Kinukuenta daw Nindo an Gastos?

INALOKAN ni Jesu-Cristo an saiyang mga disipulo kan paglaom na buhay na daing katapusan, alagad sinadol man nia sinda na kuentahon an gastos nin pagigin Kristiano. Iinilustrar nia an punto paagi sa paghapot: “Siisay sa saindo na boot na magtogdok nin torre an dai nguna minatukaw asin kinukuenta an gastos, tanganing helingon kun igwa sia nin igo tanganing iyan matapos?” (Lucas 14:28) Anong gastos an boot sabihon ni Jesus?

An gabos na Kristiano napapaatubang sa mga pagbalo​​—an nagkapira kaiyan magabat. (Salmo 34:19; Mateo 10:36) Kun siring, kaipuhan na magin andam kita sa mental asin espirituwal tanganing dai kita mabigla kun umabot sa sato an pagtumang o iba pang mga problema. An siring na mga angat kaipuhan na iiniba ta na sa kuenta kan gastos nin pagigin disipulo ni Cristo, sa pakaaram na an balos​​—an pakaligtas sa kasalan asin kagadanan​​—nakalalabing marhay an halaga kisa ano man na ikaaalok sa sato kan presenteng sistema. Iyo, mayong itinotogot an Dios​—minsan kagadanan​—na puedeng makadanyar sa sato nin permanente kun padagos kitang maglilingkod sa saiya.​​—2 Corinto 4:​16-​18; Filipos 3:8.

Paano puedeng magin arog kaiyan kakosog an satong pagtubod? Orog na minakosog an satong pagtubod kada magdesisyon kita nin tama, kada manindogan kita nin marigon para sa Kristianong mga prinsipyo, o kada maggibo kita nin lakdang na kaoyon kan kabotan nin Dios​—nangorogna kun ginigipit na gumibo nin sala. Kun personal niatong naeeksperyensiahan an bendisyon ni Jehova bilang resulta kan satong fiel na gawe, napakokosog asin naparararom an satong pagtubod. Sa paaging iyan, sinusunod niato an halimbawa ni Jesus, kan saiyang enot na mga disipulo, asin kan gabos na lalaki asin babaeng may pagtubod na sa bilog na nag-aging mga panahon tamang ‘kinuenta an gastos’ sa paglilingkod sa Dios.​​—Marcos 1:​16-​20; Hebreo 11:​4, 7, 17, 24, 25, 32-​38.