Magpuka Kamo, Umabante na May Kosog nin Boot!

Report Dapit sa Espesyal na mga Miting

SIISAY an tamang makadedehar na nabubuhay na kita sa “delikadong mga panahon na masakit pakibagayan”? Bilang Mga Saksi ni Jehova, dai kita libre sa mga pangigipit sa pamumuhay sa “huring mga aldaw.” (2 Timoteo 3:1-5) Alagad rinerekonoser niato na an mga tawo nangangaipo nin tabang. Dai ninda nasasabotan an kahulogan kan mga pangyayari sa kinaban. Kaipuhan ninda nin karangahan asin paglaom. Sa pangenot, ano an satong kabtang sa pagtabang sa satong kapwa tawo?

Igwa kita nin sugo na tao nin Dios na ihiras an maogmang bareta manongod sa naestablisar nang Kahadean nin Dios. (Mateo 24:14) Kaipuhan na maaraman kan mga tawo na an langitnon na Kahadean na ini iyo an solamenteng paglaom para sa katawohan. Pero, an satong mensahe dai pirmeng inaako nin paborable. Sa nagkapirang lugar an satong gibohon ipinagprohibir asin an satong mga tugang pinaglamag. Pero, dai kita minaontok. May lubos na tiwala ki Jehova, determinado kitang magpuka asin padagos na umabante na may kosog nin boot, na ibinabalangibog an maogmang bareta na daing ontok.​—Gibo 5:42.

Risang-risa an marigon na determinasyon na iyan sa espesyal na mga miting na nangyari kan Oktubre 2001. Kan Sabado, Oktubre 6, ginibo an taonan na miting kan Watch Tower Bible and Tract Society of Pennsylvania sa Siudad nin Jersey, New Jersey, Assembly Hall of Jehovah’s Witnesses sa Estados Unidos. a Kan sunod na aldaw, ginibo an suplementaryong mga miting sa apat na lugar, tolo sa Estados Unidos asin saro sa Canada. b

Sa saiyang pambukas na pahayag sa taonan na miting, an tsirman, si Samuel F. Herd, miembro kan Namamahalang Grupo kan Mga Saksi ni Jehova, sinambit an Salmo 92:​1, 4 dangan nagsabi: “Gusto niatong ipaheling na kita mapagpasalamat.” Tunay nanggad, itinao an mga dahelan sa pagpasalamat sa limang report hale sa bilog na kinaban.

Mga Report Hale sa Gabos na Lugar

Irineport ni Tugang na Alfred Kwakye an pag-oswag kan paghuhulit sa Ghana, na dating inaapod na Gold Coast. An satong gibohon sa nasyon na iyan ipinagprohibir sa laog nin dakol na taon. An mga tawo naghahapot: “Taano ta ipinagprohibir? Ano an ginibo nindo?” Ini an nagtao nin oportunidad tanganing makapagpatotoo, an paliwanag ni Tugang na Kwakye. Kan hinale an pagprohibir kan  1991, igwa nin 34,421 Saksi ni Jehova sa Ghana. Kan Agosto 2001, igwa na nin total na 68,152​​—sarong 98 porsientong pag-aumento. Naponan na an plano para sa pagtogdok nin Assembly Hall na may kapasidad na 10,000. Malinaw nanggad, inaaprobetsaran kan satong espirituwal na mga tugang sa Ghana an saindang relihiosong katalingkasan.

Sa ibong kan politikal na kariribokan, aktibong nagpapartisipar sa ministeryo an satong mga tugang sa Irlandia, asin iginagalang sinda huli sa saindang neutral na paninindogan. An Irlandia igwa nin 115 kongregasyon sa 6 na sirkito, sabi kan nagkokoordinar sa Komite kan Sanga na si Peter Andrews. Isinaysay ni Tugang na Andrews an eksperyensia ni Liam, sarong dies anyos na aking lalaki na daing takot na nagpatotoo sa eskuelahan. Nakapasakamot si Liam nin My Book of Bible Stories, na ipinublikar kan Mga Saksi ni Jehova, sa 25 kaklase nia siring man sa saiyang maestra. Gustong magpabautismo si Liam, alagad may naghapot kun baga sia hoben pang marahay. Si Liam nagsimbag: “Bako an edad ko kundi an sakong pagkamoot ki Jehova an maninigong magdeterminar kaiyan. Ipaheheling kan sakong pagpabautismo kun gurano ko sia kanamomotan.” Pasohan ni Liam na magin misyonero.

Kan 1968 may 5,400 na parahayag kan maogmang bareta sa Venezuela. Alagad ngonyan igwa nang labing 88,000, an sabi ni Stefan Johansson, nagkokoordinar sa Komite kan Sanga. Asin may potensial para sa dugang pang aumento huli ta labi sa 296,000 an nag-atender sa Memorial kan 2001. Kan Disyembre 1999, an makosog an sulog na oran nagpangyaring magdarusdos an mga laboy na guminadan nin kinakalkulong 50,000 na tawo, kaiba an dakol na Saksi. An sarong Kingdom Hall napano nin laboy na kabangang metro na sana makakaabot na sa kisame. Kan may magsuherir na bayaan na sana an edipisyo, an mga tugang nagsimbag: “Dai nanggad! Ini an samong Kingdom Hall, asin habo ming bayaan iyan ngonyan.” Pinonan nindang magtrabaho, na hinahale an tonetoneladang laboy, gapo, asin iba pang basura. An edipisyo rinemodel, asin sinasabi kan mga tugang na iyan mas magayon ngonyan kisa kan bago uminagi an kalamidad!

Igwa nin 87 lenguahe asin dialekto na ginagamit sa Pilipinas, sabi ni Tugang na Denton Hopkinson, nagkokoordinar sa Komite kan Sanga. Durante kan nakaaging taon nin paglilingkod, ilinuwas an kompletong New World Translation of the Holy Scriptures sa tolong prinsipal na lenguahe sa nasyon na iyan​​—an Cebuano, Iloko, asin Tagalog. Isinaysay ni Tugang na Hopkinson an eksperyensia nin sarong nuebe anyos na aking lalaki na binasa an librong Good News​​—To Make You Happy na ipinublikar kan Mga Saksi ni Jehova. Nagkua sia nin iba pang mga publikasyon sa sangang opisina, na binasa man nia, alagad kinontra sia kan saiyang pamilya. Pakalihis nin mga taon kan sia nag-eeskuela sa pagdodoktor, kinontak nia an sangang opisina asin naghagad nin sarong pag-adal sa Biblia. Nabautismohan sia kan 1996 asin dai nahaloy naglaog sa bilog na panahon na ministeryo. Sia ngonyan naglilingkod kaiba kan saiyang agom sa sangang opisina.

‘An Puerto Rico “nag-eeksportar nin mga Saksi,”’ an paliwanag kan nagkokoordinar sa Komite kan Sanga na si Ronald Parkin. Igwa nin mga 25,000 na parahayag sa islang iyan, asin an kabilangan na iyan dai nagliliwat sa laog na nin mga taon. Taano? Bueno, kinakalkulo na an Puerto Rico “nag-eeksportar” nin mga 1,000 parahayag kada taon sa Estados Unidos, na an dakol sa sainda minabalyo huli sa pinansial na mga dahelan. Isinaysay ni Tugang na Parkin an sarong desisyon sa korte na nagin tanda nin pagkaliwat may koneksion ki Luis, sarong 17 anyos na Saksi na may leukemia. Huling nagsayuma si Luis na magpaineksion nin dugo, an kaso nia dinara sa korte. Gusto kan huwes na personal siang makaolay, kaya binisita sia kaini sa ospital. Hinapot sia ni Luis: “Taano ta kun ako makagibo nin grabeng krimen, huhusgaran nindo ako bilang sarong nasa edad na, alagad kun gusto kong sumunod sa Dios, tinatratar nindo ako bilang menor de edad?” Nakombensir an huwes na sia sarong maygurang na menor de edad asin kaya nang magdesisyon para sa sadiri nia.

Kasunod kan mga report hale sa hararayong lugar, ininterbio ni Harold Corkern, miembro kan Komite kan Sanga sa E.U., an apat na haloyan nang mga lingkod ni Jehova. Si Arthur Bonno nag-51 taon sa bilog na panahon na paglilingkod asin naglilingkod ngonyan sa Komite kan Sanga sa Ecuador. Si Angelo Catanzaro nag-59 taon sa bilog na panahon na paglilingkod, na sa kadaklan kaiyan bilang nagbibiaheng paraataman. Si Richard Abrahamson naggradwar sa Paadalan nin Gilead kan 1953, asin sia nagkapribilehiong direhiran an gibohon sa Dinamarca sa laog nin 26 na taon bago sia nagbalik sa Bethel sa Brooklyn. Sa katapustapusi, an gabos naogmang marhay na madangog an 96 anyos  na si Carey W. Barber. Nabautismohan kan 1921, si Tugang na Barber nag-78 taon sa bilog na panahon na ministeryo asin nagin miembro kan Namamahalang Grupo magpoon pa kan 1978.

Nakapupukaw sa Boot na mga Diskurso

Kaiba sa taonan na miting an sunod-sunod na nakapupukaw nin isip na mga diskurso. Nagtaram si Tugang Robert W. Wallen sa temang “Sarong Banwaan Para sa Saiyang Ngaran.” Kita an banwaan para sa ngaran nin Dios, asin manonompongan kita sa labing 230 nasyon. Tinawan kita ni Jehova nin “ngapit asin paglaom.” (Jeremias 29:11) Kaipuhan na padagos niatong palakopon an Kahadean nin Dios, na ihinihiras an marahayon na mensahe nin kaginhawahan asin karangahan. (Isaias 61:1) “Kita logod sa aroaldaw,” an pagtatapos ni Tugang na Wallen, “padagos na gumawe kaoyon kan ngaran na iinaapod sa sato, Mga Saksi ni Jehova.”​—Isaias 43:10.

An huring kabtang kan programa sarong simposium kan tolong miembro kan Namamahalang Grupo. Iyan may titulong “Ngonyan na an Panahon na Magpuka, Manindogan na Marigon, Asin Magin Makosog.”​—1 Corinto 16:13.

Enot, nagtaram si Tugang na Stephen Lett sa temang “Magpuka Kamo sa Huring Oras na Ini.” An pisikal na pagtorog sarong regalo, an paliwanag ni Tugang na Lett. Pinababagsik liwat kita kaiyan. Minsan siring, an espirituwal na pagtorog nungkang marahay. (1 Tesalonica 5:6) Kun siring, paano kita magdadanay na puka sa espirituwal? Sinumaryo ni Tugang na Lett an tolong espirituwal na “tableta”: (1) Magin sibot sa gibohon kan Kagurangnan. (1 Corinto 15:58) (2) Magin mapagrisa sa saindong espirituwal na pangangaipo. (Mateo 5:3) (3) Maghimate sa hatol na basado sa Biblia tangani na makahirong may kadonongan.​—Talinhaga 13:20.

Si Tugang na Theodore Jaracz nagtao nin nakapupukaw sa boot na pahayag na may titulong “Manindogan na Marigon sa Irarom nin Pagbalo.” Sinasambit an Kapahayagan 3:​10, si Tugang na Jaracz naghapot: “Ano an ‘oras nin pagbalo’?” An pagbalo na iyan maabot sa “aldaw kan Kagurangnan,” an panahon na kinabubuhayan niato. (Kapahayagan 1:10) An pagbalo nakasentro sa mayor na isyu​​—kita daw para sa naestablisar nang Kahadean nin Dios o para sa maraot na sistema nin mga bagay ni Satanas? Sagkod na matapos an oras na iyan nin pagbalo, seguradong mapapaatubang kita sa mga kasakitan o problema. Magdadanay daw kitang maimbod ki Jehova asin sa saiyang organisasyon? ‘Kaipuhan na ipaheling niato an siring na kaimbodan bilang mga indibiduwal,’ sabi ni Tugang na Jaracz.

Sa katapustapusi, nagtaram si Tugang na John E. Barr sa temang “Magin Makosog Kamo Bilang Espirituwal na Persona.” Sinasambit an Lucas 13:23-25, sinabi nia na kaipuhan niatong maghingoa nin maigot “na makalaog sa piot na tata.” Dakol an napaprakaso huli ta daing gayo sinda nagmamaigot na magin makosog. Tanganing magin maygurang na mga Kristiano, kaipuhan na makanood kitang iaplikar an mga prinsipyo sa Biblia sa gabos na aspekto nin buhay. Si Tugang na Barr nagsadol: “Segurado akong maoyon kamo na ngonyan na an panahon na (1) papagdanayon si Jehova na pangenot sa gabos; (2) magin makosog; asin (3) maghingoa kita nin maigot sa paggibo kan kabotan ni Jehova. Sa paaging ini makakalaog kita sa piot na tata pasiring sa marahayon na buhay na daing katapusan.”

Sa pagtatapos kan taonan na miting, igwa nin sarong hapot na dai pa nasisimbag: Ano an teksto kan taon para sa 2002 na taon nin paglilingkod? An hapot na iyan sinimbag kan sunod na aldaw.

Suplementaryong Miting

Makosogon an pag-antisipar kan Domingong aga kan nagpoon an programa para sa suplementaryong miting. Pinonan iyan paagi sa sarong sumaryo kan leksion sa Torrengbantayan para sa semanang iyan, na sinundan nin sarong halipot na presentasyon kan nagkapirang tampok na kabtang kan taonan na miting. Sunod, an gabos naogmang marhay na madangog an pahayag sa teksto kan taon para sa 2002: “Madia kamo sa sako, . . . asin pagiginhawahon ko kamo.” (Mateo 11:28) An pahayag basado sa mga artikulong pag-aadalan na sa huri ipinublikar sa Disyembre 15, 2001 na isyu kan An Torrengbantayan.

Kasunod kaiyan, ihiniras kan nagkapira na nagin delegado sa espesyal na “Mga Paratokdo kan Tataramon nin Dios” na Kombension sa Pransia asin Italia kan Agosto 2001 an saindang mga impresyon. c Sa katapustapusi, bilang tampok na kabtang kan programa sa aldaw na iyan, duwang pangultimong pahayag an itinao kan nagdadalaw na mga ispiker hale sa Bethel sa Brooklyn.

 An enot may titulong “May Kosog nin Boot na Nagtitiwala ki Jehova sa Delikadong mga Panahon na Ini.” Detalyadong ipinaliwanag kan ispiker an minasunod na prinsipal na mga punto: (1) An may kosog nin boot na pagtitiwala ki Jehova mahalagang marhay sa gabos na panahon para sa banwaan nin Dios. An Biblia igwa nin dakol na halimbawa kan mga nagpaheling nin kosog nin boot asin pagtubod sa atubangan nin pagtumang. (Hebreo 11:1–​12:3) (2) Si Jehova nagtatao nin marigon na basehan tanganing lubos kitang magtiwala sa saiya. An saiyang mga gibo asin an saiyang Tataramon naggagarantiya na sia nagmamakolog sa saiyang mga lingkod asin na nungka nia sindang lilingawan. (Hebreo 6:10) (3) An kosog nin boot asin pagtitiwala nangorognang kaipuhan ngonyan. Kita ‘ikinaoongis,’ siring kan ihinula ni Jesus. (Mateo 24:9) Tanganing makatagal, kaipuhan na magsarig kita sa Tataramon nin Dios, magkompiar na yaon sa sato an saiyang espiritu, asin makosog an boot na magpadagos sa pagbalangibog kan maogmang bareta. (4) An mga halimbawa nagpapaheling na kita napapaatubang sa pagtumang ngonyan mismo. Napahirong marhay an boot kan gabos mantang isinasaysay kan ispiker kun ano an tinagalan kan mga tugang niato sa Armenia, Georgia, Kazakhstan, Pransia, Rusya, asin Turkmenistan. Totoo nanggad, ngonyan na an panahon na ipaheling an kosog nin boot asin pagtitiwala ki Jehova!

Detalyadong ipinaliwanag kan pangultimong ispiker an temang “Sararong Nag-aabante Kaiba kan Organisasyon ni Jehova.” Kinobrehan kan pahayag an dakol na puntong napapanahon. (1) Naririsang marhay an pag-abante kan banwaan ni Jehova. An satong paghuhulit asin mga kombension naririsa kan publiko. (2) Inestablisar ni Jehova an sarong organisasyon na nagkakasararo. Kan 29 C.E., linahidan si Jesus kan banal na espiritu sa katuyohan na madara nia “an gabos”​​—an mga may langitnon na kaaabtan siring man an mga may daganon na paglaom​​—sa nagkakasararong pamilya nin Dios. (Efeso 1:8-10) (3) An mga kombension marahayon na patunay kan internasyonal na pagkasararo. Malinaw nanggad na narisa ini sa espesyal na mga kombension na ginibo sa Pransia asin Italia kan nakaaging Agosto. (4) Sarong nakapahihiro sa boot na resolusyon an inaprobaran sa Pransia asin Italia. Isinabi kan ispiker an pirang kabtang hale sa nakapupukaw sa boot na resolusyon. An kompletong resolusyon yaon sa ibaba.

Sa pagtatapos kan huring pahayag, binasa kan nagdadalaw na ispiker an sarong nakapupukaw sa boot na paisi na iinandam kan Namamahalang Grupo. Iyan nagsasabi, sa sarong kabtang: “Ngonyan na an panahon na magpuka asin magdanay na mapagbantay, na minamansayan an dalagan nin mga pangyayari sa kinaban. . . . Gusto ming ipaabot sa saindo an mamomoton na pagmakolog kan Namamahalang Grupo sa saindo asin sa gabos na iba pa sa banwaan nin Dios. Logod na kamo bendisyonan nia nin igo sa bilog na kalag na paggibo kan saiyang kabotan.” Determinado an banwaan ni Jehova sa gabos na lugar na magpuka sa delikadong mga panahon na ini asin na padagos na umabanteng may kosog nin boot kaiba kan nagkakasararong organisasyon ni Jehova.

[Mga Nota sa Ibaba]

[Kahon/Mga ritrato sa pahina 29-31]

Resolusyon

Kan Agosto 2001, an espesyal na “Mga Paratokdo kan Tataramon nin Dios” na mga Kombension ginibo sa Pransia asin Italia. Sa mga kombension na iyan sarong nakapupukaw sa boot na resolusyon an iinatubang. An minasunod iyo an bilog na sinasabi sa resolusyon na iyan.

“BILANG MGA SAKSI NI JEHOVA, kita gabos na nagkakatiripon sa ‘Mga Paratokdo kan Tataramon nin Dios’ na kombension na ini tinokdoan nin katokdoan na kapakipakinabang na marhay. An gikanan kan pagtotokdong ini malinaw nanggad na namidbid. An pagtotokdo bakong hale sa tawo. Hale iyan sa Saro na ilinaladawan kan suanoy na propetang si Isaias bilang an satong ‘Kaharohalangkaweng Paratokdo.’ (Isaias 30:20) Mangnoha an pagirumdom ni Jehova na sinasabi sa Isaias 48:17: ‘Ako, si Jehova, an saimong Dios, an Saro na nagtotokdo sa saimo na pakinabangon an saimong sadiri, an  Saro na nagpapangyari sa saimo na maglakaw sa dalan na maninigo mong lakawan.’ Paano nia ginigibo ini? Sa pangenot paagi sa libro na pinakamahiwas an pagkatradusir asin pagkawaras sa kinaban, an Biblia, kun saen sinasabi sa sato sa dai mapagdududahan na mga tataramon: ‘An gabos na Kasuratan ipinasabong nin Dios asin kapakipakinabang.’​—2 Timoteo 3:16.

“Ngonyan, an katawohan nagkakaipong marhay kan siring na kapakipakinabang na pagtotokdo. Taano ta masasabi ini? Sa pag-estudyar sa pabarobago, nakariribong na situwasyon sa kinaban na ini, ano an rinerekonoser kan mapagmansay na mga tawo? Ini sana: Minsan ngani minilyon na an tinokdoan sa mga sistema sa edukasyon kan kinaban, makamomondo an kawaran nin tunay na mga prinsipyo sa buhay asin an dai pakamidbid sa kalaenan kan tama asin sala. (Isaias 5:​20, 21) Lakop an kadaihan nin kaaraman sa Biblia. Minsan ngani an teknolohiya kayang makatao nin kadakoldakol na impormasyon paagi sa paggamit nin mga komputer, haen an simbag sa mahalagang marhay na mga hapot na siring kan, Ano an katuyohan nin buhay? Paano niato sasaboton an mga pangyayari sa panahon niato? Igwa daw nin masarig na paglaom para sa ngapit? Magkakatotoo pa daw an katoninongan asin katiwasayan? Apuera kaini, makukua sa mga estante sa mga libreriya an kadakoldakol na reperensia na tinotokar an haros gabos na tema manongod sa paghihingoa nin tawo. Sa ibong kaiyan, inoorootro nin katawohan an nakaaging mga sala. Nagdadakol an krimen. Nagbabalik an mga helang na hinohonang nahale na kaidto, mantang an iba pa, arog baga kan AIDS, makatatakot na naglalakop. An buhay pampamilya nagkakabaranga sa rikas na nakatataranta. Rinaraot kan polusyon an palibot. Isinasapeligro kan terorismo asin kan mga armas para sa lagdoan na pagpara an katoninongan asin katiwasayan. Nagpaparadakol an problema na mayo nin mga solusyon. Ano an tamang kabtang niato sa pagtabang sa satong kapwa tawo sa delikadong panahon na ini? Igwa daw nin katokdoan na nagpapaliwanag kan dahelan kan mamondong kamugtakan nin katawohan asin bako sanang nagpapaheling kan dalan pasiring sa mas marahay na buhay ngonyan kundi nag-aalok man nin sarong maogma, seguradong paglaom para sa ngapit?

“An sugo sa sato sono sa Kasuratan iyo an ‘paduman asin gumibo kamo nin mga disipulo sa mga tawo kan gabos na nasyon, na tokdoan nindo sinda na otobon an gabos na bagay na ipinagboot ni Cristo.’ (Mateo 28:​19, 20) Itinao ni Jesu-Cristo an sugong ini kasunod kan saiyang pagkagadan asin pagkabuhay liwat, kan inako nia an gabos na autoridad sa langit asin sa daga. Nakalalabi iyan sa gabos na aktibidad na sinusuportaran nin mga tawo. Sa punto de vista nin Dios, an sugo sa sato, na nakasentro sa espirituwal na mga pangangaipo kan mga nagugutom sa katanosan, an dapat na ipaorog. Igwa kita nin marigon na mga dahelan sa Kasuratan na seryosohon an sugong iyan.

“Hinahagad kaini na papagdanayon na pangenot sa satong buhay an siring na aktibidad. Paagi sa bendisyon asin tabang nin Dios, mahahaman an gibohon na iyan, apisar kan dakol na nakadidisturbong mga impluwensia, olang, asin pagtumang hale sa relihioso asin politikal na mga grupo, na an intension iyo na olangon an pag-oswag kan programang ini nin pagtotokdo na lakop sa globo. May kompiansa asin pagtubod kita na an gibohon na ini padagos na magigin mapanggana asin makakaabot sa dakulang pagkahaman kaiyan. Taano ta makasesegurong gayo kita? Huli ta nanuga an Kagurangnan na Jesu-Cristo na masasakaibanan niato sia sa itinao nin Dios na ministeryo niato sagkod sa katapusan kan sistemang ini nin mga bagay.

“Madali nang matapos an panahon para sa napupurisaw na katawohan. Kaipuhan na maotob an presenteng sugo sa sato bago umabot an pangultimong katapusan. Kun siring, kita, bilang mga Saksi ni Jehova, nagdesisyon na:

“Enot: Bilang nagdusay na mga ministro, determinado kitang papagdanayon na pangenot sa satong buhay an intereses kan Kahadean asin padagos na tumalubo sa espirituwal. Sa katuyohan na iyan, an satong pamibi kaoyon kan mga tataramon sa Salmo 143:10: ‘Tokdoan mo ako na gibohon an saimong kabotan, huli ta ika an sakong Dios.’ Ini nagkakaipo nin pagigin matibay na mga estudyante, na naghihingoang basahon an Biblia aroaldaw, naggigibo nin personal na pag-adal asin pagsiyasat. Tanganing mahayag an satong pag-oswag sa gabos na tawo, gigibohon niato an ano man na rasonableng paghihingoa tanganing mag-andam asin makinabang nin lubos sa teokratikong edukasyon na makukua sa mga pagtiripon kan kongregasyon, sa mga asamblea na pansirkito, pandistrito, nasyonal, asin internasyonal na mga kombension.​—1 Timoteo 4:15; Hebreo 10:23-25.

 “Ikaduwa: Tanganing matokdoan nin Dios, eksklusibo kitang makakan sa saiyang lamesa asin maingat na hihimateon an patanid kan Biblia manongod sa nakadadayang mga katokdoan kan mga demonyo. (1 Corinto 10:21; 1 Timoteo 4:1) Magmamaan kitang marhay na likayan an nakadadanyar na mga elemento, kaiba an mga kaputikan sa relihion, daing kamanungdanan na mga pangangatanosan, makasosopog na salang paggamit sa sekso, an damat nin pornograpiya, nakaparirigsok na aling-alingan, asin gabos na bagay na bakong ‘oyon sa ikararahay na katokdoan.’ (Roma 1:​26, 27; 1 Corinto 3:20; 1 Timoteo 6:3; 2 Timoteo 1:13) Huli sa pagmidbid sa ‘balaog na mga lalaki,’ na kualipikadong magtokdo kan nakararahay, totoong igagalang niato an saindang mga paghihingoa asin bilog na pusong makikikooperar sa sainda sa pagsuportar sa malinig asin matanos na mga pamantayan kan Tataramon nin Dios sa moral asin espirituwal.​—Efeso 4:​7, 8, 11, 12; 1 Tesalonica 5:​12, 13; Tito 1:9.

“Ikatolo: Bilang Kristianong mga magurang, bilog na puso kitang maghihingoang tokdoan an satong mga aki bako sanang paagi sa tataramon kundi paagi man sa halimbawa. An pangenot sa sato iyo an pagtabang sa sainda poon sa pagkaomboy ninda na ‘manodan an banal na mga kasuratan tanganing magin madonong para sa kaligtasan.’ (2 Timoteo 3:15) Pirme niatong girumdomon na an pagpadakula niato sa sainda sa disiplina asin pagtatanos nin isip ni Jehova an matao sa sainda kan pinakamarahay na oportunidad na maeksperyensiahan an panuga ni Dios na ‘iyan ikararahay ninda asin sinda magdadanay nin haloy sa daga.’​—Efeso 6:1-4.

“Ikaapat: Kun napapaatubang sa mga kahaditan asin grabeng mga problema, enot sa gabos, ‘ipapahayag niato sa Dios an satong mga kahagadan,’ na nakaseseguro na ‘an katoninongan nin Dios na minalampas sa gabos na kaisipan nin tawo’ maprotehir sa sato. (Filipos 4:​6, 7) Mantang yaon na kita sa irarom kan sakal ni Cristo, manonompongan niato an kaginhawahan. Huling naaaraman na an Dios nagmamakolog sa sato, kita dai mag-aalangan na ibugtak sa saiya an satong mga kahaditan.​—Mateo 11:28-30; 1 Pedro 5:​6, 7.

“Ikalima: Bilang pagpahayag kan satong pagpasalamat ki Jehova sa pribilehio nin pagigin mga paratokdo kan saiyang Tataramon, ipapadagos niato an satong mga paghihingoa na ‘gamiton an tataramon kan katotoohan sa tamang paagi’ asin ‘lubos na otobon an satong ministeryo.’ (2 Timoteo 2:15; 4:5) Huli ta aram niatong marhay kun ano an imbuelto, odok sa puso na minamawot niato na hanapon an mga maninigo asin kultibaron an banhing isinabwag. Apuera kaini, papakarhayon niato an satong pagtotokdo paagi sa epektibong pamamayo nin dugang pang mga pag-adal sa Biblia. Paagi kaini orog kitang nakakaoyon sa kabotan nin Dios na ‘an gabos na klase nin tawo makaligtas asin makaabot sa tamang kaaraman sa katotoohan.’​—1 Timoteo 2:​3, 4.

“Ikaanom: Sa bilog na nakaaging siglo asin sagkod sa siglong ini, an mga Saksi ni Jehova sa dakol na nasyon nakaeksperyensia nin manlaenlaen na klase nin pagtumang asin paglamag. Alagad si Jehova nasa kampi niato. (Roma 8:31) Inaasegurar kita kan saiyang dai nasasalang Tataramon na ‘mayong armas na gigibohon tumang sa sato’ tanganing olangon, paluwayon, o papondohon an satong paghuhulit asin pagtotokdo manongod sa Kahadean an magigin mapanggana. (Isaias 54:17) Baga man sa marahay o sa masakit na panahon, dai niato mapogolan na magtaram kan katotoohan. An satong desisyon iyo na taposon na may pagkasibot an sugo sa sato na maghulit asin magtokdo. (2 Timoteo 4:​1, 2) An satong obheto iyo na ihiras nin lubos sagkod na mapupuede an maogmang bareta kan Kahadean nin Dios sa mga tawo kan gabos na nasyon. Sa siring, padagos sindang magkakaigwa nin oportunidad na manodan an manongod sa probisyon para sa pagkamit kan buhay na daing katapusan sa sarong matanos na bagong kinaban. Bilang nagkakasararong kaburunyogan nin mga paratokdo kan Tataramon ni Dios, determinasyon niato na padagos na sumunod sa halimbawa kan Dakulang Paratokdo, si Jesu-Cristo, asin magpabanaag kan saiyang diosnon na mga kualidad. Gigibohon niato an gabos na ini para sa onra asin kaomawan kan satong Kaharohalangkaweng Paratokdo asin Paratao nin Buhay, si Jehova Dios.

“An gabos na yaon sa kombension na ini na pabor sa pag-aprobar sa resolusyon na ini, tabi magsabing IYO!”

Kan ihinapot an pantapos na hapot kan resolusyon sa 160,000 na nagkakatiripon sa tolong kombension sa Pransia asin 289,000 sa siyam na lugar sa Italia, sarong nag-uurog-udog na “Iyo” an ikinurahaw sa dakol na lenguahe na irinirepresentar kan mga delegado.