Hula ni Isaias—Liwanag Para sa Bilog na Katawohan I

Kapitulo Beinte-Un:o An Kamot ni Jehova Nagin Halangkaw

Isaias 25:1–27:13

1. Taano si Isaias ta may pag-apresyar ki Jehova?

 SI Isaias may hararom na pagkamoot ki Jehova asin naoogmang marhay na omawon sia. Sia nagkakagsing: “O Jehova, ika an sakuyang Dios. Pinamumuraway taka, inoomaw ko an saimong ngaran.” Ano an nakatatabang sa propeta na magkaigwa kan siring na marahayon na pag-apresyar sa saiyang Kaglalang? An sarong mayor na dahelan iyo an saiyang kaaraman manongod ki Jehova asin sa saiyang mga aktibidad. Nahahayag sa sunod na mga  tataramon ni Isaias an kaaraman na ini: “Huli ta naggibo ka nin makangangalas na mga bagay, mga konseho poon kan enot na mga panahon, sa pagigin fiel, sa pagigin mapagtitiwalaan.” (Isaias 25:1) Arog ki Josue na naenot sa saiya, aram ni Isaias na si Jehova fiel asin mapagtitiwalaan asin na an gabos niang “konseho”​—an mga bagay na katuyohan niang gibohon​—naootob.​—Josue 23:14.

2. Anong konseho ni Jehova an ipinahahayag ngonyan ni Isaias, asin sa ano tibaad nanonongod an konsehong ini?

² Kaiba sa mga konseho ni Jehova an saiyang mga kapahayagan nin paghokom tumang sa mga kaiwal kan Israel. Ipinahahayag ngonyan ni Isaias an saro sa mga ini: “Ginibo mo an siudad na sarong tambak nin mga gapo, an may kutang banwaan na nagtutupas na kagabaan, an torreng erokan nin mga estranghero na magin bako nang siudad, na dai na itotogdok liwat sagkod sa panahon na daing talaan.” (Isaias 25:2) Ano an dai nginaranan na siudad na ini? An tibaad pinanonongdan ni Isaias iyo an Ar nin Moab​—an Moab haloy nang may pakikienemigo sa banwaan nin Dios. a O tibaad an pinanonongdan nia iba man, mas pusog na siudad​—an Babilonya.​—Isaias 15:1; Sofonias 2:​8, 9.

3. Sa anong paagi na an mga kaiwal ni Jehova nagpapamuraway sa saiya?

³ Ano an magigin reaksion kan mga kaiwal ni Jehova kun maotob na an konsehong ini tumang sa saindang pusog na siudad? “Idtong makosog na banwaan magpapamuraway sa saimo; an banwaan kan maringis na mga nasyon, sinda matatakot sa saimo.” (Isaias 25:3) Natural sana na an mga kaiwal kan makakamhan sa gabos na Dios matatakot sa saiya. Pero paano sia ninda pinamumuraway? Babayaan daw ninda an saindang falsong mga dios asin aakoon an dalisay na pagsamba? Dai nanggad! Imbes, arog ni Faraon asin Nabucodonosor, pinamumuraway ninda si Jehova kun sinda napipiritan na rekonoseron an saiyang dakulaon na kalabihan sa sainda.​—Exodo 10:​16, 17; 12:30-33; Daniel 4:37.

4. Anong “banwaan kan maringis na mga nasyon” an nag-eeksister ngonyan, asin paanong dawa ini kaipuhan na magpamuraway ki Jehova?

⁴ Ngonyan “an banwaan kan maringis na mga nasyon” iyo an “dakulang siudad na igwa nin kahadean sa mga hade kan daga,” arin na baga, an “Dakulang Babilonya,” an pambilog na kinaban na imperyo nin falsong relihion. (Kapahayagan 17:​5, 18) An pangenot na kabtang kan imperyong ini iyo an Kakristianohan. Paano pinamumuraway si Jehova kan mga namomoon sa relihion nin Kakristianohan? Paagi sa may karaotan sa boot na pag-admitir sa makangangalas na mga bagay na ginibo nia para sa saiyang mga Saksi. Partikularmente kan 1919 kan ibinalik ni Jehova an saiyang mga lingkod sa dinamikong aktibidad pakatapos na butasan sinda sa espirituwal na pagkabihag sa Dakulang Babilonya, an mga namomoon na ini “natakot asin nagpamuraway sa Dios kan langit.”​—Kapahayagan 11:13. b

5. Paano pinoprotehiran ni Jehova an mga may absolutong kompiansa sa saiya?

⁵ Minsan ngani makatatakot sa pagheling kan saiyang mga kaiwal, si Jehova pailihan para sa mga mahoyo asin mapakumbaba na nagmamawot na paglingkodan sia. Tibaad probaran kan mga relihioso asin politikal na mga tirano an gabos na paagi tangani na raoton an pagtubod kan tunay na mga parasamba, alagad sinda nasusudya huli ta sinda may absolutong kompiansa ki Jehova. Sa kahurihurihi, madali niang mapasisilensio an mga nagkokontra sa saiya, sa paagi na garo baga tinatahoban nia nin sarong panganoron an naglalaad na saldang sa desierto o binabagatan nin sarong lanob an puersa nin sarong bagyong maoranon.​—Basahon an Isaias 25:​4, 5.

‘Sarong Bangkete Para sa Gabos na Banwaan’

6, 7. (a) Anong klaseng bangkete an ipinupuesto ni Jehova, asin para kiisay? (b) Ano an ipinanganganino kan bangkete na ihinula ni Isaias?

⁶ Siring sa sarong mamomoton na ama, si Jehova bako sanang nagpoprotehir kundi pinakakakan man an saiyang mga aki, nangorogna sa espirituwal na paagi. Pakatapos na patalingkason an saiyang banwaan kan 1919, pinuestohan nia sinda nin sarong bangkete para sa kapangganahan, sarong abundang suplay nin espirituwal na kakanon: “Si Jehova nin mga hukbo magibo nanggad para sa gabos na banwaan, sa bukid na ini, nin bangkete nin matatabang putahe, bangkete nin arak na laon, nin matatabang putahe na pano nin hotok, nin arak na laon, sinara.”​—Isaias 25:6.

⁷ An bangkete nakapuesto sa “bukid” ni Jehova. Ano an bukid na ini? Iyan “an bukid kan harong ni Jehova” na dian maburunyog an gabos na nasyon “sa huring kabtang kan mga aldaw.” Iyan an “banal na bukid” ni Jehova, na dian an saiyang fiel na mga parasamba dai naggigibo nin maraot asin dai nanraraot. (Isaias 2:2; 11:9) Sa halangkaw na lugar na ini nin pagsamba, ipinupuesto ni Jehova an saiyang abundang bangkete para sa mga fiel. Asin an espirituwal na marahay na mga bagay na bastanteng itinatao ngonyan nagseserbing anino kan pisikal na marahay na mga bagay na itatao kun an Kahadean nin Dios iyo na an magin solamenteng gobyerno nin katawohan. Dangan mawawara na an gutom. “Magkakaigwa nin abundang tipasi sa ibabaw kan daga; maglilipwas sa alitoktok kan kabukidan.”​—Salmo 72:​8, 16.

8, 9. (a) Anong duwang dakulang kaiwal nin katawohan an hahaleon? Ipaliwanag. (b) Ano an gigibohon nin Dios tanganing haleon an katuyawan kan saiyang banwaan?

⁸ An mga nakikikabtang ngonyan sa espirituwal na bangkete na itinatao nin Dios may mamuraway na mga linalaoman. Hinanyoga an sunod na mga tataramon ni Isaias. Ikinokomparar an kasalan asin kagadanan sa sarong nakapupuot na “hinabol,” o “tahob,” sia nagsasabi: “Sa bukid na ini hahalonon nanggad [ni Jehova] an ibabaw kan tahob na nakatatahob sa gabos na banwaan, asin an hinabol na nabibiklad sa gabos na nasyon. Totoong hahalonon nia an kagadanan sagkod lamang, asin papahidon nanggad kan Soberanong Kagurangnan na Jehova  an mga luha sa gabos na lalauogon.”​—Isaias 25:​7, 8a.

⁹ Iyo, mayo na nin kasalan asin kagadanan! (Kapahayagan 21:​3, 4) Dugang pa, an katuyawan huli sa kaputikan na tinios kan mga lingkod ni Jehova sa laog nin rinibong taon mawawara na man. “An katuyawan kan saiyang banwaan hahaleon nia sa bilog na daga, huli ta si Jehova mismo an nagtaram kaiyan.” (Isaias 25:8b) Paano ini mangyayari? Hahaleon ni Jehova an ginikanan kan katuyawan na iyan, si Satanas asin an saiyang banhi. (Kapahayagan 20:1-3) Bakong makangangalas na mapahihiro an banwaan nin Dios na kumagsing: “Uya! Ini an satong Dios. Kita naglalaom sa saiya, asin ililigtas nia kita. Ini si Jehova. Kita naglalaom sa saiya. Mag-orogma asin maggayagaya kita sa pagliligtas nia.”​—Isaias 25:9.

Ibinababa an mga Maabhaw

10, 11. Anong maringis na tratamiento an itinatagama ni Jehova para sa Moab?

¹⁰ Iliniligtas ni Jehova an mga kabilang sa saiyang banwaan na nagpapaheling nin kapakumbabaan. Minsan siring, an Moab na kataed kan Israel mapalangkaw, asin ikinauuyam nin makuri ni Jehova an kapaabhawan. (Talinhaga 16:18) Kun siring, an Moab itinagama sa pagkapasupog. “An kamot ni Jehova maontok sa bukid na ini, asin an Moab titimaktimakan sa namumugtakan kaiyan kun paanong an tambak nin dagami tinitimaktimakan sa sarong tapokan nin odo. Asin itatalpi nia an saiyang unat na mga kamot sa tahaw kaiyan kun paanong itinatalpi iyan nin unat nin sarong paralangoy tanganing makalangoy, asin ibababa nia an kaabhawan kaiyan paagi sa ekspertong mga hiro kan saiyang mga kamot. Asin an nakukutaan na siudad, saka an saimong haralangkaw na lanob para sa proteksion, ibabagsak nia; ibababa nia iyan, palalakmaon nia iyan sa daga, sa kabokabo.”​—Isaias 25:10-12.

¹¹ An mapagprotehir na kamot ni Jehova “maontok” sa saiyang banal na bukid. Alagad, an maabhaw na Moab tatalpion asin titimaktimakan na siring “sa sarong tapokan nin odo.” Kaidtong panahon ni Isaias, an dagami binabatayan sa tambak nin odo tanganing makagibo nin abono; kaya ihinuhula ni Isaias an pagkapasupog nin Moab, apisar kan saiyang halangkaw, garo baga ligtas na mga lanob.

12. Taano an Moab ta ilinaen para sa kapahayagan nin paghokom ni Jehova?

¹² Taano ta ilinaen ni Jehova an Moab para sa maringis na konsehong iyan? An mga Moabita gikan ni Lot, an sobrino ni Abraham asin sarong nagsasamba ki Jehova. Sa siring, bako sana sindang kataed kan katipan na nasyon nin Dios kundi mga paryente man. Apisar kaini, inako ninda an falsong mga dios asin nagpaheling nin grabeng pakikienemigo sa Israel. Maninigo para sa sainda an naabtan ninda. Sa bagay na ini, an Moab kapareho kan mga kaiwal ni Jehova ngonyan. Nangorognang nakakapareho nia an Kakristianohan, na naghihingako na naggikan sa Kristianong kongregasyon kan enot na siglo alagad, siring kan naheling sa kapinonan, iyo an pangenot na kabtang kan Dakulang Babilonya.

Sarong Awit nin Kaligtasan

13, 14. Igwa nin anong “pusog na siudad” an banwaan nin Dios ngonyan, asin sairisay an tinotogotan na lumaog dian?

¹³ Kumusta man an banwaan nin Dios? Napapalukso an puso huli sa pagkaigwa kan pabor asin proteksion ni Jehova, ilinalangkaw ninda an saindang boses sa pag-awit. “Sa aldaw na iyan aawiton an awit na ini sa daga nin Juda: ‘Igwa kita nin pusog na siudad. Kaligtasan mismo an ibubugtak nia na pinakang mga lanob asin kuta. Buksi nindo an mga tata, tanganing makalaog an matanos na nasyon na nagpapadanay sa fiel na gawe.’” (Isaias 26:​1, 2) Minsan ngani an mga tataramon na ini daing duda na nagkaigwa nin kaotoban kan suanoy na mga panahon, igwa man iyan nin klarong kaotoban ngonyan. An “matanos na nasyon” ni Jehova, an espirituwal na Israel, tinawan nin sarong pusog, arog-siudad na organisasyon. Kanigoan na dahelan nin paggayagaya, na umawit!

¹⁴ Anong klaseng mga tawo an minalaog sa “siudad” na ini? Itinatao kan awit an simbag: “An tendensia na marigon saimong [Dios] iingatan sa nagdadanay na katoninongan, huli ta sa saimo na an saro pinapagtitiwala. Magtiwala kamo ki Jehova, banwaan, sa gabos na panahon, huli ta dian ki Jah Jehova an Gapo kan daing talaan na mga panahon.” (Isaias 26:​3, 4) “An tendensia” na sinusuportaran ni Jehova iyo an pagmawot na kuyogon an saiyang matanos na mga prinsipyo asin magtiwala sa saiya, bako sa nadedepisilan na komersial, politikal, asin relihiosong mga sistema kan kinaban. Si “Jah Jehova” an solamenteng masasarigan na Gapo nin seguridad. An mga may lubos na kompiansa ki Jehova nag-aako kan saiyang proteksion asin nagkakamit nin “nagdadanay na katoninongan.”​—Talinhaga 3:​5, 6; Filipos 4:​6, 7.

15. Paano ibinaba ngonyan “an halangkaw na banwaan,” asin sa anong paagi na babatayan iyan “kan mga bitis kan mga nagsasakit nin makuri”?

¹⁵ Abaang kalaenan sa nangyari sa mga kaiwal kan banwaan nin Dios! “Tinumba nia an mga nag-eerok sa kalangkawan, an halangkaw na banwaan. Ibinababa nia iyan, ibinababa nia iyan sa daga; idinuduta nia iyan sa kabokabo. Babatayan iyan kan bitis, kan mga bitis kan mga nagsasakit nin makuri, kan mga lakad kan mga may kababaan.” (Isaias 26:​5, 6) Sa giraray, an pinanonongdan digdi ni Isaias tibaad sarong “halangkaw na banwaan” sa Moab, o tibaad ibang siudad an boot niang sabihon, siring kan Babilonya, na halangkaw nanggad sa kaabhawan. Arin man dian an totoo, binaliktad ni Jehova an kamugtakan kan “halangkaw na banwaan,” asin babatayan iyan kan saiyang ‘mga may kababaan asin nagsasakit nin makuri.’ Ngonyan an hulang ini tamang-tama sa Dakulang Babilonya, partikularmente sa Kakristianohan. Kan 1919 napiritan an “halangkaw na banwaan” na ini na butasan an banwaan ni Jehova​—sarong makasusupog na pagbagsak​—asin sinda na man an mabatay sa dating nambihag sa sainda. (Kapahayagan 14:8) Paano? Paagi sa hayagan na pag-anunsiar kan maabot na pamamalos ni Jehova sa saiya.​—Kapahayagan 8:7-12; 9:14-19.

[Mga Nota sa Ibaba]

[Mga Hapot Para sa Pag-adal]