“O, Medyo Makolog Ini”

NADANGOG na daw nindo an mga tataramon na iyan? Tibaad sinabi iyan nin sarong doktor o nars bago itao an sarong irinerekomendar na pagbolong.

Posibleng marhay na dai kamo nagsayuma sa pagbolong na iyan tangani sanang makalikay sa inaantisipar na kolog. Imbes, tinios nindo an kolog tanganing kamtan an mga pakinabang nin marahay na salud sa ngapit. Sa grabeng mga kaso, an pag-ako o pagsayuma sa bakong komportableng pagbolong puedeng mangahulogan nin buhay asin kagadanan.

Minsan ngani tibaad dai ta man kaipuhan na pirmeng magpaheling sa doktor, kita gabos bilang bakong sangkap na mga tawo dai puede na mayo nin disiplina, o pagtatanos, dawa an disiplina na, kun beses, tibaad makolog. (Jeremias 10:23) Idinodoon an pangangaipong ini sa parte nin mga aki, an Biblia nagsasabi: “An kakablasan nagagakot sa puso nin aki; an pamakol sa pagdisiplina iyo an mapaharayo kaiyan sa saiya.”​—Talinhaga 22:15.

Sa kasong ini, an pamakol simbolo nin autoridad nin mga magurang. Totoo na pipira sanang aki an gusto nin disiplina. Kun iyan may kaibang sarong klase nin pagpadusa, tibaad ikaanggot ninda iyan. Minsan siring, an hineheling nin madonong asin mamomoton na mga magurang bako an pagsentir kan aki kundi an pakinabang sa huri. Aram kan Kristianong mga magurang na an Tataramon nin Dios totoo sa pagsabi kaiyan na: “Mayong disiplina na sa presente garo nakagagayagaya, kundi nakamomondo; pero pagkatapos duman sa mga napatood kaiyan iyan nagbubunga nin matoninong na bunga, arin na baga, an katanosan.”​—Hebreo 12:11; Talinhaga 13:24.

Siempre, bako sanang mga aki an nangangaipo nin disiplina. Kaipuhan man iyan kan mga nasa edad na. An Biblia nagtataram sa mga nasa edad na kan iyan magsabing: “Mangapot ka sa disiplina; dai mo iyan pagbutasan. Ingatan mo iyan, huli ta iyan mismo an saimong buhay.” (Talinhaga 4:13) Iyo, an madonong na mga tawo​​—hoben asin gurang​​—maogmang aakoon an disiplina na basado sa Tataramon nin Dios, an Biblia, huli ta an paggibo kaiyan mag-iingat sa saindang buhay sa katapustapusi.