Ano an Karibay nin Sarong Malinig na Konsensia?

“GOBYERNO Pinagbotan na Akoon an R$20,000.” An pambihirang titulong ini naglataw kasuarin pa sana sa peryodiko sa Brazil na Correio do Povo. Isinasaysay kan artikulo an estorya manongod ki Luiz Alvo de Araújo, sarong lokal na kartero, na nagpabakal nin sarong lote sa gobyerno kan estado. Pakatapos na pirmahan an dokumento sa pagbalyo kan pagigin may sadiri kan saiyang propiedad, nabigla si Luiz kan madiskobre na an ibinayad sa saiya sobra nin R$20,000 (poko mas o menos $8,000, E.U.) sa napagkaoyonan na presyo!

An pagbalik kan sobrang bayad dai nagin madali. Pakatapos nin nagkapirang dai nagkaigwa nin saysay na mga pagsongko sa mga departamento nin gobyerno, si Luiz sinadol na magkua nin abogado asin resolberan an problema sa korte. “Minalataw na may saro na nasala, asin huli sa kadakol na rekisitos, mayo nang nakaaaram kun paano huhusayon an mga bagay-bagay,” an sinabi kan huwes na nagsentensia sa gobyerno na akoon an kuarta asin bayadan an gastos na ginamit sa legal na prosedimiento. “Ini pa sana an naheling kong kaso na daing kaagid kasuarin man.”

Si Luiz, na saro sa Mga Saksi ni Jehova, nagpapaliwanag: “Dai itinotogot kan sakong konsensia na sinanay sa Biblia na sadirihon an lehitimong bakong sako. Kinaipuhan kong hingoahon na ibalik an kuarta.”

Dakol an ibibilang na pambihira nanggad o dai masabotan pa ngani an siring na aktitud. Alagad ipinaheheling kan Tataramon nin Dios na halangkawon an pagpapahalaga kan tunay na mga Kristiano sa pagpapadanay nin malinig na konsensia sa saindang relasyon sa sekular na mga autoridad. (Roma 13:5) Determinado an Mga Saksi ni Jehova na papagdanayon an ‘sadiosan na konsensia asin gumawe nin sadiosan sa gabos na bagay.’—Hebreo 13:18.