Para sa Satong Kapakinabangan an mga Ley nin Dios

“Kanigoan an sakong pagkamoot sa saimong ley!”​—SALMO 119:97.

1. Ano an lakop na aktitud dapit sa pagkuyog sa mga ley nin Dios?

 AN PAGKUYOG sa mga ley nin Dios bakong popular ngonyan. Para sa dakol, an pagsunod sa sarong dai naheheling na mas halangkaw na autoridad garo baga daing saysay. Nabubuhay kita sa sarong panahon nin relatibismo sa moral, nin malibog na mga limite sa kun ano an tama asin sala, asin nin dakulaon na mga bagay na alanganon. (Talinhaga 17:15; Isaias 5:20) Nagpaparisa nin sarong kaisipan na lakop sa dakol na sekularisadong sosyedad, an sarong dai pa sana nahahaloy na surbey nagsabi na “an kadaklan na Amerikano gustong iyo an magdesisyon para sa saindang sadiri kun ano an tama, marahay, asin makahulogan.” Mas suno ninda an “bakong estriktong Dios. Bakong estriktong mga susundon. Bakong estriktong mga superyor, sa moral man o iba pang bagay.” An sarong analisador sa sosyedad nagsabi na sa ngonyan “an mga indibiduwal an inaasahan na iyo mismo an magdeterminar para sa saindang sadiri kun ano an boot sabihon kan marahay asin birtuosong pamumuhay.” Nagpadagos sia: “An ano man na klase nin mas halangkaw na autoridad kaipuhan na ibagay an mga pagboot kaiyan sa mga pangangaipo nin totoong mga tawo.”

2. Paano konektadong marhay sa bendisyon asin pag-oyon nin Dios an enot na pagkasambit kan ley sa Biblia?

² Huling kadakol an nagkukuestion sa kahalagahan kan mga ley ni Jehova, kaipuhan niatong pasarigon an satong kombiksion na an mga pamantayan nin Dios para sa satong kapakinabangan. Interesanteng estudyaran an rekord kun saen enot na nasambitan an ley sa Biblia. Sa Genesis 26:​5, mababasa ta an tataramon nin Dios: “Si Abraham . . . padagos na inotob an saiyang mga obligasyon sa sako, an sakong mga pagboot, an sakong mga reglamento, asin an sakong mga ley.” An mga tataramon na iyan itinaram dakol na siglo bago nagtao si Jehova nin detalyadong kodigo nin ley sa mga gikan ni Abraham. Paano binalosan nin Dios an pagkuyog ni Abraham, kabale an pagkuyog sa Saiyang mga ley? Nanuga sa saiya si Jehova Dios: “Paagi sa saimong banhi an gabos na nasyon sa daga magbebendisyon nanggad kan saindang sadiri.” (Genesis 22:18) Sa siring an pagkuyog sa mga ley nin Dios konektadong marhay sa mga bendisyon asin pag-oyon nin Dios.

3. (a) Anong saboot dapit sa ley ni Jehova an ipinahayag nin sarong salmista? (b) Anong mga hapot an maninigo niatong tawan nin atension?

³ An saro sa mga salmista​—posibleng marhay na sarong prinsipe sa Juda asin magigin hade sa ngapit​—nagpahayag nin saboot na sa parate bakong konektado sa ley. Nagkagsing sia sa Dios: “Kanigoan an sakong pagkamoot sa saimong ley!” (Salmo 119:97) Bako ining basta biglang pagpahayag nin emosyon. Iyan kapahayagan nin pagkamoot sa kabotan nin Dios na nakasurat sa saiyang ley. Iyan man an nagin saboot ni Jesu-Cristo, an sangkap na Aki nin Dios. Si Jesus makahulang ilinadawan na nagsasabing: “An paggibo kan boot mo, O Dios ko, iyo an naoogmahan ko, asin an saimong ley nasa kairaroman kan sakong sadiri.” (Salmo 40:8; Hebreo 10:9) Kumusta man kita? Ikinaoogmang  marhay daw niato an paggibo kan kabotan nin Dios? Kombensido daw kita sa mga kapakinabangan kan mga ley ni Jehova? Ano an kabtang kan pagkuyog sa mga ley nin Dios sa satong pagsamba, sa satong pan-aroaldaw na buhay, sa satong pagdedesisyon, asin sa satong relasyon sa iba? Tanganing mamotan an ley nin Dios, marahay na masabotan niato kun taano an Dios ta igwa nin deretso na gumibo asin magpaotob nin mga ley.

Si Jehova—An Lehitimong Paraboot

4. Taano ta si Jehova an supremo, lehitimong Paraboot?

⁴ Bilang Kaglalang, si Jehova an supremo, lehitimong Paraboot sa uniberso. (Kapahayagan 4:11) Si propeta Isaias nagsabi: “Si Jehova iyo an satong Paraboot.” (Isaias 33:22) Sia an nagbugtak kan pisikal na mga ley na nagdidirehir sa may buhay asin daing buhay na mga linalang. (Job 38:4-38; 39:1-12; Salmo 104:5-19) Bilang linalang nin Dios, an tawo sakop kan pisikal na mga ley ni Jehova. Asin minsan ngani an tawo libre ahente moral, na may kakayahan na mangatanosan sa sadiri, sia maogma sana kun sia nagpapasakop sa moral asin espirituwal na mga ley nin Dios.​—Roma 12:1; 1 Corinto 2:14-16.

5. Paano totoo an prinsipyo sa Galacia 6:7 mapadapit sa mga ley nin Dios?

⁵ Siring kan aram niato, an pisikal na mga ley ni Jehova dai mababari. (Jeremias 33:​20, 21) Kun kokontrahon nin saro an nagkapirang pisikal na ley, arog kan ley nin grabidad, maeeksperyensiahan nia an epekto. Kaagid kaiyan, an moral na mga ley nin Dios dai puedeng bawion asin dai puedeng sudyaon o lapason na daing kapadusahan. An pagpaotob kaiyan siring kasegurado kan pagpaotob kan saiyang ley nin naturalesa, minsan ngani an resulta tibaad bakong siring kaiyan kaensegida. “An Dios dai maoolog-olog. Huli ta ano man an itinatanom nin tawo, ini man an saiyang aanihon.”​—Galacia 6:7; 1 Timoteo 5:24.

An Sakop kan Ley ni Jehova

6. Gurano kahiwas an sakop kan mga ley nin Dios?

⁶ An sarong lataw na kapahayagan kan ley nin Dios iyo an Ley ni Moises. (Roma 7:12) Pag-abot nin panahon, an Ley ni Moises sinalidahan ni Jehova Dios kan “ley kan Cristo.” a (Galacia 6:2; 1 Corinto 9:21) Bilang mga Kristiano na sakop kan “sangkap na ley para sa katalingkasan,” nasasabotan niato na dai linilimitaran nin Dios an saiyang mga direktiba sa nagkapirang aspekto kan satong buhay, arog kan mga paniniwala sa doktrina o mga seremonya. Sakop kan saiyang mga pamantayan an gabos na aspekto nin buhay, kabale an mga bagay-bagay sa pamilya, transaksion sa negosyo, paggawe sa bakong kasekso, aktitud sa mga kapwa Kristiano, asin partisipasyon sa tunay na pagsamba.​—Santiago 1:​25, 27.

7. Magtao nin halimbawa nin mahalagang mga ley nin Dios.

⁷ Halimbawa, an Biblia nagsasabi: “Bakong mga parapakisaro, ni mga parasamba sa idolo, ni mga parasambay, ni mga binabae, ni mga lalaki na minadorog sa kapwa lalaki, ni mga parahabon, ni mga paslo, ni mga paraburat, ni mga paramuda, ni mga parakikil an magmamana kan kahadean nin Dios.” (1 Corinto 6:​9, 10) Iyo, an pagsambay asin pakikisaro bako sanang “pagkaminootan.” An mga gibong homoseksuwal bako sanang “napapalaen na estilo nin pamumuhay.” Mga pagbalga ini sa ley ni Jehova. Asin iyo man an mga bagay na arog kan paghabon, pagputik, asin pagpakaraot. (Salmo 101:5; Colosas 3:9; 1 Pedro 4:15) Kinondenar ni Santiago an pananagsag, asin sinadol kita ni Pablo na likayan an rungaw na orolay asin bastos na sorobahan. (Efeso 5:4; Santiago 4:16) Para sa mga Kristiano, an gabos na susundon na ini sa paggawe kabtang kan sangkap na ley nin Dios.​—Salmo 19:7.

8. (a) Anong klase an ley ni Jehova? (b) Ano an pundamental na kahulogan sa likod kan termino sa Hebreo para sa “ley”?

⁸ Ihinahayag kan pundamental na mga reglamentong iyan sa Tataramon ni Jehova na an saiyang ley bako sana nanggad na lista nin indiperente, legalistikong mga reglamento. Iyan an basehan para sa timbang, mabungang buhay, na sa ikararahay an epekto sa gabos na aspekto nin paggawe. An ley nin Dios nakaparirigon, may etiko, asin nakapagtotokdo. (Salmo 119:72) An terminong “ley” na ginamit kan salmista trinadusir hale sa termino sa Hebreo na toh·rahʹ. An sarong nag-espesyalisar sa Biblia nagsasabi: “An terminong ini kinua sa sarong berbo na nangangahulogan na direhiran, giyahan, punteryahon, asentaron. An kahulogan . . . kaiyan, kun siring, sarong susundon nin paggawe.” Para sa salmista an ley sarong balaog nin Dios. Bako daw na maninigo na siring man kaiyan an magin pagheling niato dian, na tinotogotan iyan na makaimpluwensia sa satong ugale sa buhay?

9, 10. (a) Taano ta kaipuhan niato an masasarigan na instruksion? (b) Paano sana kita puedeng magkaigwa nin nakaoogmang marhay asin mapangganang buhay?

 ⁹ An gabos na linalang nangangaipo nin masasarigan na instruksion asin mapagtitiwalaan na paggiya. Totoo ini ki Jesus asin sa iba pang mga anghel, na nakalalabi sa tawo. (Salmo 8:5; Juan 5:30; 6:38; Hebreo 2:7; Kapahayagan 22:​8, 9) Kun an sangkap na mga linalang na ini puedeng makinabang sa paggiya nin Dios, lalo na nanggad na totoo iyan para sa bakong sangkap na mga tawo! An kasaysayan nin tawo asin an satong personal na eksperyensia nagpatunay sa pagigin balido kan obserbasyon ni propeta Jeremias: “Aram kong marhay, O Jehova, na bakong kapot nin daganon na tawo an saiyang dalan. Bakong kapot nin tawong naglalakaw dawa an paggiya sa saiyang lakad.”​—Jeremias 10:23.

¹⁰ Kun mawot niato na magkaigwa nin nakaoogmang marhay asin mapangganang buhay, maninigo kitang umasa sa Dios para sa paggiya. Rinekonoser ni Hadeng Salomon an peligro nin pamumuhay segun sa personal na mga pamantayan, na independiente sa paggiya nin Dios: “Igwa nin dalan na tanos sa pagheling nin tawo, alagad ta mga dalan nin kagadanan an kasagkodan kaiyan.”​—Talinhaga 14:12.

Mga Dahelan nin Pagpahalaga sa Ley ni Jehova

11. Taano ta maninigo niatong mawoton na masabotan an ley nin Dios?

¹¹ Marahay na kultibaron niato an hararom na pagmawot na masabotan an ley ni Jehova. Ipinahayag kan salmista an siring na paghimuyawot kan sia magsabi: “Halea an takop sa sakong mga mata, tanganing maheling ko an makangangalas na mga bagay gikan sa saimong ley.” (Salmo 119:18) Mientras na orog niatong namimidbid an Dios asin naaaraman an saiyang mga dalan, orog man na mararom an satong pakasabot sa pagigin totoo kan mga tataramon ni Isaias: “Ako, si Jehova, an saimong Dios, an Saro na nagtotokdo sa saimo na pakinabangon an saimong sadiri, an Saro na nagpapangyari sa saimo na maglakaw sa dalan na maninigo mong lakawan. O kun ika sana kutana totoong matao nin atension sa sakong mga togon!” (Isaias 48:​17, 18) Odok na kamawotan ni Jehova na an saiyang banwaan makalikay sa kalamidad asin magkamit nin buhay paagi sa pagtao nin atension sa saiyang mga togon. Siyasaton niato an nagkapirang mayor na dahelan kun taano ta maninigo niatong pahalagahan an ley nin Dios.

12. Paano an pakamidbid sa sato ni Jehova minagibo sa saiya na an pinakamarahay na Paratao nin Ley?

¹² An ley nin Dios naggigikan sa Saro na nakamimidbid na marhay sa sato. Huling si Jehova an Kaglalang sa sato, lohiko na midbid nia nin lubos an mga tawo. (Salmo 139:​1, 2; Gibo 17:24-28) An pakamidbid sa sato kan dayupot na mga katood, paryente, minsan mga magurang bakong siring kalubos kan pakamidbid sa sato ni Jehova. Tara, mas midbid pa ngani kita nin Dios kisa pakamidbid niato sa satong sadiri! An Kaggibo sa sato igwa nin daing kaagid na pakasabot sa satong espirituwal, emosyonal, mental, asin pisikal na mga pangangaipo. Mantang  itinatao nia sa sato an saiyang atension, sia nagpapaheling nin personal na pakasabot sa pagkagibo sa sato, sa satong mga gusto, asin sa satong mga kamawotan. Nasasabotan ni Jehova an satong mga limitasyon, alagad aram man nia an satong potensial para sa ikararahay. Nagsabi an salmista: “Sia mismo nakaaaram na gayo kan pagkaporma sa sato, na ginigirumdom na kita kabokabo.” (Salmo 103:14) Sa siring, puede kitang makamate nin espirituwal na seguridad mantang kita naghihingoang lumakaw sa saiyang mga ley, na gikan sa boot na nagpapasakop sa paggiya nin Dios.​—Talinhaga 3:19-26.

13. Taano ta makakokompiar kita na nasa puso ni Jehova an pinakaikararahay niato?

¹³ An ley nin Dios naggigikan sa Saro na namomoot sa sato. Odok an pagmalasakit nin Dios manongod sa satong nagdadanay na ikararahay. Bako daw na paagi sa dakulaon na pagsakripisyo sa sadiri itinao nia an saiyang Aki bilang “pantubos na karibay nin dakol”? (Mateo 20:28) Bako daw na nanuga si Jehova na ‘dai nia itotogot na kita masugotan nin labi sa satong makakaya’? (1 Corinto 10:13) Bako daw na inaasegurar kita kan Biblia na sia ‘may pagmakolog sa sato’? (1 Pedro 5:7) Mayo nin siisay man na mas mamomoton na interesado sa pagtao nin kapakipakinabang na mga giya para sa linalang na mga tawo kisa ki Jehova. Aram nia kun ano an ikararahay niato saka kun ano an matao nin kaogmahan asin nin kamondoan. Minsan ngani kita bakong sangkap asin nasasala, kun susunodon niato an katanosan, ipinaheheling nia an saiyang pagkamoot sa sato sa mga paagi na magbubunga nin buhay asin mga bendisyon.​—Ezequiel 33:11.

14. Sa anong mahalagang paagi napapalaen an ley nin Dios sa mga ideya nin tawo?

¹⁴ An ley nin Dios nakapakokosog liwat sa boot na dai nagliliwat. Sa maribok na mga panahon na nabubuhayan niato, si Jehova sarong gapo na marigon, na nag-eeksister poon sa panahon na daing katapusan sagkod sa panahon na daing katapusan. (Salmo 90:2) Sia nagsabi dapit sa saiyang sadiri: “Ako si Jehova; dai ako nagliwat.” (Malaquias 3:6) An mga pamantayan nin Dios, na nasusurat sa Biblia, biyong masasarigan​—bakong arog kan kumunoy nin daing ontok na paliwatliwat na mga ideya nin tawo. (Santiago 1:17) Halimbawa, sa laog nin dakol na taon sinuportaran nin mga sikologo an mapagkonsinteng pagpadakula sa aki, alagad kan huri an nagkapira nagbago an isip asin inadmitir na sala an saindang sadol. An kinabanon na mga pamantayan asin giya dapit sa bagay na ini naggigiaygiay na garo sinasalpok nin doros. Minsan siring, an Tataramon ni Jehova marigon. An Biblia dakol nang siglo na nagtatao nin sadol sa kun paano padadakulaon na may pagkamoot an mga aki. Si apostol Pablo nagsurat: “Mga ama, dai nindo pagpaanggoton an saindong mga aki, kundi padagos na padakulaon sinda sa disiplina asin pagtatanos nin isip ni Jehova.” (Efeso 6:4) Nakapakokosog nanggad liwat sa boot na maaraman na puede kitang magsarig sa mga pamantayan ni Jehova; dai iyan maliwat!

Mga Bendisyon sa mga Nagkukuyog sa mga Ley nin Dios

15, 16. (a) Ano an ibubunga kun iaaplikar niato an mga pamantayan ni Jehova? (b) Paano an mga ley nin Dios magigin marahay na giya sa pag-agoman?

¹⁵ Paagi sa saiyang propetang si Isaias, an Dios nagsabi: “An sakong tataramon na magluwas sa sakong ngoso . . . siertong magigin mapanggana.” (Isaias 55:11) Segurado man na kun kita odok na maghihingoang sunodon an mga pamantayan na yaon sa saiyang Tataramon, kita magigin mapanggana, makahahaman nin marahay, asin makanonompong nin kaogmahan.

¹⁶ Estudyare kun paanong an mga ley nin Dios marahay na giya para sa mapangganang pag-agoman. “Magin logod kagalanggalang sa gabos an pag-aragoman,” an isinurat ni Pablo, “asin dai pagdigtaan an higdaan kan mag-agom, huli ta hohokoman nin Dios an mga parapakisaro asin parasambay.” (Hebreo 13:4) An mga mag-agom dapat na magin magalang asin mamomoton sa kada saro: “An lambang saro sa saindo mamoot sa saiyang agom na babae arog kan pagkamoot nia sa saiyang sadiri; sa ibong na kampi, an agom na babae maninigong magkaigwa nin hararom na paggalang sa saiyang agom.” (Efeso 5:33) An klase nin  pagkamoot na kaipuhan ilinaladawan sa 1 Corinto 13:4-8: “An pagkamoot matinios asin maboot. An pagkamoot bakong maimon, iyan dai nananagsag, dai nagpapaabhaw, dai minagawe nin bakong disente, dai naghahanap kan saiyang sadiring kapakanan, dai napaaanggot. Iyan dai nagkukuenta kan danyos. Iyan dai naggagayagaya sa karatan, kundi naggagayagaya sa katotoohan. Iyan nagtitios kan gabos na bagay, nagtutubod kan gabos na bagay, naglalaom kan gabos na bagay, nagtatagal kan gabos na bagay. An pagkamoot nungka na nasusudya.” An pag-agoman na igwa kan klaseng ini nin pagkamoot dai masusudya.

17. Anong mga pakinabang an ibinubunga nin pag-aplikar kan mga pamantayan ni Jehova dapit sa paggamit nin alkohol?

¹⁷ An saro pang ebidensia na kapakipakinabang an mga pamantayan ni Jehova, iyo an bagay na kinokondenar nia an pagburat. Dai ngani nia inooyonan an ‘pagigin makiarak.’ (1 Timoteo 3:​3, 8; Roma 13:13) An dakol na nag-iignoro sa mga pamantayan nin Dios dapit sa bagay na ini nakakukua nin mga helang na bunga o pinagrabe nin labi-labing pag-inom. Sa pag-ignoro sa hatol kan Biblia dapit sa pagigin tama sana, an nagkapira nagin ugale na an makosog na pag-inom tanganing “makatabang na sinda makarelaks.” Dakol an problemang resulta nin sobrang pag-inom, kabale an pagkawara nin paggalang, naraot na relasyon sa pamilya o pagkasuruway nin pamilya, nasayang na entrada, asin pagkawara nin trabaho. (Talinhaga 23:19-21, 29-35) Bako daw na proteksion an mga pamantayan ni Jehova mapadapit sa paggamit nin alkohol?

18. Praktikal daw an mga ley nin Dios sa mga bagay na may labot sa pinansial? Ipaliwanag.

¹⁸ An mga pamantayan nin Dios praktikal man sa mga bagay na may labot sa pinansial. Sinasadol kan Biblia an mga Kristiano na magin onesto asin  mahigos. (Lucas 16:10; Efeso 4:28; Colosas 3:23) Huling sinusunod ninda an hatol na ini, dakol na Kristiano an ilinangkaw nin posisyon o nagdanay sa saindang mga trabaho mantang an iba nasisante. Nagbubunga man nin mga pakinabang sa pinansial kun linilikayan nin saro an bakong sono sa Kasuratan na mga bisyo asin pagkaadikto na arog nin pagsugal, pagsigarilyo, asin pagdodroga. Daing duwa-duwa na may maiisip pa kamong ibang halimbawa nin pagigin praktikal sa pinansial kan mga pamantayan nin Dios.

19, 20. Taano ta madonong na akoon asin pangaptan an mga ley nin Dios?

¹⁹ Madali para sa bakong sangkap na mga tawo na rumayo sa mga ley asin pamantayan nin Dios. Isip-isipa an mga Israelita sa Bukid nin Sinai. An Dios nagsabi sa sainda: “Kun maingat nanggad nindong kukuyogon an sakong tingog asin ootobon nanggad an sakong tipan, dangan kamo sierto nanggad na magigin sakong espesyal na sadiri hale sa gabos na ibang banwaan.” Sinda nagsimbag: “Andam kaming gibohon an gabos na itinaram ni Jehova.” Pero, kabaliktaran nanggad an pinili nindang gibohon! (Exodo 19:​5, 8; Salmo 106:12-43) Sa kabaliktaran, akoon asin pangaptan niato an mga pamantayan nin Dios.

²⁰ Madonong asin matao nin kaogmahan na magdanay nin dayupot sa daing kaparehong mga ley na itinao ni Jehova tanganing tumabang na giyahan an satong buhay. (Salmo 19:7-11) Tanganing magibo ini nin mapanggana, kaipuhan man niatong apresyaron an halaga kan diosnon na mga prinsipyo. Ini an pag-oolayan sa minasunod na artikulo.

[Nota sa Ibaba]

Nagigirumdoman daw Nindo?

• Taano ta makatitiwala kita na an mga ley nin Dios para sa satong kapakinabangan?

• Huli sa anong mga dahelan maninigo niatong pahalagahan an ley ni Jehova?

• Sa anong mga paagi kapakipakinabang an mga ley nin Dios?

[Mga Hapot Para sa Pag-adal]

[Ritrato sa pahina 13]

Si Abraham binendisyonan nin igo huli sa pagkuyog sa ley ni Jehova

[Mga ritrato sa pahina 15]

Dahelan sa mga kahaditan sa sibot na pamumuhay sa ngonyan dakol an minarayo sa ley nin Dios

[Ritrato sa pahina 17]

Siring sa sarong parola sa ibabaw nin sarong dakulang gapo, an ley nin Dios marigon asin dai nagliliwat