Hanapon an Dios Paagi sa Saindong Puso Asin Isip

Ineenkaminar kan tunay na Kristianismo an paggamit kan puso sagkod isip sa pagpatalubo nin pagtubod na nakakapaogma sa Dios.

SA KATUNAYAN, itinokdo kan kagpundar nin Kristianismo, si Jesu-Cristo, na kaipuhan na mamotan niato an Dios sa “bilog [niatong] isip,” o intelihensia, apuera sa “bilog [niatong] puso” asin ‘bilog na kalag.’ (Mateo 22:37) Iyo, an satong kakayahan nin pag-isip dapat na magkaigwa nin mayor na kabtang sa satong pagsamba.

Kun inaagda an saiyang mga paradangog na horophoropon an saiyang mga katokdoan, parateng sinasabi ni Jesus: “Ano sa paghona mo?” (Mateo 17:25; 18:12; 21:28; 22:42) Sa siring man na paagi, si apostol Pedro nagsurat sa mga kapagtubod tanganing ‘pukawon an saindang malinaw na pag-isip.’ (2 Pedro 3:1) Sinadol kan pinakamahiwas an binaklay na naenot na misyonero, si apostol Pablo, an mga Kristiano na gamiton an saindang “kakayahan na mangatanosan” asin na ‘patunayan sa saindang sadiri kun ano an marahay asin inaako patin sangkap na kabotan nin Dios.’ (Roma 12:​1, 2) Paagi sana sa siring kalubos, kaingat na pagsiyasat sa saindang tinutubod na an mga Kristiano makakapatalubo nin pagtubod na nakakapaogma sa Dios asin magpapangyaring makaya an mga pagbalo na minaabot sa buhay.​—Hebreo 11:​1, 6.

Tanganing matabangan an iba pa na mapatalubo an siring na pagtubod, an enot na mga Kristianong ebanghelisador “nakipagrasonan sa sainda hale sa Kasuratan, na ipinaliliwanag asin pinatutunayan paagi sa mga reperensia” an mga bagay na itinokdo. (Gibo 17:1-3) Marahay an nagin reaksion kan mga sadiosan an puso sa rasonableng pagsiyasat na arog kaiyan. Halimbawa, dakol na tawo sa siudad nin Berea sa Macedonia an ‘nag-ako sa tataramon [nin Dios] na igwa nin dakulang pagkagalaga sa isip, na maingat na sinisiyasat an Kasuratan aroaldaw kun baga an mga bagay na ini [na ipinaliwanag ni Pablo asin kan saiyang mga kairiba] iyo man nanggad.’ (Gibo 17:11) Duwang bagay an mahalagang  mangnohon digdi. Enot, an mga taga Berea galagang naghinanyog sa Tataramon nin Dios; ikaduwa, dai ninda basta na sana inako na tama an saindang nadangog, kundi kinonsulta liwat ninda an Kasuratan. Mapakumbabang kinomendaran kan Kristianong misyonero na si Lucas an mga taga Berea huli kaini, na inaapod sindang ‘marahay an kamawotan.’ Ipinababanaag daw nindo an siring karahay na kamawotan sa saindong pagsiyasat sa espirituwal na mga bagay?

An Isip Asin Puso Nagtitinabangan

Siring kan naenot nang sinabi, kalabot an isip sagkod puso sa tunay na pagsamba. (Marcos 12:30) Isipon liwat an ilustrasyon sa naenot na artikulo manongod sa tangdanan na parapinta na guminamit nin salang mga kolor kan nagpipinta nin harong. Kun maingat nia kutanang dinangog an mga instruksion kan saiyang among, nagibo kuta nia nin bilog na puso asin kalag an saiyang trabaho asin magkakaigwa sia nin kompiansa na an saiyang trabaho aaprobaran kan kagsadiri. Minaaplikar man iyan sa satong pagsamba.

“An tunay na mga parasamba,” sabi ni Jesus, “masamba sa Ama sa espiritu asin katotoohan.” (Juan 4:23) Huli kaini, si apostol Pablo nagsurat: “Kaya ngani kami man . . . dai nag-ontok sa pagpamibi para sa saindo asin sa paghagad na kamo mapano kan tamang kaaraman sa saiyang kabotan sa bilog na kadonongan asin espirituwal na pakatalastas, tanganing maglakaw na angay ki Jehova sa katuyohan na lubos na makapaogma sa saiya.” (Colosas 1:​9, 10) An siring na “tamang kaaraman” nagpapangyari sa sinserong mga indibiduwal na magibo ninda nin bilog na puso asin kalag an saindang pagsamba na may lubos na kompiansa huli ta “nagsasamba [sinda] kaidtong [saindang] namimidbid.”​—Juan 4:22.

Sa mga dahelan na ini, an Mga Saksi ni Jehova dai nagbabautismo nin mga omboy o bagong interesado na dai pa nag-adal nin maingat sa Kasuratan. Isinugo ni Jesus an saiyang mga parasunod: “Gumibo kamo nin mga disipulo sa mga tawo kan gabos na nasyon, . . . na tokdoan nindo sinda na otobon an gabos na bagay na ipinagboot ko sa saindo.” (Mateo 28:​19, 20) An sinserong mga estudyante sa Biblia makakagibo nin may kabatidan na pagdesisyon manongod sa mga bagay na may labot sa pagsamba pakatapos sana kan pagkua nin tamang kaaraman manongod sa kabotan nin Dios. Nagmamaigot daw kamong makua an tamang kaaraman na iyan?

Pagsabot sa Pamibi kan Kagurangnan

Tanganing maheling an kalaenan kan pagkaigwa nin tamang kaaraman sa Biblia asin hababaw sanang kaaraman sa sinasabi kaiyan, estudyaran niato an sa parate inaapod na Ama Niamo, o Pamibi kan Kagurangnan, na yaon sa Mateo 6:9-13.

Minilyon an regular na namimibi kan modelong pamibi ni Jesus sa simbahan. Alagad pira an natokdoan kan kahulogan kaiyan, espesyalmente an enot na kabtang kan pamibi na may labot sa ngaran asin Kahadean nin Dios? An mga temang ini mahalagang marhay kaya iyan an inenot ni Jesus sa pamibi.

Iyan nagpopoon: “Ama niamo na nasa langit, santipikaron logod an saimong ngaran,” na nangangahulogan pakangbanalon, o gibohon na banal. Mangnoha na sinabi ni Jesus na ipamibi na santipikaron an ngaran nin Dios. Para sa dakol na tawo, iyan nagpapalataw nin kisuerra duwang hapot. Enot, ano an ngaran nin Dios? Asin ikaduwa, taano ta kaipuhan na santipikaron iyan?

An simbag sa enot na hapot manonompongan sa labing 7,000 na kabtang sa Biblia sa orihinal na mga lenguahe kaiyan. An saro yaon sa Salmo 83:18: “Tanganing an mga tawo makaaram na ika, na an ngaran Jehova, ika sana an Kaharohalangkawe sa bilog na daga.” May labot sa ngaran nin Dios, an Jehova, an Exodo 3:15 nagsasabi: “Ini an sakong ngaran sagkod sa panahon na daing katapusan, asin iyo ini an sakong girumdoman sa sunod-sunod na kapag-arakian.” a Alagad taano ta an ngaran nin Dios, na iyo an pinakaladawan nin kadalisayan asin kabanalan, ta kaipuhan na santipikaron? Huli ta iyan pinakaraot asin binalobagi magpoon pa sa kapinonan kan kasaysayan nin tawo.

Sa Eden, sinabihan nin Dios si Adan asin Eva na sinda magagadan kun kakanon ninda an ipinangangalad na prutas. (Genesis 2:17) Daing supog na  kinontra ni Satanas an Dios, na nagsasabi ki Eva: “Dai nanggad kamo magagadan.” Huli kaini, sinahotan ni Satanas an Dios nin pagputik. Pero, dai sia puminondo dian. Dakol pang katuyawan an itinambak nia sa ngaran nin Dios, na sinasabi ki Eva na an Dios bakong makatanosan na itinatago an mahalagang kaaraman sa saiya. “Huli ta naaaraman nin Dios na sa mismong aldaw na kamo kumakan [sa kahoy nin pakamidbid kan marahay asin maraot] mabubuklat an saindong mga mata asin kamo magigin arog nin Dios, na nakamimidbid kan marahay asin maraot.” Kanigoan na pagpakaraot!​—Genesis 3:​4, 5.

Paagi sa pagkakan kan ipinangangalad na prutas, si Adan asin Eva kuminampi ki Satanas. Dinugangan kan kadaklan na tawo poon kaidto, tinutuyo o dai, an kaenot-enoteng katuyawan na iyan paagi sa paghabo sa matanos na mga pamantayan nin Dios. (1 Juan 5:19) Pinapakaraot pa man giraray kan mga tawo an Dios paagi sa pagbasol sa saiya huli sa pagdusa ninda​—dawa ngani tibaad huli iyan sa maraot nindang mga iginagawe. “An sadiring kabalisngagan nin tawo rinaraot an saiyang buhay, dangan minaraot an saiyang boot tumang sa Kagurangnan,” an sabi kan Talinhaga 19:3. (The New English Bible) Nasasabotan daw nindo kun taano si Jesus, na talagang namomotan an saiyang Ama, ta namibi na an Saiyang ngaran masantipikar?

“Dumatong Logod an Kahadean Mo”

Pakapamibi na masantipikar an ngaran nin Dios, si Jesus nagsabi: “Dumatong logod an kahadean mo. Gibohon logod an boot mo, kun paano sa langit, siring man sa daga.” (Mateo 6:10) May labot sa tekstong iyan, tibaad maghapot kita: ‘Ano an Kahadean nin Dios? Asin ano an koneksion kan pagdatong kaiyan sa paggibo kan kabotan nin Dios digdi sa daga?’

Sa Biblia, an terminong “kahadean” sa pundamental nangangahulogan nin “pamamahala nin sarong hade.” Kun siring, rasonable sana na an Kahadean nin Dios nanonongod sa sarong pamamahala, o gobyerno, nin Dios, na may hade na sia an nagpili. An Hadeng ini mayong iba kundi an binuhay liwat na si Jesu-Cristo​—an “Hade nin mga hade asin Kagurangnan nin mga kagurangnan.” (Kapahayagan 19:16; Daniel 7:​13, 14) May labot sa Mesiyanikong Kahadean nin Dios sa kamot ni Jesu-Cristo, si propeta Daniel nagsurat: “Sa mga aldaw kan mga hadeng idto [mga gobyerno nin tawo na namamahala ngonyan] an Dios nin kalangitan mapatindog nin sarong kahadean na dai noarin man malalaglag. Asin an kahadean mismo dai itatao sa arin man na ibang banwaan. Iyan an maronot asin matapos kan gabos na ining kahadean, asin iyan mismo magdadanay sagkod sa mga panahon na daing talaan,” an boot sabihon, sagkod lamang.​—Daniel 2:44.

Iyo, an Kahadean nin Dios magkakaigwa nin lubos na kontrol sa daga, na hahaleon dian an gabos na maraot asin mamamahala “sagkod sa mga panahon na daing talaan,” an boot sabihon, sagkod lamang. Sa paaging ini, an Kahadean nin Dios an gagamiton ni Jehova sa pagsantipikar sa saiyang ngaran, na hinahalean iyan kan gabos na putik na katuyawan ni Satanas asin kan maraot na mga tawo.​—Ezequiel 36:23.

Arog kan gabos na gobyerno, an Kahadean nin Dios igwa nin mga sakop. Sairisay ini? An Biblia nagsisimbag: “An mga mahoyo mismo makasasadiri kan daga, asin manonompongan nanggad ninda an saindang labi-labi nanggad na kaogmahan sa nagsosopay na katoninongan.” (Salmo 37:11) Siring man, si Jesus nagsabi: “Maogma an mga mahoyo, mantang mamanahon ninda an daga.” Siempre, an mga ini igwa nin tamang kaaraman manongod sa Dios, na kaipuhan para sa buhay.​—Mateo 5:5; Juan 17:3.

Naiimahinar daw nindo an bilog na daga na pano nin mahoyong mga tawo na totoong namomoot sa Dios asin nagkakaminorootmootan? (1 Juan 4:​7, 8) Iyan an ipinamibi ni Jesus kan sia nagsabing: “Dumatong logod an kahadean mo. Gibohon logod an boot mo, kun paano sa langit, siring man sa daga.” Nasasabotan na daw nindo kun taano ta itinokdo ni Jesus sa saiyang mga parasunod na mamibi sa paaging iyan? Mas mahalaga, naheheling daw nindo kun paano kamo tibaad personal na naaapektaran kan kaotoban kan pamibing iyan?

Minilyon an Nangangatanosan Ngonyan Basado sa Kasuratan

Ihinula ni Jesus an lakop sa globong kampanya nin espirituwal na edukasyon na mag-aanunsiar kan madatong na Kahadean nin Dios. Sia nagsabi: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan  [kan presenteng kinaban, o sistema].”​—Mateo 24:14.

Sa bilog na kinaban mga anom na milyon na Saksi ni Jehova an naghihiras kan maogmang bareta na iyan sa saindang mga kataed. Iniimbitaran ninda kamo na mag-adal nin orog pa manongod sa Dios asin sa saiyang Kahadean paagi sa ‘maingat na pagsiyasat sa Kasuratan,’ na ginagamit an saindong kakayahan nin pangangatanosan. An paggibo kaiyan mapasarig sa pagtubod nindo asin mapaogma sa saindo huli sa paglaom na buhay sa sarong paraisong daga, na “mapapano . . . kan kaaraman dapit ki Jehova kun paanong an tubig nakatatahob sa mismong kadagatan.”​—Isaias 11:6-9.

[Nota sa Ibaba]

 [Kahon/Ritrato sa pahina 8]

AROGON AN DAKULANG PARATOKDO

Si Jesus parateng nagtotokdo paagi sa pagkonsentrar sa espesipikong mga topiko sa Biblia. Halimbawa, pagkabuhay nia liwat ipinaliwanag nia an saiyang kabtang sa katuyohan nin Dios sa duwang disipulo na nariribaraw sa pagkagadan nia. An Lucas 24:27 nagsasabi: “Magpoon ki Moises asin sa gabos na Propeta ipinaliwanag nia sa sainda an mga bagay manongod sa saiya sa bilog na Kasuratan.”

Mangnoha na si Jesus nagpili nin espesipikong tema​​—“saiya,” an Mesiyas​​—asin na sa pakikipag-olay nia nagkotar sia sa “gabos na Kasuratan.” Garo man sana pinag-iriba ni Jesus an magkakakonektadong teksto sa Biblia na garo mga piesa nin sarong puzzle, na nagpangyaring maheling kan saiyang mga disipulo an malinaw na arogan nin espirituwal na katotoohan. (2 Timoteo 1:13) Bilang resulta, sinda bako sanang naliwanagan kundi napahirong marhay. An pagkasaysay nagsasabi sa sato: “Sinabi ninda sa lambang saro: ‘Bakong naglaad an satong puso mantang nagtataram sia sa sato sa dalan, mantang lubos niang binubuksan sa sato an Kasuratan?’”​​—Lucas 24:32.

Nagmamaigot an Mga Saksi ni Jehova na arogon an mga paagi ni Jesus sa saindang ministeryo. An saindang pangenot na pantabang sa pag-adal iyo an brosyur na Ano an Kahagadan sa Sato nin Dios? asin an librong Kaaraman na Minagiya Pasiring sa Buhay na Daing Katapusan. Tinatratar kaini an kadakol na interesanteng topiko sa Biblia, arog kan: “Siisay an Dios?,” “Taano ta Tinotogotan nin Dios an Pagsakit?,” “Paano Nindo Manonompongan an Tunay na Relihion?,” “Ini Na an Huring mga Aldaw!,” asin “Pagtogdok nin Pamilya na Nagtatao nin Onra sa Dios.” An kada leksion igwa nin dakol na teksto.

Iniimbitaran kamong kontakon an mga Saksi ni Jehova sa saindong komunidad o magsurat sa adres sa pahina 2 kan magasin na ini para sa daing bayad na pag-adal sa Biblia sa harong dapit sa mga temang ini asin iba pa.

[Ritrato]

Taroson an puso kan saindong mga inaadalan paagi sa pagkonsentrar sa espesipikong mga topiko sa Biblia

[Mga ritrato sa pahina 7]

Nasasabotan daw nindo an kahulogan kan modelong pamibi ni Jesus?

“Ama niamo na nasa langit, santipikaron logod an saimong ngaran . . .”

“Dumatong logod an [Mesiyanikong] kahadean mo . . .”

“Gibohon logod an boot mo, kun paano sa langit, siring man sa daga”