Mga Hapot Hale sa mga Parabasa

An pagkabakong sangkap daw kan daragang si Maria igwa nin negatibong epekto sa pangingidam ki Jesus?

May labot sa “pagkamundag ni Jesus,” an ipinasabong na rekord nagsasabi: “Sa panahon na an saiyang inang si Maria ipinanugang ipakasal ki Jose, sia nanompongan na bados paagi sa banal na espiritu bago sinda pinagsaro.” (Mateo 1:18) Tunay nanggad, an banal na espiritu nin Dios nagkaigwa nin importanteng-importanteng kabtang sa pagbabados ni Maria.

Pero, kumusta man si Maria? An saiya daw na semilya nagkaigwa nin ano man na kabtang sa saiyang pagbabados? Huli sa panuga nin Dios ki Abraham, Isaac, Jacob, Juda, asin Hadeng David​​—mga apoon ni Maria​​—an mamumundag na omboy kaipuhan na magin tunay na gikan ninda. (Genesis 22:18; 26:24; 28:10-14; 49:10; 2 Samuel 7:16) Sa paano pang ibang paagi na an mamumundag na omboy ki Maria magigin lehitimong paramana kan mga panugang iyan nin Dios? Sia kaipuhan na magin totoong aki nia.​—Lucas 3:23-34.

An anghel ni Jehova nagpaheling sa daragang si Maria, na nagsasabi: “Dai ka matakot, Maria, huli ta nagkamit ka nin ugay sa Dios; asin, uya! ika mangingidam sa saimong matris asin mangangaki nin sarong aking lalaki, asin aapodon mo an saiyang ngaran na Jesus.” (Lucas 1:​30, 31) An pangingidam nangangaipo na an semilya kan babae mapertilisar. Minalataw na pinangyari ni Jehova Dios na mapertilisar an sarong semilya sa matris ni Maria, na ginigibo ini paagi sa pagbalyo kan buhay kan saiyang Aking bugtong hale sa rona nin mga espiritu pasiring sa daga.​—Galacia 4:4.

Puede daw na an sarong omboy na ipinangidam sa arog kaining paagi nin sarong bakong sangkap na babae magin sangkap asin mayo nin kasalan sa saiyang pisikal na hawak? Paano naggagana an ley nin erensia kun isinasaro an pagkasangkap sa pagkabakong sangkap? Girumdoma na an banal na espiritu an ginamit sa pagbalyo kan sangkap na puersa nin buhay kan Aki nin Dios asin sa pagpangyari kan pangingidam. Kinanselar kaini an ano man na pagkabakong sangkap na yaon sa semilya ni Maria, na paagi kaiyan naprodusir an sarong henetikong disenyo na sangkap poon pa sa kapinonan kaiyan.

Sa paano man, makasisierto kita na an pagpunsionar kan banal na espiritu nin Dios sa panahon na iyan an naggarantiya kan kapangganahan kan katuyohan nin Dios. Ipinaliwanag ki Maria kan anghel na si Gabriel: “An banal na espiritu madatong sa saimo, asin an kapangyarihan kan Kaharohalangkawe malindong sa saimo. Kaya man an ipangangaki aapodon na banal, Aki nin Dios.” (Lucas 1:35) Iyo, an banal na espiritu nin Dios garo man sana naggibo nin sarong nagpoprotehir na olang tangani na mayong pagkabakong sangkap o nakadadanyar na puersa na makadepekto sa nagtatalubong embrion poon sa pangingidam.

Malinaw nanggad, utang ni Jesus an saiyang sangkap na buhay bilang tawo sa saiyang langitnon na Ama, bakong sa siisay man na tawo. ‘Inandaman sia [ni Jehova] nin hawak,’ asin si Jesus​​—poon sa pangingidam​—talagang “dai nin digta, siblag sa mga parakasala.”​​—Hebreo 7:26; 10:5.

[Ritrato sa pahina 19]

“Ika mangingidam sa saimong matris asin mangangaki nin sarong aking lalaki”