Ikinaoongis ni Jehova an Pagtraydor

‘Dai kamo magtrinaydoran.’​—MALAQUIAS 2:10.

1. Ano an hinahagad sa sato nin Dios tanganing akoon niato an buhay na daing katapusan?

 GUSTO daw nindo nin buhay na daing katapusan? Kun nagtutubod kamo sa paglaom na iyan na ipinanuga sa Biblia, posibleng masabi kamo, ‘Siempre.’ Alagad kun mawot nindong tawan kamo nin Dios nin buhay na daing katapusan sa saiyang bagong kinaban, kaipuhan nindong aboton an saiyang mga kahagadan. (Eclesiastes 12:13; Juan 17:3) Bakong rasonable daw na asahan na magigibo iyan kan mga tawong bakong sangkap? Bako, ta ini an nakaparirigon sa boot na sinabi ni Jehova: “Sa mamomoton na kabootan ako naogma nin labi-labi, asin bakong sa atang; asin sa kaaraman dapit sa Dios kisa bilog na mga dolot na tinotong.” (Oseas 6:6) Kaya maski an madaling masala na mga tawo puedeng maabot an mga kahagadan nin Dios.

2. Paano nagtraydor ki Jehova an dakol na Israelita?

² Minsan siring, bakong gabos boot na gibohon an kabotan ni Jehova. Ihinahayag ni Oseas na maski an dakol na Israelita habong gibohon iyan. Bilang nasyon, sinda uminoyon na lumaog sa sarong tipan, sarong kasundoan, na kuyogon an mga ley nin Dios. (Exodo 24:1-8) Pero, dai nahaloy, ‘linapas ninda an tipan’ paagi sa pagbalga sa saiyang mga ley. Sa siring, sinabi ni Jehova na an mga Israelitang idto “nagtraydor” sa saiya. (Oseas 6:7) Asin iyo man an ginigibo nin dakol na tawo poon kaidto. Alagad ikinaoongis ni Jehova an pagtraydor, baga man iyan ginigibo sa saiya o sa mga namomoot asin naglilingkod sa saiya.

3. Anong pag-analisar an gigibohon sa pag-adal na ini?

³ Bakong si Oseas an solamenteng propeta na nagdoon kan pagmansay nin Dios sa katraydoran, sarong pagmansay na kaipuhan na yaon sa sato kun naglalaom kitang magkamit nin maogmang buhay. Sa sinundan na artikulo, pinonan niatong analisaron an dakol na kabtang kan makahulang mensahe ni Malaquias, magpoon sa enot na kapitulo kan saiyang libro. Bumalyo kita ngonyan sa ikaduwang kapitulo kan librong iyan asin helingon niato kun paano tinatawan nin dugang pang atension an pagmansay nin Dios sa katraydoran. Minsan ngani an tinotokar ni Malaquias iyo an nagin situwasyon sa tahaw kan banwaan nin Dios dakol na siglo pakatapos kan saindang pagbalik hale sa pagkabihag sa Babilonya, an ikaduwang kapitulo na iyan igwa nin tunay na kahulogan para sa sato ngonyan.

Kulpableng mga Saserdote

4. Anong patanid an itinao ni Jehova sa mga saserdote?

⁴ An kapitulo 2 minapoon paagi sa pagkondenar ni Jehova sa mga saserdoteng Judio huli sa pagsuway sa saiyang matanos na mga dalan. Kun dai ninda kaidto isasapuso an saiyang hatol asin itatanos an saindang mga dalan, seguradong delikado an kaaabtan ninda. Mangnoha an enot na duwang bersikulo: “‘An togon na ini sa saindo, O mga saserdote. Kun dai kamo mahinanyog, asin kun dai nindo iyan isasapuso na magtao nin kamurawayan sa sakong ngaran,’ sabi ni Jehova nin mga hukbo, ‘siertong ipapaabot ko man sa saindo an sumpa, asin susumpaon ko an saindong mga bendisyon.’” Kun itinokdo kutana kan mga saserdote sa banwaan an mga ley nin Dios asin inotob iyan, binendisyonan kutana sinda. Alagad dahelan sa dai pag-intindi sa kabotan nin Dios, sarong sumpa, maldisyon, an imbes na maabot. Maski an mga bendisyon na ipinahayag kan mga saserdote magigin sumpa.

5, 6. (a) Taano ta nangorognang kulpable an mga saserdote? (b) Paano si Jehova nagpahayag nin pagkasuya sa mga saserdote?

⁵ Taano ta nangorognang kulpable an mga saserdote? Malinaw na ipinaririsa iyan kan bersikulo 7: “An mga ngabil nin sarong saserdote iyo an  kaipuhan na magsaray kan kaaraman, asin an ley iyo an kaipuhan na hanapon kan banwaan hale sa saiyang ngoso; huli ta sia iyo an sugo ni Jehova nin mga hukbo.” Labing sangribong taon bago kaini, an mga ley nin Dios na itinao sa Israel paagi ki Moises nagsabi na an mga saserdote igwa nin katongdan “na itokdo sa mga aki ni Israel an gabos na regulasyon na itinaram ni Jehova.” (Levitico 10:11) Makamomondo, pag-abot nin panahon, an kagsurat kan 2 Cronica 15:3 nagbareta: “Kadakol kan aldaw na an Israel mayo nin tunay na Dios asin mayo nin saserdote na nagtotokdo patin mayo nin Ley.”

⁶ Kan panahon ni Malaquias, kan ikalimang siglo B.C.E., iyo pa man giraray an kamugtakan kan mga saserdote. Dai ninda ikinatotokdo sa banwaan an Ley nin Dios. Kaya maninigo na papanimbagon an mga saserdoteng idto. Mangnoha an mapuersang mga tataramon sa sainda ni Jehova. An Malaquias 2:3 nagsasabi: “Wawarakan ko nin odo an saindong mga lalauogon, an odo nin saindong mga kapiestahan.” Kanigoan na pagsaway! An odo nin mga hayop na iaatang dapat na iluwas sa kampo asin soloon. (Levitico 16:27) Alagad pagsinabi sa sainda ni Jehova na an odo iwawarak imbes sa saindang mga lalauogon, iyan malinaw na nagpapaheling na saiyang ikinasusuya asin hinahaboan an saindang mga atang asin an mga nagdodolot kaiyan.

7. Taano ta anggot si Jehova sa mga paratokdo kan Ley?

⁷ Mga siglo bago kan panahon ni Malaquias, an mga Levita an iinasignar ni Jehova na mag-asikaso kan tabernakulo asin sa huri kan templo asin kan sagradong paglilingkod. Sinda an mga paratokdo sa nasyon nin Israel. An pag-otob sa saindang asignasyon puede kutanang mangahulogan nin buhay asin katoninongan para sa sainda asin sa nasyon. (Bilang 3:5-8) Pero, nawara sa mga Levita an pagkatakot sa Dios na yaon sa sainda kan enot. Sa siring, sinabihan sinda ni Jehova: ‘Suminuhay kamo dian sa dalan. Nasingkog nindo an dakol sa ley. Rinaot nindo an tipan ni Levi. Dai nindo inotob an sakong mga dalan.’ (Malaquias 2:​8, 9) Paagi sa dai ninda pagtokdo kan katotoohan asin paagi sa bakong marahay na halimbawa ninda, ilinagalag kan mga saserdote an dakol na Israelita, kaya tama sanang maanggot sa sainda si Jehova.

Pagsunod sa mga Pamantayan nin Dios

8. Sobra daw na asahan an mga tawo na makasunod sa mga pamantayan nin Dios? Ipaliwanag.

⁸ Dai niato pag-isipon na an mga saserdoteng idto angay sa simpatiya asin maninigo kutanang pinatawad huli ta sinda mga tawo sana na bakong sangkap asin dai puedeng asahan na makasunod sa mga pamantayan nin Dios. An totoo iyo na an mga tawo puedeng sumunod sa mga pagboot nin Dios, ta dai man sinda hinahagadan ni Jehova kan dai ninda kayang gibohon. Posibleng marhay na an nagkapirang indibiduwal na saserdote kaidto talagang nagsunod sa mga pamantayan nin Dios, asin daing duda manongod sa saro na kan huri talagang nagsunod​—si Jesus, an dakulang “halangkaw na saserdote.” (Hebreo 3:1) Dapit sa saiya totoong masasabi: “An mismong ley nin katotoohan nasa saiyang ngoso, asin mayo nin pagkabakong matanos na manonompongan sa saiyang mga ngabil. Sa katoninongan asin sa pagkatanos sia naglakaw na kaibanan ko, asin dakol an itinalikod nia sa sala.”​—Malaquias 2:6.

9. Siisay an fiel na nagtatao kan katotoohan sa panahon niato?

⁹ Kaagid kaiyan, sa laog nin labi nang sarong siglo ngonyan, an linahidan na mga tugang  ni Cristo, an mga igwa nin langitnon na paglaom, naglilingkod bilang “banal na kabilogan na grupo nin mga saserdote, tanganing magdolot nin espirituwal na mga atang na inaako nin Dios.” (1 Pedro 2:5) Sinda an nangenot sa pagtao sa iba nin mga katotoohan sa Biblia. Mantang nanonodan nindo an mga katotoohan na saindang itinotokdo, bako daw na nanompongan nindo base sa eksperyensia na an mismong ley nin katotoohan nasa saindang ngoso? Nagtabang sinda na italikod an dakol sa relihiosong sala, kaya ngonyan igwa na nin minilyon sa bilog na kinaban na nakanood kan mga katotoohan sa Biblia asin igwa kan paglaom na buhay na daing katapusan. An mga ini man igwa nin pribilehio na itokdo an ley nin katotoohan sa minilyon pang iba.​—Juan 10:16; Kapahayagan 7:9.

Dahelan na Magmaan

10. Taano ta may dahelan kitang magmaan?

¹⁰ Minsan siring, igwa kita nin dahelan na magmaan. Puedeng malipasan niato an mga leksion na ipinaririsa sa Malaquias 2:1-9. Kita daw mismo mapagbantay, tanganing mayo nin pagkabakong matanos na manompongan sa satong mga ngabil? Halimbawa, talaga daw na matitiwalaan kan satong mga kapamilya an mga sinasabi niato? Iyo man daw an satong espirituwal na mga tugang na lalaki asin babae sa kongregasyon? Madaling magkaigwa kan ugale na magtaram nin mga termino na kun sa teknikal na pagtaram tama man alagad mapandaya. O tibaad pasobrahan o itago nin saro an mga detalye na may labot sa sarong transaksion sa negosyo. Dai daw iyan maheheling ni Jehova? Asin kun iyan an ugale niato, aakoon daw nia an mga atang nin pag-omaw gikan sa satong mga ngabil?

11. Siisay an nangorognang kaipuhan na magmaan?

¹¹ Kun dapit sa mga igwa nin pribilehio na magtokdo kan Tataramon nin Dios sa kongregasyon ngonyan, an Malaquias 2:7 maninigong magserbing patanid. Iyan nagsasabi na an saindang mga ngabil “kaipuhan na magsaray kan kaaraman, asin an ley iyo an kaipuhan na hanapon kan banwaan” hale sa saindang ngoso. May magabat na paninimbagan an siring na mga paratokdo, ta an Santiago 3:1 nagsasabi na sinda “magkakamit nin orog kagabat na paghokom.” Minsan ngani maninigo sindang magtokdo na may kaigotan asin entusiasmo, an saindang tokdo dapat na marigon na napapasikad sa nasusurat na Tataramon nin Dios asin sa instruksion na itinatao paagi sa organisasyon ni Jehova. Sa paaging iyan sinda magigin “biyong kualipikado na magtokdo sa iba.” Sa siring, sinda sinasadol: “Gibohon mo an bilog mong makakaya tanganing ikaatubang mo an saimong sadiri na inooyonan nin Dios, sarong paragibo na mayo nin maninigong ikasupog, na ginagamit an tataramon kan katotoohan sa tamang paagi.”​—2 Timoteo 2:​2, 15.

12. An mga nagtotokdo kaipuhan na gumibo nin anong pag-iingat?

¹² Kun bako kitang maingat, puede kitang masugotan na isaliot sa satong pagtotokdo an personal na mga gusto o opinyon. Nangorognang delikado iyan sa sarong tawo na may tendensiang magin kompiado sa saiyang sadiring mga konklusyon dawa kun an mga ini sarongat sa itinotokdo kan organisasyon ni Jehova. Alagad an Malaquias kapitulo 2 nagpapaheling na maninigo niatong asahan na an mga paratokdo sa kongregasyon mangangapot sa kaaraman na gikan sa Dios asin bakong sa personal na mga ideya, na puedeng makasingkog sa mga karnero. Si Jesus nagsabi: “An siisay man na magpasingkog sa saro kan mga saradit na ini na nagtubod sako, marahay pa saiya na gakodan an saiyang liog nin gapong gilingan na arog kan iniitok nin asno asin lamoson sa mahiwas na dagat.”​—Mateo 18:6.

 Pag-agom nin Sarong Daing Pagtubod

13, 14. Ano an sarong pagtraydor na itinampok ni Malaquias?

¹³ Poon sa bersikulo 10, an katraydoran mas direkta pa nganing itinatampok kan Malaquias kapitulo 2. Si Malaquias nakaturuhok sa duwang magkakonektadong paggawe na paorootro niang ginagamitan kan tataramon na ‘may katraydoran.’ Enot, helinga na iiniintrodusir ni Malaquias an saiyang hatol paagi sa mga hapot na ini: “Bako daw na kita gabos saro sana an ama? Bako daw na saro sanang Dios an naglalang sa sato? Tadaw ta nagtitrinaydoran kita, sa paglanghad sa tipan kan satong mga apoon?” Dangan idinagdag kan bersikulo 11 na an pagtraydor kan Israel paglanghad sa “kabanalan ni Jehova.” Ano an ginigibo ninda na seryosong marhay? Sinasabi kan bersikulong iyan an saro kan salang mga gibo: “Sinadiri [ninda] bilang nobya an aking babae nin sarong dios nin ibang nasyon.”

¹⁴ Sa ibang pagtaram, an nagkapirang Israelita, na kabilang sa sarong nasyon na nagdusay ki Jehova, nag-agom nin mga dai nagsasamba sa saiya. Tinatabangan kita kan konteksto na masabotan kun taano ta seryosong marhay iyan. An bersikulo 10 nagsasabi na saro sana an saindang ama. Bako ining si Jacob (na an ngaran sinalidahan nin Israel) o si Abraham o dawa si Adan. An Malaquias 1:6 nagpapaheling na si Jehova an ‘sarong ama.’ An nasyon nin Israel igwa nin relasyon sa saiya, partisipante sinda sa pakipagtipan sa saindang mga apoon. An saro sa mga ley na nasa tipan na iyan iyo an: “Dai ka makipagbalae sa sainda. Dai mo ipagtao an saimong aking babae sa saiyang aking lalaki, asin dai mo pagkuanon an saiyang aking babae para sa saimong aking lalaki.”​—Deuteronomio 7:3.

15. (a) Paano tibaad hingoahon nin nagkapira na ipangatanosan an pag-agom nin daing pagtubod? (b) Ano an sinasabi ni Jehova kun dapit sa pag-agom?

¹⁵ An nagkapira ngonyan tibaad magrason: ‘Si nagugustohan ko marahayon man an ugale. Pag-abot nin panahon, posibleng marhay na aakoon man nia an tunay na pagsamba.’ Pinatutunayan kan siring na kaisipan an ipinasabong na patanid: “Madaya an puso nin labi sa ano pa man na bagay asin desesperado.” (Jeremias 17:9) An pagmansay nin Dios sa pag-agom nin daing pagtubod ipinahahayag sa Malaquias 2:12: “Popohoon ni Jehova an balang saro na naggigibo kaiyan.” Sa siring, sinasadol an mga Kristiano na mag-agom ‘sana dian sa Kagurangnan.’ (1 Corinto 7:39) Sa irarom kan Kristianong areglo, an sarong may pagtubod dai ‘pinopoho’ huli sa pag-agom nin daing pagtubod. Pero, kun an daing pagtubod magdanay na daing pagtubod, ano an mangyayari sa daing pagtubod na iyan kun biglang taposon na nin Dios an sistemang ini?​—Salmo 37:​37, 38.

Pagmaltrato sa Agom

16, 17. Anong pagtraydor an ginibo nin nagkapira?

¹⁶ Dangan tinokar ni Malaquias an ikaduwang katraydoran: pagmaltrato sa agom, nangorogna paagi sa bakong makatanosan na pagdiborsio. An bersikulo 14 kan kapitulo 2 nagsasabi: “Si Jehova mismo nagpatotoo sa pag-oltanan mo asin kan agom na babae nin saimong pagkahoben, na saimo mismong trinaydor, minsan ngani sia an saimong kapadis asin an agom na babae kan saimong tipan.” Paagi sa pagtraydor sa saindang agom, pinangyari kan mga agom na lalaking Judio na ‘matahoban nin mga luha’ an altar ni Jehova. (Malaquias 2:13) An mga lalaking idto idinidiborsio an saindang agom base sa bakong lehitimong mga dahelan, na bakong tama na binabayaan an agom na babae kan saindang pagkahoben, na posibleng marhay na tanganing mag-agom nin mas hoben o babaeng pagano. Asin tinogotan iyan kan maraot na mga saserdote! Pero, an Malaquias 2:16 nagsasabi: “‘Saiyang ikinaongis an pagdidiborsio,’ sabi ni Jehova na Dios nin Israel.” Kan huri, ipinaheling ni Jesus na an inmoralidad an solamenteng basehan nin diborsio na an daing salang  agom magigin talingkas na mag-agom liwat.​—Mateo 19:9.

¹⁷ Pensara an mga tataramon ni Malaquias, asin helinga kun paano iyan nakapupukaw nin puso asin pagmate nin simpleng kabootan. Nasasambitan nia “an saimong kapadis asin an agom na babae kan saimong tipan.” An balang lalaki na imbuelto digdi may agom na kapwa parasamba, sarong babaeng Israelita, na pinili ini bilang mahal na kaibaiba, kapadis sa buhay. Minsan ngani nagkainagoman gayod sinda kan sinda hoben pa, an pag-agi nin panahon asin pagpoon na magkaedad dai ginigibong imbalido an pinagtipanan ninda, an boot sabihon, an kontrata sa kasal.

18. Sa anong mga paagi aplikado pa ngonyan an hatol ni Malaquias mapadapit sa katraydoran?

¹⁸ An hatol mapadapit sa mga isyung iyan aplikado pa man giraray ngonyan. Makasusupog na an nagkapira dai iniintindi an instruksion nin Dios dapit sa pag-agom sana dian sa Kagurangnan. Asin makamomondo man na an nagkapira dai nagpapadagos sa paghihingoa na papagdanayon na makosog an saindang relasyon mag-agom. Imbes, naggigibo sinda nin mga sarahotan asin naggigibo nin mga bagay na ikinaoongis nin Dios paagi sa bakong sono sa Kasuratan na pagdiborsio sa saindang agom tangani na mag-agom nin iba. Sa paggibo kan siring na mga bagay, ‘pinagal ninda si Jehova.’ Kaidtong panahon ni Malaquias, an mga nag-iignoro kan hatol nin Dios may kosog pa ngani nin boot na mag-isip na si Jehova bakong makatanosan sa saiyang mga pagmansay. Sa katunayan sinasabi ninda: “Haen an Dios nin hustisya?” Kanigoan karaot na kaisipan! Dai kita maholog sa siod na iyan.​—Malaquias 2:17.

19. Paano puedeng mag-ako nin espiritu nin Dios an mga agom na lalaki asin babae?

¹⁹ Sa positibong lado naman, ipinaheheling ni Malaquias na an nagkapirang agom na lalaki dai nagtatraydor sa saindang agom na babae. ‘Yaon sa sainda an natatada kan banal na espiritu nin  Dios.’ (Bersikulo 15) Nakaoogma, sa organisasyon nin Dios ngonyan kadakol nin lalaki na ‘tinatawan nin onra an saindang agom na babae.’ (1 Pedro 3:7) Dai ninda minamaltrato an saindang agom sa pisikal o berbal na paagi, dai iiniinsistir an makasusupog na seksuwal na mga gibo, asin dai ninda hinahalean nin onra an saindang agom paagi sa pakigitilan sa ibang mga babae o paagi sa pagheling nin pornograpiya. An organisasyon ni Jehova naoogma man na magkaigwa nin kadakol na fiel na Kristianang agom na maimbod sa Dios asin sa saiyang mga ley. Aram kan mga lalaki asin babaeng iyan kun ano an ikinaoongis nin Dios, asin kaoyon dian an saindang pag-isip asin paghiro. Padagos na magin arog ninda, ‘na kinukuyog an Dios bilang namamahala’ asin tinatawan nin banal na espiritu nia.​—Gibo 5:29.

20. Anong panahon an madali nang dumatong para sa bilog na katawohan?

²⁰ Dai na mahahaloy, hohokoman ni Jehova an bilog na kinaban na ini. An lambang indibiduwal kaipuhan na manimbag sa saiya para sa mga tinutubod asin iginagawe nia. “An lambang saro sa sato maninimbag sa Dios para sa saiyang sadiri.” (Roma 14:12) Kaya an nakapupukaw nin interes na hapot sa puntong ini iyo an: Siisay an makaliligtas sa aldaw ni Jehova? An ikatolo asin ultimong artikulo sa seryeng ini an matokar kan temang iyan.

Ikapaliliwanag daw Nindo?

• Huli sa anong pundamental na dahelan kinondenar ni Jehova an mga saserdote sa Israel?

• Taano ta bako man na halangkawon an mga pamantayan nin Dios tanganing masunod nin mga tawo?

• Taano ta maninigo kitang mag-ingat sa satong pagtotokdo ngonyan?

• Anong duwang gibo an nangorognang kinondenar ni Jehova?

[Mga Hapot Para sa Pag-adal]

[Ritrato sa pahina 15]

Kan panahon ni Malaquias kinondenar an mga saserdote huli sa pagsuway sa mga dalan ni Jehova

[Ritrato sa pahina 16]

Dapat kitang mag-ingat sa pagtokdo kan mga dalan ni Jehova, na dai pinalalakop an personal na mga gusto

[Mga ritrato sa pahina 18]

Kinondenar ni Jehova an mga Israelita na idinidiborsio an saindang agom na babae base sa daing saysay na mga dahelan asin nag-agom nin mga babaeng pagano

[Ritrato sa pahina 18]

Inootob kan mga Kristiano ngonyan an saindang tipan sa kasal