Hula ni Isaias—Liwanag Para sa Bilog na Katawohan I

Kapitulo Desiotso: Mga Leksion Manongod sa Pagigin Bakong Fiel

Isaias 22:1-25

1. Ano daw an tibaad kamugtakan sa laog nin sarong suanoy na siudad na sinasalikopan?

 IMAHINARON an kamugtakan kun kamo nasa sarong suanoy na siudad na sinasalikopan. Nasa luwas kan mga lanob an mga kaiwal​—makokosog asin daing herak. Aram nindo na pinabagsak na nia an ibang mga siudad. Ngonyan sia determinadong kongkistaron asin salakaton an saindong siudad patin lugoson asin gadanon an mga nag-iistar dian. An kaiwal na mga hukbo labi-labi kamapuersa tangani na labanan nin hampangan; naglalaom na sana kamo na an mga lanob kan siudad maolang sa sainda na makalaog. Mantang nagheheling kamo sa luwas kan mga lanob, natatanaw nindo an mga torreng pansalikop na dara kan mga kaiwal. Igwa man sinda nin mga kasangkapan na pansalikop na kayang mag-itsa nin darakulang gapo tanganing tumpagon an saindong mga pandepensa. Naheheling nindo an saindang mga panggaba asin hagahag, an saindang mga parapana asin karro, an saindang mga kadaklan nin soldados. Kanigoan kanakasisindak na eksena!

2. Noarin mangyayari an pagsalikop na ilinadawan sa Isaias kapitulo 22?

² Sa Isaias kapitulo 22, mababasa niato an manongod sa siring na pagsalikop​—pagsalikop tumang sa Jerusalem. Kasuarin iyan nangyari? Depisil sabihon nin eksakto an arin man na pagsalikop na dian naotob an gabos na sinabing kabtang. Minalataw na an hula masasabotan na marhay bilang sarong pankagabsan na paglaladawan kan manlaenlaen na pagsalikop na mangyayari sa Jerusalem, sarong pankagabsan na patanid kan mangyayari sa ngapit.

3. Ano an reaksion kan mga nag-iistar sa Jerusalem sa pagsalikop na ilinaladawan ni Isaias?

³ Mantang napapaatubang sa pagsalikop na ilinaladawan ni Isaias, ano an ginigibo kan mga nag-iistar sa Jerusalem? Bilang katipan na banwaan nin Dios, sinda daw nakikimaherak ki Jehova na iligtas sinda? Dai, sinda nagpapaheling nin bako nanggad na madonong na aktitud, kapareho kan manonompongan ngonyan sa tahaw kan dakol na naghihingako na nagsasamba sa Dios.

Sarong Siudad na Sinasalikopan

4. (a) Ano an “kababan kan bisyon,” asin taano ta ini an ngaran kaiyan? (b) Ano an espirituwal na kamugtakan kan mga nag-iistar sa Jerusalem?

⁴ Sa kapitulo 21 nin Isaias, an kada saro sa tolong mensahe nin paghokom iinintrodusir paagi sa pananaram na “An kapahayagan.” (Isaias 21:​1, 11, 13) An kapitulo 22 nagpopoon sa kaparehong paagi: “An kapahayagan kan kababan kan bisyon: Ano, kun siring, an nangyayari sa saimo, ta suminakat ka nin biyo sa mga bubongan?” (Isaias 22:1) “An kababan kan bisyon” nanonongod sa Jerusalem. An siudad inaapod na kababan huli ta dawa ngani halangkaw, iyan napalilibotan nin mas halangkaw na mga bukid. Iyan konektado sa “bisyon” huli ta dakol na bisyon asin kapahayagan nin Dios an itinao duman. Sa dahelan na ini, an mga nag-iistar sa siudad maninigong maghimate sa mga tataramon ni Jehova. Imbes kaiyan, sinda dai nag-intindi sa saiya asin nalagalag sa falsong pagsamba. An kaiwal na nagsasalikop sa siudad sarong instrumento kan paghokom nin Dios tumang sa saiyang sumbikalan na banwaan.​—Deuteronomio 28:​45, 49, 50, 52.

5. Posibleng marhay, taano an mga tawo ta nagsarakat sa saindang mga bubongan?

⁵ Mangnoha na an mga nag-iistar sa Jerusalem ‘suminakat nin biyo sa mga bubongan’ kan saindang mga harong. Kan suanoy na mga panahon, an mga bubongan kan mga harong nin mga Israelita patag asin an mga pamilya sa parate nagtitiripon dian. Dai sinabi ni Isaias kun taano ta ginibo ninda iyan sa okasyon na ini, alagad an saiyang mga tataramon nagpaparisa nin pagdesaprobar. Kun siring, posibleng marhay na nagsakat sinda sa mga bubongan tanganing makiolay sa saindang falsong mga dios. Ini an saindang kostumbre kan mga taon bago kan pagkalaglag kan Jerusalem kan 607 B.C.E.​—Jeremias 19:13; Sofonias 1:5.

6. (a) Anong mga kamugtakan an nangyari sa laog nin Jerusalem? (b) Taano an iba ta naggagayagaya, alagad ano an natatagama sa ngapit?

⁶ Si Isaias nagpapadagos: “Pano ka nin grabeng karibarawan, sarong maribok na siudad, sarong maogmahon na banwaan. An mga nagadan dian sa saimo bakong mga ginadan paagi sa espada, ni mga nagadan sa ralaban.” (Isaias 22:2) An mga kaburunyogan nagtiripon sa siudad, asin grabe an karibarawan dian. An mga tawo sa mga tinampo maribok asin natatakot. Pero, an nagkapira naggagayagaya, huli gayod ta an pagmate ninda ligtas sinda o naniniwala sinda na maagi sana an peligro. a Minsan siring, kamangmangan an maggayagaya sa panahon na ini. An dakol na nasa siudad magagadan sa kagadanan na mas maringis nanggad kisa kan paagi sa tarom nin espada. An sarong siudad na sinasalikopan dai na makakakua nin kakanon sa luwas. An reserbang suplay sa laog kan siudad nagdidiit. An nagugutom na mga tawo asin  pagsurusoan nagbubunga nin mga epidemya. Sa siring dakol kan nasa Jerusalem an magagadan sa gutom asin peste. Nangyari ini pareho kan 607 B.C.E. asin kan 70 C.E.​—2 Hade 25:3; Lamentacion 4:​9, 10. b

7. Ano an ginibo kan mga namamahala sa Jerusalem durante kan pagsalikop, asin ano an nangyari sa sainda?

⁷ Sa krisis na ini, paano nangenot an mga namamahala sa Jerusalem? Si Isaias minasimbag: “An gabos mong diktador nagdurulag nin sarabay. Dai kinaipuhan an busog na sinda binihag. An gabos dian sa saimo na nanompongan magkairibang binihag. Nagdurulag sinda sa harayo.” (Isaias 22:3) An mga namamahala asin makokosog na lalaki nagdurulag dangan nadakop! Dai ngani nin busog na inignit tumang sa sainda, sinda nadakop asin dinarang bihag. Nangyari ini kan 607 B.C.E. Pakatapos na laboton an lanob kan Jerusalem, si Hadeng Zedequias nagdulag kan banggi kaiba an saiyang makokosog na lalaki. Naaraman ini kan mga kaiwal, linapag sinda, asin inabotan sinda sa kaplanodohan nin Jerico. Nagsuruwaysuway an makokosog na mga lalaki. Si Zedequias dinakop, binuta, rinamalan nin tanso, asin ginuyod pasiring sa Babilonya. (2 Hade 25:2-7) Makaturotriste nanggad na resulta kan saiyang pagigin bakong fiel!

Panluluya nin Boot Huli sa Kalamidad

8. (a) Ano an reaksion ni Isaias sa hula na nagsasabi bago pa kan kalamidad na maabot sa Jerusalem? (b) Ano an magigin situwasyon sa Jerusalem?

⁸ An hulang ini nakapukaw nanggad sa boot ni Isaias. Sia nagsasabi: “Dai na nindo ako pagmasdan. Ipapaheling ko an kapaitan sa pagtangis. Dai na kamo mag-insistir na rangahon ako huli sa pananamsam sa aking babae kan sakong banwaan.” (Isaias 22:4) Si Isaias nagmondo huli sa ihinulang kaaabtan kan Moab asin Babilonya. (Isaias 16:11; 21:3) Ngonyan an saiyang panluluya nin boot asin pananangis mas grabe pa mantang hinohorophorop nia an grabeng kapahamakan na mangyayari sa saiyang sadiring banwaan. Dai na sia mararanga pa. Taano? “Huli ta iyan aldaw nin karibarawan asin nin pagtimaktimak asin nin pananaranta kan Soberanong Kagurangnan, si Jehova nin mga hukbo, sa kababan kan bisyon. Yaon an paralaglag kan lanob, asin an kurahaw sa bukid.” (Isaias 22:5) An Jerusalem mapapano nin dai mapogolan na karibarawan. An mga tawo malagawlagaw na biyong natataranta, na daing direksion. Mantang pinoponan kan kaiwal na laogon an mga lanob kan siudad, magkakaigwa nin “kurahaw sa bukid.” Nangangahulogan daw ini na an mga nag-iistar sa siudad maagrangay sa Dios sa saiyang banal na templo sa Bukid nin Moria? Puede gayod. Minsan siring, huli sa saindang pagigin bakong fiel, iyan gayod nangangahulogan sana na an saindang mga kurahaw huli sa grabeng takot mag-aaningal sa kabukidan sa palibot.

9. Iladawan an hukbong nanhuhuma sa Jerusalem.

⁹ Anong klaseng kaiwal an nanhuhuma sa Jerusalem? Sinasabi sa sato ni Isaias: “Kinaptan kan Elam mismo an suksukan nin pana, sa karro de guerra nin daganon na tawo, na may mga kabayo; asin ilinuwas kan Kir mismo an kalasag.” (Isaias 22:6) An mga kalaban kompleto sa armas. Igwa sinda nin mga parapana na an suksukan nin pana pano nin pana. Iinaandam kan mga guerrero an saindang mga kalasag para sa ralaban. Igwa nin mga karro asin mga kabayo na sinanay sa ralaban. Kaiba sa hukbo an mga soldados hale sa Elam, na yaon sa amihanan kan midbid ngonyan na Golpo Persiano, asin hale sa Kir, harani gayod sa Elam. An pagkasambit sa mga kadagaan na idto nagpaparisa kan harayoon na pinaghalean kan mga nananakyada. Ipinaririsa man kaiyan na puedeng kaiba an mga parapanang Elamita sa hukbo na nanhuhuma sa Jerusalem kan kaaldawan ni Ezequias.

Mga Pagprobar sa Pagdepensa

10. Anong pangyayari an magigin tanda nin maraot na mangyayari sa siudad?

¹⁰ Ilinadawan ni Isaias an nangyayaring situwasyon: “Mangyayari na an pinakapili kan saindong hababang kaplanodohan mapapano nin mga karro de guerra, asin an mismong mga kabayo daing salto na mapuesto sa may tata, asin hahaleon nin saro an panahob nin Juda.” (Isaias 22:​7, 8a) An mga karro asin kabayo nagsurusoan sa mga kaplanodohan sa luwas kan siudad nin Jerusalem asin nagposisyon na salakayon an mga tata kan siudad. Ano “an panahob nin Juda” na hinale? Posibleng marhay, iyan sarong tata kan siudad, na an pagkabihag kaini magigin tanda nin maraot na mangyayari sa mga nagdedepensa. c Kun haleon na an pandepensang panahob na ini, an siudad malalaog na nin mga nananalakay.

11, 12. Anong mga lakdang sa pagdepensa an ginibo kan mga nag-iistar sa Jerusalem?

¹¹ Isinentro ngonyan ni Isaias an saiyang atension sa mga pagprobar kan banwaan na idepensa an saindang sadiri. An enot nindang iniisip​—mga armas! “Maheling ka sa aldaw na iyan sa bugtakan nin mga armas kan harong kan kadlagan, asin maheheling nanggad nindo an mismong mga guang kan Siudad ni David, huli ta an mga iyan talagang magigin dakol. Asin titiponon nindo an katubigan sa tangke sa ibaba.” (Isaias 22:8b, 9) An mga armas itinatago sa bugtakan nin mga armas kan harong kan kadlagan. An bugtakan nin mga armas na ini itinogdok ni Salomon. Huli ta iyan ginamitan nin mga sedro na hale sa Libano kan itinogdok, iyan inapod na “Harong kan Kadlagan nin Libano.” (1 Hade 7:2-5) Siniyasat an mga guang sa lanob. Tinipon an tubig​—sarong mahalagang lakdang sa pagdepensa. An banwaan nangangaipo nin tubig tanganing mabuhay. Kun mayo kaiyan, an sarong siudad dai matagal. Pero, mangnoha na mayong sinasabi na sinda nag-asa ki Jehova para sa pagliligtas. Imbes, nagsarig sinda sa saindang sadiring rekurso. Nungka logod na gibohon niato an siring na sala!​—Salmo 127:1.

¹² Ano an magigibo sa mga guang na idto sa lanob kan siudad? “An mga harong sa Jerusalem bibilangon nanggad nindo. Gagabaon man nindo an mga harong tangani na dai maabot an lanob.” (Isaias 22:10) An mga harong sisiyasaton tanganing maheling kun arin an mga puedeng gabaon tanganing magamit an materyales sa paghirahay kan mga  guang. Saro ining paghihingoa na olangon an kaiwal na lubos na makontrol an lanob.

Sarong Banwaan na Daing Pagtubod

13. Paano hiningoa kan banwaan na seguradohon na igwa nin suplay nin tubig, alagad siisay an nalingawan ninda?

¹³ “Magkakaigwa nin salodan na gigibohon nindo sa pag-oltanan kan duwang lanob para sa katubigan kan daan na tangke. Asin dai nanggad kamo maheling sa Kaharohalangkaweng Kaggibo kaiyan, asin an saro na naghaman kaiyan kan suanoy pang panahon dai nanggad nindo maheheling.” (Isaias 22:11) An mga paghihingoa na magtipon nin tubig, na ilinadawan digdi sagkod sa bersikulo 9, nagpapagirumdom sa sato kan ginibo ni Hadeng Ezequias tangani na protehiran an siudad tumang sa nananakyadang mga Asirio. (2 Cronica 32:2-5) Minsan siring, an mga tawo sa siudad na nasa hulang ini ni Isaias daing pagtubod nanggad. Mantang nagmamaigot sindang idepensa an siudad, dai ninda iniisip an Kaglalang, bakong arog ki Ezequias.

14. Apisar kan nagpapatanid na mensahe ni Jehova, may anong bakong madonong na aktitud an banwaan?

¹⁴ Si Isaias nagpapadagos: “An Soberanong Kagurangnan, si Jehova nin mga hukbo, mangangapodan sa aldaw na iyan para sa pagtangis asin para sa pagmondo asin para sa pagkakalbo patin para sa paghagkos nin telang sako. Alagad, uya! pag-ogma asin paggayagaya, paggadan sa mga baka asin pagbuno sa mga karnero, pagkakan nin karne asin pag-inom nin arak, ‘Kumakan asin uminom kita, ta nuodma magagadan kita.’” (Isaias 22:​12, 13) An mga nag-iistar sa Jerusalem dai nagpapaheling nin pagbasol sa saindang pagrebelde tumang ki Jehova. Dai sinda nagtatangis, dai ninda binubulogan an saindang buhok, o nagsusulot nin telang sako bilang tanda nin pagsolsol. Kun ginibo ninda iyan, posibleng marhay na ililikay sinda ni Jehova sa maabot na makatatakot na marhay na mga pangyayari. Imbes, sinda biyong nagpadara sa horot nin kasiraman sa laman. An iyo man sanang aktitud yaon ngonyan sa tahaw kan dakol na dai nagtutubod sa Dios. Huling mayo sinda nin paglaom​—magsalang nin pagkabuhay liwat hale sa mga gadan o nin buhay sa Paraisong daga sa ngapit​—sinda namumuhay na may pagpanigo sa sadiri, na nagsasabi: “Magkarakan asin mag-irinom kita, huli ta sa aga magagadan kita.” (1 Corinto 15:32) Kanigoan kahalipot an pananaw! Kun sinda magtitiwala sana kutana ki Jehova, magkakaigwa sinda nin nagdadanay na paglaom!​—Salmo 4:6-8; Talinhaga 1:33.

15. (a) Ano an mensahe nin paghokom ni Jehova tumang sa Jerusalem, asin siisay an naggibo kan saiyang paghokom? (b) Taano an kaaabtan kan Kakristianohan ta magigin kapareho kan nangyari sa Jerusalem?

¹⁵ An sinasalikopan na mga nag-iistar sa Jerusalem dai magkakaigwa nin katiwasayan. Si Isaias nagsasabi: “Sa sakong mga talinga ihinayag ni Jehova nin mga hukbo an saiyang sadiri: ‘“An salang ini dai tutuboson para sa saindo sagkod na kamo magadan,” an sabi kan Soberanong Kagurangnan, si Jehova nin mga hukbo.’” (Isaias 22:14) Huli sa katagasan nin puso kan banwaan, dai magkakaigwa nin kapatawadan. Daing salto, maabot an kagadanan. Saro ining kasiertohan. An Soberanong Kagurangnan, si Jehova nin mga hukbo, an nagsabi kaiyan. Bilang kaotoban kan makahulang mga tataramon ni Isaias, duwang beses nag-agi nin kalamidad an bakong fiel na Jerusalem. Linaglag iyan kan mga hukbo nin Babilonya asin kan huri nin Roma. Kaya maagi man nin kalamidad an bakong fiel na Kakristianohan, na an mga miembro naghihingako na nagsasamba sa Dios alagad an totoo nagpapainda sa saiya paagi sa saindang mga gibo. (Tito 1:16) An mga kasalan kan Kakristianohan, pati kan sa iba pang relihion sa kinaban na hinahalean nin halaga an matanos na mga dalan nin Dios, “nakaabot na sagkod sa langit.” Kapareho kan sala kan apostatang Jerusalem, an saindang sala dakulaon na tangani na matubos.​—Kapahayagan 18:​5, 8, 21.

Sarong Maimot na Mayordomo

16, 17. (a) Siisay ngonyan an nag-aako nin nagpapatanid na mensahe hale ki Jehova, asin taano? (b) Huli sa saiyang harohalangkawon na mga ambisyon, ano an mangyayari ki Sebna?

¹⁶ Dinara ngonyan kan propeta an saiyang atension hale sa bakong fiel na banwaan pasiring sa bakong fiel na indibiduwal. Si Isaias nagsurat: “Iyo ini an isinabi kan Soberanong Kagurangnan, si Jehova nin mga hukbo: ‘Lakaw, laoga an mayordomong ini, si Sebna, na namamahala sa harong, “Ano an mahalaga sa saimo digdi, asin siisay an mahalaga sa saimo digdi, ta nagkotkot ka digdi nin lolobngan para sa saimo man sana?” Sa sarong halangkaw na kamugtakan sia nagkokotkot kan saiyang lolobngan; sa sarong kantil sia nagtutuki nin erokan para sa saiya man sana.’”​—Isaias 22:​15, 16.

¹⁷ Si Sebna ‘mayordomo kan harong,’ an harong gayod ni Hadeng Ezequias. Bilang siring, sia may maimpluwensiang katongdan, ikaduwa sana sa hade. Dakula an inaasahan sa saiya. (1 Corinto 4:2) Pero, imbes na maninigo kutanang ineenot niang asikasohon an intereses kan nasyon, nagmamaigot si Sebna na kamtan an sadiri niang kamurawayan. Nagpapaukit sia nin sarong luhosong lolobngan​—kaagid kan sa sarong hade​—para sa saiya man sana sa sarong halangkaw na kantil. Kan maheling ini, pinasabngan ni Jehova si Isaias na patanidan an bakong fiel na mayordomong ini: “Uya! Ihoholog ka ni Jehova sa madahas na pagkaholog, O pusog na lalaki, asin kakapotan ka nin makosog. Daing salto na ika papatoson nia nin higot, siring sa sarong bola para sa mahiwas na daga. Duman ka magagadan, asin duman an mga karro kan saimong kamurawayan magigin kasusupgan kan harong nin saimong kagurangnan. Asin itutulod taka hale sa saimong katongdan; asin sa saimong opisyal na kamugtakan may magbabagsak sa saimo.” (Isaias 22:17-19) Huli sa saiyang kapasloan, si Sebna dai magkakaigwa nin dawa ordinaryong lolobngan sa Jerusalem. Imbes, sia iiitsa na siring sa sarong bola, tangani na magadan sa sarong harayong daga. May patanid digdi para sa gabos na pinaniwalaan nin autoridad sa tahaw kan banwaan nin Dios. An pag-abuso sa kapangyarihan mabunga nin pagkawara kan autoridad na iyan asin posibleng marhay nin pagkapahale.

18. Siisay an masalida ki Sebna, asin ano an kahulogan kan pag-ako kaini kan opisyal na gubing ni Sebna asin kan liabe kan dinastiya ni David?

¹⁸ Pero, paano hahaleon sa saiyang katongdan si Sebna? Paagi ki Isaias, si Jehova nagpapaliwanag: “Mangyayari sa aldaw na iyan na aapodon ko an sakuyang lingkod, si Eliaquim na aking lalaki ni Hilcias. Asin gugubingan ko sia  kan saimong gubing, asin an saimong habay ibubugkos ko nin higot sa saiya, asin an saimong nasasakopan itatao ko sa saiyang kamot; asin magigin sia ama sa nag-eerok sa Jerusalem asin sa harong ni Juda. Asin ibubugtak ko an liabe kan dinastiya ni David sa saiyang abaga, asin sia mabukas na mayo nin siisay man na makapipinto, asin sia mapinto na mayo nin siisay man na makabubukas.” (Isaias 22:20-22) Bilang kasalihid ni Sebna, itatao ki Eliaquim an opisyal na gubing kan mayordomo pati an liabe kan dinastiya ni David. An Biblia naggagamit kan terminong “liabe” bilang simbolo nin autoridad, gobyerno, o kapangyarihan. (Ikomparar an Mateo 16:19.) Kan suanoy na mga panahon, an sarong konsehero nin hade, na pinaniwalaan kan mga liabe, puedeng magkaigwa kan pankagabsan na pangangataman sa mga kuarto kan hade, na nagdedesisyon pa ngani sa pagpili nin mga kandidato para sa paglilingkod sa hade. (Ikomparar an Kapahayagan 3:​7, 8.) Sa siring, mahalaga an katongdan nin mayordomo, asin dakula an inaasahan sa siisay man na naglilingkod nin siring. (Lucas 12:48) Si Sebna tibaad may kakayahan, alagad huli ta sia bakong fiel, sasalidahan sia ni Jehova.

Duwang Simbolikong Taldok

19, 20. (a) Paanong si Eliaquim magigin bendisyon sa saiyang banwaan? (b) Ano an mangyayari sa mga padagos na nag-aasa ki Sebna?

¹⁹ Sa katapustapusi, naggamit si Jehova nin simbolikong pananaram tanganing iladawan an pagbalyo nin kapangyarihan hale ki Sebna pasiring ki Eliaquim. Sia nagsasabi: “‘Ipapako ko sia [si Eliaquim] na garo taldok sa sarong nagdadanay na lugar, asin sia magigin trono nin kamurawayan sa harong kan saiyang ama. Asin isasabit sa saiya an gabos na kamurawayan kan harong kan saiyang ama, an mga aki asin mga makoapo, an gabos na lalagan na sadit, mga lalagan na mangko patin an gabos na lalagan na darakulang dulay. Sa aldaw na iyan,’ an sabi ni Jehova nin mga hukbo, ‘an taldok [si Sebna] na ipinako sa nagdadanay na lugar magagalbot, asin iyan puputolon asin mahoholog, asin an isinabit dian popohoon, ta iyan itinaram mismo ni Jehova.’”​—Isaias 22:23-25.

²⁰ Sa mga bersikulong ini an enot na taldok iyo si Eliaquim. Sia magigin “trono nin kamurawayan” sa harong kan saiyang ama, si Hilcias. Bakong arog ki Sebna, dai nia ipapasupog an harong o reputasyon kan saiyang ama. Si Eliaquim magigin nagdadanay na suporta sa mga lalagan sa harong, an boot sabihon, sa iba pa na naglilingkod sa hade. (2 Timoteo 2:​20, 21) Sa kabaliktaran, an ikaduwang taldok nanonongod ki Sebna. Minsan ngani sia garo baga segurado na, sia hahaleon. An siisay man na padagos na nag-aasa sa saiya mabagsak.

21. Sa presenteng mga panahon, siisay, siring ki Sebna, an sinalidahan, taano, asin niisay?

²¹ An inagihan ni Sebna nagpapagirumdom sa sato na sa tahaw kan mga naghihingakong nagsasamba sa Dios, an mga nag-aako nin mga pribilehio nin paglilingkod maninigong gamiton iyan sa paglingkod sa iba asin sa pagtao nin kaomawan ki Jehova. Dai ninda maninigong abusohon an saindang posisyon tanganing magpayaman o magkamit nin personal na pagkaprominente. Halimbawa, haloy nang pinalalangkaw kan Kakristianohan an saiyang sadiri bilang ninombrahan na mayordomo, an daganon na representante ni Jesu-Cristo. Minsan siring, kun paanong tinawan nin kasusupgan ni Sebna an saiyang ama paagi sa saiyang pagmamaigot na pamurawayon an saiyang sadiri, an mga namomoon sa Kakristianohan nagtao nin kasusupgan sa Kaglalang paagi sa pagtipon nin kayamanan asin kapangyarihan para sa saindang sadiri. Huli kaini, kan dumatong an panahon nin paghokom ‘na mapoon sa harong nin Dios’ kan 1918, hinale ni Jehova an Kakristianohan. Saro pang mayordomo an ipinamidbid​—“an fiel na mayordomo, an sarong may diskresion”​—asin ninombrahan na mamahala sa daganon na kasararo sa harong ni Jesus. (1 Pedro 4:17; Lucas 12:42-44) Ipinaheling kan grupong ini na kompuesto nin dakol na sia angay na magsaabaga kan sa hadeng “liabe” kan dinastiya ni David. Siring sa mapagtitiwalaan na “taldok,” iyan napatunayan na sarong masasarigan na suporta para sa gabos na laen-laen na “lalagan,” an linahidan na mga Kristiano na may laen-laen na paninimbagan na nag-aasa dian para sa espirituwal na pagkakan. An “ibang karnero” man, arog ‘kan nakikihimanwa na nasa laog kan mga tata’ nin suanoy na Jerusalem, nagsasarig sa “taldok” na ini, an Eliaquim sa presenteng aldaw.​—Juan 10:16; Deuteronomio 5:14.

22. (a) Taano ta napapanahon an pagsalida ki Sebna bilang mayordomo? (b) Sa presenteng mga panahon, taano ta napapanahon an pagnombra sa “fiel na mayordomo, an sarong may diskresion”?

²² Sinalidahan ni Eliaquim si Sebna kan si Senaquerib asin an saiyang kadaklan nanhuhuma kaidto sa Jerusalem. Kaagid kaiyan, “an fiel na mayordomo, an sarong may diskresion,” ninombrahan na maglingkod durante kan panahon nin katapusan, na matatapos kun si Satanas asin an saiyang mga hukbo humiro na para sa sarong pangultimong pagsalakay sa “Israel nin Dios” asin sa kairiba nindang ibang karnero. (Galacia 6:16) Siring kan kaaldawan ni Ezequias, an pagsalakay na iyan matatapos sa pagkalaglag kan mga kaiwal nin katanosan. An mga nagsasandig sa “taldok sa sarong nagdadanay na lugar,” an fiel na mayordomo, maliligtas, kun paanong naligtas an fiel na mga nag-iistar sa Jerusalem sa pagsalakay kan Asiria sa Juda. Kun siring, madonong nanggad na dai mangapot sa napahimutikan na “taldok” nin Kakristianohan!

23. Ano an sa kahurihurihi nangyari ki Sebna, asin ano an manonodan niato digdi?

²³ Ano an nangyari ki Sebna? Mayo kita nin rekord kun paano naotob an hula manongod sa saiya na nakarekord sa Isaias 22:18. Kan pamurawayon nia an saiyang sadiri dangan napasupog, kapareho nia an Kakristianohan, alagad tibaad nakanood sia sa disiplina. Sa bagay na ini, laen siang marhay sa Kakristianohan. Kan hagadon kan Asiriong si Rabsaces na sumuko an Jerusalem, an bagong mayordomo ni Ezequias, si Eliaquim, pinangenotan an delegasyon na nagluwas tanganing sabaton sia. Minsan siring, si Sebna nasa kataed nia bilang sekretaryo kan hade. Minalataw na si Sebna naglilingkod pa sa hade. (Isaias 36:​2, 22) Kanigoan karahay na leksion para sa mga nawaran nin katongdan nin paglilingkod sa organisasyon nin Dios! Imbes na magraot na marhay an boot asin maghinanakit, sinda madonong na nagpapadagos sa paglilingkod ki Jehova sa ano man na kapasidad na itinotogot nia. (Hebreo 12:6) Sa paggibo kaiyan, malilikayan ninda an grabeng kapahamakan na sasaparon kan Kakristianohan. Makakamtan ninda an pabor asin bendisyon nin Dios sa bilog na panahon na daing sagkod.

[Mga Nota sa Ibaba]

[Mga Hapot Para sa Pag-adal]