Kun Paano Mahahale an mga Kabiadian

IMAHINARA na an mata kan mga buta nakakaheling na, an talinga kan mga bungog nakakadangog na kan gabos na tanog, an dila kan mga pula nag-aawit na may kagayagayahan, asin an bitis kan mga pilay nagigin pusog na asin nakakalakawlakaw na! An pinag-oolayan niato digdi, bakong manongod sa mga progreso sa siensia medikal, kundi manongod sa mga resulta kan pag-interbenir mismo nin Dios para sa katawohan. An Biblia naghuhula: “Sa panahon na iyan an mga mata kan mga buta magkakaburuklat, asin an mismong mga talinga kan mga bungog magkakaburukasan. Sa panahon na iyan an pilay matukad na garo lalaking usa, asin an dila kan pula makurahaw sa kaogmahan.” (Isaias 35:​5, 6) Alagad paano niato masesegurado na maootob an makangangalas nanggad na hulang ini?

Primero, kan si Jesu-Cristo yaon pa sa daga, talagang pinaomayan nia an mga tawo sa gabos na klase nin helang asin kabiadian. Apuera kaini, an kadaklan kan saiyang mga milagro naheling nin dakol na saksi​​—dawa kan saiyang mga enemigo. Sa katunayan, sa kisuerra sarong pangyayari, inimbestigaran na marhay kan mapagdudang mga nagkokontra an sarong pagpaomay tanganing pakaraoton si Jesus. Alagad sa pagkapasupog na marhay ninda, kinompirmar sana ninda an saiyang milagro. (Juan 9:​1, 5-34) Pagkatapos na gumibo si Jesus nin saro pang dai manenegaran na milagro, desganadong sinabi ninda: “Ano an satong gigibohon, huli ta an tawong ini naggigibo nin dakol na tanda?” (Juan 11:47) Minsan siring, an ordinaryong mga tawo bakong siring kaiyan kaindiperente, huli ta dakol an nagpoon na tumubod ki Jesus.​—Juan 2:23; 10:​41, 42; 12:9-11.

An mga Milagro ni Jesus—Sarong Preliminaryong Paheling nin Lakop sa Globong Pagpapaomay

An mga milagro ni Jesus bako sanang nagpatunay na si Jesus an Mesiyas asin an Aki nin Dios. Nagtao iyan nin basehan para sa pagtubod sa mga panuga kan Biblia na an makinuyog na katawohan maoomayan sa ngapit. Kaiba sa mga panugang ini an hula sa Isaias kapitulo 35, na nasambitan sa enot na parapo. An Isaias 33:24 nagsasabi may labot sa salud sa ngapit kan matatakton sa Dios na mga tawo: “Mayo nin nag-eerok na masabi: ‘Naghehelang ako.’” Kaagid kaiyan, an Kapahayagan 21:4 nanunuga: “Papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagsuriyaw ni kolog. An enot na mga bagay [mga kasakitan asin pagdusa ngonyan] nakalihis na.”

 An mga tawo regular na namimibi na maotob logod an mga hulang ini kun inootro ninda an modelong pamibi ni Jesus, na sa sarong kabtang nagsasabi: “Dumatong logod an kahadean mo. Gibohon logod an boot mo digdi sa daga, nin siring sa langit.” (Mateo 6:​10, King James Version) Iyo, kaiba sa kabotan nin Dios an daga asin katawohan. An helang asin mga kabiadian, minsan ngani itinogot na may dahelan, mawawara na sa dai na mahahaloy; dai na kaiyan pakakanoson an “tongtongan” nin Dios sagkod lamang.​—Isaias 66:1. a

Pinaomayan na Daing Kolog o Gastos

Ano man an helang kan mga tawo, pinaomayan sinda ni Jesus na daing kolog, daing pag-atraso, asin daing gastos. Dai malilikayan, an baretang ini marikason na naglakop, asin dai nahaloy “nagdorolok sa saiya an darakulang kadaklan, na may darang mga pilay, kimay, buta, pula, asin dakol pang iba, asin haros iinapon ninda sinda sa saiyang pamitisan, asin pinaomayan nia sinda.” Ano an nagin reaksion kan mga tawo? An pagkasaysay ni Mateo na nakaheling mismo nagpapadagos: “An kadaklan nagngaralas kan maheling ninda na an pula nagtataram asin an pilay naglalakaw patin an buta nakakaheling, asin pinamuraway ninda an Dios nin Israel.”​—Mateo 15:​30, 31.

Mangnohon na an mga pinaomayan ni Jesus dai maingat na pinili sa kadaklan​​—sarong panloloko na ginigibo nin mga impostor. Imbes, an dakol na paryente asin katood kan mga may kamatean ‘haros iinapon sinda sa pamitisan ni Jesus, asin pinaomayan nia sinda.’ Repasohon niato ngonyan an nagkapirang espesipikong halimbawa kan abilidad ni Jesus na magpaomay.

Pagkabuta: Kan yaon sa Jerusalem, pinangyari ni Jesus na makaheling an sarong lalaki na dating “buta poon kan mamundag.” An lalaking ini midbid na marhay sa siudad bilang butang parapakilimos. Kaya maiimahinar nindo an pagkariribok kan maheling sia kan mga tawo na naglalakawlakaw asin nakakaheling! Pero, bakong gabos naogma. Nakolgan an boot huli sa naenot na pagbuyagyag ni Jesus kan saindang karatan, an nagkapirang miembro nin sarong prominente asin maimpluwensiang Judiong sekta na inaapod Fariseo naghingoang marhay na hanapan si Jesus nin ebidensia nin panloloko. (Juan 8:​13, 42-44; 9:​1, 6-31) Huli kaini, inusisa ninda an naomayan na lalaki, dangan an saiyang mga magurang, asin dangan an lalaki giraray. Alagad nakompirmar sana kan imbestigasyon kan mga Fariseo an milagro ni Jesus, na lalong nakapaanggot sa sainda. Napangalas sa karatan kan relihiosong mga ipokritong ini, an naomayan na lalaki nagsabi mismo: “Poon pa kan suanoy dai pa noarin man nadangog na an siisay man nakapabuklat sa mata nin saro na namundag na buta. Kun an tawong ini bakong gikan sa Dios, mayo sia nin ano man na magigibo.” (Juan 9:​32, 33) Huli sa onesto asin madonong na pagpahayag nin pagtubod, “sia pinalayas” kan mga Fariseo, na nagpaparisa na pinahale ninda sa sinagoga an dating butang lalaki.​—Juan 9:​22, 34.

Pagkabungog: Mantang si Jesus yaon sa Decapolis, sarong rehion sa sirangan kan Salog nin Jordan, ‘dinara sa saiya kan mga tawo duman an sarong lalaking bungog asin may depekto sa pagtaram.’ (Marcos 7:​31, 32) Bako sanang pinaomayan ni Jesus an tawong ini kundi ihinayag man nia an hararom na pakarorop sa saboot kan bungog, na tibaad nasusupog sa matawong lugar. Sinasabi sa sato kan Biblia na an bungog na lalaki ‘isinuhay ni Jesus sa kadaklan sa pribado’ asin pinaomayan sia. Sa giraray, an mga nakaheling mismo ‘nagngaralas sa pambihirang marhay na paagi,’ na nagsasabi: “Marahay an pagkagibo nia sa gabos na bagay. Ginigibo pa ngani niang makadangog an mga bungog asin makataram an dai nakatataram.”​—Marcos 7:33-37.

Paralisis: Mantang si Jesus yaon sa Capernaum, dinolok sia kan mga tawo dara an sarong paralisadong lalaki na nakahigda sa hamak. (Mateo 9:2) Isinasaysay kan bersikulo 6 sagkod 8 an nangyari. “Sinabihan [ni Jesus] an lopog: ‘Buhat, kuana an saimong hamak, asin paduman sa saimong harong.’ Asin sia nagbuhat asin napaduman sa saiyang harong. Kan maheling ini an mga kadaklan nagkatirikbahan, asin sinda nagpamuraway sa Dios, na nagtao nin siring na kapangyarihan sa mga tawo.” Ginibo man an milagrong ini sa presensia kan mga disipulo ni Jesus sagkod kan saiyang mga enemigo. Mangnohon na an mga disipulo ni Jesus, na dai nabubuta nin pagkaongis asin daing binabasaran na pagkaanggot, “nagpamuraway sa Dios” sa naheling ninda mismo.

 Helang: “May nagdolok man [ki Jesus] na sarong leproso, na nakikimaherak sa saiya na nakaluhod pa ngani, na an sabi sa saiya: ‘Kun boot mo sana, mapalilinig mo ako.’ Huli kaiyan sia naherak, asin inunat nia an saiyang takyag asin dinootan sia, asin sinabi sa saiya: ‘Boot ko. Luminig ka.’ Asin an lepra tolos na nahale sa saiya.” (Marcos 1:40-42) Mangnohon niato na dai napipiritan sana si Jesus kan paomayan nia an tawong ini kundi huli sa tunay na pakikidamay. Isip-isipa kun kamo sarong daoton. Ano an mamamatean nindo kun tolos-tolos asin daing kolog kamong pinaomayan sa sarong helang na nakatatakot na gradwal na rinaraot an saindong hawak asin dahel kaiyan isinisikwal kamo sa sosyedad? Daing duda na nasasabotan nindo kun taano ta an saro pang daoton na milagrosong pinaomayan “luminaob sa pamitisan ni Jesus, na nagpapasalamat sa saiya.”​—Lucas 17:12-16.

Pagkaerido: An huring milagro ni Jesus bago sia arestaron asin ipako sa harigi sarong gibo nin pagpaomay. Sa ragap na paghiro tumang sa mga maarestar ki Jesus, si apostol Pedro, “mantang sia may espada, hinugkot iyan asin tinigbas an oripon kan halangkaw na saserdote patin pinalong an saiyang toong talinga.” (Juan 18:3-5, 10) An kaagid na pagkasaysay sa Lucas nagsasabi sa sato na “dinuotan [ni Jesus] an talinga asin pinaomayan sia.” (Lucas 22:​50, 51) Sa giraray, an maheherakon na aksion na ini ginibo na naheheling kan mga katood ni Jesus siring man kan saiyang mga enemigo​—na sa pangyayaring ini, an mga duminakop sa saiya.

Iyo, mantang orog niatong sinisiyasat an mga milagro ni Jesus, mas namamansayan niato an nagpapamidbid na mga tanda nin pagkamasasarigan. (2 Timoteo 3:16) Asin arog kan mas naenot na nasambitan, an arog kaiyan na pag-adal maninigong magpakosog sa satong pagtubod sa panuga nin Dios na paomayan an makinuyog na mga tawo. Tinatawan nin kahulogan kan Biblia an Kristianong pagtubod na “an siertong paghalat sa mga bagay na linalaoman, an hayag na pagpapaheling kan mga katunayan minsan dai naheheling.” (Hebreo 11:1) Malinaw nanggad, an ineenkaminar nin Dios, bakong an basta na sana maniwala o magmawot sa boot, kundi an masarig na pagtubod basado sa ebidensia. (1 Juan 4:1) Mantang nagkakaigwa kita kan siring na pagtubod, nagigin kitang mas makosog, mas marahay an salud, asin mas maogma sa espirituwal.​—Mateo 5:3; Roma 10:17.

An Espirituwal na Pagpapaomay Kaipuhan na Maenot Nguna!

Dakol na tawo na marahay an salud sa pisikal an bakong maogma. An nagkapira nagpoprobar pa nganing maghugot huli ta mayo sindang paglaom para sa ngapit o huli ta sinda nagagabatan na sa mga problema. Garo man sana sinda mga biadi sa espirituwal​​—mas seryosong marhay na kamugtakan sa pagheling nin Dios kisa pisikal na kabiadian. (Juan 9:41) Sa ibong na lado, dakol na biadi sa pisikal, arog ni Christian asin Junior na nasambitan sa naenot na artikulo, an igwa nin maogma, nakakokontentong buhay. Taano? Huli ta marahay an espirituwal na salud ninda asin pinakokosog kan seguradong paglaom na basado sa Biblia.

Sinasambit an satong daing kaparehong pangangaipo bilang mga tawo, si Jesus nagsabi: “An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.” (Mateo 4:4) Iyo, bakong arog kan linalang na mga hayop, bako sanang materyal na kakanon an kaipuhan nin mga tawo. Huling linalang sa “ladawan” nin Dios, kaipuhan niato an espirituwal na kakanon​​—an kaaraman dapit sa Dios asin kun ano an kabtang niato sa saiyang katuyohan saka an paggibo kan saiyang kabotan. (Genesis 1:27; Juan 4:34) An kaaraman dapit sa Dios nagtatao nin katuyohan asin espirituwal na bagsik sa satong buhay. Iyan man an basehan para sa buhay na daing sagkod sa sarong paraisong daga. “Ini nangangahulogan nin buhay na daing katapusan,” an sabi ni Jesus, “an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.”​—Juan 17:3.

Mahalagang mangnohon na dai inapod si Jesus kan mga katemporanyo nia na “Parabolong” kundi “Paratokdo.” (Lucas 3:12; 7:40) Taano? Huli ta itinokdo ni Jesus sa mga tawo an manongod sa permanenteng solusyon sa mga problema nin katawohan​​—an Kahadean nin Dios. (Lucas 4:43; Juan 6:​26, 27) An langitnon na gobyernong ini sa kamot ni Jesu-Cristo mamamahala sa bilog na daga asin ootobon an gabos na panuga sa Biblia may labot sa lubos asin nagdadanay na pagparahay sa matanos na mga tawo asin sa saindang erokan na daga. (Kapahayagan 11:15) Iyan an dahelan na ikinonektar ni Jesus, sa saiyang modelong pamibi, an pag-abot kan Kahadean sa paggibo kan kabotan nin Dios sa daga.​—Mateo 6:10.

Para sa dakol na biading indibiduwal, an pakanood  sa nakaiinspirar na paglaom na ini an nagin dahelan na an saindang mga luha nin kamondoan nagin mga luha nin kagayagayahan. (Lucas 6:21) Sa katunayan, an gigibohon nin Dios orog pa sa paghale sana sa helang asin kabiadian; paparaon nia an pinakadahelan kan pagdusa nin tawo​​—an kasalan mismo. Sa katunayan, an Isaias 33:24 asin Mateo 9:2-7, na mas naenot na kinotar, ikinokonektar an helang sa satong makasalan na kamugtakan. (Roma 5:12) Huli kaini, kun nadaog na an kasalan, sa katapustapusi makakamit kan katawohan an “mamuraway na katalingkasan kan mga aki nin Dios,” sarong katalingkasan na kaiba an sangkap na isip asin hawak.​—Roma 8:21.

An mga medyo may marahay na salud pasil na ipasipara sana an saindang kamugtakan. Alagad bakong arog kaiyan an kamugtakan kan mga nag-aagi nin makolog na eksperyensia nin pagkabiadi. Aram ninda kun gurano kahalaga kan salud asin buhay patin kun paanong puedeng mabago nin bigla asin dai inaasahan an mga situwasyon. (Eclesiastes 9:11) Huli kaini, naglalaom kami na an mga biadi na parabasa niamo espesyal na eestudyaran an makangangalas na mga panuga nin Dios na nakarekord sa Biblia. Itinao ni Jesus an saiyang buhay tanganing seguradohon an kaotoban kaiyan. Ano pang mas marahay na garantiya an hahanapon ta?​—Mateo 8:​16, 17; Juan 3:16.

[Nota sa Ibaba]