Kun Noarin Madonong na Dumulag

AN KINABAN ngonyan parateng midbid sa pagkaigwa nin espiritu nin pag-isog-isog asin paglabanlaban o panenentar. An tawong minadulag sa sarong situwasyon sa pankagabsan ibinibilang na maluya o kobarde. Tibaad ngani sia pag-olog-ologon.

Minsan siring, linilinaw kan Biblia na may mga panahon na an pagdulag kapwa madonong asin kakosogan nin boot. Sa pagpatunay kaiyan, bago isugo an saiyang mga disipulo sa ministeryo, sinabihan sinda ni Jesu-Cristo: “Kun kamo paglamagon ninda sa sarong siudad, dumulag kamo pasiring sa saro.” (Mateo 10:23) Iyo, dapat na pagmaigotan kan mga disipulo ni Jesus na dumulag sa mga naglalamag sa sainda. Dai sinda dapat gumibo nin ano man na siring sa krusada, na pinaghihingoang kombertiron an iba nin puersahan. An dara ninda mensahe nin katoninongan. (Mateo 10:11-​14; Gibo 10:34-​37) Kaya imbes na togotan na mag-init an timplada kan payo, an mga Kristiano dapat na dumulag, rumayo sa nagpoprobokar. Sa paaging ini, napagdanay ninda an marahay na konsensia siring man an saindang mahalagang marhay na relasyon ki Jehova.​​—2 Corinto 4:​1, 2.

An sarong kabaliktaran na halimbawa yaon sa libro sa Biblia na Talinhaga. Iiniestorya kaiyan an sarong hoben na lalaki na, imbes na dumulag sa atubangan nin sugot, nagsunod sa sarong patotot “siring kan baka na pasiring sa bobonoan.” An resulta? Kapahamakan huli sa pagpadaog sa sugot na nangahulogan kan saiya mismong buhay.​​—Talinhaga 7:5-8, 21-23.

Ano kun kamo mapaatubang sa sarong sugot na magkomiter nin seksuwal na inmoralidad o mapaatubang sa iba pang potensial na peligro? Segun sa Tataramon nin Dios, an tamang gibohon iyo na dumulag na sana, rumayo tolos sa eksena.​​—Talinhaga 4:​14, 15; 1 Corinto 6:​18; 2 Timoteo 2:22.