Pakahimong Makaya an “Sarong Tonok sa Laman”

“An sakuyang dai na kutana maninigong kabootan igo na para sa saimo.”—2 CORINTO 12:9.

1, 2. (a) Taano ta dai niato maninigo na ipagngalas an bagay na kita napapaatubang sa mga pagbalo asin problema? (b) Taano ta puede kitang magin kompiado sa atubangan nin mga kasakitan?

 “AN GABOS na nagmamawot na mamuhay na may diosnon na debosyon kaibahan ni Cristo Jesus paglalamagon man.” (2 Timoteo 3:12) Taano ta siring kaiyan? Huli ta iiniinsistir ni Satanas na an tawo naglilingkod sa Dios para sana sa paslong mga dahelan, asin desidido sia na patunayan an argumento nia. Pinatanidan kaidto ni Jesus an saiyang fiel na mga apostol: “Hinagad ni Satanas na saligsigon kamo siring sa trigo.” (Lucas 22:31) Aram na marhay ni Jesus na tinotogotan nin Dios si Satanas na baloon kita paagi sa makolog na mga problema. Siempre, dai iyan nangangahulogan na an lambang problema na inaatubang niato sa buhay direktang hale ki Satanas o sa saiyang mga demonyo. (Eclesiastes 9:11) Alagad galaga si Satanas na gamiton an ano man na medyos na magigibo nia tanganing raoton an satong integridad.

² An Biblia nagsasabi sa sato na dai niato maninigo na ipagngalas an satong mga kasakitan. Ano man an dumatong sa sato, iyan bakong bago o dai linalaoman. (1 Pedro 4:12) Sa katunayan, “an siring man na mga pagtios nangyayari sa bilog na kasararoan nin [satong] mga tugang sa kinaban.” (1 Pedro 5:9) Ngonyan, ginigipit nin labi-labi ni Satanas an lambang lingkod nin Dios. Naoogmang marhay an Diablo na maheling kita na nasasakitan sa pinakadakol na garo tonok na mga problemang mapupuede. Sa katuyohan na iyan, ginagamit nia an saiyang sistema nin mga bagay sa paagi na iyan posibleng marhay na matao nin o mapagrabe sa ano man na ‘mga tonok sa satong laman.’ (2 Corinto 12:7) Minsan siring, an mga pag-atake ni Satanas dai kaipuhan na makaraot sa satong integridad. Kun paanong si Jehova ‘matao nin luluwasan’ tanganing matagalan niato an sugot, iyan man an gigibohon nia kun kita napapaatubang sa mga problema na garo mga tonok sa satong laman.​—1 Corinto 10:13.

Kun Paano Makakaya an Sarong Tonok

3. Ano an simbag ni Jehova kan hagadon sa saiya ni Pablo na haleon an tonok sa saiyang laman?

³ Nakimaherak si apostol Pablo sa Dios na haleon an tonok sa saiyang laman. “Dahel kaini ako tolong beses na nakimaherak sa Kagurangnan na iyan mahale sa sako.” Ano an simbag ni Jehova sa maigot na kahagadan ni Pablo? “An sakuyang dai na kutana maninigong kabootan igo na para sa saimo; huli ta an sakuyang kapangyarihan sinasangkap sa kaluyahan.” (2 Corinto 12:​8, 9) Analisaron ta an simbag na ini asin helingon kun paano iyan makatatabang  sa sato na makaya an ano man na garo tonok na mga problema na nagtatao sa sato nin kakologan.

4. Sa anong mga paagi nakinabang si Pablo sa dai na kutana maninigong kabootan ni Jehova?

⁴ Mangnoha na inenkaminar nin Dios si Pablo na apresyaron an dai na kutana maninigong kabootan na ipinaabot na saiya paagi ki Cristo. Tunay nanggad, si Pablo nag-ako nin dakulang bendisyon sa dakol na paagi. Mamomoton na tinawan sia ni Jehova kan pribilehio nin pagigin disipulo, minsan ngani sia kaidto panatikong paratumang sa mga parasunod ni Jesus. (Gibo 7:58; 8:3; 9:1-4) Pakatapos kaiyan maboot na tinawan ni Jehova si Pablo nin dakol na nakaoogmang asignasyon asin pribilehio. Malinaw an leksion para sa sato. Maski sa pinakamasakit na mga panahon, igwa pa man giraray kita nin dakol na bendisyon na dapat ipagpasalamat. Nungka na an mga kasakitan niato magin dahelan na malingawan ta an abundang karahayan ni Jehova.​—Salmo 31:19.

5, 6. (a) Paano itinokdo ni Jehova ki Pablo na an kapangyarihan nin Dios “sinasangkap sa kaluyahan”? (b) Paano pinatunayan kan halimbawa ni Pablo na si Satanas putikon?

⁵ An dai na kutana maninigong kabootan ni Jehova igo na sa saro pang paagi. Igo na an kapangyarihan nin Dios na tabangan kitang makapanggana sa satong mga kasakitan. (Efeso 3:20) Itinokdo ni Jehova ki Pablo na an kapangyarihan nin Dios “sinasangkap sa kaluyahan.” Paano? Mamomoton na tinawan nia si Pablo kan gabos na kosog na kaipuhan nia tanganing makaya an kasakitan nia. An pakatagal ni Pablo asin an saiyang lubos na pagtitiwala ki Jehova naghayag man sa gabos na an kapangyarihan nin Dios nanggagana sa kamugtakan kan maluya asin makasalan na tawong ini. Isipon nindo ngonyan an epekto sa Diablo, na naghihingako na an mga tawo naglilingkod sana sa Dios kun an buhay maginhawa asin daing mga problema. An integridad ni Pablo nagin tampal sa lalauogon kan parapakaraot na iyan!

⁶ Uya si Pablo, dating kasurog ni Satanas sa saiyang pakikilaban tumang sa Dios, sarong daing pakundangan na paralamag kan mga Kristiano, sarong maigot na Fariseo na, daing duda, kaidto igwa nin dakol na kagianan sa buhay huli ta sia namundag sa mga may kaya. Si Pablo naglilingkod ngonyan ki Jehova asin ki Cristo bilang “an pinakahababa sa mga apostol.” (1 Corinto 15:9) Bilang siring, sia mapakumbabang nagpapasakop sa autoridad kan Kristianong namamahalang grupo kan enot na siglo. Asin sia fiel na nagtatagal sa ibong kan saiyang tonok sa laman. Sa kasusupgan na gayo ni Satanas, an mga kasakitan sa buhay dai nagin dahelan na lumuya an kaigotan ni Pablo. Nungkang liningawan ni Pablo an paglaom na sia magkakaigwa nin kabtang sa langitnon na Kahadean ni Cristo. (2 Timoteo 2:12; 4:18) Daing tonok, gurano man kakolog, na makakapaluya kan saiyang kaigotan. Logod na an satong kaigotan magdanay man na makosog! Paagi sa pagsustenir sa sato sa mga kasakitan niato, tinatawan kita ni Jehova nin dignidad paagi sa pribilehio nin pagtabang na patunayan na si Satanas putikon.​—Talinhaga 27:11.

Mahalagang Marhay an mga Probisyon ni Jehova

7, 8. (a) Paagi sa ano tinatawan ni Jehova nin puersa an saiyang mga lingkod ngonyan? (b) Taano ta mahalagang marhay an aroaldaw na pagbasa asin pag-adal sa Biblia sa pakahimong makaya an sarong tonok sa satong laman?

⁷ Ngonyan, tinatawan ni Jehova nin puersa an fiel na mga Kristiano paagi sa saiyang banal na espiritu, saiyang Tataramon, asin satong Kristianong kasararoan nin magturugang. Arog ni apostol Pablo, puede niatong itao ki Jehova sa pamibi an mga pagabat sa sato. (Salmo 55:22) Minsan ngani tibaad dai haleon nin Dios an mga kasakitan niato, puede nia kitang tawan kan kadonongan tanganing makaya iyan, dawa an mga kasakitan na nangorognang masakiton tioson. Puede man kitang tawan ni Jehova nin sarig nin boot​—na nagtatao sa sato nin “puersa na labi sa ordinaryo”​—tanganing tabangan kitang makatagal.​—2 Corinto 4:7.

⁸ Paano ta inaako an tabang na iyan? Dapat na mahigos niatong pag-adalan an Tataramon nin Dios, ta dian niato makukua an saiyang seguradong mga pagranga. (Salmo 94:19) Sa Biblia, mababasa ta an nakapahihirong mga tataramon kan mga lingkod nin Dios mantang sinda nakikimaherak na logod tabangan nin Dios. An mga simbag ni Jehova, na sa parate kaiba an paggamit nin nakararangang mga tataramon, mahalaga na horophoropon. An pag-adal mapasarig sa sato tanganing ‘an puersa na labi sa ordinaryo magin sa Dios asin bakong an gikan mismo sa sato.’ Kun paanong kaipuhan kitang kumakan nin pisikal na kakanon aroaldaw para sa sustansia asin kosog, dapat man kitang  regular na kumakan sa tataramon nin Dios. Ginigibo ta daw ini? Kun iyo, kun siring maheheling niato na an pag-ako niato nin “puersa na labi sa ordinaryo” nakatatabang sa sato na matagalan an ano man na piguratibong mga tonok na tibaad nagpapasakit sa sato ngonyan.

9. Paano masusuportaran kan kamagurangan an mga may kinakayang atubangon na mga problema?

⁹ An may takot sa Dios na Kristianong kamagurangan puedeng magin “siring sa pailihan sa doros” nin kasakitan, sarong “tagoan sa bagyo” nin mga problema. An kamagurangan, na boot na magin angay sa ipinasabong na paglaladawan na iyan, mapakumbaba asin sinserong naghahagad ki Jehova na tawan sinda nin “dila kan mga tinokdoan” tanganing tatao sinda kun paano sisimbagon nin tamang mga tataramon an mga nagdudusa. An mga tataramon nin kamagurangan puedeng magin siring sa maluya sanang oran na nagpapapresko asin nagpapaginhawa sa satong espiritu durante nin masakit na mga panahon sa buhay. Paagi sa pagtaram na “may pagranga sa mga kalag na nagmomondo nin makuri,” totoong sinusuportaran kan kamagurangan an saindang espirituwal na mga tugang na lalaki asin babae na tibaad napapagal na o pinanluluyahan nin boot huli sa sarong tonok sa saindang laman.​—Isaias 32:2; 50:4; 1 Tesalonica 5:14.

10, 11. Paano maparirigon kan mga lingkod nin Dios an iba na nag-aagi nin grabeng mga pagbalo?

¹⁰ An gabos na lingkod ni Jehova kabtang kan saiyang sararong Kristianong pamilya. Iyo, kita “mga kabtang na an lambang saro kabtang nin iba,” asin kita “nasa irarom nin obligasyon na magkaminorootmootan.” (Roma 12:5; 1 Juan 4:11) Paano ta inootob an obligasyon na ini? Segun sa 1 Pedro 3:​8, ginigibo ta iyan paagi sa ‘pagpaheling nin pakikipagkapwa, pagkaigwa nin kapadangatan sa tugang, asin pagigin madinamayon’ sa gabos na may relasyon sa sato sa pagtubod. Kun dapit sa mga may kinakayang atubangon na sarong partikularmenteng makolog na tonok sa laman, hoben man o gurang, kita gabos puedeng magtao sa sainda nin espesyal na konsiderasyon. Paano?

¹¹ Maninigo niatong hingoahon na magin mapagrisa sa saindang mga pagdusa. Kun kita daing simpatiya, daing pagmate, o indiperente, tibaad dai niato tinutuyo na mapagrabe an saindang pagdusa. An pakaaram niato sa saindang mga kasakitan dapat na magpahiro sa sato na magin maingat sa satong sinasabi, sa paagi nin pagsabi niato kaiyan, asin sa satong paagi nin paghiro. An satong pagigin positibo asin nakaparirigon sa boot puedeng makatabang na mainaan an nagkapira sa grabeng kolog nin ano man na tonok na nagpapasakit sa sainda. Paagi kaiyan puede kitang magin tabang na nagpapakosog sa sainda.​—Colosas 4:11.

Kun Paano Mapangganang Nakaya kan Nagkapira

12-14. (a) Ano an ginibo nin sarong Kristiana tanganing makayang atubangon an kanser? (b) Paano an espirituwal na mga tugang kan babaeng ini sinuportaran asin pinarigon an boot nia?

¹² Mantang paparani na kita sa katapusan kan huring mga aldaw na ini, an “mga kolog nin kasakitan” nag-oorog aroaldaw. (Mateo 24:8) Sa siring, an mga kasakitan posibleng marhay na maagi sa gabos  na nasa daga, nangorogna sa fiel na mga lingkod ni Jehova, na naghihingoang gibohon an saiyang kabotan. Halimbawa, estudyare an sarong Kristiana na naglilingkod sa bilog na panahon na ministeryo. Nadiskobre na sia may kanser asin kinaipuhan na haleon paagi sa operasyon an saiyang salivary asin lymphatic gland. Kan maaraman nindang mag-agom na sia igwa kan helang na ini, sinda tolos-tolos na nagdolok ki Jehova sa sarong halawig, nakikimaherak na pamibi. Kan huri sinabi nia na nakamate sinda nin masakit paniwalaan na katoninongan. Pero, sia nag-agi nin pagbarobalyo nin marahay asin maraot na panahon, nangorogna kan kinakaya niang atubangon an maraot na mga epekto kan pagbolong sa saiya.

¹³ Tanganing atubangon an saiyang situwasyon, an tugang na babaeng ini naghingoang pag-adalan sagkod sa mahihimo nia an manongod sa kanser. Kinonsulta nia an saiyang mga doktor. Sa An Torrengbantayan, Awake!, asin konektadong Kristianong mga publikasyon, nakaheling sia nin personal na mga estorya na nagpapaheling kun paano nakaya kan emosyon nin mga indibiduwal na atubangon an helang na ini. Binasa man nia an konektadong mga teksto sa Biblia na nagpapaheling kan kakayahan ni Jehova na susteniran an saiyang banwaan durante nin mga kadepisilan, asin nin iba pang nakatatabang na mga impormasyon.

¹⁴ An sarong artikulo dapit sa pakahimong makaya an pagkadesesperar sinitar an madonong na mga tataramon na ini: “An nagsosolosolo maghahanap sa saiyang sadiring paslong pagmawot.” (Talinhaga 18:1) Kun siring itinao kan artikulo an sadol na ini: “Labanan an pagsolosolo.” a An tugang na babae nagsaysay: “Dakol an nagsabi sa sako na ipinapamibi ninda ako; an iba inapodan ako sa telepono. Duwang magurang sa kongregasyon an regular na inaapodan ako tanganing kumustahon ako. Nakaresibi ako nin mga burak asin kadakol na kard. An nagkapira nagluto pa ngani. Siring man, dakol an nagboluntaryo na ibanan ako sa sakong pagpabolong.”

15-17. (a) Paano nakaya nin sarong Kristiana an mga kadepisilan na resulta nin mga aksidente? (b) Anong suporta an itinao kan mga kakongregasyon?

¹⁵ An sarong haloy nang lingkod ni Jehova sa New Mexico, E.U.A., duwang beses na naaksidente sa auto. Nadanyaran an saiyang liog asin abaga, na lalong nagpagrabe sa saiyang artritis na labing 25 taon na niang tinitios. Sia nagsaysay: “Nasasakitan akong marhay na itiso an sakong payo asin magbuhat nin ano man na bagay na sobra sa duwang kilo. Alagad an odok na pamimibi ki Jehova nakasustenir na marhay sa sako. Siring man an mga artikulo sa An Torrengbantayan na pinag-adalan niamo. May sarong nagkomento sa Miqueas 6:​8, na nagsabi na an pagigin hababa an boot sa paglakaw sa kaibanan nin Dios nangangahulogan nin pagmidbid sa mga limitasyon nin saro. Nakatabang ini sa sako na marealisar na sa ibong kan sakong kamugtakan, dai maninigong manluya an sakong boot, minsan ngani an panahon na nagagamit ko sa ministeryo mas dikit kisa gusto ko. An paglilingkod sa saiya na may dalisay na motibo iyo an pinakamahalaga.”

¹⁶ Ibinareta man nia: “An kamagurangan pirme akong tinatawan nin komendasyon sa sakong mga paghihingoa na umatender sa mga pagtiripon asin lumuwas sa ministeryo sa langtad. An mga hoben tinataratara ako na may kugos. An mga ministrong payunir mapasensiang marhay sa sako asin sa parate binabago an saindang mga iskedyul sa mga aldaw na maraot an pagmate ko. Kun maraot an kamugtakan nin panahon, may kabootan na iiniiba ninda ako sa mga pagdalaw liwat o inaagda ako na umayon sa saindang mga inaadalan sa Biblia. Asin huling dai ako makabitbit nin bag, an sakong mga literatura ilinalaag kan ibang mga parahayag sa saindang bag kun ako naluwas sa paghuhulit.”

¹⁷ Mangnoha kun paano tinabangan kan kamagurangan sa kongregasyon asin mga kapagtubod an duwang tugang na babaeng ini na makaya an saindang garo tonok na mga kamatean. Sinda nagtao nin praktikal, maboot na tabang sa katuyohan na ikatao an espesipikong mga pangangaipo sa espirituwal, pisikal, asin emosyonal. Bako daw na dinadagka kamo kaiyan na tumao nin tabang sa ibang mga tugang na lalaki asin babae na nag-aagi nin mga problema? Kamong mga hoben puede man na makatabang sa mga kakongregasyon nindo na may tinitios na mga tonok sa saindang laman.—Talinhaga 20:29.

18. Anong pagparigon sa boot an makukua niato sa mga estorya nin buhay na ipinupublikar sa magasin na Torrengbantayan asin Awake!?

¹⁸ An magasin na Torrengbantayan asin Awake! nagpublikar nin dakol na estorya nin buhay asin eksperyensia nin mga Saksi na nahimong makaya, asin sagkod ngonyan kinakayang atubangon, an  mga problema sa buhay. Mantang regular nindong binabasa an siring na mga artikulo, maheheling nindo na an dakol sa saindong espirituwal na mga tugang na lalaki asin babae sa bilog na kinaban nagtios nin mga kasakitan sa pagbuhay, nin pagkagadan nin mga namomotan sa mga kalamidad, asin nin peligrosong mga panahon nin guerra. An iba namumuhay na may nagpapaluyang mga helang. An dakol dai nagigibo an nagkapira sa simpleng mga bagay sa buhay na baliwala para sa mga marahay an salud. Masakit na marhay na pagbalo para sa sainda an mga helang ninda, nangorogna kun dai sinda makapakikabtang sa Kristianong mga aktibidad sa pinakadakol na paaging gusto ninda. Odok nanggad na inaapresyar ninda an tabang asin suporta na itinatao kan saindang mga tugang na lalaki asin babae, hoben asin gurang!

An Pakatagal Nagbubunga nin Kaogmahan

19. Taano ta nakapaggayagaya si Pablo sa ibong kan saiyang garo tonok na mga kasakitan asin kaluyahan?

¹⁹ Naggayagaya si Pablo na maheling kun paano sia pinakosog nin Dios. Sia nagsabi: “Ogmahon pa akong maghambog kun dapit sa sakong mga kaluyahan, tanganing an kapangyarihan kan Cristo magdanay sa ibabaw ko na siring sa sarong tolda. Kun siring ako nag-oogma sa mga kaluyahan, sa mga pagtuya, sa mga pangangaipo, sa mga paglamag asin kasakitan, dahel ki Cristo. Huli ta kun noarin ako maluya, saka man ako mapuersa.” (2 Corinto 12:​9, 10) Huli sa saiyang personal na mga eksperyensia, may kompiansang masasabi ni Pablo: “Bakong sa ako nagtataram mapadapit sa pagigin tikapo, huli ta nakanood ako, sa ano man na magin kamugtakan ko, na manigoan sa sadiri. Aram ko nanggad kun paano magkulang nin mga kinakaipuhan, aram ko nanggad kun paano magin abunda. Sa gabos na bagay asin sa gabos na kamugtakan nanodan ko an hilom nin pagigin basog asin nin pagigin gutom, kun paano magin abunda asin kun paano magkulang. Igwa ako kan kosog para sa gabos na bagay huli sa saiya na nagtatao nin puersa sa sako.”​—Filipos 4:11-13.

20, 21. (a) Taano ta puede kitang makaeksperyensia nin kagayagayahan sa paghorophorop sa “mga bagay na dai naheheling”? (b) Ano an nagkapirang “bagay na dai naheheling” na linalaoman nindong maheling sa daganon na Paraiso?

²⁰ Kaya, kun siring, paagi sa pagtagal sa ano man na piguratibong tonok sa satong laman, makaeeksperyensia kita nin dakulang kaogmahan sa pagpaheling sa gabos na an kapangyarihan ni Jehova sinasangkap sa satong kaluyahan. Si Pablo nagsurat: “Dai kami minasuko . . . Tunay na an samong pagkatawo sa laog nababago aroaldaw. Huli ta minsan ngani an kasakitan naagi sana asin magian, iyan nagbubunga para sa samo nin kamurawayan na paorog nang paorog an gabat asin daing katapusan; mantang kami nakatorohok . . . sa mga bagay na dai naheheling. Huli ta an mga bagay . . . na dai naheheling daing katapusan.”​—2 Corinto 4:16-18.

²¹ An kadaklan sa banwaan ni Jehova ngonyan naglalaom na mabuhay sa saiyang daganon na Paraiso asin magkamit kan mga bendisyon na ipinanuga nia. An siring na mga bendisyon tibaad ibilang niato na “dai naheheling” ngonyan. Minsan siring, marikas nang nagdadangadang an panahon na maheheling niato an mga bendisyon na iyan paagi kan sato mismong mga mata, iyo, asin kamtan iyan sagkod lamang. An saro sa mga bendisyon na iyan iyo an pakaginhawa na kita nungka na giraray na mabubuhay na igwa nin ano man na garo tonok na mga problema! ‘Lalaglagon [kan Aki nin Dios] an mga gibo kan Diablo’ asin ‘paparaon an saro na igwa kan kapangyarihan na magtao nin kagadanan.’​—1 Juan 3:8; Hebreo 2:14.

22. Ano an maninigo na magin kompiansa asin determinasyon niato?

²² Kun siring, ano man na tonok sa satong laman an nagtataong kolog sa sato ngonyan, padagos niatong kayanon iyan. Arog ni Pablo, magkakaigwa kita kan kosog na gibohon iyan huli ki Jehova, na buka an palad na nagtatao nin puersa sa sato. Sa panahon na kita nabubuhay na sa daganon na Paraiso, aroaldaw na oomawon niato si Jehova na satong Dios huli sa gabos niang makangangalas na ginibo para sa sato.​—Salmo 103:2.

[Nota sa Ibaba]

Ano an Isisimbag Nindo?

• Taano asin paano hinihingoa kan Diablo na raoton an integridad kan tunay na mga Kristiano?

• Paano “sinasangkap sa kaluyahan” an kapangyarihan ni Jehova?

• Paano maparirigon kan kamagurangan asin kan iba pa an boot kan mga nagsasakit huli sa mga problema?

[Mga Hapot Para sa Pag-adal]

[Ritrato sa pahina 18]

Tolong beses na namibi si Pablo na haleon nin Dios an tonok sa saiyang laman