Kabilang daw Kamo sa mga Namomotan nin Dios?

“An igwa kan sakong mga togon asin minaotob kaiyan, an sarong iyan iyo an namomoot sa sako. An namomoot man sa sako mamomotan kan sakong Ama.”​—JUAN 14:21.

1, 2. (a) Paano ipinaheling ni Jehova an saiyang pagkamoot sa katawohan? (b) Ano an iinintrodusir ni Jesus kan banggi nin Nisan 14, 33 C.E.?

 NAMOMOTAN ni Jehova an mga tawong linalang nia. Sa katunayan, sia namomoot na gayo sa kinaban nin katawohan “na itinao nia an saiyang Aking bugtong, tanganing an lambang naggigibo nin pagtubod sa saiya dai mapahamak kundi magkaigwa nin buhay na daing katapusan.” (Juan 3:16) Mantang nagdadangadang an panahon nin pagselebrar kan Memorial kan kagadanan ni Cristo, an tunay na mga Kristiano orog kasuarin man maninigo na makamate na si Jehova “namoot sa sato asin isinugo an saiyang Aki bilang pampagian nin boot na atang para sa satong mga kasalan.”​—1 Juan 4:10.

² Kan banggi nin Nisan 14, 33 C.E., si Jesus asin an 12 niang apostol nagtiripon sa sarong kuarto sa itaas duman sa Jerusalem tanganing selebraron an Paskua, na ginigirumdom an pagkakalda kan mga Israelita sa Egipto. (Mateo 26:17-20) Pakaselebrara kan Judiong kapiestahan na ini, pinahale ni Jesus si Judas Iscariote asin iinintrodusir an sarong nagpapagirumdom na pamanggihan na iyo an magigin Kristianong Memorial kan kagadanan ni Cristo. a Ginagamit an tinapay na mayo nin lebadura asin arak na pula bilang mga emblema, o simbolo, kan pisikal niang hawak asin dugo, iribang pinakakan ni Jesus an 11 nawalat na apostol sa pagkakan na ini para sa pakikikabtang. An mga detalye sa kun ano an ginibo nia itinatao kan mga kagsurat kan Sinoptikong mga Ebanghelyo na si Mateo, Marcos, asin Lucas saka ni apostol Pablo, na inapod iyan na “pamanggihan nin Kagurangnan.”​—1 Corinto 11:20; Mateo 26:26-28; Marcos 14:22-25; Lucas 22:​19, 20.

3. Sa anong importanteng mga paagi na napapalaen sa iba an salaysay ni apostol Juan manongod sa huring mga oras ni Jesus kaiba kan saiyang mga disipulo sa kuarto sa itaas?

³ Interesante nanggad, dai nasambitan ni apostol Juan an pagpasa kan tinapay asin arak, tibaad sa dahelan na kan panahon na isurat nia an saiyang Ebanghelyo (kaidtong mga 98 C.E.), establisado nang marhay an prosedimiento sa tahaw kan enot na mga Kristiano. (1 Corinto 11:23-26) Minsan siring, sa irarom nin pasabong, si Juan sana an nagtao sato nin nagkapirang mahalagang marhay na impormasyon mapadapit sa sinabi asin ginibo ni Jesus bago asin pagkatapos tolos na iintrodusir Nia an Memorial kan Saiyang kagadanan. Limang kapitulo kan Ebanghelyo ni Juan an nakapupukaw sa boot na mga detalyeng ini. Biyong liniliwanag kaiyan kun anong klaseng mga indibiduwal an namomotan nin Dios. Siyasaton niato an Juan kapitulo 13 sagkod 17.

Makanood sa Arogan na Pagkamoot ni Jesus

4. (a) Paano idinoon ni Juan an nangingibabaw na pinakatema kan pakitipon ni Jesus sa saiyang mga disipulo kan iintrodusir nia an Memorial? (b) Ano an sarong importanteng dahelan kun taano ta namomotan ni Jehova si Jesus?

⁴ An pagkamoot pangenot na pinakatema sa mga kapitulong ini na igwa kan panhuring konseho ni Jesus sa saiyang mga parasunod. Sa katunayan, an laen-laen na porma kan terminong “pagkamoot” minalataw dian nin 31 beses. An hararom na pagkamoot ni Jesus sa saiyang Ama, si Jehova, asin sa saiyang mga disipulo risang-risa sa mga kapitulong ini kisa saen pa man. An pagkamoot ni Jesus ki Jehova risa sa gabos na salaysay nin Ebanghelyo manongod  sa saiyang buhay, alagad solamente si Juan an nagsurat na si Jesus malinaw na nagsabi: “Namomotan ko an Ama.” (Juan 14:31) Sinabi man ni Jesus na sia namomotan ni Jehova asin ipinaliwanag nia kun taano. Sabi nia: “Kun paanong namomotan ako kan Ama asin namomotan ko kamo, magdanay kamo sa sakong pagkamoot. Kun otobon nindo an sakong mga togon, magdadanay kamo sa sakong pagkamoot, kun paanong ako nag-otob sa mga togon kan Ama asin nagdanay sa saiyang pagkamoot.” (Juan 15:​9, 10) Iyo, namomotan ni Jehova an saiyang Aki huli sa lubos na pagkuyog kaini. Abaa karahay na leksion para sa gabos na parasunod ni Jesu-Cristo!

5. Paano ipinaheling ni Jesus an pagkamoot nia sa saiyang mga disipulo?

⁵ An hararom na pagkamoot ni Jesus sa saiyang mga parasunod idinodoon sa kapinonan mismo kan salaysay ni Juan manongod sa pangultimong pakitipon ni Jesus sa mga apostol. Isinaysay ni Juan: “Ngonyan, huli ta naisihan na nia bago pa kan kapiestahan nin paskua na nag-abot na an saiyang oras na sia humale sa kinaban na ini pasiring sa Ama, si Jesus, huling namoot sa saiyang mga sadiri na yaon sa kinaban, namoot sa sainda sagkod sa katapusan.” (Juan 13:1) Kan memorableng bangging idto, tinawan nia sinda nin dai malilingawan na leksion sa mamomoton na paglilingkod sa iba. Hinanawan nia an bitis ninda. Ini sarong bagay na maninigo kutana na ginustong gibohon kan balang saro sa sainda para ki Jesus asin para sa saindang mga tugang, alagad dai ninda ginibo iyan. Ginibo ni Jesus an hamak na trabahong ini dangan sinabi sa saiyang mga disipulo: “Kun ako, minsan Kagurangnan asin Paratokdo, naghanaw kan saindong mga bitis, maninigo na hanawan man nindo an bitis kan lambang saro. Huli ta ako nagtao sa saindo nin arogan, tanganing, kun ano an ginibo ko sa saindo, iyo man an gibohon nindo.” (Juan 13:​14, 15) An tunay na mga Kristiano maninigo na magin andam asin maogmang maglingkod sa saindang mga tugang.​—Mateo 20:​26, 27, nota sa ibaba; Juan 13:17.

Sunodon an Bagong Togon

6, 7. (a) Anong importanteng detalye an itinatao ni Juan may labot sa pag-introdusir kan Memorial? (b) Anong bagong togon an itinao ni Jesus sa saiyang mga disipulo, asin ano an bago dian?

⁶ An salaysay ni Juan manongod sa nangyari sa kuarto sa itaas kan banggi nin Nisan 14 iyo an solamenteng nakakasambit nin espesipiko kan paghale ni Judas Iscariote. (Juan 13:21-30) Ipinaririsa kan pagbaragay kan mga salaysay kan Ebanghelyo na pagkahale sana kan traydor na ini na iinintrodusir ni Jesus an Memorial kan Saiyang kagadanan. Dangan lubos niang kinaolay an fiel na mga apostol nia, na tinatawan sinda nin panhuring konseho asin mga instruksion. Mantang nag-aandam kitang umatender sa Memorial, maninigo na kita magin interesadong marhay sa sinabi ni Jesus kaidto, asin nangorogna ta gusto nanggad niato na makabilang sa mga namomotan nin Dios.

⁷ An kaenot-enoteng instruksion na itinao ni Jesus sa saiyang mga disipulo pakaintrodusiran kan Memorial kan saiyang kagadanan sarong bagay na bago. Sinabi nia: “Tinatawan ko kamo nin bagong togon, na kamo magkaminorootmootan; siring sa pagkamoot ko sa saindo, na kamo man magkaminorootmootan. Paagi kaini an gabos makaaaram na kamo an sakong mga disipulo, kun kamo nagkakaminorootmootan.” (Juan 13:​34, 35) Ano an bago sa togon na ini? Paghaloyhaloy kan bangging idto, lininaw ni Jesus an mga bagay, na sinasabi: “Ini an sakong togon, na kamo magkaminorootmootan siring kan pagkamoot ko sa saindo. Mayo nin siisay man na namoot nin orog pa kaini, na itao nin saro an saiyang kalag dahel sa saiyang mga katood.” (Juan 15:​12, 13) An mga Israelita pinagbotan kan Ley ni Moises na ‘kamotan an saindang kapwa nin siring sa sainda man sana.’ (Levitico 19:18) Alagad linabihan iyan kan togon ni Jesus. An mga Kristiano dapat na magkaminorootmootan siring kan pagkamoot ni Cristo sa sainda, na andam na isakripisyo an sainda mismong buhay para sa saindang mga tugang.

8. (a) Ano an kalabot sa mapagsakripisyong pagkamoot? (b) Paano nagpapaheling nin mapagsakripisyong pagkamoot an Mga Saksi ni Jehova ngonyan?

 ⁸ An panahon nin Memorial tamang panahon na siyasaton an satong sadiri, bilang indibiduwal asin bilang kongregasyon, kun baga kita talagang igwa kan tandang ini na nagpapamidbid sa tunay na Kristianismo​​—an pagkamoot na arog-Cristo. An siring na mapagsakripisyong pagkamoot puedeng mangahulogan, asin kun beses nangahulogan, na mas gugustohon pa nin Kristiano na isapeligro an buhay nia kisa ipahamak an saiyang mga tugang. Pero mas parate na an kalabot dian pagigin andam niato na isakripisyo an personal niatong mga interes tangani na matabangan asin mapaglingkodan an satong mga tugang asin an iba. Si apostol Pablo marahay na halimbawa sa bagay na ini. (2 Corinto 12:15; Filipos 2:17) An Mga Saksi ni Jehova midbid sa bilog na kinaban huli sa saindang mapagsakripisyong espiritu, na tinatabangan an saindang mga tugang saka an saindang kapwa asin iinuubos an makakaya ninda sa pagpaabot kan katotoohan sa Biblia sa saindang kapwa. b​—Galacia 6:10.

Mga Relasyon na Dapat Pakamahalon

9. Tanganing mapagdanay an satong mahalagang marhay na relasyon sa Dios asin sa saiyang Aki, ano an ikinaoogma niatong gibohon?

⁹ Mayo na nin mas mahalagang marhay para sa sato kisa kamotan ni Jehova asin kan saiyang Aki, si Cristo Jesus. Minsan siring, tanganing kamtan asin mamatean an pagkamoot na ini, may dapat kitang gibohon. Kan pangultimong bangging idto kaiba kan saiyang mga disipulo, sinabi ni Jesus: “An igwa kan sakong mga togon asin minaotob kaiyan, an sarong iyan iyo an namomoot sa sako. An namomoot man sa sako mamomotan kan sakong Ama, asin ako mamomoot sa saiya asin ihahayag ko an sakong sadiri sa saiya.” (Juan 14:21) Mantang pinakamamahal niato an satong relasyon sa Dios asin sa saiyang Aki, magayagaya niatong kinukuyog an saindang mga togon. Kabale digdi an bagong togon na magpaheling nin mapagsakripisyong pagkamoot pati an pagboot na itinao ni Cristo pagkabuhay nia liwat “na maghulit sa mga tawo asin magtao nin lubos na pagpatotoo,” na hinihingoang ‘gibohon na disipulo’ an mga nag-aako kan maogmang bareta.​—Gibo 10:42; Mateo 28:​19, 20.

10. Anong mahalagang marhay na mga relasyon an bukas para sa mga linahidan asin sa “ibang karnero”?

¹⁰ Paghaloyhaloy kan bangging idto, bilang simbag sa ihinapot sa saiya kan fiel na apostol na si Judas (Tadeo), sinabi ni Jesus: “Kun an siisay man namomoot sa sako, ootobon nia an sakong tataramon, asin an sakong Ama mamomoot sa saiya, asin kami madian sa saiya asin mag-eerok sa saiya.” (Juan 14:​22, 23) Dawa yaon pa digdi sa daga, an linahidan na mga Kristiano, na inapod na magreynar kaiba ni Cristo sa langit, igwa na nin partikularmenteng haraning relasyon ki Jehova asin sa saiyang Aki. (Juan 15:15; 16:27; 17:22; Hebreo 3:1; 1 Juan 3:​2, 24) Alagad an kairiba nindang “ibang karnero,” na an paglaom mabuhay sagkod lamang digdi sa daga, may mahalaga man na marhay na relasyon sa saindang “sarong pastor,” si Jesu-Cristo, asin sa saindang Dios, si Jehova, basta sinda magin makinuyog.​—Juan 10:16; Salmo 15:1-5; 25:14.

“Kamo Bakong Kabtang kan Kinaban”

11. Anong nakapapepensar na patanid an itinao ni Jesus sa saiyang mga disipulo?

¹¹ Durante kan huring pakitipon na ini sa fiel na  mga disipulo nia bago sia magadan, si Jesus nagtao nin nakapapepensar na patanid: Kun an saro namomotan nin Dios, ikaoongis sia kan kinaban. Sinabi nia: “Kun an kinaban naoongis sa saindo, aram na nindo na iyan naongis na nguna sa sako bago iyan naongis sa saindo. Kun kamo kabtang kan kinaban, mamahalon kan kinaban an sadiri kaiyan. Ngonyan huling kamo bakong kabtang kan kinaban, kundi pinili ko kamo hale sa kinaban, huli kaini an kinaban naoongis sa saindo. Girumdoma nindo an tataramon na isinabi ko sa saindo, An oripon bakong orog sa saiyang kagurangnan. Kun ako pinaglamag ninda, kamo man paglalamagon ninda; kun inotob ninda an sakong tataramon, ootobon man ninda an saindo.”​​—Juan 15:18-20.

12. (a) Taano ta pinatanidan ni Jesus an saiyang mga disipulo na ikaoongis sinda kan kinaban? (b) Ano an marahay na pensaron nin gabos mantang nagdadangadang an Memorial?

¹² Itinao ni Jesus an patanid na ini tangani na an 11 apostol na ini asin an gabos na tunay na Kristiano na masurunod sa sainda dai panluyahan nin boot asin pumondo huli sa pagkaongis kan kinaban. Idinugang nia: “An mga bagay na ini itinaram ko sa saindo tanganing dai kamo magkasiringkog. Kamo pahahaleon nin mga tawo sa mga sinagoga. Sa katunayan, maabot an oras na an lambang gumadan sa saindo maghohona na nakagibo sia nin sagradong paglilingkod sa Dios. Alagad gigibohon ninda an mga bagay na ini huli ta dai ninda namidbid an Ama o ako.” (Juan 16:1-3) Ipinaliliwanag nin sarong leksiko sa Biblia na an sarong porma kan berbo na trinadusir digding “magkasiringkog” nangangahulogan “papangyarihon an saro na pumoon na pagdiskompiaran asin bayaan an saro na dapat niang pagtiwalaan asin kuyogon; papangyarihon na sumuhay.” Mantang nagdadangadang an panahon nin pagselebrar kan Memorial, marahay na pensaron nin gabos an nagin buhay nin mga fiel, kan nakaagi asin sa presente, asin arogon an halimbawa ninda sa pagigin marigon sa irarom nin pagbalo. Dai itogot na papangyarihon nin pagkontra o paglamag na bayaan nindo si Jehova asin si Jesus, kundi magin desidido na magtiwala asin magkuyog sa sainda.

13. Ano an hinagad ni Jesus para sa mga parasunod nia sa sarong pamibi sa saiyang Ama?

¹³ Sa saiyang pantapos na pamibi bago humale sa kuartong idto sa itaas duman sa Jerusalem, sinabi ni Jesus sa saiyang Ama: “Itinao ko sa sainda an saimong tataramon, alagad an kinaban naongis sa sainda, huli ta sinda bakong kabtang kan kinaban, kun paanong ako bakong kabtang kan kinaban. Ako nakikimaherak sa saimo, bako na haleon sinda sa kinaban, kundi na bantayan sinda huli sa maraot. Sinda bakong kabtang kan kinaban, kun paanong ako bakong kabtang kan kinaban.” (Juan 17:14-16) Masisierto niato na binabantayan ni Jehova an mga namomotan nia, tanganing pakosogon sinda mantang sinda nagdadanay na siblag sa kinaban.​—Isaias 40:29-31.

Magdanay sa Pagkamoot kan Ama Asin sa Pagkamoot kan Aki

14, 15. (a) Sa ano iinagid ni Jesus an saiyang sadiri, bakong arog kan anong ‘lapang poon nin ubas’? (b) Sairisay an “mga sanga” kan “tunay na poon nin ubas”?

¹⁴ Durante kan pribadong pakikipag-olay nia sa fiel niang mga disipulo kan banggi nin Nisan 14, iinagid ni Jesus an sadiri nia sa “tunay na poon nin ubas,” bakong arog kan ‘lapang poon nin ubas’ nin bakong fiel na Israel. Sabi nia: “Ako iyo an tunay na poon nin ubas, asin an sakong Ama iyo an paraataman.” (Juan 15:1) Mga siglo bago kaidto, isinurat ni propeta Jeremias an mga tataramon na ini ni Jehova sa saiyang tumangerong banwaan:  “Itinanom taka bilang piling poon nin ubas na pula . . . Kaya paano ka naliwat sa pagin lapang mga supang nin ibang poon nin ubas para sa sako?” (Jeremias 2:21) Asin isinurat ni propeta Oseas: “An Israel sarong poon nin ubas na nalalapa. Padagos siang nagbubunga para sa saiya man sana. . . . An saindang puso nagin mapagsaginsagin.”​—Oseas 10:​1, 2.

¹⁵ Imbes na magpaluwas kan mga bunga nin tunay na pagsamba, an Israel naholog sa apostasiya asin nagbunga para sa saiya man sana. Tolong aldaw bago an pangultimo niang pakitipon sa fiel na mga disipulo nia, sinabihan ni Jesus an mapagsaginsagin na mga namomoon na Judio: “Ako nagsasabi sa saindo, An kahadean nin Dios hahaleon sa saindo asin itatao sa nasyon na nagpapaluwas kan mga bunga kaiyan.” (Mateo 21:43) An bagong nasyon na iyan iyo an “Israel nin Dios,” na kompuesto kan 144,000 na linahidan na mga Kristiano, na iinaagid sa “mga sanga” kan “tunay na poon nin ubas,” si Cristo Jesus.​—Galacia 6:16; Juan 15:5; Kapahayagan 14:​1, 3.

16. Ano an isinadol ni Jesus na gibohon kan 11 fiel na apostol, asin ano an masasabi manongod sa fiel na natatada sa panahon na ini nin katapusan?

¹⁶ Sinabihan ni Jesus an 11 apostol na yaon duman kaiba nia sa kuarto sa itaas: “An lambang sanga sa sako na dai nagbubunga hinahale nia, asin an lambang nagbubunga linilinig nia, tanganing iyan magbunga nin orog. Magdanay kamong kasaro ko, asin ako kasaro nindo. Kun paanong an sanga dai makakapagbunga sa saiya man sana kun dai iyan magdanay sa poon nin ubas, ni kamo man, kun dai kamo magdanay na kasaro ko.” (Juan 15:​2, 4) Ipinaheheling kan kasaysayan sa presenteng panahon kan banwaan ni Jehova na an fiel na natatada kan linahidan na mga Kristiano nagdanay na kasaro kan saindang Payo, si Cristo Jesus. (Efeso 5:23) Inako ninda an paglinig asin pagtapas. (Malaquias 3:​2, 3) Poon kan 1919, nagpaluwas sinda nin abundang bunga kan Kahadean, enot iba pang linahidan na Kristiano asin, poon 1935, padakol nang padakol na “dakulang kadaklan” nin kairiba.​—Kapahayagan 7:9; Isaias 60:​4, 8-11.

17, 18. (a) Anong mga tataramon ni Jesus an nakatatabang sa mga linahidan asin sa ibang karnero na magdanay sa pagkamoot ni Jehova? (b) Paano kita matatabangan kan pag-atender sa Memorial?

¹⁷ Sa gabos na linahidan na Kristiano asin sa saindang kairiba, minaaplikar an dagdag pang mga tataramon ni Jesus: “An sakong Ama napapamuraway kaini, na kamo padagos na nagbubunga nin dakol asin nagpapatunay na kamo sakong mga disipulo. Kun paanong namomotan ako kan Ama asin namomotan ko kamo, magdanay kamo sa sakong pagkamoot. Kun otobon nindo an sakong mga togon, magdadanay kamo sa sakong pagkamoot, kun paanong ako nag-otob sa mga togon kan Ama asin nagdanay sa saiyang pagkamoot.”​—Juan 15:8-10.

¹⁸ Gusto niato gabos na magdanay sa pagkamoot nin Dios, asin ini nagpapahiro sa sato na magin mabungang mga Kristiano. Ginigibo niato ini paagi sa pag-aprobetsar sa lambang oportunidad na ihulit ‘an maogmang bareta kan kahadean.’ (Mateo 24:14) Ginigibo man niato an bilog niatong makakaya na ipaheling “an bunga kan espiritu” sa personal niatong buhay. (Galacia 5:​22, 23) An pag-atender sa Memorial kan kagadanan ni Cristo mapakosog sa sato sa satong desisyon na gibohon ini, ta ikakapagirumdom sa sato an dakulang pagkamoot nin Dios asin ni Cristo para sa sato.​—2 Corinto 5:​14, 15.

19. Anong dagdag na tabang an totokaron sa kasunod na artikulo?

¹⁹ Pakaintrodusiran kan Memorial, nanuga si Jesus na isusugo kan saiyang Ama sa saiyang fiel na mga parasunod an “paratabang, an banal na espiritu.” (Juan 14:26) Kun paano tinatabangan kan espiritung ini an mga linahidan asin an ibang karnero na magdanay sa pagkamoot ni Jehova sisiyasaton sa kasunod na artikulo.

[Mga Nota sa Ibaba]

Mga Hapot sa Repaso

• Anong praktikal na leksion sa mamomoton na paglilingkod an itinao ni Jesus sa saiyang mga disipulo?

• Mapadapit sa ano na an panahon nin Memorial tamang panahon para sa pagsiyasat sa sadiri?

• Taano ta dai kita maninigong masingkog sa patanid ni Jesus manongod sa pagkaongis asin paglamag kan kinaban?

• Siisay “an tunay na poon nin ubas”? Sairisay “an mga sanga,” asin ano an inaasahan sa sainda?

[Mga Hapot Para sa Pag-adal]

[Ritrato sa pahina 15]

Tinawan ni Jesus an mga apostol nia nin dai malilingawan na leksion sa mamomoton na paglilingkod

[Mga ritrato sa pahina 16, 17]

Kinukuyog kan mga disipulo ni Cristo an pagboot nia na magpaheling nin mapagsakripisyong pagkamoot