“Madia Kamo sa Sako, . . . Asin Pagiginhawahon Ko Kamo”

Mga Pagtiripon na Nagdadagka sa Pagkamoot Asin sa Marahay na mga Gibo

POON sa Toronto sagkod sa Tokyo, poon sa Moscu sagkod sa Montevideo​—nagkapirang beses kada semana, an minilyon na Saksi ni Jehova asin mga katood ninda nagbuburunyog pasiring sa saindang lugar nin pagsamba. Kaiba sa mga indibiduwal na ini an mahigos na de pamilyang mga lalaki, na pagal-pagal pakatapos nin halawig na aldaw nin pagtrabaho; mahigos na mga agom na babae asin ina na may kaibang saradit na aki; mabagsik na mga hoben na hale sa eskuelahan; maluya nang mga gurang na maluway maglakaw huli sa mga kolog; makosog an boot na mga balo asin ilo; asin an mga nagmomondo nin makuri na nangangaipo nin karangahan.

An mga Saksing ini ni Jehova naggagamit nin dakol na klase nin transportasyon​—poon sa marikason na bullet train sagkod sa mga kabayo, poon sa hayakpit na mga tren sa irarom kan daga sagkod sa mga trak. An nagkapira kaipuhan na bumalyo sa mga salog na dakol an buaya, mantang an iba pa kaipuhan na tioson an nakakanerbios na trapik sa darakulang siudad. Taano ta dakulaon an paghihingoa kan mga tawong ini?

Sa pangenot huli ta an pag-atender asin pagpartisipar sa Kristianong mga pagtiripon sarong importanteng paagi nin pagsamba ki Jehova Dios. (Hebreo 13:15) Sinambit ni apostol Pablo an dugang pang rason kan sia nagsurat: “Konsideraron niato an lambang saro tanganing mandagka sa pagkamoot asin sa marahay na mga gibo, na dai pagpabayaan an satong pagtorotiripon, . . . kundi na magparinigonan nin boot, asin lalo na ta naheheling nindo na an aldaw harani na.” (Hebreo 10:​24, 25) Inotro digdi ni Pablo an saboot ni salmista David, na nag-awit: “Ako naogma kan sinda nagsasabi sa sako: ‘Sa harong ni Jehova magduruman kita.’”​—Salmo 122:1.

Taano ta naoogma an mga Kristiano sa pagigin presente sa saindang mga pagtiripon? Huli ta an mga nag-aatender bakong basta mga paramasid. Imbes, an mga pagtiripon nagtatao sa sainda nin oportunidad na mamidbid an lambang saro. An mga pagtiripon na ini nangorognang nagtatao nin oportunidad na magtao, bako sanang umako, asin mandagka sa lambang saro na magpaheling nin pagkamoot asin magpartisipar sa marahay na mga gibo. Nakatatabang ini na an mga pagtiripon magin nakapakokosog na mga okasyon. Dugang pa, an Kristianong mga pagtiripon saro sa mga paagi na inootob ni Jesus an saiyang panuga: “Madia kamo sa sako, . . . asin pagiginhawahon ko kamo.”​—Mateo 11:28.

 Sarong Oasis nin Karangahan Asin Pagmakolog

May marahay na mga dahelan an mga Saksi ni Jehova na mansayon an saindang mga pagtiripon bilang nakagiginhawa. Sarong bagay, ipinupuesto sa mga pagtiripon an espirituwal na mga pagkakan sa tamang panahon kan “fiel asin may diskresion na oripon.” (Mateo 24:45) Igwa man nin importanteng kabtang an mga pagtiripon sa paggibo sa mga lingkod ni Jehova na magin eksperto asin maigot na mga paratokdo kan Tataramon nin Dios. Saro pa, sa Kingdom Hall, an saro makanonompong nin mamomoton, may interes, asin may pagmakolog na mga katood na andam patin gustong tumabang asin magtao nin karangahan sa iba sa panahon nin kasakitan.​—2 Corinto 7:5-7.

Ini an naeksperyensiahan ni Phillis, sarong balo na nagadan an agom kan an saiyang mga aki singko asin otso anyos. Isinasaysay an nakagiginhawang epekto sa saiya asin sa saiyang saradit pang mga aki kan Kristianong mga pagtiripon, sinabi nia: “Nakararanga an pagpasiring sa Kingdom Hall huli ta pirmeng ipinapaheling kan mga kapagtubod an saindang pagkamoot asin pagmakolog paagi sa sarong kugos, sarong ideya na sono sa Kasuratan, o sarong higot na abrasa. Iyan an lugar na gusto ko na dian yaon ako pirme.”​—1 Tesalonica 5:14.

Pakatapos nin mayor na operasyon ki Marie, sinabi kan saiyang doktor na kisuerra mga anom na semana an kaipuhan tanganing sia marahay. Durante kan enot na mga semana kan saiyang pagparahay, dai makaatender sa mga pagtiripon si Marie. Narisa kan saiyang doktor na bako siang magayagaya arog kan dati. Kan maaraman kaini na dai sia nag-aatender sa mga pagtiripon, inenkaminar nia siang mag-atender. Sinabi ni Marie na an saiyang agom, na bako niang kapagtubod, habo siang togotan na mag-atender sa mga pagtiripon huli sa pagkahadit sa saiyang salud. An doktor kun siring suminurat nin sarong opisyal na reseta na “pinagbobotan” si Marie na magduman sa Kingdom Hall para sa pagparigon sa boot asin nakapakokosog na pakikiasosyar. Si Marie nagsabi: “Pakaatender nin sarong pagtiripon, nagrahay na gayo an sakong pagmate. Nagpoon akong magkakan, nakatorog ako sa bilog na banggi, dai ko na kinaipuhan na parateng mag-inom nin mga bolong para sa kolog, asin naghuhuyom na naman ako!”​—Talinhaga 16:24.

Naririsa kan mga tagaluwas an mamomoton na kamugtakan sa Kristianong mga pagtiripon. Pinili nin sarong estudyante sa kolehio na obserbaran an mga Saksi ni Jehova para sa saiyang isusurat na kaipuhan sa saiyang klase sa etnolohiya. Mapadapit sa kamugtakan kan pagtiripon, sinurat nia: “An mainit na pag-ako sa sako . . . kaomaw-omaw na marhay. . . . An pagigin makikatood kan mga Saksi ni Jehova sarong kualidad na risang-risa asin sa pagmate ko iyan an pinakamahalagang kabtang kan kamugtakan duman.”​—1 Corinto 14:25.

Sa maribok na kinaban na ini, an Kristianong kongregasyon sarong espirituwal na oasis. Iyan sarong lugar nin proteksion na may katoninongan asin pagkamoot. Paagi sa pagigin presente sa mga pagtiripon, maeeksperyensiahan mismo nindo an katotoohan kan mga tataramon kan salmista: “Uya! Kanigoan karahay asin kanigoan kaogma na an magturugang mag-ontok na sararo!”​—Salmo 133:1.

[Kahon/Ritrato sa pahina 25]

PAGPANIGO SA SARONG ESPESYAL NA PANGANGAIPO

Paano makikinabang sa Kristianong mga pagtiripon an mga dai nakadadangog? Sa bilog na kinaban, an Mga Saksi ni Jehova nag-oorganisar nin mga kongregasyon na naggagamit nin pagtaram paagi sa senyas. Durante kan nakaaging 13 taon, 27 kongregasyon sa pagtaram sa senyas asin 43 na grupo sa pagtaram sa senyas an naorganisar sa Estados Unidos. Sa kisuerra 40 iba pang nasyon, igwa na ngonyan nin mga 140 kongregasyon sa pagtaram sa senyas. May Kristianong mga publikasyon na iinandam sa video sa 13 pagtaram sa senyas.

An Kristianong kongregasyon nag-aalok sa mga bungog nin oportunidad na mag-omaw ki Jehova. Si Odile, sarong dating Katoliko sa Pransia na inatake nin grabeng depresyon asin nag-isip nang maghugot, odok na nagpapasalamat sa edukasyon sa Biblia na inako nia sa Kristianong mga pagtiripon. “Naulian an sakong salud asin nakabalik an kagayagayahan ko sa buhay,” an sabi nia. “Alagad orog sa gabos, nanompongan ko an katotoohan. An buhay ngonyan igwa na nin katuyohan para sa sako.”