Mga Hapot Hale sa mga Parabasa

Kan maheling ni Juan an “dakulang kadaklan” na nagtatao nin sagradong paglilingkod sa templo ni Jehova, saen na parte kan templo ginigibo ninda ini?—Kapahayagan 7:9-15.

Makatanosan na sabihon na an dakulang kadaklan nagsasamba ki Jehova sa saro kan daganon na mga patyo kan saiyang dakulang espirituwal na templo, partikularmente sa saro na katimbang kan patyong nasa luwas kan templo ni Salomon.

Kan nakaaging mga panahon, ipinamumugtak na an dakulang kadaklan iyo an espirituwal na katimbang, o sarong antitipo, kan Patyo kan mga Hentil na nag-eksister kan kaaldawan ni Jesus. Minsan siring, an dugang pang pagsiyasat naghayag nin kisuerra limang dahelan kun taano ta bakong siring. Enot, bakong gabos na kabtang kan templo ni Herodes igwa nin antitipo sa dakulang espirituwal na templo ni Jehova. Halimbawa, an templo ni Herodes igwa nin Patyo kan mga Babae asin nin Patyo kan Israel. An mga lalaki sagkod babae pareho puedeng lumaog sa Patyo kan mga Babae, alagad mga lalaki sana an tinogotan na lumaog sa Patyo kan Israel. Sa daganon na mga patyo kan dakulang espirituwal na templo ni Jehova, an mga lalaki asin babae dai sineseparar sa saindang pagsamba. (Galacia 3:​28, 29) Huli kaini, mayo nin katimbang an Patyo kan mga Babae asin an Patyo kan Israel sa espirituwal na templo.

Ikaduwa, mayong Patyo kan mga Hentil sa itinao nin Dios na arkitektural na mga plano kan templo ni Salomon o kan templo sa bisyon ni Ezequiel; ni sa templo na itinogdok liwat ni Zorobabel. Huli kaini, mayo nin dahelan na magkonklusyon na an Patyo kan mga Hentil kaipuhan na may espirituwal na katimbang sa areglo kan dakulang espirituwal na templo ni Jehova para sa pagsamba, nangorogna kun kokonsideraron an minasunod na punto.

Ikatolo, an Patyo kan mga Hentil itinogdok ni Hadeng Herodes na Edomita tanganing pamurawayon an saiyang sadiri asin makua an pag-oyon kan Roma. Pinonan ni Herodes na hirahayon an templo ni Zorobabel tibaad kaidtong 18 o 17 B.C.E. An The Anchor Bible Dictionary nagpapaliwanag: “An klasikong hilig kan imperyal na kapangyarihan duman sa Solnopan [Roma] . . . naghagad nin sarong templo na mas dakula kisa kan sa kaagid na mga siudad sa sirangan.” Minsan siring, an sokol kan templo mismo naestablisar na. An diksionaryo nagpapaliwanag: “Minsan ngani an Templo mismo kaipuhan na magkaigwa kan kaparehong sokol kan sa mga sinundan kaiyan [an ki Salomon asin Zorobabel], an Patongtongan kan Templo dai linimitaran sa potensial na sokol kaiyan.” Huli kaini, pinahiwas ni Herodes an lugar kan templo paagi sa pagdagdag kan inapod sa modernong panahon na Patyo kan mga Hentil. Taano ta magkakaigwa nin antitipo sa areglo kan espirituwal na templo ni Jehova an pagtogdok na igwa kan siring na kasaysayan?

Ikaapat, haros gabos​—an buta, an pilay, asin bakong turi na mga Hentil​—puedeng lumaog sa Patyo kan mga Hentil. (Mateo 21:​14, 15) Totoo, an patyo nakatabang sa dakol na bakong turi na Hentil na nagmawot na tumao nin dolot sa Dios. Asin duman kaidto may beses na kinaolay ni Jesus an mga kadaklan asin duwang beses na pinahale an mga pararibay nin kuarta asin negosyante, na sinasabi na linapastangan ninda an harong kan saiyang Ama. (Mateo 21:​12, 13; Juan 2:​14-​16) Pero, an The Jewish Encyclopedia nagsasabi: “An patyong ini na nasa luwas, sa estriktong pagtaram, bakong kabtang kan Templo. An daga kaiyan bakong sagrado, asin puede iyan na laogon nin siisay man.”

Ikalima, an Griegong tataramon (hi·e·ron’) na trinadusir na “templo” na ginagamit para sa Patyo kan mga Hentil “nanonongod sa enterong pasilidad, imbes na espesipikong sa edipisyo kan Templo mismo,” an sabi kan A Handbook on the Gospel  of Matthew, ni Barclay M. Newman asin Philip C. Stine. Sa kabaliktaran, mas espesipiko an Griegong tataramon (na·os’) na trinadusir na “templo” sa bisyon ni Juan kan dakulang kadaklan. Sa konteksto kan templo sa Jerusalem, iyan parateng nanonongod sa Banal kan mga Banal, sa edipisyo kan templo, o sa mga patyo kan templo. Kun beses tinatradusir man iyan na “santuaryo.”​​—Mateo 27:​5, 51; Lucas 1:​9, 21; Juan 2:20.

An mga miembro kan dakulang kadaklan naggigibo nin pagtubod sa atang na pantubos ni Jesus. Sinda malinig sa espirituwal, huling “hinugasan ninda an saindang mga gubing asin pinaputi iyan sa dugo kan Kordero.” Huli kaini, sinda ipinahayag na matanos sa katuyohan na magin mga katood nin Dios asin makaligtas sa dakulang kahorasaan. (Santiago 2:​23, 25) Sa dakol na paagi, arog sinda kan mga proselito sa Israel na nagsunod sa tipan nin Ley asin nagsamba kaiba kan mga Israelita.

Siempre, an mga proselitong idto dai naglingkod sa patyong nasa laog, na duman ginigibo kan mga saserdote an saindang mga katongdan. Asin an mga miembro kan dakulang kadaklan mayo sa patyong nasa laog kan dakulang espirituwal na templo ni Jehova, na an patyong iyan nagrerepresentar sa kamugtakan nin sangkap, matanos na pagigin aki nin tawo kan mga miembro kan “banal na kabilogan na grupo nin mga saserdote” ni Jehova mantang sinda yaon pa sa daga. (1 Pedro 2:5) Alagad arog kan sinabi kan langitnon na magurang ki Juan, an dakulang kadaklan talagang nasa templo, bakong nasa luwas kan lugar kan templo na arog kan espirituwal na Patyo kan mga Hentil. Abaang pribilehio iyan! Asin itinatampok nanggad kaiyan an pangangaipo na papagdanayon kan lambang saro an espirituwal asin moral na kadalisayan sa gabos na panahon!

[Diagram/Ritrato sa pahina 31]

(Para sa aktuwal na format, hilingon an publikasyon)

Templo ni Salomon

1. Edipisyo kan Templo

2. Patyong Nasa Laog

3. Patyong Nasa Luwas

4. Hagyan Pasiring sa Patyo kan Templo