Daing Pinipili an mga Kabiadian
Daing Pinipili an mga Kabiadian
KINIDNAP si Christian, na nag-iistar sa sarong nasyon sa Aprika, kan mga soldados na nagprobar na puersahon siang umayon sa armi, alagad sia nagsayuma huli sa saiyang konsensia na sinanay sa Biblia. Dangan dinara sia kan mga soldados sa sarong kampo militar kun saen, pagkatapos siang bugbogon sa laog nin apat na aldaw, binadil sia sa tabay kan saro sa sainda. Nahimo ni Christian na makaabot sa ospital, alagad kinaipuhan na putolon an saiyang tabay sa ibaba kan tuhod. Sa saro pang nasyon sa Aprika, dawa an saradit na aki pinuputolan nin mga takyag o tabay kan armadong mga rebelde. Asin poon sa Cambodia sagkod sa Balkanes, poon sa Afghanistan sagkod sa Angola, an nakatalbong na mga bomba padagos na nagigin dahelan nin pagkaputol nin mga parte nin hawak asin pagkabiadi nin mga tawo hoben man asin gurang.
Nakadadanyar man an mga aksidente asin helang, siring baga kan diabetes. Dawa an mga hilo sa palibot puedeng magresulta sa pagkabiadi. Halimbawa, sa kaharaning mga pagtaraed sa sarong siudad sa Sirangan na Europa, dakol na aki an namundag na saro sana an takyag. Igwa sana sinda nin halipot na pungo sa ibaba kan siko. An ebidensia nagtotokdo sa danyos sa henetiko na nakua sa kemikal na polusyon. Dai mabilang na iba pa an may kompletong mga takyag o tabay alagad biadi huli sa paralisis o iba pang helang. Tunay nanggad, daing pinipili an mga kabiadian.
Ano man an dahelan, an kabiadian puedeng nakapanluluya nin biyo. Nawaran si Junior nin walang tabay sa edad na 20. Sinabi nia sa huri: “Dakol an nagin problema ko sa emosyon. Nagparahibi ako huli ta nungka nang ikakabalik an sakong tabay. Dai ko aram kun ano an gigibohon ko. Nariribaraw ako.” Minsan siring, pag-abot nin panahon, nabagong marhay an aktitud ni Junior. Nagpoon siang mag-adal sa Biblia asin nakanood nin mga bagay na bako sanang nakatabang sa saiya na maatubang an mga problema kundi nakatao man sa saiya nin makangangalas na paglaom na sarong maogmang ngapit digdi mismo sa daga. Kun kamo biadi, gusto daw nindong magkaigwa man kan paglaom na iyan?
Kun iyo, basahon tabi kun siring an masunod na artikulo. Irinerekomendar niamo na hanapon nindo an sinambit na mga teksto sa sadiri nindong Biblia tanganing maheling mismo nindo kun ano an itinatagama kan Kaglalang para sa mga nakakanood kan saiyang katuyohan asin iinooyon dian an saindang buhay.