Hula ni Isaias—Liwanag Para sa Bilog na Katawohan I

Kapitulo Beinte-Tres: Magdanay na Nag-aantisipar ki Jehova

Isaias 30:1-33

1, 2. (a) Ano an laog kan Isaias kapitulo 30? (b) Anong mga hapot an eestudyaran ta ngonyan?

 SA Isaias kapitulo 30, mababasa niato an dugang pang mga kapahayagan nin Dios tumang sa mga maraot. Minsan siring, an kabtang na ini kan hula ni Isaias nagtatampok sa nagkapirang nakaoogmang kualidad ni Jehova. Sa katunayan, an mga karakteristiko ni Jehova ilinaladawan sa malinaw na marhay na pananaram kaya garo man sana naheheling ta an saiyang nakararangang presensia, nadadangog an saiyang naggigiyang tingog, asin namamatean an saiyang nakakapaomay na duta.​—Isaias 30:​20, 21, 26.

² Dawa siring, an mga kahimanwa ni Isaias, an apostatang mga nag-eerok sa Juda, nagsayumang magbalik ki Jehova. Imbes sinda nagtiwala sa tawo. Ano an namatean ni Jehova manongod digdi? Asin paano matatabangan kan kabtang na ini kan hula ni Isaias an mga Kristiano ngonyan na magdanay na nag-aantisipar ki Jehova? (Isaias 30:18) Aramon niato.

Kabalisngagan Asin Pagkatalaga sa Kapahamakan

3. Anong pakana an ibinuyagyag ni Jehova?

³ Sa harohalawig na panahon an mga namomoon sa Juda hilom na nagpapakana tanganing makakua nin paagi na dai masakop kan Asiria. Minsan siring, si Jehova nagmamasid. Ngonyan ibinuyagyag nia an saindang pakana: “‘Herak man kan sutil na mga aki,’ an sabi ni Jehova, ‘an mga andam na gumibo nin konseho, alagad bako idtong hale sa sako; asin magbubo nin dolot na inomon, alagad mayo kan sakong espiritu, tanganing dagdagan nin kasalan an kasalan; an mga minahale tanganing paduman sa Egipto.’”​—Isaias 30:​1, 2a.

4. Paano ibinugtak kan rebeldeng banwaan nin Dios an Egipto sa puesto nin Dios?

⁴ Kanigoan kan pagkabigla kan nagpapakanang mga namomoon na idto na madangog na ibinuyagyag an saindang plano! An pagbiahe pasiring sa Egipto tanganing makialyansa sa saiya labi pa sa pagtumang sa Asiria; idto pagrebelde tumang ki Jehova Dios. Kan kapanahonan ni Hadeng David, an nasyon nag-asa ki Jehova bilang sarong kuta asin nagpaili ‘sa lindong kan saiyang mga pakpak.’ (Salmo 27:1; 36:7) Ngonyan sinda ‘nagpapahipli sa kuta ni Faraon’ asin ‘nagpapaili sa lindong kan Egipto.’ (Isaias 30:2b) Ibinugtak ninda an Egipto sa puesto nin Dios! Katraydoran nanggad!​—Basahon an Isaias 30:3-5.

5, 6. (a) Taano ta nakagagadan na sala an pakialyansa sa Egipto? (b) Anong naenot na pagbiahe kan banwaan nin Dios an nagtatampok kan kamangmangan kan pagbiaheng ini pasiring sa Egipto?

⁵ Na garo baga sinisimbag an ano man na ideya na an misyon sa Egipto saro sanang dai tinutuyong pagdalaw, si Isaias nagtatao nin dugang pang detalye. “An kapahayagan tumang sa mga hayop kan timog: Sa daga nin kapurisawan asin masakit na mga kamugtakan, kan leon asin kan leopardo na nag-aagrutong, kan bibora asin kan nagkakalayong halas na naglalayog, sa mga abaga nin dakula nang mga asno dara ninda an saindang mga kayamanan, asin sa burobuntok kan mga kamelyo an saindang mga suplay.” (Isaias 30:6a) Malinaw nanggad, plinanong marhay an biahe. An mga sugo nag-organisar nin karaban nin mga kamelyo asin asno, na kinargahan ninda nin mamahalon na mga bagay asin nagpasiring sa Egipto na nangangagi sa sarong mapungaw na kaawagan na dakol an nag-aagrutong na leon asin mararang halas. Sa katapustapusi, an mga sugo nakaabot sa saindang destinasyon asin itinao an saindang mga kayamanan sa mga Egipcio. Binakal ninda an proteksion​—o siring kaiyan an paghona ninda. Minsan siring, si Jehova nagsasabi: “Para sa banwaan an mga iyan dai magigin kapakipakinabang. Asin an mga Egipcio daing kamanungdanan, asin matabang sinda na sayang sana. Kun siring an apod ko sa sarong ini: ‘Rahab​—sinda pabor sa pagtukaw na daing girong.’” (Isaias 30:6b, 7) An “Rahab,” sarong “sa dagat na higanteng hayop,” nagsimbolisar sa Egipto. (Isaias 51:​9, 10) Sia nanunuga kan gabos na bagay alagad mayo man nagigibo. An pakialyansa sa saiya kan Juda nakagagadan na sala.

⁶ Mantang ilinaladawan ni Isaias an pagbiahe kan mga sugo, tibaad nagirumdoman kan mga naghihinanyog sa saiya an sarong kaagid na pagbiahe kaidtong kaaldawan ni Moises. An saindang mga apoon naglakaw sa iyo man sanang “makangingirhat na kaawagan.” (Deuteronomio 8:14-16) Minsan siring, kan kaaldawan ni Moises an mga Israelita nagbibiahe parayo sa Egipto asin sa pagkakalda sa kaoripnan. Ngonyan an mga sugo nagbibiahe pasiring sa Egipto asin, an totoo, sa pagigin sakop. Kabalisngagan nanggad! Nungka logod niatong gibohon an siring na mangmang na desisyon asin iribay an satong espirituwal na katalingkasan sa kaoripnan!​—Ikomparar an Galacia 5:1.

Pagkontra sa Mensahe kan Propeta

7. Taano ta ipinasurat ni Jehova ki Isaias an Saiyang patanid sa Juda?

⁷ Sinabihan ni Jehova si Isaias na isurat an mensahe na katatao nia pa sana tangani na “iyan magserbi para sa sarong aldaw sa ngapit, bilang patotoo sagkod sa panahon na daing talaan.” (Isaias 30:8) An pagdesaprobar ni Jehova sa pagpaorog sa mga pakikialyansa sa tawo kisa pagsarig sa Saiya dapat na irekord sa kapakinabangan kan mga kapag-arakian sa ngapit​—kaiba na an satong kapag-arakian ngonyan. (2 Pedro 3:1-4) Alagad igwa nin mas apuradong pangangaipo para sa sarong nasusurat na rekord. “Iyan banwaan na rebelde, mga aking putikon,  mga aki na habong magdangog sa ley ni Jehova.” (Isaias 30:9) Hinaboan kan banwaan an konseho nin Dios. Huli kaini, iyan kaipuhan na isurat tangani na sa huri dai sinda makanenegar na nag-ako sinda nin igong patanid.​—Talinhaga 28:9; Isaias 8:​1, 2.

8, 9. (a) Sa anong paagi hinihingoang paraoton kan mga namomoon sa Juda an mga propeta ni Jehova? (b) Paano ipinaheling ni Isaias na dai sia puedeng takoton?

⁸ Nagtao ngonyan si Isaias nin halimbawa kan rebeldeng aktitud kan banwaan. Sinda “nagsabi sa mga nakaheheling, ‘Dai kamo magheling,’ asin sa mga nagkakaigwa nin bisyon, ‘Dai kamo maghula para sa samo nin ano man na tanos. Itaram nindo sa samo an magagayon na bagay; maghula kamo nin mapandayang mga bagay.’” (Isaias 30:10) Paagi sa pagboot sa fiel na mga propeta na pumondo na sa pagtaram nin “tanos,” o totoo, asin imbes magtaram nin “magagayon” asin ‘mapandaya,’ o falsong mga bagay, ipinaheheling kan mga namomoon sa Juda na gusto nindang magpakitik sa talinga. Gusto nindang omawon, bakong kondenaron. Sa opinyon ninda, an siisay man na propeta na habong maghula oyon sa gusto ninda maninigong ‘bayaan an dalan; sumuhay sa dana.’ (Isaias 30:11a) Sia maninigong magsalang magtaram nin mga bagay na nakaoogma sa talinga o biyo nang pumondo sa paghuhulit!

⁹ An mga kalaban ni Isaias nag-iinsistir: “Paontoka an Banal kan Israel huli sana sa samo.” (Isaias 30:11b) Umontok na si Isaias sa pagtaram sa ngaran ni Jehova, “an Banal kan Israel”! An titulo mismong ini nakakairitar sa sainda huli ta ipinaheheling kan halangkaw na mga pamantayan ni Jehova an saindang daing kuentang kamugtakan. Ano an reaksion ni Isaias? Ipinahayag nia: “Ini an isinabi kan Banal kan Israel.” (Isaias 30:12a) Daing pag-alangan, sinabi ni Isaias an mismong mga tataramon na ikinaoongis na madangog kan mga nagkokontra sa saiya. Dai sia puedeng takoton. Marahayon nanggad na halimbawa para sa sato! Kun dapit sa pagbalangibog kan mensahe nin Dios, an mga Kristiano dapat na nungkang makikompromiso. (Gibo 5:27-29) Arog ni Isaias, padagos nindang ibinabalangibog: ‘Ini an isinabi ni Jehova’!

An mga Resulta nin Pagrebelde

10, 11. Ano an magigin resulta kan rebelyon nin Juda?

¹⁰ Hinaboan kan Juda an tataramon nin Dios, nagtiwala sa kaputikan, asin nanarig sa “tusong bagay.” (Isaias 30:12b) Ano an magigin resulta? Imbes na humale sa eksena siring kan mawot kan nasyon, pangyayarihon ni Jehova na dai na mag-eksister an nasyon! Mangyayari ini nin bigla asin biyo, siring kan idinodoon ni Isaias paagi sa ilustrasyon. An pagigin rebelde kan nasyon garo “sarong raot na kabtang na pabagsak na, sarong bukdo sa sarong halangkawon na lanob, na an pagkatumpag kaini puedeng mangyari nin bigla, nin padali.” (Isaias 30:13) Kun paanong an nagdadakulang bukdo sa sarong halangkaw na lanob sa katapustapusi iyong mapabagsak sa lanob, an naggagrabeng pagrebelde kan mga katemporanyo ni Isaias an mapabagsak kan nasyon.

¹¹ Paagi sa saro pang ilustrasyon ipinaheheling ni Isaias an pagigin lubos kan maabot na pagkalaglag: “Papasaon nanggad iyan nin saro na siring sa pagpasa nin sarong dakulang dulay kan mga paragibo nin koron, na rinonot na daing itinatada, kaya sa naronot na mga pidaso kaini mayong makukuang kapidaso kan gamit na gibo sa dalipay na ikakakaros nin kalayo sa alisabwan o ikatatabo nin tubig sa tangyan.” (Isaias 30:14) Magigin lubos an pagkalaglag kan Juda kaya mayong ano man na may halaga an matatada​—ni kapidaso nin koron na igo an pagkadakula tangani na makahakbot nin abo sa alisabwan o makatabo nin tubig sa kabasan. Makasusupog nanggad na katapusan! An nagdadangadang na pagkalaglag kan mga nagrerebelde tumang sa tunay na pagsamba ngonyan magigin bigla asin biyo man.​—Hebreo 6:4-8; 2 Pedro 2:1.

Hinaboan an Alok ni Jehova

12. Paano malilikayan kan mga taga Juda an pagkalaglag?

¹² Pero para sa mga naghihinanyog ki Isaias, an pagkalaglag bakong dai malilikayan. Igwa nin paagi tanganing makadulag. Ipinaliliwanag kan propeta: “Iyo ini an isinabi kan Soberanong Kagurangnan na Jehova, an Banal kan Israel: ‘Paagi sa pagbalik asin pagpahingalo maliligtas kamo. Yaon sana sa pagtoninong asin pananarig an saindong pagigin poderoso.’” (Isaias 30:15a) Si Jehova andam na iligtas an saiyang banwaan​—kun sinda mapaheling nin pagtubod paagi sa “pagpahingalo,” o dai paghingoang makamtan an kaligtasan paagi sa mga alyansa nin tawo, asin paagi sa “pagtoninong,” o pagpaheling nin pagtitiwala sa nagpoprotehir na kapangyarihan nin Dios paagi sa dai pagpadaog sa takot. “Alagad,” sinasabi ni Isaias sa banwaan, “habo kamo.”​—Isaias 30:15b.

13. Sa ano ibinugtak kan mga namomoon sa Juda an saindang kompiansa, asin makatanosan daw an siring na kompiansa?

¹³ Dangan idinetalye pa ni Isaias: “Asin sinabi nindo: ‘Dai, kundi madulag kami na nakakabayo!’ Iyan an dahelan na kamo madulag. ‘Asin sa kaskas na mga kabayo masakay kami!’ Iyan an dahelan na makaskas an mga naglalapag sa saindo.” (Isaias 30:16) Naghohona an mga Judeano na an kaskas na mga kabayo, imbes na si Jehova, an makapagliligtas sa sainda. (Deuteronomio 17:16; Talinhaga 21:31) Minsan siring, kuminontra an propeta, an saindang pagtitiwala magigin ilusyon huli ta sinda aabotan kan saindang mga kalaban. Minsan an dakulang kabilangan dai makatatabang sa sainda. “An sangribo matakig huli sa nanhuhumang kurahaw nin saro; huli sa nanhuhumang kurahaw nin lima kamo madulag.” (Isaias 30:17a) An mga hukbo nin Juda matataranta asin madurulag sa kurahaw nin nagkapira sanang kalaban. a Sa katapustapusi, natatada na sana an mawawalat, “siring sa sarong palo na nasa alitoktok nin bukid asin siring sa sarong senyal na nasa bulod.” (Isaias 30:17b) Siring kan ihinula, kan laglagon an Jerusalem kan 607 B.C.E., natatada sana an nakaligtas.​—Jeremias 25:8-11.

[Nota sa Ibaba]

[Mga Hapot Para sa Pag-adal]