Padagos na Maglingkod ki Jehova na May Marigon na Puso
Padagos na Maglingkod ki Jehova na May Marigon na Puso
“An sakong puso marigon, O Dios, an sakong puso marigon.”—SALMO 57:7.
1. Taano ta puede kitang magkaigwa nin kombiksion na arog kan ki David?
PUEDE kitang gibohon ni Jehova na magin marigon sa Kristianong pagtubod, tangani na makapangapot kita sa tunay na Kristianismo bilang saiyang dusay na mga lingkod. (Roma 14:4) Kun siring, puede kitang magkaigwa nin kombiksion na arog kan ki salmista David, na napahirong umawit: “An sakong puso marigon, O Dios.” (Salmo 108:1) Kun marigon an satong puso, kita mamomotibar na otobon an satong pagdusay sa Dios. Asin paagi sa pagsarig sa saiya para sa paggiya asin kosog, kita magigin nanggad dai nahihiro, marigon an determinasyon asin paniniwala bilang mga nagdadanay na may integridad, “na danay na dakol an gigibohon sa gibohon kan Kagurangnan.”—1 Corinto 15:58.
2, 3. Ano an kahulogan kan mga sadol ni Pablo na nakasurat sa 1 Corinto 16:13?
2 Sa mga sadol na ipinaabot sa mga parasunod ni Jesus sa suanoy na Corinto alagad siertong aplikado sa mga Kristiano sa presenteng panahon, si apostol Pablo nagsabi: “Magpuka kamo, manindogan na marigon sa pagtubod, magpakalalaki kamo, magin makosog kamo.” (1 Corinto 16:13) Sa Griego an lambang saro kan mga pagboot na ini nasa tiempo presente, sa siring nagsasadol nin dagos-dagos na paghiro. Ano an kahulogan kan konsehong ini?
3 Puede kitang “magpuka” sa espirituwal paagi sa pagtumang sa Diablo asin pagdadanay na dayupot sa Dios. (Santiago 4:7, 8) An pagsarig ki Jehova nagpapangyari sa sato na magdanay na nagkakasararo asin ‘makatindog nin marigon sa Kristianong pagtubod.’ Kita—kabale an dakol na babaeng kabilang sa sato—‘nagpapakalalaki’ paagi sa may kosog nin boot na paglilingkod sa Dios bilang mga parabalangibog kan Kahadean. (Salmo 68:11) Kita ‘nagigin makosog’ paagi sa dagos-dagos na pagsarig sa satong langitnon na Ama para sa kosog tanganing gibohon an saiyang kabotan.—Filipos 4:13.
4. Ano an ginibo niato bago nabautismohan bilang mga Kristiano?
4 Kita nanindogan sa tunay na pagtubod kan kita naggibo nin lubos na pagdusay ki Jehova asin sinimbolisaran iyan paagi sa pagpabautismo sa tubig. Alagad ano an ginibo ta bago nabautismohan? Enot nagkua kita nin tamang kaaraman sa Tataramon nin Dios. (Juan 17:3) Nagpatalubo ini nin pagtubod asin nagpahiro sa sato na magsolsol, na nagpapaheling nin tunay na pagkamondo huli sa nakaaging salang ginibo. (Gibo 3:19; Hebreo 11:6) Dangan suminunod an pagkakombertir niato, huli ta tinalikdan niato an salang mga gibo tanganing mamuhay nin kaoyon kan kabotan nin Dios. (Roma 12:2; Efeso 4:23, 24) Sinundan ini nin bilog na pusong pagdusay ki Jehova paagi sa pamibi. (Mateo 16:24; 1 Pedro 2:21) Hinagad niato sa Dios na tawan kita nin malinig na konsensia asin nabautismohan kita bilang simbolo kan satong pagdusay sa saiya. (1 Pedro 3:21) An pagsaisip kan mga lakdang na ini an matabang sa sato na magdanay na nakaturuhok sa pangangaipo na dagos-dagos na maghingoa na otobon an satong pagdusay asin padagos na maglingkod ki Jehova na may marigon na puso.
Ipadagos an Paghanap Nindo kan Tamang Kaaraman
5. Taano ta maninigo kitang magpadagos na kumua nin kaaraman sa Kasuratan?
5 Tanganing maotob an satong pagdusay sa Dios, dapat na padagos kitang magkua nin nakapakokosog sa pagtubod na kaaraman sa Kasuratan. Abaa kadakulang kaogmahan an pagkakan sa espirituwal kan enot niatong maaraman an katotoohan nin Dios! (Mateo 24:45-47) An mga “kakanon” na iyan masiram—asin binabasog nanggad kita kaiyan sa espirituwal. Ngonyan kaipuhan na padagos na kumakan nin masustansiang espirituwal na kakanon tanganing mapagdanay niato an marigon na puso bilang dusay na mga lingkod ni Jehova.
6. Paano daw kamo natabangan na mapatalubo an odok sa pusong pag-apresyar sa katotoohan sa Biblia?
6 Kinakaipuhan an paghihingoa sa pagkua nin dugang na kaaraman sa Kasuratan. Kapareho iyan nin paghanap sa natatagong kayamanan—sarong bagay na nangangaipo nin pagmamaigot. Alagad abaa kanakakokontento na makua “an mismong kaaraman nin Dios”! (Talinhaga 2:1-6) Kan an sarong parahayag kan Kahadean enot na magtokdo sa saindo kan Biblia, tibaad ginamit nia an librong Kaaraman na Minagiya Pasiring sa Buhay na Daing Katapusan. Tibaad darudakulang panahon an ginamit sa pag-oolay kan kada kapitulo, tibaad bako sanang sarong sesyon. Nakinabang kamo kun binabasa asin ipinaliliwanag an sitadong mga teksto. Kun may depisil na masabotan, ipinaliliwanag iyan. An namamayo kan pag-adal nindo sa Biblia nag-andam na marhay, namibi para sa espiritu nin Dios, asin tinabangan kamo na mapatalubo an odok sa pusong pagpasalamat sa katotoohan.
7. Ano an minakualipikar sa saro na magtokdo kan katotoohan nin Dios sa iba?
7 Angay an paghihingoang ini, ta si Pablo nagsurat: “An siisay man na berbal na tinotokdoan kan tataramon makikabtang sa gabos na marahay na bagay sa saro na nagtatao kan siring na berbal na katokdoan.” (Galacia 6:6) An tekstong Griego digdi nagpaparisa na an mga katokdoan sa Tataramon nin Dios ikinatadom sa isip asin puso kan saro na “berbal na tinotokdoan.” An pagtotokdo sa saindo sa paaging iyan minakualipikar sa saindo na magin paratokdo sa iba pa. (Gibo 18:25) Tanganing magin fiel sa saindong pagdusay, dapat nindong papagdanayon an saindong espirituwal na salud asin karigonan paagi sa dagos-dagos na pag-adal sa Tataramon nin Dios.—1 Timoteo 4:13; Tito 1:13; 2:2.
Girumdomon an Saindong Pagsolsol Asin Pagkakombertir
8. Paano mahihimong mapagdanay an diosnon na gawe-gawe?
8 Natatandaan daw nindo an pakaginhawang namatean nindo kan kamo makanood kan katotoohan, nagsolsol, dangan nakamate kan pagpapatawad nin Dios basado sa pagtubod sa pantubos na atang ni Jesus? (Salmo 32:1-5; Roma 5:8; 1 Pedro 3:18) Seguradong habo nindong bumalik sa makasalan na pamumuhay. (2 Pedro 2:20-22) Kabilang sa iba pang mga bagay, an regular na pamimibi ki Jehova matabang sa saindo na mapagdanay an diosnon na gawe-gawe, maotob an saindong pagdusay, asin padagos na maglingkod nin fiel ki Jehova.—2 Pedro 3:11, 12.
9. Huling tinalikdan na an makasalan na mga gibo, anong direksion an maninigo niatong ipadagos ngonyan?
9 Huling nakombertir na paagi sa pagtalikod sa makasalan na mga gibo, padagos na hagadon an tabang nin Dios sa pagpapadanay kan saindong puso na marigon. Garo man sana kamo nasala nin tinampo alagad kinonsulta nindo an sarong masasarigan na mapa asin nagpoon na umagi sa tamang dalan. Dai na kamo malagalag ngonyan. Padagos na magsarig sa paggiya nin Dios, asin magin determinadong magdanay sa dalan na pasiring sa buhay.—Isaias 30:20, 21; Mateo 7:13, 14.
Nungkang Paglingawan an Saindong Pagdusay Asin Bautismo
10. Anong mga punto an maninigo niatong tandaan mapadapit sa satong pagdusay sa Dios?
10 Tandaan na nagdusay kamo sa Dios paagi sa pamibi, na nasa isip an daing sagkod na fiel na paglilingkod. (Judas 20, 21) An pagdusay nangangahulogan nin pagtagama, o pagsuhay, para sa katuyohan na sagrado. (Levitico 15:31; 22:2) An saindong pagdusay bakong temporaryong kasundoan ni sarong kapanugaan sa mga tawo. Iyan sarong permanenteng pagdusay sa Unibersal na Soberano, asin an pag-otob kaiyan naghahagad nin kaimbodan sa Dios sagkod na nabubuhay. Iyo, ‘mabuhay o magadan, ki Jehova kita.’ (Roma 14:7, 8) An satong kaogmahan nakadepende sa satong pagpasakop sa saiyang kabotan asin sa satong pagpapadagos na maglingkod sa saiya na may marigon na puso.
11. Taano ta maninigo nindong girumdomon an saindong bautismo asin an kahulogan kaiyan?
11 Pirmeng girumdomon an bautismo nindo bilang simbolo kan saindong bilog na pusong pagdusay sa Dios. Bako iyan na puersahan na bautismo, ta kamo mismo an nagdesisyon. Determinado na daw kamo ngonyan na gamiton an sadiri nindong kabotan kaoyon kan kabotan nin Dios sa bilog nindong buhay? Hinagad nindo sa Dios na tawan kamo nin malinig na konsensia asin nabautismohan kamo bilang simbolo kan saindong pagdusay sa saiya. Ingatan an malinig na konsensiang iyan paagi sa pag-otob sa saindong pagdusay, asin mapapasaindo an nagsosopay na bendisyon ni Jehova.—Talinhaga 10:22.
May Kabtang an Saindong Kabotan
12, 13. Paano konektado sa pagdusay asin bautismo an satong sadiring kabotan?
12 An pagdusay asin bautismo tunay nanggad na nagdara nin dakulang mga bendisyon sa minilyon na tawo sa bilog na daga. Kun sinisimbolisaran niato an satong pagdusay sa Dios paagi sa pagpabautismo sa tubig, kita nagagadan kun manongod sa satong nakaaging pamumuhay alagad bakong kun manongod sa satong sadiring kabotan. Bilang nagturubod na tinokdoan nin tama, an totoo ginamit niato an satong sadiring kabotan kan kita magdusay sa Dios paagi sa pamibi asin nagpabautismo. An pagdusay asin pagpabautismo naghahagad na aramon niato kun ano an kabotan nin Dios dangan gikan sa boot na magdesisyon na gibohon iyan. (Efeso 5:17) Sa siring, inaarog niato si Jesus, na ginamit an sadiri niang kabotan kan butasan nia an saiyang mga gamit sa pagpanday, nagpabautismo, asin lubos na idinusay an saiyang sadiri sa paggibo kan kabotan kan saiyang langitnon na Ama.—Salmo 40:7, 8; Juan 6:38-40.
13 Katuyohan ni Jehova Dios na an saiyang Aki gigibohon na ‘sangkap paagi sa mga pagtios.’ Sa siring kinaipuhan ni Jesus na gamiton an saiyang sadiring kabotan tanganing matagalan na may pagkafiel an siring na mga pagdusa. Sa katuyohan na iyan, sia nagdolot nin “mga pagngayongayo patin nin mga kahagadan . . . na may makosog na mga pagtangis asin luha, asin sia dinangog na may pabor huli sa saiyang diosnon na takot.” (Hebreo 2:10, 18; 5:7, 8) Kun kita nagpapaheling nin kaparehong reberensial na pagkatakot sa Dios, kita man seguradong ‘dadangogon na may pabor,’ asin makakokompiar kita na paririgonon kita ni Jehova bilang saiyang dusay na mga Saksi.—Isaias 43:10.
Mapagdadanay Nindo an Marigon na Puso
14. Taano ta maninigo niatong basahon an Biblia aroaldaw?
14 Ano an matabang sa saindo na mapagdanay an marigon na puso asin sa siring maotob an saindong pagdusay sa Dios? Sa katuyohan na ilaog sa isip an padagos na nag-oorog na kaaraman sa Tataramon nin Dios, basahon an Biblia aroaldaw. Ini an dayaday na isinasadol kan “fiel asin may diskresion na oripon” na gibohon niato. Itinatao an siring na hatol huli ta an pag-otob sa satong pagdusay naghahagad na kita padagos na maglakaw sa katotoohan nin Dios. Kun an organisasyon ni Jehova tuyong inaprobaran an falsong mga katokdoan, an sadol na basahon an Biblia nungkang itatao sa mga Saksi ni Jehova asin duman sa mga hinuhulitan ninda.
15. (a) Ano an maninigo na horophoropon kun naggigibo nin mga desisyon? (b) Taano ta masasabi na an sekular na trabaho sarong Kristianong apisyon?
15 Kun naggigibo nin mga desisyon, pirmeng horophoropon kun paano iyan puedeng makaapektar sa pag-otob kan saindong pagdusay ki Jehova. Puedeng may koneksion ini sa saindong sekular na trabaho. Hinihingoa daw nindo na iyan makatabang sa saindo sa pagpalakop kan tunay na pagsamba? Minsan ngani naaaraman kan kadaklan na among na an nagdusay na mga Kristiano masasarigan asin episiente, naririsa man ninda na an mga Saksi ni Jehova dai sobra kaambisyoso na makipag-enotan sa kinaban asin dai nakikipagdaogan sa iba para sa mga posisyon na pinakahalangkaw an sueldo. Ini huli ta an pasohan kan mga Saksi bakong an pagkamit nin kayamanan, kabantogan, prestihio, o kapangyarihan. Para sa mga nag-ootob kan saindang pagdusay sa Dios, an pinakaimportante iyo an paggibo kan kabotan nin Dios. An sarong sekular na trabaho na nakatatabang sa sainda na makua an mga pangangaipo sa buhay sarong apisyon, sarong okupasyon na segunda an importansia. Arog ki apostol Pablo, an saindang propesyon, o pinakatrabaho, iyo an Kristianong ministeryo. (Gibo 18:3, 4; 2 Tesalonica 3:7, 8; 1 Timoteo 5:8) Ineenot daw nindo sa saindong buhay an intereses kan Kahadean?—Mateo 6:25-33.
16. Ano an puede niatong gibohon kun an labi-labing kahaditan nagigin dahelan na magin masakit otobon an satong pagdusay sa Dios?
16 An nagkapira tibaad haros nagagabatan na sa laen-laen na kahaditan bago ninda nanodan an katotoohan. Alagad an saindang puso pinangibabawan nanggad nin kagayagayahan, pagpasalamat, asin pagkamoot sa Dios kan akoon ninda an paglaom sa Kahadean! An pagpensar sa mga bendisyon na nakamtan ninda poon kaidto puede nanggad na makatabang sa sainda na maotob an saindang pagdusay ki Jehova. Sa ibong na kampi, kumusta kun an labi-labing pagkahadit sa mga problema na komon sa buhay sa sistemang ini naghuhuma ngonyan na puoton “an tataramon nin Dios,” kun paanong an mga tonok puedeng makaolang sa mga semilya na tumalubo nin husto asin mamunga? (Lucas 8:7, 11, 14; Mateo 13:22; Marcos 4:18, 19) Kun namamatean nindo na nagpopoon na ining mangyari sa saindo o sa saindong pamilya, itao an saindong kahaditan ki Jehova asin mamibi na logod tabangan nia kamong tumalubo sa pagkamoot asin apresasyon. Kun itatao nindo sa saiya an pagabat sa saindo, sususteniran nia kamo asin tatawan kamo kan kosog tanganing makapadagos na maglingkod sa saiya nin maogma na may marigon na puso.—Salmo 55:22; Filipos 4:6, 7; Kapahayagan 2:4.
17. Paano mahihimong makayang atubangon an grabeng mga pagbalo?
17 Padagos na mamibi nin regular ki Jehova Dios, kun paanong namibi kamo kan kamo magdusay sa saiya. (Salmo 65:2) Kun nasusugotan na gumibo nin sala o kun napapaatubang sa grabeng pagbalo, hagadon an paggiya nin Dios asin an saiyang tabang na sunodon iyan. Tandaan an pangangaipo na magkaigwa nin pagtubod, ta si disipulo Santiago nagsurat: “Kun an siisay man sa saindo kulang nin kadonongan [tanganing makayang atubangon an sarong pagbalo], padagos siang maghagad sa Dios, huli ta sia abundang nagtatao sa gabos na dai nin pagbasol; asin iyan itatao saiya. Alagad sia padagos na maghagad sa pagtubod, na dai nin ano man na pagduwaduwa, huli ta an nagduduwaduwa siring sa alon nin dagat na ipinapadpad nin doros asin iinaapwak minsan saen. Sa katunayan, dai maghona an siring na tawo na sia mag-aako nin ano man hale ki Jehova; sia tawong dai makadesisyon, bakong marigon sa gabos niang dalan.” (Santiago 1:5-8) Kun an sarong pagbalo garo baga magabaton na, makasisierto kita kaini: “Mayong sugot na uminabot sa saindo kundi idto sanang komun sa mga tawo. Alagad fiel an Dios, asin dai nia itotogot na kamo masugotan nin labi sa saindong makakaya, kundi kaibahan kan sugot matao man sia nin luluwasan tanganing iyan matagalan nindo.”—1 Corinto 10:13.
18. Ano an puede niatong gibohon kun an sarong seryosong itinatagong kasalan pinaluluya an satong desisyon na otobon an satong pagdusay ki Jehova?
18 Paano kun riniribok nin sarong seryosong itinatagong kasalan an saindong konsensia asin pinaluluya an saindong desisyon na otobon an saindong pagdusay sa Dios? Kun kamo nagsosolsol, mararanga kamo kan pakaaram na ‘dai duduhagion ni Jehova an sarong pusong laglag asin ronot.’ (Salmo 51:17) Hagadon an tabang kan mamomoton na Kristianong kamagurangan, sa pakaaram na dai ninda—bilang pag-arog ki Jehova—babaliwalaon an saindong kamawotan na mamatean an pakabalik nin marahay na relasyon sa saindong langitnon na Ama. (Salmo 103:10-14; Santiago 5:13-15) Dangan huli sa pakabalik nin espirituwal na kosog asin marigon na puso, makagigibo na kamo nin tanos na mga dana para sa saindong mga bitis asin mahihimo na nindong otobon an saindong pagdusay sa Dios.—Hebreo 12:12, 13.
Padagos na Maglingkod na May Marigon na Puso
19, 20. Taano ta mahalagang marhay na padagos niatong otobon an satong pagdusay?
19 Sa delikadong mga panahon na ini, dapat kitang magmaigot na otobon an satong pagdusay asin padagos na maglingkod sa Dios na may marigon na puso. Si Jesus nagsabi: “An nakatagal sagkod sa katapusan iyo an maliligtas.” (Mateo 24:13) Huling kita nabubuhay na sa “huring mga aldaw,” an katapusan puedeng dumatong ano man na oras. (2 Timoteo 3:1) Dugang pa, mayo sato an makasesegurado na kita buhay pa sa aga. (Santiago 4:13, 14) Kaya mahalaga na padagos niatong otobon ngonyan an satong pagdusay!
20 Idinoon ini ni apostol Pedro sa saiyang ikaduwang surat. Ipinaheling nia na kun paanong an mga maraot nagadan sa Baha, an simbolikong daga, o maraot na sosyedad nin tawo, lalaglagon man durante kan “aldaw ni Jehova.” Nagkagsing kun siring si Pedro: “Kamo maninigong magin anong klaseng mga tawo sa banal na mga gawe asin gibo nin diosnon na debosyon”! Sinadol man nia sinda: “Mga namomotan, mantang kamo igwa na kan patienot na kaaraman na ini, mag-ingat kamo na dai kamo madara [nin falsong mga paratokdo asin maraot na mga tawo] asin maholog kamo sa saindong sadiring karigonan.” (2 Pedro 3:5-17) Makaturotriste nanggad kun an sarong bautisado malagalag asin magadan bilang saro na dai nakapagpadanay nin marigon na puso!
21, 22. Paano nagkatotoo an mga tataramon sa Salmo 57:7 sa kamugtakan ni David asin kan tunay na mga Kristiano?
21 An saindong determinasyon na otobon an saindong pagdusay sa Dios mapakokosog nanggad kun gigirumdomon nindo an maogmang aldaw kan saindong bautismo asin hahagadon an tabang nin Dios tanganing an saindong tataramon asin gibo makapagayagaya sa saiyang puso. (Talinhaga 27:11) Si Jehova nungkang sinusudya an saiyang banwaan, asin sierto nanggad na maninigo kitang magin fiel sa saiya. (Salmo 94:14) Nagpaheling sia nin pagkaherak kan olangon nia an mga plano kan mga kalaban asin kan iligtas nia si David. Huling nagpapasalamat dahel kaini, ipinahayag ni David an karigonan, an pagkadai mahihiro, kan saiyang pagkamoot sa Paraligtas nia. Odok sa boot, sia nag-awit: “An sakong puso marigon, O Dios, an sakong puso marigon. Ako maawit asin magibo nin melodiya.”—Salmo 57:7.
22 Arog ki David, an tunay na mga Kristiano dai natatanyog sa saindang debosyon sa Dios. May marigon na puso, saindang iinaatribwir an saindang pagkakalda asin pagkaligtas ki Jehova, na magayagayang inaawitan ninda nin mga pag-omaw. Kun marigon an saindong puso, iyan magsasarig sa Dios, asin sa tabang nia maootob nindo an saindong pagdusay. Iyo, puede kamong magin arog kan “mga matanos” na mapadapit sa sainda nag-awit an salmista: “Dai sia matatakot minsan sa maraot na bareta. An saiyang puso marigon, pinasarig ki Jehova.” (Salmo 112:6, 7) Paagi sa pagtubod sa Dios asin lubos na pagsarig sa saiya, maootob nindo an saindong pagdusay asin padagos kamong makapaglilingkod ki Jehova na may marigon na puso.
Nagigirumdoman daw Nindo?
• Taano ta maninigo kitang magpadagos sa pagkua nin tamang kaaraman sa Biblia?
• Taano ta maninigo niatong girumdomon an satong pagsolsol asin pagkakombertir?
• Paano kita nakikinabang sa paggirumdom sa satong pagdusay asin bautismo?
• Ano an matabang sa sato na padagos na makapaglingkod ki Jehova na may marigon na puso?
[Mga Hapot Para sa Pag-adal]
[Mga ritrato sa pahina 18]
Pinapagdadanay daw nindo an saindong espirituwal na salud paagi sa aroaldaw na pag-adal sa Tataramon nin Dios?
[Ritrato sa pahina 18]
An paggibo sa Kristianong ministeryo na magin satong pinakatrabaho nakatatabang sa sato na padagos na makapaglingkod ki Jehova na may marigon na puso