Taano ta Dapat Magpabautismo?

“Paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda.”​—MATEO 28:19.

1, 2. (a) Sa anong mga kamugtakan ginibo an nagkapirang pagbautismo? (b) Anong mga hapot an pinalalataw mapadapit sa bautismo?

 PINIRIT kan Francong si Hadeng Carlomagno an nadaog na mga Saxon na magpabautismo gabos kan 775-77 C.E. “Pinirit nia sindang makombertir na magin Kristiano sa ngaran sana,” an isinurat kan historyador na si John Lord. Kaagid kaiyan, pakatapos na maagom an sarong prinsesang Griego Ortodokso kan 987 C.E., an namamahala sa Rusya na si Vladimir I nagdesisyon na an saiyang mga sakop dapat na magin mga “Kristiano.” Ipinagboot nia an lagduan na mga pagbautismo kan saiyang mga namamanwaan​—na may huma nin kagadanan!

² Tama daw an siring na mga bautismo? Iyan daw igwa nin tunay na kahulogan? Maninigo daw na bautismohan an minsan siisay?

Bautismo—Paano?

3, 4. Taano ta bakong tamang Kristianong bautismo an pagwisik o pagbubo nin tubig sa payo?

³ Kan piriton ni Carlomagno asin Vladimir I an mga tawo na magpabautismo, an ginibo kan mga namamahalang idto bakong kaoyon sa Tataramon nin Dios. An totoo, mayo nin saysay kun an bautismo pinapaagi sa pagwisik, pagbubo nin tubig sa payo, o pagladop pa ngani sa mga indibiduwal na dai natokdoan kan katotoohan sa Kasuratan.

⁴ Estudyare an nangyari kan si Jesus nin Nazaret magduman ki Juan na Bautisador kan 29 C.E. Si Juan nagbabautismo nin mga tawo sa Salog nin Jordan. Sinda boluntad na nagduruman sa saiya tanganing magpabautismo. Pinatindog sana daw nia sinda sa Jordan mantang binububoan nia an saindang payo nin kadikit na tubig hale sa salog o winiwisikan nia sinda kaiyan? Ano an nangyari kan bautismohan ni Juan si Jesus? Ibinareta ni Mateo na kan mabautismohan na “si Jesus tolos na naghawas sa tubig.” (Mateo 3:16) Sia naglugbo sa tubig, huling ilinadop sa Salog nin Jordan. Siring man, an debotong kapon na Etiope binautismohan sa sarong lugar na “may tubig.” Kaipuhan an siring na mga lugar na may tubig  huli ta kalabot sa bautismo ki Jesus asin sa saiyang mga disipulo an biyong pagladop.​—Gibo 8:36.

5. Paano nagbautismo nin mga tawo an enot na mga Kristiano?

⁵ An mga termino sa Griego na trinadusir na “bautismohan,” “bautismo,” asin iba pa, nanonongod sa pagladop, o pagbuntog sa irarom nin tubig. An Smith’s Bible Dictionary nagsasabi: “An bautismo tama asin literal na nangangahulogan nin pagladop.” Sa siring an nagkapirang traduksion nin Biblia nagsasabing “Juan na Parapaladop” asin “Juan na parabuntog.” (Mateo 3:​1, Rotherham; Diaglott interlinear) An History of the Christian Religion and Church, During the Three First Centuries ni Augusto Neander nagsasabi: “An bautismo sa kapoonpooni ginibo paagi sa pagladop.” An bantog na libro sa Pransia na Larousse du XX^e Siècle (Paris, 1928) nagkokomento: “An enot na mga Kristiano nag-ako nin bautismo paagi sa pagladop sa gabos na lugar na igwa nin tubig.” Asin an New Catholic Encyclopedia nagsasabi: “Malinaw na an Bautismo sa enot na Iglesia ginigibo kaidto paagi sa pagladop.” (1967, Tomo II, pahina 56) Kaya ngonyan, an bautismo bilang saro sa mga Saksi ni Jehova sarong boluntad na lakdang na kalabot an biyong pagladop sa tubig.

Sarong Bagong Dahelan na Magpabautismo

6, 7. (a) Sa anong katuyohan naggibo nin mga bautismo si Juan? (b) Ano an bago kaidto manongod sa bautismo kan mga parasunod ni Jesus?

⁶ An mga bautismong ginibo ni Juan laen an katuyohan kisa kan mga bautismong ginibo kan mga parasunod ni Jesus. (Juan 4:​1, 2) Si Juan nagbautismo nin mga tawo bilang hayag na simbolo kan saindang pagsolsol sa mga kasalan tumang sa Ley. a (Lucas 3:3) Alagad may bagong bagay na kalabot sa bautismo kan mga parasunod ni Jesus. Kan Pentecostes 33 C.E., sinadol ni apostol Pedro an mga naghihinanyog sa saiya: “Magsorolsol kamo, asin an lambang saro logod sa saindo mabautismohan sa ngaran ni Jesu-Cristo para sa kapatawadan kan saindong mga kasalan.” (Gibo 2:37-41) Minsan ngani an sinasabihan nia iyo an mga Judio asin proselito, si Pedro dai nagtataram manongod sa bautismo bilang simbolo nin pagsolsol sa mga kasalan tumang sa Ley; ni boot niang sabihon na an bautismo sa ngaran ni Jesus naglaladawan sa paghugas sa mga kasalan.​—Gibo 2:10.

⁷ Sa pangyayaring idto, ginamit ni Pedro an enot sa “mga liabe kan kahadean.” Para sa anong katuyohan? Tanganing ihayag sa mga naghihinanyog sa saiya an kaaraman manongod sa saindang oportunidad na lumaog sa Kahadean nin langit. (Mateo 16:19) Huling sinayumahan kan mga Judio si Jesus bilang Mesiyas, an pagsolsol asin paggibo nin pagtubod sa saiya sarong bago asin mahalagang marhay na bagay na nakakokontribwir sa paghagad asin pag-ako kan pagpapatawad nin Dios. Puede nindang ipaheling an hayag na ebidensia nin siring na pagtubod paagi sa pagladop sa tubig sa ngaran ni Jesu-Cristo. Sa paaging iyan sisimbolisaran ninda an saindang personal na pagdusay sa Dios paagi ki Cristo. An gabos na nagmamawot kan pag-oyon nin Dios ngonyan dapat na gumibo nin iyo man sanang pagtubod, idusay an saindang sadiri ki Jehova Dios, asin umagi nin Kristianong bautismo bilang simbolo nin lubos na pagdusay sa Kaharohalangkaweng Dios.

Kaipuhan an Tamang Kaaraman

8. Taano ta bakong para sa gabos an Kristianong bautismo?

⁸ An Kristianong bautismo bakong para sa gabos. Pinagbotan ni Jesus an mga parasunod nia: “Paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo.” (Mateo 28:​19, 20) Bago bautismohan, an mga tawo dapat na ‘tokdoan na otobon an gabos na bagay na ipinagboot ni Jesus sa mga disipulo nia.’ Huli kaini, daing kamanungdanan an puersahan na mga bautismo kan mga mayo nin pagtubod na basado sa tamang kaaraman sa Tataramon nin Dios asin kontra iyan sa sugo na itinao ni Jesus sa tunay na mga parasunod nia.​—Hebreo 11:6.

9. Ano an boot sabihon kan bautismohan “sa ngaran kan Ama”?

⁹ Ano an boot sabihon kan bautismohan “sa ngaran kan Ama”? Nangangahulogan iyan na rinerekonoser kan kandidato sa bautismo an katongdan  asin autoridad kan satong langitnon na Ama. Sa siring minimidbid si Jehova Dios bilang satong Kaglalang, “an Kaharohalangkawe sa bilog na daga,” asin an Unibersal na Soberano.​—Salmo 83:18; Isaias 40:28; Gibo 4:24.

10. An pagbautismo ‘sa ngaran kan Aki’ nangangahulogan nin ano?

¹⁰ An bautismohan ‘sa ngaran kan Aki’ nangangahulogan nin pagrekonoser sa katongdan asin autoridad ni Jesus bilang Aking bugtong nin Dios. (1 Juan 4:9) Si Jesus inaako kan mga kualipikado sa bautismo bilang an saro na itinao nin Dios bilang “pantubos na karibay nin dakol.” (Mateo 20:28; 1 Timoteo 2:​5, 6) Dapat man na midbidon kan mga kandidato sa bautismo an “superyor na kamugtakan” na dian pinamuraway nin Dios an saiyang Aki.​—Filipos 2:8-11; Kapahayagan 19:16.

11. Ano an kahulogan kan pagigin binautismohan ‘sa ngaran kan banal na espiritu’?

¹¹ Ano an kahulogan kan bautismo ‘sa ngaran kan banal na espiritu’? Ipinaheheling kaini na rinerekonoser kan mga kandidato sa bautismo na an banal na espiritu iyo an puersa aktiba ni Jehova, na ginagamit sa laen-laen na paagi kaoyon kan saiyang katuyohan. (Genesis 1:2; 2 Samuel 23:​1, 2; 2 Pedro 1:21) Minimidbid kan mga kualipikado sa bautismo na an banal na espiritu an nagtatabang sa sainda na masabotan an “hararom na mga bagay nin Dios,” na magibo an paghuhulit kan Kahadean, asin ikapaheling an bunga kan espiritu na “pagkamoot, kagayagayahan, katoninongan, pakatios, kabootan, karahayan, pagtubod, kahoyoan, pagpopogol sa sadiri.”​—1 Corinto 2:10; Galacia 5:​22, 23; Joel 2:​28, 29.

Kahalagahan kan Pagsolsol Asin Pagkakombertir

12. Paano konektado sa pagsolsol an Kristianong bautismo?

¹² Apuera sa kamugtakan kan daing kasalan na tawong si Jesus, an bautismo sarong tao nin Dios na simbolo na konektado sa pagsolsol. Kun kita nagsosolsol, kita nakakamate nin hararom na pagbasol huli sa sarong bagay na nagibo o dai niato nagibo. An mga Judio kaidtong enot na siglo na boot na paogmahon an Dios kinaipuhan na pagsolsolan an saindang mga kasalan tumang ki Cristo. (Gibo 3:11-19) An nagkapirang nagturubod na Hentil sa Corinto pinagsolsolan an pakikisaro, idolatriya, paghabon, asin iba pang grabeng mga kasalan. Huli sa saindang pagsolsol, sinda “nahugasan” sa dugo ni Jesus; “sinantipikar,” o itinagama, para sa paglilingkod sa Dios; asin ‘ipinahayag na matanos’ sa ngaran ni Cristo asin paagi sa espiritu nin Dios. (1 Corinto 6:9-11) An pagsolsol sarong mahalagang marhay na lakdang tanganing makamtan an malinig na konsensia asin tao nin Dios na pakaginhawa sa pakamate nin kasalan.​—1 Pedro 3:21.

13. Mapadapit sa bautismo, ano an kalabot sa pagkakombertir?

¹³ An pagkakombertir dapat na gibohon bago kita bautismohan bilang Saksi ni Jehova. An pagkakombertir sarong boluntad na akto na sueltong ginigibo nin saro na bilog na pusong nagdesisyon na sumunod ki Cristo Jesus. Isinisikwal kan siring na mga indibiduwal an saindang dating salang iginawe asin nagdedesisyon na gibohon an tama sa pagheling nin Dios. Sa Kasuratan, an mga berbo sa Hebreo asin Griego na nanonongod sa pagkakombertir igwa nin kahulogan na pagtalikod, pagbakle. An paghirong ini nagpaparisa nin pagbalik sa Dios hale sa salang dalan. (1 Hade 8:​33, 34) An pagkakombertir nagkakaipo nin “mga gibo na angay sa pagsolsol.” (Gibo 26:20) Hinahagad kaiyan na bayaan niato an falsong pagsamba, na humiro kita kaoyon kan mga togon nin Dios, asin magtao nin dai nababangang debosyon ki Jehova. (Deuteronomio 30:​2, 8-10; 1 Samuel 7:3) An pagkakombertir nagbubunga nin mga pagbabago sa satong kaisipan, obheto, asin ugale. (Ezequiel 18:31) ‘Nagbabakle’ kita mantang an maraot na mga ugale sinasanglian nin bagong personalidad.​—Gibo 3:19; Efeso 4:20-24; Colosas 3:5-14.

Mahalagang Marhay an Bilog na Pusong Pagdusay

14. Ano an kahulogan kan pagdusay kan mga parasunod ni Jesus?

¹⁴ Dapat man na maenot sa bautismo kan mga parasunod ni Jesus an bilog na pusong pagdusay sa Dios. An pagdusay nangangahulogan nin pagtagama para sa sarong katuyohan na sagrado. Mahalagang marhay an lakdang na ini kaya maninigo niatong ipahayag ki Jehova sa pamibi an satong desisyon na itao sa saiya an dai nababangang debosyon sagkod lamang. (Deuteronomio 5:9) Siempre, kita nagdusay bakong sa sarong gibohon o sa sarong tawo kundi sa Dios mismo.

15. Taano ta ilinaladop an mga kandidato sa bautismo?

 ¹⁵ Kun kita nagdudusay kan satong sadiri sa Dios paagi ki Cristo, ipinapahayag niato an determinasyon na gamiton an satong buhay sa paggibo kan kabotan nin Dios na sinasabi sa Kasuratan. Bilang simbolo kan pagdusay na iyan, an mga kandidato sa bautismo ilinaladop sa tubig, kun paanong si Jesus binautismohan sa Salog nin Jordan tanganing simbolisaran an pagpresentar nia kan saiyang sadiri sa Dios. (Mateo 3:13) Mahalagang mangnohon na si Jesus namibi sa mahalagang marhay na okasyon na idto.​—Lucas 3:​21, 22.

16. Paano tamang ikapapahayag an satong kagayagayahan kun naheheling niato an mga tawo na nagpapabautismo?

¹⁶ An pagbautismo ki Jesus sarong seryoso alagad magayagayang okasyon. Iyo man an Kristianong bautismo sa presenteng panahon. Kun naheheling niato an mga tawo na sinisimbolisaran an saindang pagdusay sa Dios, an satong kagayagayahan puedeng ipahayag paagi sa may paggalang na pag-upak asin mamomoton na komendasyon. Alagad linilikayan an pag-upak na nagkukurahaw, pagtaghoy, asin mga kaagid kaiyan nin huli sa paggalang sa pagigin sagrado kan kapahayagan na ini nin pagtubod. An satong kagayagayahan ipinahahayag sa may dignidad na paagi.

17, 18. Ano an nakatatabang na madeterminaran kun baga kualipikado para sa bautismo an mga indibiduwal?

¹⁷ Bakong arog kan mga nagwiwisik sa mga omboy o nagpipirit na magpabautismo an gabos na tawong daing pakaaram sa Kasuratan, an mga Saksi ni Jehova dai nagpipirit sa siisay man na magpabautismo. An totoo, dai ninda binabautismohan an mga mayo nin espirituwal na kualipikasyon. Bago ngani an siisay man magin dai pa bautisadong parahulit kan maogmang bareta, sinisierto kan Kristianong kamagurangan na nasasabotan kaini an pundamental na mga tokdo sa Biblia, namumuhay ini kaoyon kaiyan, asin positibo an simbag sa hapot na arog kaini, “Talaga daw na boot mong magin saro sa mga Saksi ni Jehova?”

¹⁸ Sa kadaklan na kamugtakan, kun an mga indibiduwal naggigibo na nin makahulogan na pakikikabtang sa paghuhulit kan Kahadean asin nagpapahayag nin pagmawot na magpabautismo, kinakaolay sinda kan Kristianong kamagurangan tanganing siertohon na sinda nagtutubod na nagdusay na ki Jehova asin nakakaabot sa mga kahagadan nin Dios para sa bautismo. (Gibo 4:4; 18:8) An personal na mga simbag sa labing 100 na hapot dapit sa mga tokdo sa Biblia nakakatabang sa kamagurangan na madeterminaran kun baga naaabot kan mga nagsisimbag an mga kahagadan kan Kasuratan para sa bautismo. May mga dai nakukualipikar asin kun siring dai inaako para sa Kristianong bautismo.

May Nakapopogol daw sa Saindo?

19. Basado sa Juan 6:​44, sairisay an magigin kairibang paramana ni Jesus?

¹⁹ An dakol na napiritan na partisipante sa lagduan na mga pagbautismo tibaad sinabihan na sinda maduman sa langit pagkagadan. Alagad sa pagtaram manongod sa mga parasunod sa saiyang lakad, si Jesus nagsabi: “Dai nin nakadodolok sa sako kun dai sia dagkahon kan Ama na nagsugo sa sako.” (Juan 6:44) Dinagka ni Jehova ki Cristo an 144,000 na magigin kairibang paramana ni Jesus sa langitnon na Kahadean. An puersahan na bautismo nungkang nagsantipikar sa siisay man para sa mamuraway na kabtang na iyan sa areglo nin Dios.​—Roma 8:14-17; 2 Tesalonica 2:13; Kapahayagan 14:1.

20. Ano an tibaad makatabang sa nagkapira na dai pa nababautismohan?

²⁰ Partikularmente poon sa kabangaan kan mga taon nin 1930, kadakol na naglalaom na makaligtas sa “dakulang kahorasaan” asin mabuhay sa daga sagkod lamang an nagin kabilang sa “ibang karnero” ni Jesus. (Kapahayagan 7:​9, 14; Juan 10:16) Kualipikado sindang mabautismohan huli ta iinoyon na ninda an saindang buhay sa Tataramon nin Dios asin namomotan ninda sia sa  ‘bilog nindang puso, kalag, kosog, asin isip.’ (Lucas 10:25-28) Minsan ngani aram kan nagkapirang tawo na an Mga Saksi ni Jehova ‘nagsasamba sa Dios sa espiritu asin katotoohan,’ dai pa ninda sinusunod an halimbawa ni Jesus asin dai pa nagpapaheling nin hayag na ebidensia nin tunay na pagkamoot asin dai nababangang debosyon ki Jehova paagi sa pagpabautismo. (Juan 4:​23, 24; Deuteronomio 4:24; Marcos 1:9-11) An odok asin espesipikong pamibi mapadapit sa mahalagang marhay na lakdang na ini tibaad iyo nanggad an makaengganyar asin makapakosog sa boot ninda na lubos na kuyogon an Tataramon nin Dios, gumibo nin lubos na pagdusay ki Jehova Dios, asin magpabautismo.

21, 22. Huli sa anong mga dahelan na napopogolan an nagkapira na magdusay asin magpabautismo?

²¹ An nagkapira napopogolan na magdusay asin magpabautismo huli ta nababangkag sindang marhay sa mga bagay-bagay sa kinaban o sa paghanap nin kayamanan kaya mayo na sinda nin panahon para sa espirituwal na mga bagay. (Mateo 13:22; 1 Juan 2:15-17) Abaang ogma ninda kun bagohon ninda an saindang isip asin mga pasohan! An pagrani ki Jehova maparahay sa sainda sa espirituwal, matabang na mahale an kahaditan, asin matao sa sainda nin katoninongan asin kan satispaksion na bunga kan paggibo kan kabotan nin Dios.​—Salmo 16:11; 40:8; Talinhaga 10:22; Filipos 4:​6, 7.

²² An iba nagsasabing namomotan ninda si Jehova alagad dai nagdudusay asin nagpapabautismo huli ta iniisip ninda na sa siring na paagi mayo sinda nin paninimbagan sa Dios. Alagad an lambang saro sa sato maninimbag sa Dios. Nagkaigwa kita nin paninimbagan kan madangog niato an tataramon ni Jehova. (Ezequiel 33:7-9; Roma 14:12) Bilang ‘piniling banwaan,’ an suanoy na mga Israelita namundag sa sarong nasyon na dusay ki Jehova, asin sa siring sinda igwa nin obligasyon na maglingkod sa saiya nin fiel kaoyon kan saiyang mga tokdo. (Deuteronomio 7:​6, 11) Mayo nin siisay man na namumundag sa siring na nasyon ngonyan, alagad kun nag-ako na kita nin tamang pagtotokdo sa Kasuratan, kaipuhan niatong isagibo iyan oyon sa pagtubod.

23, 24. Anong mga pagkatakot an dai maninigo na makapogol sa mga indibiduwal na magpabautismo?

²³ An pagkatakot na bako pang igo an saindang kaaraman tibaad nakapopogol sa nagkapira na magpabautismo. Pero, kita gabos dakol pang dapat na manodan huli ta ‘dai noarin man marororop kan katawohan an ginibo kan tunay na Dios poon sa kapinonan sagkod sa katapusan.’ (Eclesiastes  3:11) Estudyare an kapon na Etiope. Bilang proselito, minsan paano may kaaraman na sia sa Kasuratan, alagad dai nia masimbag an gabos na hapot manongod sa mga katuyohan nin Dios. Minsan siring, pakatapos na maaraman an manongod sa probisyon ni Jehova para sa kaligtasan paagi sa pantubos na atang ni Jesus, tolos-tolos na nagpabautismo sa tubig an kapon.​—Gibo 8:26-38.

²⁴ An nagkapira nag-aalangan na magdusay sa Dios huli ta natatakot sinda na dai ninda iyan maootob. Nagsabi an 17 anyos na si Monique: “Napopogolan akong magpabautismo huli sa takot na dai ko maootob an sakong pagdusay.” Minsan siring, kun kita nagtitiwala ki Jehova sa bilog niatong puso, ‘itatanos nia an satong mga dana.’ Tatabangan nia kita na ‘padagos na maglakaw sa katotoohan’ bilang saiyang fiel na nagdusay na mga lingkod.​—Talinhaga 3:​5, 6; 3 Juan 4.

25. Anong hapot an angay na pag-olayan ngonyan?

²⁵ Huli sa bilog na pagtitiwala ki Jehova asin odok sa pusong pagkamoot sa saiya, kada taon rinibo an napahihiro na magdusay asin magpabautismo. Asin sierto nanggad na an gabos na dusay na lingkod nin Dios boot na magin fiel sa saiya. Pero, kita nabubuhay sa delikadong mga panahon, asin napapaatubang kita sa laen-laen na pagbalo sa pagtubod. (2 Timoteo 3:1-5) Ano an magigibo niato tanganing maotob an satong pagdusay ki Jehova? Pag-oolayan niato ini sa sunod na artikulo.

[Nota sa Ibaba]

Nagigirumdoman daw Nindo?

• Paano ginigibo an Kristianong bautismo?

• Anong kaaraman an kaipuhan tanganing an saro mabautismohan?

• Anong mga lakdang an ginigibo bago kan bautismo nin tunay na mga Kristiano?

• Taano ta napopogolan an nagkapira na magpabautismo, alagad paano daw sinda matatabangan?

[Mga Hapot Para sa Pag-adal]

Mga ritrato sa pahina 14]

Aram daw nindo an boot sabihon kan bautismohan ‘sa ngaran kan Ama, kan Aki, asin kan banal na espiritu’?