Nungkang Gurangon na Tangani na Makanood

SI Kseniya namundag kan 1897. Nagkaigwa sia nin 3 aking babae, sarong aking lalaki, 15 makoapo, asin 25 makoapo sa tuhod. Sa bilog niang buhay ginibo nia kun ano an itinokdo sa saiya kan saiyang mga magurang. Minsan ngani nagpa-Moscu sia bilang sarong dulag hale sa Republika nin Abkhaz na nababanga huli sa guerra, na nasa pag-oltanan kan Dagat na Itom asin Caucasus, sia naninigoan na nanggad sa saiyang buhay, nangorogna sa inapod nia na saiyang minanang pagtubod.

Kan 1993, an aking babae ni Kseniya na si Meri nagin saro sa mga Saksi ni Jehova. Pinonan ni Meri na ipakipag-olay ki Kseniya an manongod ki Jehova Dios asin sa Biblia, alagad habo niang maghinanyog. Parateng sinasabi ni Kseniya sa saiyang aking babae, “Huri nang marhay para sa sako na makanood nin bagong bagay.”

Pero, an saiyang aking babaeng si Meri; an agom kan saiyang makoapong lalaki, si Londa; asin an saiyang makoapo sa tuhod na si Nana asin Zaza, na gabos nagin nang Saksi ni Jehova, padagos na nakipag-olay sa saiya manongod sa Biblia. Sarong banggi kan 1999, binasa ninda an sarong teksto ki Kseniya na nakapahiro sa saiyang puso. Yaon dian an nakapahihirong mga tataramon ni Jesus sa saiyang fiel na mga apostol kan iiniintrodusir nia an Pamanggihan nin Kagurangnan. (Lucas 22:​19, 20) Sa edad na 102, si Kseniya nagdesisyon kan bangging idto na ponan an pag-adal sa Biblia.

“Pakatapos na mabuhay nin 102 na taon,” an sabi ni Kseniya, “nasabotan ko sa katapustapusi an kahulogan nin buhay. Biyo kong naaraman ngonyan na mayo nang maorog pa kisa paglingkodan an satong marahayon, mamomoton na Dios, si Jehova. Listo pa man ako asin marahay pa an salud. Nakakabasa ako na mayong antipara asin aktibong nakikiasosyar sa sakong pamilya.”

Kan Nobyembre 5, 2000, nabautismohan si Kseniya. Sia nagsasabi: “Itinatao ko ngonyan an sakong buhay ki Jehova tangani na paglingkodan sia na may pagkamoot. Nagpapasakamot ako nin mga magasin asin pulyeto mantang nagtutukaw sa pondohan nin auto na harani sa sakong harong. Parateng nagdadalaw an mga paryente, asin maogma kong ihinihiras sa sainda an katotoohan manongod ki Jehova.”

Inaantisipar ni Kseniya an aldaw na ‘an saiyang kublit magigin mas lumbod kisa kaidtong pagkahoben, asin sia mabalik sa mga aldaw kan saiyang bagsik nin pagkahoben.’ (Job 33:25) Kun an sarong sentenaryo dai nagsasaboot na gurangon na sia tangani na manodan an kahulogan nin buhay basado sa Biblia, kumusta man kamo?