Hula ni Isaias—Liwanag Para sa Bilog na Katawohan I

Kasumpay kan Kapitulo Beinte-Tres: Magdanay na Nag-aantisipar ki Jehova

Karangahan sa Ibong nin Pagkondenar

14, 15. Anong pagranga an itinatao kan mga tataramon sa Isaias 30:18 sa mga nag-eerok sa Juda kan suanoy na mga panahon asin sa tunay na mga Kristiano ngonyan?

¹⁴ Mantang an nakapapepensar na mga tataramon na ini nag-aaningal pa sa mga talinga kan mga nagdadangog ki Isaias, an tono kan saiyang mensahe nagbago. An huma nin grabeng kapahamakan sinalidahan nin panugang mga bendisyon. “Kun siring si Jehova magdadanay na nag-aantisipar na pahelingan kamo nin pabor, asin kun siring sia matindog sa pagpaheling sa saindo nin pagkaherak. Huli ta si Jehova Dios nin paghokom. Maogma an gabos na nagdadanay na nag-aantisipar sa saiya.” (Isaias 30:18) Nakapakokosog nanggad sa boot na mga tataramon iyan! Si Jehova sarong maheherakon na Ama na naghihimuyawot na tabangan an saiyang mga aki. Naoogma siang marhay na magpaheling nin pagkaherak.​—Salmo 103:13; Isaias 55:7.

¹⁵ An nakapakokosog liwat sa boot na mga tataramon na ini aplikado sa Judiong natatada na naherakan na makaligtas sa pagkalaglag kan Jerusalem kan 607 B.C.E. asin sa pira sanang nagbalik sa Dagang Panuga kan 537 B.C.E. Minsan siring, an mga tataramon kan propeta nakararanga man sa mga Kristiano ngonyan. Kita pinagigirumdom na si Jehova “matindog” para sa sato, na tataposon an maraot na kinaban na ini. An fiel na mga parasamba makakokompiar na si Jehova​—na “Dios nin paghokom”​—dai totogotan an kinaban ni Satanas na lumampas pa nin sarong aldaw sa hinahagad kan hustisya. Kun siring, an mga “nagdadanay na nag-aantisipar sa saiya” dakol an dahelan na magin maogma.

Rinaranga ni Jehova an Saiyang Banwaan Paagi sa Pagsimbag sa mga Pamibi

16. Paano rinaranga ni Jehova an mga nanluluya an boot?

¹⁶ Pero an nagkapira tibaad nanluluya an boot huli ta an pagkakalda dai nag-abot sa panahon na linalaoman ninda. (Talinhaga 13:12; 2 Pedro 3:9) Makakua logod sinda nin karangahan sa sunod na mga tataramon ni Isaias, na nagtatampok nin sarong espesyal na aspekto kan personalidad ni Jehova. “Kun an mismong banwaan sa Sion mag-erok sa Jerusalem, dai ka na nanggad matangis. Totoong gayong pahehelingan ka nia nin pabor huli sa tingog kan saimong pagsuriyaw; pagkadangog nia kaiyan talagang sisimbagon ka nia.” (Isaias 30:19) Si Isaias nagpapahayag nin kapadangatan sa mga tataramon na ini paagi sa pagbago hale sa paggamit kan plural na “kamo” sa bersikulo 18 pasiring sa singular na “ka” sa bersikulo 19. Kun si Jehova nanraranga nin mga nasasakitan, tinatratar nia an balang saro bilang indibiduwal. Bilang sarong Ama, dai nia sinasabihan an sarong aki na nanluluya an boot, ‘Taano ta dai ka umarog sa tugang mo na makosog an boot?’ (Galacia 6:4) Imbes, sia naghihinanyog nin atento sa balang saro. Sa katunayan, ‘pagkadangog nia kaiyan talagang masimbag sia.’ Kanigoan kanakapakokosog liwat sa boot! An mga nanluluya an boot mapakokosog nanggad kun sinda mamimibi ki Jehova.​—Salmo 65:2.

Dangogon an Naggigiyang Tingog nin Dios Paagi sa Pagbasa kan Saiyang Tataramon

17, 18. Dawa sa masakit na mga panahon, paano si Jehova nagtatao nin giya?

¹⁷ Mantang nagpapadagos si Isaias sa saiyang pagtaram, pinagigirumdom nia sa mga nagdadangog sa saiya na madatong an kasakitan. An banwaan maako nin “tinapay sa porma nin kasakitan asin tubig sa porma nin pan-aapi.” (Isaias 30:20a) An kasakitan asin pan-aapi na maeeksperyensiahan ninda mantang sinasalikopan magigin siring kapamilyar nin tinapay asin tubig. Dawa siring, si Jehova andam na sumukoro sa mga tama an kamugtakan nin puso. “Dai na itatago kan saimong Kaharohalangkaweng Paratokdo an saiyang sadiri, asin an saimong mga mata maninigong mga mata na nakakaheling sa saimong Kaharohalangkaweng Paratokdo. Asin an saimong mga talinga makadadangog nin tataramon sa likod mo na nagsasabi: ‘Iyo ini an dalan. Maglakaw kamo dian,’ enkaso kamo pumatoo o enkaso kamo pumawala.”​—Isaias 30:20b, 21. a

 ¹⁸ Si Jehova an “Kaharohalangkaweng Paratokdo.” Dai siang kapantay bilang paratokdo. Pero paano sia ‘maheheling’ asin ‘madadangog’ kan mga tawo? Ihinayag ni Jehova an saiyang sadiri paagi sa saiyang mga propeta, na an mga tataramon nakarekord sa Biblia. (Amos 3:​6, 7) Ngonyan, kun binabasa kan fiel na mga parasamba an Biblia, garo man sana an garo sa ama na tingog nin Dios sinasabihan sinda kan dalan na dapat lakawan asin sinasadol sinda na pakarhayon giraray an saindang paggawe tanganing makalakaw dian. An balang Kristiano maninigong maghinanyog nin maingat mantang si Jehova nagtataram paagi sa mga pahina kan Biblia asin paagi sa mga publikasyon na basado sa Biblia na itinatao kan “fiel asin may diskresion na oripon.” (Mateo 24:45-47) An balang saro logod magin mahigos sa pagbasa kan Biblia, huli ta ‘iyan nangangahulogan kan saiyang buhay.’​—Deuteronomio 32:​46, 47; Isaias 48:17.

Horophoropon an mga Bendisyon sa Ngapit

19, 20. Anong mga bendisyon an nakatagama para sa mga naghihimate sa tingog kan Kaharohalangkaweng Paratokdo?

¹⁹ An mga naghihimate sa tingog kan Kaharohalangkaweng Paratokdo iwawarak an saindang kinortehan na mga imahen, na ibinibilang iyan na makababaldeng bagay. (Basahon an Isaias 30:22.) Dangan, an mga naghihimate magkakamit nin makangangalas na mga bendisyon. Ilinaladawan ini ni Isaias, siring kan nasusurat sa Isaias 30:23-26, na sarong nakaoogmang marhay na hula sa pagbabalik sa dati na enot na naotob kan an sarong Judiong natatada nagpuli hale sa pagkabihag kan 537 B.C.E. Ngonyan, an hulang ini nagtatabang sa sato na maheling an makangangalas na mga bendisyon na pangyayarihon kan Mesiyas sa espirituwal na paraiso ngonyan asin sa literal na Paraiso na madatong.

²⁰ “Itatao nia nanggad an oran para sa saimong banhi na isinasabwag mo sa daga, asin bilang bunga kan daga tinapay, na magigin mataba asin naglalanalana. An saimong ataman na mga hayop masabsab sa aldaw na iyan sa sarong mahiwas na sabsaban. Asin an mga baka asin an husto na sa edad na mga asno na nagkukultibar kan daga masabsab nin sakati na tinimplahan nin acedera, na pinahimalidan paagi sa pala asin tinidor.” (Isaias 30:​23, 24) An tinapay na “mataba asin naglalanalana”​—kakanon na masustansia​—magigin pangenot na kakanon nin tawo sa aroaldaw. An daga abundang marhay na mamumunga kaya maski mga hayop makikinabang. An ataman na mga hayop babahogon nin “sakati na tinimplahan nin acedera”​—manamit na sakati na irineserba sa bihirang mga okasyon. An kakanon na ini “pinahimalidan” pa ngani​—prosesong sa parate para sa grano na kinakakan nin tawo. Kanigoan kanakaoogmang marhay na mga detalye an iinaatubang digdi ni Isaias tangani na iladawan an kadakolan kan mga bendisyon ni Jehova sa fiel na katawohan!

21. Iladawan an pagigin kompleto kan mga bendisyon na madatong.

²¹ “Sa ibabaw nin gabos na halangkaw na bukid asin sa ibabaw nin gabos na halangkaw na bulod magkakaigwa nin sapa.” (Isaias 30:25a) b Iinaatubang ni Isaias an tamang-tamang paglaladawan na nagdodoon kan pagigin kompleto kan mga bendisyon ni Jehova. Mayo nin kakulangan nin tubig​—sarong mahalagang marhay na bagay na mabolos bako sana sa mga kababan kundi sa gabos na bukid, dawa ngani “sa ibabaw nin gabos na halangkaw na bukid asin sa ibabaw nin gabos na halangkaw na bulod.” Iyo, an gutom magigin bagay kan nakaagi. (Salmo 72:16) Dugang pa, an atension kan propeta napasiring sa mga bagay na mas halangkaw pa ngani kisa mga bukid. “An liwanag kan kabilogan nin bulan magigin siring sa liwanag kan nagsisinag na saldang; asin an liwanag mismo kan nagsisinag na saldang madodoble nin makapito, siring sa liwanag nin pitong aldaw, sa aldaw na bendahan ni Jehova an pagkalaglag kan saiyang banwaan asin bolongon dawa an grabeng lugad na resulta kan saiyang hampak.” (Isaias 30:26) Kanigoan kanakapupukaw sa boot na kulminasyon para sa pambihirang hulang ini! An kamurawayan nin Dios masirang sa lubos na kagayonan kaiyan. An mga bendisyon na nakatagama para sa fiel na mga parasamba nin Dios lalabihan nanggad​—nin makapito​—an ano man na naeksperyensiahan ninda kaidto.

Paghokom Asin Kagayagayahan

22. Kabaliktaran kan mga bendisyon na madatong para sa mga fiel, ano an itinagama ni Jehova para sa mga maraot?

²² An tono kan mensahe ni Isaias nagbago na naman. “Uya!” an sabi nia, tanganing makua an  atension kan mga nagdadangog sa saiya. “An ngaran ni Jehova nagdadangadang hale sa harayo, naglalaad sa saiyang kaanggotan asin may kaibang mahibog na panganoron. Kun manongod sa saiyang ngabil, iyan napano nin pagdenunsiar, asin an saiyang dila garo nanunumtom na kalayo.” (Isaias 30:27) Sagkod digdi, si Jehova dai nag-interbenir, na tinotogotan an mga kaiwal kan saiyang banwaan na gibohon an gusto ninda. Ngonyan sia nagrarani​—garo daing ontok na nagdadangadang na nagkikikilat asin nagdadagoldol na bagyo​—tanganing lubos na gibohon an paghokom. “An saiyang espiritu garo sarong binabahang sapang masulog na paliog an rarom, tanganing itaratabyon an mga nasyon paagi sa sarong panara nin kadaihan nin kamanungdanan; asin sarong busal na nagpapangyari sa saro na maglagawlagaw mapapasa panga kan mga banwaan.” (Isaias 30:28) An mga kaiwal kan banwaan nin Dios palilibotan kan “sarong binabahang sapang masulog,” na makosog na ‘itinataratabyon paagi sa sarong panara,’ asin rinerendahan paagi sa “sarong busal.” Sinda lalaglagon.

23. Ano an dahelan nin “paggayagaya nin puso” para sa mga Kristiano ngonyan?

²³ Nagbago na naman an tono ni Isaias mantang ilinaladawan nia an maogmang kamugtakan kan fiel na mga parasamba na pag-abot nin aldaw mapuli sa saindang daga. “Magkakaigwa kamo nin sarong awit na kaagid kan sa banggi na sinasantipikar nin saro an saiyang sadiri para sa kapiestahan, asin nin paggayagaya nin puso na kaagid kan saro na naglalakaw na may plauta tangani na lumaog sa bukid ni Jehova, sa Gapo kan Israel.” (Isaias 30:29) Naeeksperyensiahan kan tunay na mga Kristiano ngonyan an kaagid na “paggayagaya nin puso” mantang hinohorophorop ninda an paghokom sa kinaban ni Satanas; an proteksion na itinatao sa sainda ni Jehova, an “Gapo nin kaligtasan;” asin an madatong na mga bendisyon kan Kahadean.​—Salmo 95:1.

24, 25. Paano idinodoon kan hula ni Isaias an pagigin totoo kan madatong na paghokom sa Asiria?

²⁴ Pakatapos kan kapahayagan na ini nin kaogmahan, nagbalik si Isaias sa tema nin paghokom asin sinasabi kun siisay an pinupunteriya kan grabeng kaanggotan nin Dios. “Ipadadangog nanggad ni Jehova an dignidad kan saiyang tingog asin ipaheheling an pagbaba kan saiyang takyag, sa grabeng kaanggotan asin laad nin nanunumtom na kalayo asin biglang makosog na pag-oran asin bagyong maoranon patin mga gapong graniso. Huli ta sa tingog ni Jehova an Asiria pangingibabawan nin grabeng takot, hahampakon nia ngani iyan nin baston.” (Isaias 30:​30, 31) Paagi sa klarong paglaladawan na ini, idinodoon ni Isaias an pagigin totoo kan paghokom nin Dios sa Asiria. Garo man sana an Asiria nagtitindog sa atubangan nin Dios asin nagtatakig kan maheling an saiyang ‘nagbababang takyag’ nin paghokom.

²⁵ An propeta nagpapadagos: “Balang hampak kan saiyang sogkod nin pagkastigo na patatamaon ni Jehova sa Asiria sasabayan nanggad nin mga pandereta asin arpa; asin sa mga ralaban na may pagwasiwas makikilaban talaga sia tumang sa sainda. Huli ta an saiyang Tofet prineparar kaidto pa sana; iyan inandam man para sa hade mismo. Pinararom nia an tambak kaiyan. An kalayo asin kahoy abunda. An hinangos ni Jehova, siring sa sapang masulog nin asupre, naglalaad tumang dian.” (Isaias 30:​32, 33) An Tofet, sa Kababan nin Hinnom, ginagamit digdi bilang piguratibong lugar na nagkakalayo. Paagi sa pagpapaheling na duman matatapos an Asiria, idinodoon ni Isaias an bigla asin biyong pagkalaglag na mangyayari sa nasyon na iyan.​—Ikomparar an 2 Hade 23:10.

26. (a) Igwa nin anong aplikasyon sa presenteng aldaw an mga proklamasyon ni Jehova tumang sa Asiria? (b) Paano an mga Kristiano ngonyan padagos na inaantisipar si Jehova?

²⁶ Minsan ngani an mensahe nin paghokom na ini ipinanonongod tumang sa Asiria, an kahulogan kan hula ni Isaias mas harayo pa an naaabot. (Roma 15:4) Si Jehova garo man sana madatong giraray hale sa harayo tanganing bahaon, tanyogon, asin busalan an gabos na nandadaogdaog sa saiyang banwaan. (Ezequiel 38:18-23; 2 Pedro 3:7; Kapahayagan 19:11-21) Dumatong man logod tolos an aldaw na iyan! Mientras tanto, an mga Kristiano galagang naghahalat kan aldaw nin pagliligtas. Sinda napakokosog paagi sa paghorophorop sa buhay na marhay na mga tataramon na nakarekord sa Isaias kapitulo 30. An mga tataramon na ini nag-eenkaminar sa mga lingkod nin Dios na pakamahalon an pribilehio nin pamibi, magmahigos sa pag-adal kan Biblia, asin horophoropon an maabot na mga bendisyon kan Kahadean. (Salmo 42:​1, 2; Talinhaga 2:1-6; Roma 12:12) Sa siring an mga tataramon ni Isaias tinatabangan kita gabos na padagos na antisiparon si Jehova.

[Mga Nota sa Ibaba]

[Mga Hapot Para sa Pag-adal]