An Pakaabot sa mga Kahagadan nin Dios Nagbabantog kan Kadakulaan ni Jehova

“Ibabantog ko an saiyang kadakulaan paagi sa pagpapasalamat.”​—SALMO 69:30.

1. (a) Taano ta maninigong ibantog an kadakulaan ni Jehova? (b) Paano niato ibinabantog an kadakulaan nia paagi sa pagpapasalamat?

 SI Jehova an makakamhan sa gabos na Dios, an Unibersal na Soberano, an Kaglalang. Bilang siring, maninigo na ibantog an kadakulaan kan saiyang ngaran asin mga katuyohan. An pagbantog kan kadakulaan ni Jehova nangangahulogan nin pagtao sa saiya kan pinakahalangkaw na pagheling, pag-omaw asin pagrukyaw sa saiya paagi sa tataramon asin gibo. An paggibo kaiyan “paagi sa pagpapasalamat” naghahagad na kita pirmeng magpasalamat sa ginigibo nia para sa sato ngonyan asin sa gigibohon nia sa ngapit. An kaipuhan na magin aktitud niato ipinaheheling sa Kapahayagan 4:​11, na dian an fiel na espiritung mga linalang sa langit nagpapahayag: “Maninigo ka, Jehova, na samong Dios, na mag-ako kan kamurawayan asin kan onra patin kan kapangyarihan, huli ta linalang mo an gabos na bagay, asin huli sa saimong kabotan an mga iyan naglataw asin nalalang.” Paano niato ibinabantog an kadakulaan ni Jehova? Paagi sa pag-adal manongod sa saiya dangan paggibo kan hinahagad nia sa sato. Maninigo kitang makamate nin arog kan salmista kan sia magsabi: “Tokdoan mo ako na gibohon an saimong kabotan, huli ta ika an sakong Dios.”​—Salmo 143:10.

2. Ano an gigibohon ni Jehova sa mga nagbabantog kan kadakulaan nia asin sa mga dai?

² Pinahahalagahan ni Jehova an mga nagbabantog kan saiyang kadakulaan. Kaya sia “an parabalos sa mga maigot na naghahanap sa saiya.” (Hebreo 11:6) Ano an balos? Nagsabi si Jesus sa pamibi sa saiyang langitnon na Ama: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) Iyo, an mga ‘nagbabantog kan kadakulaan ni Jehova paagi sa pagpapasalamat’ “magmamana kan daga, asin sinda mag-eerok dian sagkod lamang.” (Salmo 37:29) Sa ibong na kampi, “mayo nin kaaabtan an siisay man na maraot.” (Talinhaga 24:20) Asin sa huring mga aldaw na ini, apurado an pangangaipo na ibantog an kadakulaan ni Jehova huli ta sa dai na mahahaloy lalaglagon nia an mga maraot asin iingatan an mga matanos. “An kinaban maagi sana asin siring man an mawot kaiyan, alagad an naggigibo kan kabotan nin Dios magdadanay sagkod lamang.”​—1 Juan 2:17; Talinhaga 2:​21, 22.

3. Taano ta maninigo niatong tawan nin atension an libro ni Malaquias?

³ An kabotan ni Jehova manonompongan sa Biblia, ta “an gabos na Kasuratan ipinasabong nin Dios.” (2 Timoteo 3:16) An Tataramon na iyan nin Dios dakol na isinasaysay dapit sa kun paano binebendisyonan ni Jehova an mga nagbabantog kan kadakulaan nia asin dapit sa kun ano an nangyayari sa mga dai. An saro sa mga pagkasaysay na  iyan igwa nin koneksion sa nangyari sa Israel durante kan panahon ni propeta Malaquias. Kan mga taon 443 B.C.E., durante kan pagkagobernador ni Nehemias sa Juda, isinurat ni Malaquias an libro na inaapod sa ngaran nia. An mapuersa asin nakapupukaw sa boot na librong ini igwa nin impormasyon asin mga hula na “isinurat para sa pagpatanid sa sato na inabotan kan mga katapusan kan mga palakaw nin mga bagay.” (1 Corinto 10:11) An pagtao nin atension sa mga tataramon ni Malaquias puedeng makatabang sa sato na mangandam para sa “dakula asin makangingirhat na aldaw ni Jehova,” paglinaglag na Nia an maraot na sistemang ini.​—Malaquias 4:5.

4. Anong anom na punto an dinadara sa satong atension kan Malaquias kapitulo 1?

⁴ Paano nagtatabang sa sato sa ika-21 siglong ini an libro ni Malaquias, na isinurat kaidtong labing 2,400 na taon na an nakaagi, na mangandam para sa dakula asin makangingirhat na aldaw na iyan ni Jehova? Dinadara kan enot na kapitulo an satong atension sa kisuerra anom na punto na mahalaga sa pagbantog niato sa kadakulaan ni Jehova paagi sa pagpapasalamat tanganing kamtan an saiyang pabor asin an buhay na daing katapusan: (1) Namomotan ni Jehova an saiyang banwaan. (2) Dapat kitang magpaheling nin pagpahalaga sa sagradong mga bagay. (3) Inaasahan ni Jehova na itao niato sa saiya an pinakamarahay niato. (4) An tunay na pagsamba minomotibar nin daing kapasloan na pagkamoot, bakong nin kahanaban. (5) An inaakong pagsamba sa Dios bakong nakapagagabat na pormalidad. (6) An balang saro sa sato maninimbag sa Dios. Kaya, kun siring, digdi sa enot kan tolong artikulo dapit sa libro ni Malaquias, estudyaran niato an kada saro kan mga puntong iyan mantang maingat niatong sinisiyasat an Malaquias kapitulo 1.

Namomotan ni Jehova an Saiyang Banwaan

5, 6. (a) Taano ta namotan ni Jehova si Jacob? (b) Kun aarogon niato an pagigin fiel ni Jacob, ano an maaasahan niato?

⁵ An pagkamoot ni Jehova linilinaw sa enot na mga bersikulo kan Malaquias. An libro minapoon paagi sa mga tataramon na: “Sarong kapahayagan: An tataramon ni Jehova mapadapit sa Israel.” Dugang pa, an Dios nagsasabi: “Namotan ko kamo.” Sa pagsitar nin halimbawa, sa bersikulo man sanang iyan, si Jehova nagsasabi: “Namotan ko si Jacob.” Si Jacob sarong tawong may pagtubod ki Jehova. Pag-abot nin panahon, an ngaran ni Jacob sinalidahan ni Jehova nin Israel, asin sia nagin apoon kan nasyon nin Israel. Huli ta si Jacob sarong tawong may pagtubod kaya namotan sia ni Jehova. An mga kabilang sa nasyon na nagpaheling nin arog kan aktitud ni Jacob ki Jehova namotan man Nia.​—Malaquias 1:​1, 2.

⁶ Kun kita namomoot ki Jehova asin maimbod na nagdadanay sa kaibanan kan saiyang banwaan, mararanga kita kan mga tataramon sa 1 Samuel 12:22: “Si Jehova dai mapabaya sa saiyang banwaan huli sa saiyang dakulang ngaran.” Namomotan ni Jehova an saiyang banwaan asin binabalosan nia sinda, sa katapustapusi nin buhay na daing katapusan. Kaya mababasa niato: “Magtiwala ka ki Jehova asin gumibo ka nin marahay; mag-erok ka sa daga, asin gumawe kang may pagigin fiel. Siring man magkaigwa nin labi-labi nanggad na pagkakontento dian ki Jehova, asin itatao nia sa saimo an mga kahagadan kan saimong puso.” (Salmo 37:​3, 4) Kalabot sa pagkamoot niato ki Jehova an ikaduwang punto na dinadara sa satong atension kan Malaquias kapitulo 1.

Magpaheling nin Pagpahalaga sa Sagradong mga Bagay

7. Taano ta ikinaongis ni Jehova si Esau?

⁷ Siring kan mababasa niato sa Malaquias 1:​2, 3, pakatapos na sabihon ni Jehova na, “namotan ko si Jacob,” sia nagsabing, “si Esau ikinaongis ko.” Taano ta magkalaen? Ibinantog ni Jacob an kadakulaan ni Jehova, alagad an kakambal nia, si Esau, dai. Si Esau  inapod man na Edom. Sa Malaquias 1:​4, an daga nin Edom inaapod na teritoryo nin karatan, asin an mga nag-eerok dian idinenunsiar. Edom (na an boot sabihon “Mapula”) an inginaran ki Esau pakatapos na ipabakal nia ki Jacob an mahalagang marhay na pagkamatua nia karibay nin sarong linagang mapula. “Pinagmenos ni Esau an pagkamatua,” sabi kan Genesis 25:34. Sinadol ni apostol Pablo an mga kapagtubod na mag-ingat na “dai magkaigwa nin parapakisaro o siisay man na dai nagpapahalaga sa sagradong mga bagay, siring ki Esau, na huli sa sarong pagkakan ipinanao an saiyang mga deretso bilang matua.”​—Hebreo 12:14-16.

8. Ano an dahelan ta iinagid ni Pablo si Esau sa parapakisaro?

⁸ Taano ta ikinonektar ni Pablo sa pakikisaro an ginibo ni Esau? Huli ta an pagkaigwa kan mentalidad na arog ki Esau puedeng magin dahelan na dai mapahalagahan nin saro an sagradong mga bagay. Dangan puede ining magresulta sa magabat na mga kasalan, arog nin pakikisaro. Huli kaini, an balang saro sa sato tibaad maghapot: ‘Ako daw kun beses natetentaran na iribay an sakong Kristianong pamana​—an buhay na daing katapusan​—sa sarong bagay na temporaryo sana arog nin sarong mangko nin linagang lentehas? Tibaad dai ko narerealisar, pinagmemenos ko daw an sagradong mga bagay?’ Si Esau dai makapaghalat an pagmawot na panigoan an sarong pisikal na paghimuyawot. Sinabi nia ki Jacob: “Dali man, tabi, pakakana ako kan mapula.” (Genesis 25:30) Makamomondo, an nagkapirang lingkod nin Dios garo man sana nagsasabing: “Dali na! Taano ta hahalaton ta pa an kagalanggalang na pag-agom?” An pagmawot nin seksuwal na kasiraman ano man an magin karibay iyo an nagin saindang mangko nin linagang lentehas.

9. Paano niato mapagdadanay an reberensial na pagkatakot ki Jehova?

⁹ Logod man na dai niato pagmenoson an sagradong mga bagay paagi sa dai pagpahalaga sa kabinian, integridad, asin sa satong espirituwal na pamana. Imbes na magin arog ki Esau, kita magin siring sa fiel na si Jacob asin papagdanayon niato an reberensial na pagkatakot sa Dios paagi sa pagpaheling nin hararom na pagpahalaga sa sagradong mga bagay. Paano daw niato ini magigibo? Paagi sa pag-iingat na aboton an mga kahagadan ni Jehova. Rasonable sanang dinadara kita kaini sa ikatolong punto na pinalataw sa Malaquias kapitulo 1. Ano daw iyan?

Pagtao ki Jehova kan Pinakamarahay Niato

10. Sa anong paagi dinuduhagi kan mga saserdote an lamesa ni Jehova?

¹⁰ An mga saserdote sa Juda na naglilingkod sa templo sa Jerusalem durante kan panahon ni Malaquias dai itinatao ki Jehova an pinakamarahay na mga atang. An Malaquias 1:6-8 nagsasabi: “‘An aking lalaki, sa saiyang kabtang, nagtataong onra sa ama; asin an lingkod, sa saiyang kaharohalangkaweng kagurangnan. Kaya kun ako ama, haen an onra sa sako? Asin kun ako Kaharohalangkaweng Kagurangnan, haen an pagkatakot sa sako?’ an sabi ni Jehova nin mga hukbo sa saindo, O mga saserdote na nagduduhagi sa sakuyang ngaran.” “Sa anong paagi mi dinuhagi an saimong ngaran?” an hapot kan mga saserdote. “Paagi sa pagdolot sa sakong altar nin maating tinapay,” an simbag ni Jehova. “Sa anong paagi mi ika inatian?” an hapot kan mga saserdote. Kaya sinabihan sinda ni Jehova: “Paagi sa pagsabi nindong: ‘An lamesa ni Jehova sarong bagay na dapat duhagion.’” Ipinaheling kan mga saserdoteng idto na dinuduhagi ninda an lamesa ni Jehova kada magdolot sinda nin atang na may diperensia, na nagsasabing: “Bako iyan na maraot.”

11. (a) Ano an sinabi ni Jehova manongod sa dai inaakong mga atang? (b) Sa anong paagi may sala an mga tawo sa pankagabsan?

¹¹ Dangan nangatanosan si Jehova mapadapit sa  dai inaakong mga atang na iyan: “Irani mo, tabi, iyan sa saimong gobernador. Maoogma daw sia sa saimo, o aakoon ka daw nia na may kabootan?” Dai, dai maoogma an saindang gobernador sa siring na balaog. Lalo na nanggad na dai aakoon kan Unibersal na Soberano an mga dolot na may diperensia! Asin bako sanang mga saserdote an may sala. Totoo, linalapastangan ninda si Jehova paagi sa paggibo kan aktuwal na mga pag-atang. Alagad dai daw nin sala an banwaan sa pankagabsan? Bako nanggad! Sinda man sana an nagpili kan buta, pilay, asin may helang na mga hayop na idto asin nagdara kan mga iyan sa mga saserdote tanganing iatang an mga iyan. Kanigoan na kasalan!

12. Paano kita tinatabangan na ikatao ki Jehova an pinakamarahay niato?

¹² An pagtao ki Jehova kan pinakamarahay niato iyo an paagi tanganing ipaheling na talagang namomotan niato sia. (Mateo 22:​37, 38) Bakong arog kan sumbikalan na mga saserdote kan panahon ni Malaquias, an organisasyon ni Jehova ngonyan nagtatao nin dakol na instruksion gikan sa Kasuratan na nagtatabang sa sato na ibantog an kadakulaan ni Jehova na may pagpapasalamat paagi sa pag-abot sa mga kahagadan nin Dios. Konektado digdi an ikaapat na mahalagang punto na makukua sa Malaquias kapitulo 1.

An Tunay na Pagsamba Minomotibar nin Pagkamoot, Bakong nin Kahanaban

13. Ano an ginigibo kan mga saserdote na nagpaheling na kahanaban an nagmomotibar sa sainda?

¹³ An mga saserdote kan kaaldawan ni Malaquias paslo, daing pagkamoot, asin gutom sa kuarta. Paano niato iyan naaaraman? An Malaquias 1:10 nagsasabi: “‘Siisay man dian sa saindo an mapinto kan mga tata? Asin kamo habong mag-ilaw kan sakong altar​​—na mayong bayad. Dai ko kamo nawiwilihan,’ an sabi ni Jehova nin mga hukbo, ‘asin dai ko ikinaoogma an balaog na dolot hale sa saindong kamot.’” Iyo, an mahanab na mga saserdoteng idto nagpabayad pa ngani para sa pinakasimpleng paglilingkod sa templo, naghahagad nin bayad sa pagpinto kan mga tata asin pagpailaw kan mga solo sa altar! Bakong makangangalas na dai nawili si Jehova sa mga dolot na gikan sa saindang kamot!

14. Taano ta masasabi niato na an Mga Saksi ni Jehova minomotibar nin pagkamoot?

¹⁴ An kahanaban asin kapasloan kan makasalan na mga saserdote sa suanoy na Jerusalem puede nanggad na magpagirumdom sa sato na, segun sa Tataramon nin Dios, an mahanab na mga indibiduwal dai magmamana kan Kahadean nin Dios. (1 Corinto 6:​9, 10) An paghorophorop sa pagigin mapan-aprobetsar kan mga saserdoteng idto nagpapakosog kan satong pagpahalaga sa pambilog na kinaban na paghuhulit na ginigibo kan Mga Saksi ni Jehova. Iyan boluntad; nungka kitang nagpapabayad sa ano man na kabtang kan satong ministeryo. Bako, “kita bakong mga paratinda kan tataramon nin Dios.” (2 Corinto 2:17) Arog ki Pablo, an balang saro sa sato onestong makasasabi: “Ako maogmang nagpahayag kan maogmang bareta nin Dios sa saindo na dai nin bayad.” (2 Corinto 11:7) Mangnoha na si Pablo “maogmang nagpahayag kan maogmang bareta.” Nagsusuherir iyan nin ikalimang punto na dinara sa satong atension kan Malaquias kapitulo 1.

An Paglilingkod sa Dios Bakong Nakapagagabat na Pormalidad

15, 16. (a) Ano an nagin aktitud kan mga saserdote dapit sa pagdolot nin mga atang? (b) Paano idinodolot kan Mga Saksi ni Jehova an saindang mga atang?

¹⁵ An pagdolot nin mga atang ibinilang na mapagal na pormalismo kan daing pagtubod na mga saserdote sa suanoy na Jerusalem. Magabat iyan para sa sainda. Siring kan sabi sa Malaquias 1:​13, an Dios nagsabi sa sainda: “Kamo nagsabi, ‘Uya! Abaa kanakapapagal!’ asin kinusmodan nindo iyan.” Kinusmodan, o tinuya, kan mga saserdoteng idto an sagradong  mga bagay nin Dios. Ipamibi niato na kita mismo dai noarin man magin arog ninda. Imbes, logod na pirme niatong ipaheling an espiritu na risang-risa sa mga tataramon sa 1 Juan 5:3: “Ini iyo an boot sabihon kan pagkamoot sa Dios, na kuyogon niato an saiyang mga togon; pero an saiyang mga togon dai nakapagagabat.”

¹⁶ Ikaogma niatong marhay an pagdolot nin espirituwal na mga atang sa Dios, na nungkang ibinibilang ini na sarong nakakasawang pagabat. Logod na himateon niato an makahulang mga tataramon: “Magsabi kamo [ki Jehova], kamo gabos, ‘Patawadon mo logod an sala; asin akoa an marahay, asin idodolot niamo bilang balos an mga ogbon na baka kan samong mga ngabil.’” (Oseas 14:2) An pananaram na “ogbon na baka kan samong mga ngabil” nangangahulogan nin espirituwal na mga atang, an mga tataramon na itinataram niato sa pag-omaw ki Jehova asin sa saiyang mga katuyohan. An Hebreo 13:15 nagsasabi: “Paagi [ki Jesu-Cristo] danay kitang magdolot sa Dios nin atang nin pag-omaw, na iyo, an bunga nin mga ngabil na nagpapahayag sa publiko kan saiyang ngaran.” Abaang ogma niato na an satong espirituwal na mga atang, bakong pormalidad sana, kundi bilog na pusong kapahayagan kan satong pagkamoot sa Dios! Minagiya ini sa ikaanom na punto na manonodan sa Malaquias kapitulo 1.

An Balang Saro Maninimbag

17, 18. (a) Taano ta sinumpa ni Jehova “an naghihiro nin tuso”? (b) Ano an dai inisip kan mga naghihiro nin tuso na idto?

¹⁷ An mga indibiduwal na nabubuhay kaidtong kaaldawan ni Malaquias personal na nanimbag sa saindang mga gibo, asin iyo man kita. (Roma 14:12; Galacia 6:5) Huli kaiyan, an Malaquias 1:14 nagsasabi: “Sinumpa an naghihiro nin tuso kun igwa nin [daing diperensiang] lalaking hayop sa saiyang kahayopan, asin sia naggigibo nin promesa asin nag-aatang nin may kaninan ki Jehova.” An sarong tawo na igwa nin kahayopan bakong saro sanang hayop an pagsadiri​—sabihon ta baga na saro sanang karnero​—kaya mayo na siang mapagpilian. Sa pagpili nin hayop na iaatang, dai sia kaipuhan na magpili nin buta, pilay, o may helang. Kun talagang an pinili nia iyo an siring na may diperensiang hayop, iyan mapaheling na dinuhagi nia an areglo ni Jehova sa pag-atang, ta an sarong tawo na igwa nin kahayopan seguradong may makukuang hayop na mayo kan siring na mga depekto!

¹⁸ May marahay na dahelan, kun siring, sinumpa ni Jehova an naghihiro nin tuso, an saro na igwa nin angay na lalaking hayop alagad an dinara​—tibaad kinaipuhan pang guyodon​—iyo an buta, pilay, o may helang na hayop sa saserdote tanganing iatang. Pero, mayo lamang nin nagpaparisa na may siisay man sa mga saserdote na nagkotar sa ley nin Dios na nagsasabi na dai inaako an may diperensiang mga hayop. (Levitico 22:17-20) Aram nin rasonableng mga indibiduwal na may maraot na mangyayari sa sainda kun magprobar sindang palusoton an siring na balaog sa saindang gobernador. Alagad an totoo an kaatubang ninda iyo an Unibersal na Soberano, si Jehova, na nakalalabing marhay kisa siisay man na tawong gobernador. Arog kaini an pagkasabi kaiyan kan Malaquias 1:14: “‘Ako dakulang Hade,’ sabi ni Jehova nin mga hukbo, ‘asin an sakong ngaran magigin makangingirhat sa tahaw nin mga nasyon.’”

19. Ano an hinihimuyawot niato, asin ano an maninigo na ginigibo niato?

¹⁹ Bilang maimbod na mga lingkod nin Dios, hinihimuyawot niato an aldaw na an Dakulang Hade, si Jehova, rereberensiaron kan bilog na katawohan. Sa panahon na iyan, “an daga mapapano nanggad kan kaaraman dapit ki Jehova kun paanong an tubig nakatatahob sa mismong kadagatan.” (Isaias 11:9) Mientras tanto, hingoahon niato na aboton an mga kahagadan ni Jehova paagi sa pag-arog sa salmista na nagsabi: “Ibabantog ko an saiyang kadakulaan paagi sa pagpapasalamat.” (Salmo 69:30) Sa katuyohan na iyan, si Malaquias igwa nin dugang pang hatol na pakikinabangan na marhay. Sa sunod na duwang artikulo, estudyaran niato kun siring nin maingat an iba pang kabtang kan libro ni Malaquias.

Nagigirumdoman daw Nindo?

• Taano ta maninigo niatong ibantog an kadakulaan ni Jehova?

• Taano ta dai inako ni Jehova an mga atang kan mga saserdote kan kaaldawan ni Malaquias?

• Paano kita nagdodolot ki Jehova nin atang nin pag-omaw?

• Ano an maninigo na magin motibasyon para sa tunay na pagsamba?

[Mga Hapot Para sa Pag-adal]

[Ritrato sa pahina 9]

An hula ni Malaquias napapanongod sa satong kaaldawan

[Ritrato sa pahina 10]

Dai pinahalagahan ni Esau an sagradong mga bagay

[Ritrato sa pahina 11]

An mga saserdote asin an banwaan nagdolot nin dai inaakong mga atang

[Ritrato sa pahina 12]

Sa bilog na kinaban, an Mga Saksi ni Jehova daing bayad na nagdodolot nin mga atang nin pag-omaw