Saen Nakadepende an Saindong Seguridad?

Sa sarong sadit na baryo sa Solnopan na Aprika, an hoben na si Josue nagbababay sa pagpaaram sa saiyang pamilya asin mga katood. a Dangan nagpasiring sia sa dakulang siudad tanganing maghanap nin pinansial na seguridad. Minsan siring, dai nahaloy pakaabot nia an saiyang paglaom nagrumarom ta naaraman nia na dai sana napupurot an kuarta sa siudad.

HULING nasasakitan sa pag-adaptar sa buhay sa siudad, si Josue biyong nadesganar. An dakulang siudad bakong arog kan hinohona nia kaidto. Sa gabos na panahon na ini, hinihidaw na gayo kan puso ni Josue na magbalik sa saiyang pamilya asin mga katood sa simpleng baryo na hinalean nia. Alagad natatakot sia na pag-oolog-ologon sia kan nagkapirang kababaryo. ‘Aapodon ninda akong sarong bigo,’ an paghadit nia, ‘huli ta dai ako nagin mapanggana sa siudad.’

An ikinahahadit nia pang marhay iyo an pagkadesganar na puedeng mamatean kan saiyang mga magurang. Sinda nag-aasa sa saiya para sa pinansial na tabang. Mantang nagmamaigot na makaya an emosyonal na pagabat na ini, nagtatrabaho si Josue nin halawig na oras sa nakakapamenos na trabaho asin naggaganar nin kakadikit kisa kan pinangarap niang makua. Pagal-pagal na sia huli sa sobrang trabaho. Asin an natatadang panahon para sa Kristianong mga aktibidad, na mahalagang marhay para sa saiya, nagdidikit kada semanang nag-aagi. Harayong marhay sa mainit na pakikiiba kan saiyang pamilya asin dating mga katood, sia napupungaw asin nakamamateng nagsosolo. Nanompongan nia na dai ikinatao sa saiya kan siudad an seguridad na minamawot niang marhay.

Minsan ngani nagkakalaenlaen an mga ngaran asin lugar, an mamondong estorya ni Josue paorootrong nangyayari. Si Josue bako man na maimot sa saiyang pagmawot na magbalyo​​—naghahanap sana sia nin seguridad. Sinsero siang nagsaboot na mas dakol an saiyang oportunidad sa siudad kisa sa sadit niang baryo. Siempre, kun beses an saro tibaad umasenso sa materyal, pero dai iyan nangangahulogan nin tunay na seguridad. Dai nanggad iyan nangyari ki Josue, ni posibleng marhay na mangyari sa kadaklan na iba pa na nagprobar man kaiyan. Ini an nagpapangyari na maghapot kita, ‘Ano an seguridad?’

Laen-laen an pakasabot manongod sa seguridad kan manlaenlaen na tawo. An sarong diksionaryo nagsasabi na an seguridad iyo an “katalingkasan sa peligro” o “katalingkasan sa pagkatakot o kahaditan.” Biyong naaaraman kan kadaklan na an lubos na “katalingkasan sa peligro” dai nag-eeksister ngonyan. Naninigoan na sinda basta sinda nakamamateng may seguridad, sa ibong kan nakatatakot na mga kamugtakan na tibaad nakapalibot sa sainda.

Kumusta man kamo? Saen kamo naghahanap nin seguridad? Iyan daw manonompongan sa siudad kisa sa baryo, arog kan paghona ni Josue? O iyan daw yaon sa kuarta, saen o paano man nindo tibaad makua iyan? Iyan daw tibaad makukua sa pag-asenso sa buhay? Kun ano man an tinutubod nindo na dinedependeran kan saindong seguridad, gurano kalawig na magpapadagos an seguridad na iyan para sa saindo sagkod sa saindong pamilya?

Estudyaran niato an tolong paagi nin paghanap kan dakol na indibiduwal sa seguridad​​—geograpikong lokasyon; kuarta; posisyon, o prestihio. Dangan sisiyasaton niato kun saen nakadepende an tunay, permanenteng seguridad.

[Nota sa Ibaba]