kan Pentecostes 33 C.E., siring sa pinatotoohan ni apostol Pedro: “An Jesus na ini binuhay liwat nin Dios, na manongod kaiyan kami gabos mga saksi. Kun siring huling sia ilinangkaw sa too nin Dios asin nag-ako kan ipinanugang banal na espiritu hale sa Ama, ibinubo nia ini na saindong naheheling asin nadadangog.” (Gibo 2:32, 33) Arog kan maheheling niato sa huri, an banal na espiritu na ibinubo kan Pentecostes dakol an nagibo para sa enot na mga Kristiano. Alagad ipinanuga ni Jesus na “an espiritu kan katotoohan” ‘mapagirumdom sa sainda kan gabos na bagay na isinabi nia sa sainda.’ (Juan 14:26) Papangyayarihon kaiyan na magirumdoman ninda an ministeryo asin mga itinokdo ni Jesus, pati an eksaktong mga tataramon nia, asin isurat iyan. Ini nangorognang makatatabang sa gurang nang si apostol Juan sa katapusan kan enot na siglo C.E. kan ponan niang isurat an saiyang Ebanghelyo. Kaiba sa salaysay na iyan an mahalagang marhay na konsehong itinao ni Jesus kan iintrodusir nia an Memorial kan saiyang kagadanan.—Juan, kapitulo 13-17.
4. Paano tinabangan kan “espiritu kan katotoohan” an enot na linahidan na mga Kristiano?
4 Ipinanuga man ni Jesus sa enot na mga disipulong idto na an espiritu ‘matokdo sa sainda kan gabos na bagay’ asin ‘gigiyahan sinda sa gabos na katotoohan.’ Tatabangan sinda kan espiritu na masabotan an mas harararom na bagay sa Kasuratan asin mapagdanay an saindang pagkasararo sa kaisipan, pakasabot, saka katuyohan. (1 Corinto 2:10; Efeso 4:3) Sa siring, tinawan nin poder kan banal na espiritu an enot na mga Kristianong idto na magserbing sarong grupo nin “fiel asin may diskresion na oripon” na matagama sa indibiduwal na linahidan na mga Kristiano nin espirituwal na “kakanon sa igong panahon.”—Mateo 24:45.
An Espiritu Nagpapatotoo
5. (a) Anong bagong esperansa an ihinayag ni Jesus sa saiyang mga disipulo kan banggi nin Nisan 14, 33 C.E.? (b) Ano an magigin kabtang kan banal na espiritu sa pag-otob kan panuga ni Jesus?
5 Kan banggi nin Nisan 14, 33 C.E., ininsinuar ni Jesus sa mga disipulo nia na sa huri sinda aakoon nia asin mag-eerok kaiba nia saka kan saiyang Ama sa langit. Sinabi nia sa sainda: “Sa harong kan sakong Ama kadakol kan ontokan. Ta kun bako, sinabihan ko kutana kamo, huli ta ako maduman tanganing mag-andam nin lugar para sa saindo. Siring man, kun ako magduman asin mag-andam nin lugar para sa saindo, ako madigdi liwat asin ipag-iiba ko kamo, tanganing kun saen ako duman man kamo.” (Juan 13:36; 14:2, 3) Sinda magrereynar kaiba nia sa saiyang Kahadean. (Lucas 22:28-30) Tangani na sinda magkaigwa kan langitnon na paglaom na ini, sinda kaipuhan na ‘mamundag sa espiritu’ bilang espirituwal na mga aki nin Dios asin lahidan na maglingkod bilang mga hade saka saserdote kaiba ni Cristo sa langit.—Juan 3:5-8; 2 Corinto 1:21, 22; Tito 3:5-7; 1 Pedro 1:3, 4; Kapahayagan 20:6.
6. (a) Kasuarin nagpoon an langitnon na pag-apod, asin pira an nag-aako kan pag-apod na ini? (b) An mga inapod binautismohan tanganing magin kabtang kan ano?
6 An “langitnon na pag-apod” na ini nagpoon kan Pentecostes 33 C.E. asin, sa kabilogan, minalataw na natapos kan mga 1935. (Hebreo 3:1) An kabilangan kan mga tinatakan kan banal na espiritu na magin kabtang kan espirituwal na Israel 144,000, na “binakal hale sa katawohan.” (Kapahayagan 7:4; 14:1-4) An mga ini binautismohan tanganing magin kabtang kan espirituwal na hawak ni Cristo, kan saiyang kongregasyon, asin kan saiyang kagadanan. (Roma 6:3; 1 Corinto 12:12, 13, 27; Efeso 1:22, 23) Pakatapos kan saindang bautismo sa tubig asin paglahid kan banal na espiritu, luminaog sinda sa sarong sakripisyal na dalan, buhay na may integridad sagkod sa saindang kagadanan.—Roma 6:4, 5.
7. Taano ta an linahidan sanang mga Kristiano an tamang nakikikabtang sa mga emblema sa Memorial?
7 Bilang espirituwal na mga Israelita, an linahidan na mga Kristianong ini nasa bagong tipan na ginibo sa pag-oltanan ni Jehova asin kan “Israel nin Dios.” (Galacia 6:16; Jeremias 31:31-34) An bagong tipan ginibong balido kan pinabolos na dugo ni Cristo. Nasambitan ini ni Jesus kan iintrodusir nia an Memorial kan saiyang kagadanan. Isinurat ni Lucas: “Sia nagkua nin tinapay, nagpasalamat, binaraak iyan, asin itinao iyan sa sainda, na an sabi: ‘Ini nangangahulogan kan sakong hawak na itatao para sa saindo. Padagos na gibohon nindo ini sa paggirumdom sa sako.’ Siring man, an kopa sa iyo man sanang paagi pakapamanggi ninda, na sia nagsasabi: ‘An kopang ini nangangahulogan kan bagong tipan paagi sa sakong dugo, na papaboloson para sa saindo.’” (Lucas 22:19, 20) An natatada, o nawawalat pang mga miembro kan 144,000 na yaon pa digdi sa daga, iyo an mga tama sanang nakikikabtang sa emblemang tinapay asin arak sa Memorial kan kagadanan ni Cristo.
8. Paano naaaraman kan mga linahidan na nag-ako sinda kan langitnon na pag-apod?
8 Paano naaaraman kan mga linahidan na sinda nag-ako kan langitnon na pag-apod? Dai mamamaluan na inaako ninda an patotoo kan banal na espiritu. Sinuratan ni apostol Pablo an mga siring: “An gabos na ginigiyahan kan espiritu nin Dios, ini an mga aki nin Dios. . . . An espiritu man sana nagpapatotoo kaiba kan satong espiritu na kita mga aki nin Dios. Kun siring, kun kita mga aki, kita man mga paramana: mga paramana nanggad nin Dios, alagad kaibang mga paramana ni Cristo, basta kita iribang magdusa tangani man kitang iribang mapamuraway.” (Roma 8:14-17) Mapuersang marhay an patotoong ini kan espiritu na an mga may kasaditsaditing pagduda na sinda nag-ako kan langitnon na pag-apod makakakonklusyon na sinda dai nag-ako, asin kun siring dai sinda makikikabtang sa mga emblema sa Memorial.
An Espiritu Asin an Ibang Karnero
9. Anong duwang magkalaen na grupo an nasasambitan sa mga Ebanghelyo asin sa librong Kapahayagan?
9 Nasa isip an limitadong kabilangan nin mga Kristiano na inapod na kumompuesto sa espirituwal na Israel, sinda inapod ni Jesus na “sadangoton na aripompon.” Pinalaog sinda sa “toril” kan bagong tipan, na laen sa daing kabilangan na “ibang karnero,” na sinabi ni Jesus na dapat na tiponon man nia. (Lucas 12:32; Juan 10:16) An mga kabilang sa ibang karnero na tinipon sa panahon kan katapusan makompuesto sa “dakulang kadaklan” na nakatalagang makaligtas sa “dakulang kahorasaan,” na may esperansang mabuhay sagkod lamang sa paraisong daga. Interesante nanggad, an bisyon na inako ni Juan sa katapusan kan enot na siglo C.E. pinaglalaen an dakulang kadaklan na ini asin an 144,000 na miembro kan espirituwal na Israel. (Kapahayagan 7:4, 9, 14) An ibang karnero daw nag-aako man kan banal na espiritu, asin kun iyo, paano apektado kaiyan an saindang buhay?
10. Paano an ibang karnero binabautismohan “sa ngaran kan Ama asin kan Aki patin kan banal na espiritu”?
10 An banal na espiritu talagang may importanteng kabtang sa buhay kan ibang karnero. Sinisimbolisaran ninda an saindang pagdusay ki Jehova paagi sa pagpabautismo “sa ngaran kan Ama asin kan Aki patin kan banal na espiritu.” (Mateo 28:19) Saindang rinerekonoser an soberaniya ni Jehova, nagpapasakop sinda ki Cristo bilang saindang Hade asin Parabalukat, asin sinusunod ninda an paghiro kan espiritu, o puersa aktiba, nin Dios sa saindang buhay. Aroaldaw, hinihingoa nindang kultibaron sa saindang buhay “an bunga kan espiritu,” arin na baga, “an pagkamoot, kagayagayahan, katoninongan, pakatios, kabootan, karahayan, pagtubod, kahoyoan, pagpopogol sa sadiri.”—Galacia 5:22, 23.
11, 12. (a) Paano nasasantipikar an mga linahidan sa espesyal na marhay na paagi? (b) Sa anong paagi na an ibang karnero nasasantipikar asin pinagigin banal?
11 Dapat na pabayaan man kan ibang karnero an Tataramon nin Dios asin an saiyang banal na espiritu na dalisayon, o santipikaron, sinda. An mga linahidan nasantipikar na sa espesyal na marhay na paagi, ta sinda ipinahayag nang matanos asin banal bilang nobya ni Cristo. (Juan 17:17; 1 Corinto 6:11; Efeso 5:23-27) Inaapod sinda ni propeta Daniel na “mga banal kan Supremo,” na nag-ako kan Kahadean sakop kan “aki nin tawo,” si Cristo Jesus. (Daniel 7:13, 14, 18, 27) Mas naenot pa, paagi ki Moises asin Aaron, sinabi ni Jehova sa nasyon nin Israel: “Ako si Jehova na saindong Dios; asin dapat na santipikaron nindo an saindong sadiri asin dapat na magpakabanal kamo, huli ta ako banal.”—Levitico 11:44.
12 An terminong “santipikasyon” sa pundamental nangangahulogan “an akto o proseso nin pagpagin banal, pagsiblag, o pagtagama tanganing maglingkod ki o gamiton ni Jehova Dios; an pagigin banal, nasantipikar, o nadalisay.” Kaidto pang 1938, sinabi na kan The Watchtower na an mga Jonadab, o ibang karnero, “dapat na makanood na an pagkonsagrar [pagdusay] asin santipikasyon kahagadan sa balang saro na magigin kabtang kan dakulang kaburunyogan asin mabubuhay digdi sa daga.” Sa bisyon kan dakulang kadaklan, na nasusurat sa librong Kapahayagan, sinasabi na “hinugasan ninda an saindang mga gubing asin pinaputi iyan sa dugo kan Kordero” asin nagtatao sinda ki Jehova nin “sagradong paglilingkod aldaw asin banggi sa saiyang templo.” (Kapahayagan 7:9, 14, 15) Sa tabang kan banal na espiritu, ginigibo kan ibang karnero an bilog nindang makakaya na maotob an mga kahagadan ni Jehova sa kabanalan.—2 Corinto 7:1.
Paggibo nin Karahayan sa mga Tugang ni Cristo
13, 14. (a) Segun sa parabola ni Jesus kan mga karnero asin kanding, sa ano depende an kaligtasan kan mga karnero? (b) Sa panahon na ini kan katapusan, paano naggibo nin karahayan an ibang karnero sa mga tugang ni Cristo?
13 Tinawan ni Jesus nin pagdodoon an dayupot na bungkos sa pag-oltanan kan ibang karnero asin kan sadangoton na aripompon sa saiyang parabola kan mga karnero asin kanding, na kaiba sa hula nia manongod sa “pagtatapos kan sistema nin mga bagay.” Sa parabolang iyan, malinaw na ipinaheling ni Cristo na an kaligtasan kan ibang karnero konektadong marhay sa igagawe ninda sa mga linahidan, na inapod niang “sakong mga tugang.” Sinabi nia: “An hade masabi sa mga yaon sa saiyang too, ‘Madia, kamong mga binendisyonan kan sakong Ama, manaha nindo an kahadean na inandam para sa saindo poon pa kan pagtugdas kan kinaban. . . . Totoong sinasabi ko sa saindo, Huli ta ginibo nindo iyan sa saro sa pinakasadangoton kaining sakong mga tugang, ginibo nindo iyan sa sako.’”—Mateo 24:3; 25:31-34, 40.
14 An fraseng “huli ta ginibo nindo iyan” nanonongod sa mga akto nin mamomoton na pagsuportar sa mga tugang ni Cristo na pinaniaki sa espiritu, na trinatar kan kinaban ni Satanas na mga estranghero, na ibinibilanggo pa ngani an nagkapira sa sainda. Nangaipo sinda nin kakanon, igong gubing, asin pag-ataman sa salud. (Mateo 25:35, 36, nota sa ibaba) Sa panahon na ini kan katapusan, poon kan 1914, dakol sa mga linahidan an namugtak sa siring na mga situwasyon. Pinatototoohan kan kasaysayan kan Mga Saksi ni Jehova sa presenteng panahon na sinda sinokorohan kan maimbod na kairiba ninda, an ibang karnero, mantang an mga ini pinahihiro kan espiritu.
15, 16. (a) Sa anong aktibidad na partikularmenteng tinabangan kan ibang karnero an linahidan na mga tugang ni Cristo digdi sa daga? (b) Paano ipinahayag kan mga linahidan an pagpasalamat ninda sa ibang karnero?
15 An linahidan na mga tugang ni Cristo digdi sa daga sa panahon na ini kan katapusan partikularmenteng nag-ako kan aktibong pagsuportar kan ibang karnero sa pag-otob kan sugo nin Dios na ‘ihulit an maogmang baretang ini kan kahadean sa bilog na ineerokan na daga para sa pagpatotoo sa gabos na nasyon.’ (Mateo 24:14; Juan 14:12) Mantang naiinaan an kabilangan kan mga linahidan digdi sa daga sa nag-aging mga taon, nagdadakula man an sa ibang karnero sagkod na magin nang literal na minilyon. An rinibo kaini naglilingkod bilang bilog na panahon na mga ebanghelisador—payunir asin misyonero—na ilinalakop an maogmang bareta kan Kahadean “sagkod sa kaporoporohi kan daga.” (Gibo 1:8) An iba nakikikabtang sa pagpatotoo sagkod sa makakaya ninda asin magayagayang sinusuportaran sa pinansial an importanteng gibohon na ini.
16 Kanigoan an pagpasalamat kan linahidan na mga tugang ni Cristo sa maimbod na pagsuportar na ini kan kairiba nindang ibang karnero! Magayonon an pagkapahayag kan saboot ninda sa librong Worldwide Security Under the “Prince of Peace,” na itinao kan grupong oripon kan 1986. Sinasabi kaiyan: “Poon kan Guerra Mundial II, an pagkaotob kan hula ni Jesus para sa ‘pagtatapos kan sistema nin mga bagay’ sa dakulang kabtang huli sa ginigibo kan ‘dakulang kadaklan’ nin ‘ibang karnero.’ . . . Kun siring, balakid na salamat sa internasyonal, dakol an lenguahe na ‘dakulang kadaklan’ huli sa nagin dakulaon na kabtang ninda sa pagkaotob kan hula [ni Jesus] sa Mateo 24:14!”
‘Dai Ginibong Sangkap na Siblag sa Sato’
17. Sa anong paagi na an mga fiel kan suanoy na bubuhayon liwat digdi sa daga ‘dai gigibohon na sangkap na siblag sa’ mga linahidan?
17 Nagtataram bilang saro sa mga linahidan asin sinasambit an fiel na mga lalaki saka babae na nabuhay bago si Cristo, nagsurat si apostol Pablo: “An gabos sa sainda, minsan ngani tinawan sinda nin patotoo huli sa saindang pagtubod, dai nagkamit kan kaotoban kan panuga, mantang naheling nin Dios antes pa an sarong bagay na mas marahay para sa sato [an mga linahidan], tanganing dai sinda magibong sangkap na siblag sa sato.” (Hebreo 11:35, 39, 40) Durante kan Milenyo, si Cristo asin an 144,000 na linahidan na mga tugang nia sa langit magigin mga hade saka saserdote asin matao kan mga pakinabang sa pantubos na atang ni Cristo digdi sa daga. Sa siring, an ibang karnero ‘gigibohon na sangkap’ sa hawak asin isip.—Kapahayagan 22:1, 2.
18. (a) An mga katunayan sa Biblia maninigo na makatabang sa ibang karnero na masabotan an ano? (b) May anong paglaom na hinahalat kan ibang karnero an “paghahayag kan mga aki nin Dios”?
18 Ini gabos maninigo na magtudok sa isip kan ibang karnero kun taano an Kristianong Griegong Kasuratan ta nagtatao nin dakulaon na atension ki Cristo asin sa saiyang linahidan na mga tugang saka sa prinsipal na kabtang ninda sa pagkaotob kan mga katuyohan ni Jehova. Kun siring, ibinibilang kan ibang karnero na pribilehio an pagsuportar sa gabos na paaging mapupuede sa linahidan na grupong oripon mantang hinahalat an “paghahayag kan mga aki nin Dios” sa Armagedon asin durante kan Milenyo. Maaantisipar ninda na sinda “patatalingkason sa pagkaoripon sa kalapaan asin magkakaigwa kan mamuraway na katalingkasan kan mga aki nin Dios.”—Roma 8:19-21.
Sararo sa Espiritu sa Panahon kan Memorial
19. Ano an nagibo kan “espiritu kan katotoohan” para sa mga linahidan asin sa saindang kairiba, asin paano sinda espesyalmenteng magkakasararo sa banggi nin Marso 28?
19 Sa pantapos na pamibi nia kan banggi nin Nisan 14, 33 C.E., sinabi ni Jesus: “Ako nakikimaherak . . . tanganing sinda gabos magin saro, kun paanong ika, Ama, kasaro ko asin ako kasaro mo, na sinda man magin kasaro niato, tanganing an kinaban magtubod na ako isinugo mo.” (Juan 17:20, 21) Huli sa pagkamoot, isinugo nin Dios an saiyang Aki na itao an buhay kaini para sa kaligtasan kan mga linahidan asin kan kinaban nin makinuyog na katawohan. (1 Juan 2:2) Pinagsararo kan “espiritu kan katotoohan” an mga tugang ni Cristo asin an kairiba ninda. Sa banggi nin Marso 28, pagkasolnop kan saldang, an duwang grupong ini magtitiripon tanganing selebraron an kagadanan ni Cristo asin girumdomon an gabos na ginibo ni Jehova para sa sainda paagi sa pag-atang kan mahal niang Aki, si Cristo Jesus. Logod na an presensia ninda sa importanteng okasyon na iyan magparigon sa pagkasararo ninda asin pakosogon giraray an determinasyon ninda na padagos na gibohon an kabotan nin Dios, sa siring nagtatao nin patotoo na sinda naggagayagaya na makabilang sa mga namomotan ni Jehova.
Bilang Repaso
• Kasuarin isinugo sa enot na mga Kristiano “an espiritu kan katotoohan,” asin paano iyan nagin “paratabang”?
• Paano naaaraman kan mga linahidan na sinda nag-ako kan langitnon na pag-apod?
• Sa anong mga paagi na an espiritu nin Dios naghihiro sa ibang karnero?
• Paano an ibang karnero naggibo nin karahayan sa mga tugang ni Cristo, asin taano ta ‘dai sinda gigibohon na sangkap’ na siblag sa mga linahidan?
[Mga Hapot Para sa Pag-adal]
[Ritrato sa pahina 21]
An “espiritu kan katotoohan” ibinubo sa mga disipulo kan Pentecostes 33 C.E.
[Mga ritrato sa pahina 23]
An ibang karnero naggibo nin karahayan sa mga tugang ni Cristo paagi sa pagsuportar sa sainda sa pag-otob kan sugo nin Dios na maghulit