Siisay an Makaliligtas sa Aldaw ni Jehova?

“An aldaw madatong na naglalaad siring sa horno.”—MALAQUIAS 4:1.

1. Paano ilinaladawan ni Malaquias an katapusan kan maraot na sistemang ini?

 PINASABNGAN nin Dios si propeta Malaquias na isurat an mga hula na may makangingirhat na mga pangyayari na maootob sa haranihon nang ngapit. An mga pangyayaring ini makakaapektar sa lambang tawo sa daga. An Malaquias 4:1 naghuhula: “‘Uya! an aldaw madatong na naglalaad siring sa horno, asin an gabos na pangahas asin an gabos na naggigibo nin maraot magigin siring sa pinaggapasan. Asin tutumtomon nanggad sinda kan aldaw na minadatong,’ an sabi ni Jehova nin mga hukbo, ‘kaya dai sinda kaiyan tatadaan nin gamot o sanga man.’” Magigin gurano kalubos an paglaglag sa maraot na sistemang ini nin mga bagay? Iyan magigin siring sa kahoy na rinaot an mga ugat tanganing dai na iyan noarin man tumubo liwat.

2. Paano ilinaladawan nin nagkapirang teksto an aldaw ni Jehova?

² Tibaad ihapot nindo, ‘Anong “aldaw” an ihinuhula ni propeta Malaquias?’ Iyan man sana an aldaw na sinambit sa Isaias 13:​9, na nagsasabi: “Uya! An aldaw ni Jehova madatong, na maisog kapwa sa kabangisan asin sa naglalaad na kaanggotan, tanganing gibohon an daga na bagay na pinagngangalasan, asin tanganing paraon kaiyan an mga parakasala sa daga.” Itinatao kan Sofonias 1:15 an paglaladawan na ini: “An aldaw na iyan aldaw nin kabangisan, aldaw nin kasakitan asin nin panangis, aldaw nin bagyo asin nin panggaba, aldaw nin kadikloman asin nin paglumlom, aldaw nin pagdagom asin nin pagdiklom.”

“An Dakulang Kahorasaan”

3. Ano “an aldaw ni Jehova”?

³ Sa pangenot na kaotoban kan hula ni Malaquias, “an aldaw ni Jehova” sarong lawig nin panahon na igwa nin “dakulang kahorasaan.” Ihinula ni Jesus: “Dangan magkakaigwa nin dakulang kahorasaan na dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray.” (Mateo 24:21) Isip-isipa an kasakitan na inagihan na kan kinaban, nangorogna poon kan 1914. (Mateo 24:7-12) Tara, an Guerra Mundial II sana guminadan nin labing 50  milyones! Pero, an siring na kariribokan magigin saditon na marhay kun ikokomparar sa mga kalamidad na mangyayari sa “dakulang kahorasaan.” An pangyayaring iyan, kapareho kan aldaw ni Jehova, matatapos sa Armagedon, na iyo an matapos kan huring mga aldaw kan maraot na sistemang ini.​—2 Timoteo 3:1-5, 13; Kapahayagan 7:14; 16:​14, 16.

4. Pagnatapos na an aldaw ni Jehova, ano na an nangyari?

⁴ Sa katapusan kan aldaw na iyan ni Jehova, an kinaban ni Satanas asin an mga suportador kaiyan napoho na. Maeenot an gabos na falsong relihion. Dangan an paghokom ni Jehova ipapahayag tumang sa komersial asin politikal na sistema ni Satanas. (Kapahayagan 17:12-14; 19:​17, 18) Ihinuhula ni Ezequiel: “Sa mga lansangan iaapon ninda an sainda mismong pirak, asin an saindang sadiring bulawan magigin makasusurang nin makuring bagay. An saindang pirak o an saindang bulawan dai makapagliligtas sa sainda sa aldaw kan kabangisan ni Jehova.” (Ezequiel 7:19) Mapadapit sa aldaw na iyan an Sofonias 1:14 nagsasabi: “An dakulang aldaw ni Jehova harani na. Iyan harani na, asin igwa nin paghihidale na gayo kaiyan.” Nin huli sa sinasabi kan Biblia manongod sa aldaw ni Jehova, maninigo kitang magin determinado na humiro kaoyon kan matanos na mga kahagadan nin Dios.

5. Ano an naeeksperyensiahan kan mga natatakot sa ngaran ni Jehova?

⁵ Pakatapos na ihula kun ano an gigibohon kan aldaw ni Jehova sa kinaban ni Satanas, isinurat sa Malaquias 4:2 an sinasabi ni Jehova: “Sa saindo na mga natatakot sa sakuyang ngaran masirang nanggad an saldang nin katanosan, na may pagpaomay sa mga pakpak kaiyan; asin kamo maruluwas asin sisikaran an daga siring sa pinatabang mga ogbon na baka.” “An saldang nin katanosan” iyo si Jesu-Cristo. Sia an espirituwal na “ilaw kan kinaban.” (Juan 8:12) Si Jesus minasirang na may pagpaomay, an enot espirituwal na pagpaomay, na naeeksperyensiahan na niato ngonyan, dangan lubos na pagpaomay sa pisikal sa bagong kinaban. Siring kan sabi ni Jehova, an mga pinaomayan “maruluwas asin sisikaran an daga siring sa pinatabang mga ogbon na baka” na ogmahon na marhay na makaluwas sa pagkakalaom.

6. Anong selebrasyon sa kapangganahan an pakikikabtangan kan mga lingkod ni Jehova?

⁶ Kumusta man an mga nag-iignoro sa mga kahagadan ni Jehova? An Malaquias 4:3 nagsasabi: “‘Babatayan nanggad nindo [mga lingkod nin Dios] an mga maraot, huli ta sinda magigin siring sa alpog sa irarom kan dapan kan saindong mga bitis sa aldaw kan sakuyang paghiro,’ an sabi ni Jehova nin mga hukbo.” An mga tawong nagsasamba sa Dios dai makikikabtang sa paglaglag sa kinaban ni Satanas. Imbes, piguratibo nindang ‘binabatayan an mga maraot’ paagi sa pakikikabtang sa selebrasyon sa kapangganahan na gigibohon kasunod kan aldaw ni Jehova. Sarong dakulang selebrasyon an ginibo kasunod kan paglaglag sa mga hukbo ni Faraon sa Dagat na Pula. (Exodo 15:1-21) An pagpara ki Satanas asin sa saiyang kinaban sa dakulang kahorasaan susundan man nin sarong selebrasyon sa kapangganahan. An fiel na mga makaliligtas sa aldaw ni Jehova makurahaw: “Mag-orogma asin maggayagaya kita sa pagliligtas nia.” (Isaias 25:9) Magkakaigwa nanggad nin labi-labing kagayagayahan kun mabindikar na an soberaniya ni Jehova asin malinigan na an daga bilang sarong matoninong na erokan!

Inaarog kan Kakristianohan an Israel

7, 8. Iladawan an espirituwal na kamugtakan sa Israel kan panahon ni Malaquias.

⁷ An mga nagkakaigwa nin may pabor na kamugtakan sa atubangan ni Jehova iyo an mga naglilingkod sa saiya, na kabaliktaran kan mga dai. Iyan man an situwasyon kan isurat ni Malaquias an saiyang libro. Kan 537 B.C.E., sarong natatada kan Israel an ibinalik pakalihis nin 70 taon na pagkabihag sa Babilonya. Minsan siring, kan sumunod na siglo, an ibinalik na nasyon nagpoon na maanod pasiring sa apostasiya asin karatan. Linalapastangan kan kadaklan sa banwaan an ngaran ni Jehova; iniignoro an saiyang matanos na ley; inaatian an saiyang templo paagi sa pagdara nin buta, pilay, asin may helang na mga hayop na iaatang; asin idinidiborsio an mga agom na babae kan saindang pagkabarobata.

⁸ Bilang resulta, sinabihan sinda ni Jehova: “Ako marani sa saindo para sa paghokom, asin ako magigin maliksing saksi tumang sa mga pararatak, asin tumang sa mga parasambay, asin tumang sa  mga nagsusumpa nin putik, asin tumang sa mga nandadaya sa mga tangdan nin parapatangdan, sa balo asin sa ilo, asin sa mga pinahahale an nakihihimanwa, mantang dai sinda natatakot sa sako, . . . huli ta ako si Jehova; dai ako nagliwat.” (Malaquias 3:​5, 6) Pero, nagpaabot si Jehova nin pangagda sa siisay man na matalikod sa saindang maraot na mga dalan: “Pagbalik kamo sa sako, asin ako mabalik sa saindo.”​—Malaquias 3:7.

9. Paano nagkaigwa nin enot na kaotoban an mga hula ni Malaquias?

⁹ An mga tataramon na iyan nagkaigwa man nin kaotoban kan enot na siglo C.E. Sarong natatada kan mga Judio an naglingkod ki Jehova asin nagin kabtang nin sarong bagong “nasyon” nin mga Kristiano na linahidan nin espiritu, na kan huri napabilang an mga Hentil. Alagad isinikwal si Jesus kan kadaklan kan Israel sa laman. Sinabihan kun siring ni Jesus an nasyon na iyan nin Israel: “Uya! An saindong harong pinabayaan na sa saindo.” (Mateo 23:38; 1 Corinto 16:22) Kan 70 C.E., siring kan ihinula sa Malaquias 4:​1, an “aldaw . . . na naglalaad siring sa horno” nagdatong sa Israel sa laman. Linaglag an Jerusalem asin an templo kaiyan, asin ibinareta na labing sarong milyon katawo an nagadan huli sa gutom, mga pag-inagawan nin kapangyarihan, asin mga pagsalakay kan mga hukbong Romano. Minsan siring, an mga naglingkod ki Jehova nakadulag sa kahorasaan na idto.​—Marcos 13:14-20.

10. Sa anong paagi inaarog kan kadaklan na tawo asin kan klero an Israel kan enot na siglo?

¹⁰ Inarog kan katawohan, asin partikular na kan Kakristianohan, an nasyon nin Israel kan enot na siglo. Mas suno kan mga namomoon asin kan kadaklan sa Kakristianohan an saindang relihiosong mga kredo imbes na an mga katotoohan nin Dios na itinokdo ni Jesus. An klero an nangorognang may sala. Habo nindang gamiton an ngaran ni Jehova, na hinahale pa ngani iyan sa saindang mga bersion nin Biblia. Linalapastangan ninda si Jehova paagi sa bakong sono sa Kasuratan na mga katokdoan, arog baga kan paganong mga doktrina nin daing sagkod na pagpasakit sa kalayo sa impierno, Trinidad, inmortalidad kan kalag, asin ebolusyon. Sa siring inaagawan ninda si Jehova kan maninigong kaomawan na para sa saiya, siring kan ginibo kan mga saserdote kan kaaldawan ni Malaquias.

11. Paano ipinaheheling kan mga relihion sa kinaban kun siisay an talagang pinaglilingkodan ninda?

¹¹ Kaidtong 1914, kan magpoon an huring mga aldaw, ipinaheling kan mga relihion sa kinaban na ini, na pinangengenotan kan mga naghihingakong Kristiano, kun siisay an talagang pinaglilingkodan ninda. Durante kan duwang guerra mundial, inengganyar ninda an mga miembro ninda na umentra sa guerra dahelan sa mga isyu nasyonal, minsan pa nangahulogan iyan nin paggadan sa mga karelihion ninda. Malinaw na  ipinamimidbid kan Tataramon nin Dios an mga nagkukuyog ki Jehova asin an mga dai: “An mga aki nin Dios asin an mga aki kan Diablo namimidbid sa bagay na ini: An gabos na dai naggigibo nin katanosan bakong gikan sa Dios, ni sia na dai namomoot sa saiyang tugang. Huli ta ini an mensahe na saindong nadangog poon sa kapinonan, na kita maninigong magkaminorootmootan; bakong arog ki Cain, na naggikan sa maraot asin guminadan sa saiyang tugang.”​—1 Juan 3:10-12.

Pag-otob sa Hula

12, 13. Anong mga hula an inotob kan mga lingkod nin Dios sa panahon niato?

¹² Kan matapos an Guerra Mundial I kan 1918, nasabotan kan mga lingkod ni Jehova na kinondenar na nin Dios an Kakristianohan asin an gabos na iba pang falsong relihion. Poon kaidto, ipinaabot an pangapodan sa mga tama an kamugtakan nin puso: “Lumuwas kamo sa saiya, banwaan ko, kun habo nindong makikabtang sa saiyang mga kasalan, asin kun habo nindong mag-ako nin kabtang kan saiyang mga damat. Huli ta an saiyang mga kasalan nakaabot na sagkod sa langit, asin ginirumdom na nin Dios an saiyang mga gibo nin inhustisya.” (Kapahayagan 18:​4, 5) An mga may pagmawot na maglingkod ki Jehova nagpoon na linigan sa mga gira kan falsong relihion asin pinonan na ihulit sa bilog na kinaban an maogmang bareta kan natindog nang Kahadean, sarong gibohon na dapat taposon bago an katapusan kan maraot na sistemang ini nin mga bagay.​—Mateo 24:14.

¹³ Ini tanganing otobon an hula sa Malaquias 4:​5, kun saen sinabi ni Jehova: “Uya! Isosobol ko sa saindo si Elias na propeta bago umabot an dakula asin makangingirhat na aldaw ni Jehova.” An hulang iyan nagkaigwa nin enot na kaotoban sa gibohon ni Juan na Bautisador, na ipinanganino ni Elias. Si Juan naggibo nin sarong gibohon na kapareho kan ki Elias kan binautismohan nia an mga Judio na nagsolsol sa saindang mga kasalan sa tipan nin Ley. Orog na mahalaga, si Juan an nag-andam kan dalan para sa Mesiyas. Minsan siring, an gibohon ni Juan enot na kaotoban sana kan hula ni Malaquias. Kan ipinamimidbid si Juan bilang an ikaduwang Elias, sinabi ni Jesus na magkakaigwa sa ngapit nin sarong gibohon na arog kan ki “Elias.”​—Mateo 17:​11, 12.

14. Anong mahalagang marhay na gibohon an dapat na magibo bago matapos an sistemang ini?

¹⁴ Ipinaheling kan hula ni Malaquias na an dakulang gibohon na ini ni Elias gigibohon bago “an dakula asin makangingirhat na aldaw ni Jehova.” An aldaw na iyan matatapos sa marikas nang nagdadangadang na ralaban kan dakulang aldaw nin Dios na Makakamhan sa gabos, sa Armagedon. Nangangahulogan ini na bago kan katapusan kan maraot na sistemang ini nin mga bagay asin kan pagpopoon kan Milenyal na Paghade kan langitnon na Kahadean nin Dios sa kamot kan pinatukaw na sa trono na si Jesu-Cristo, may gigibohon nguna na kapareho kan aktibidad ni Elias. Kaoyon kan hulang iyan, bago laglagon ni Jehova an maraot na sistemang ini, entusiastikong ginigibo kan grupong Elias sa presenteng panahon, na sinusuportaran kan minilyon na kapwa Kristiano na may daganon na paglaom, an pagbabalik kan dalisay na pagsamba, na pinamumuraway an ngaran ni Jehova, asin tinotokdoan kan mga katotoohan sa Biblia an mga arog-karnero.

Binebendisyonan ni Jehova an mga Lingkod Nia

15. Paano ginigirumdom ni Jehova an mga lingkod nia?

¹⁵ Binebendisyonan ni Jehova an mga naglilingkod sa saiya. An Malaquias 3:16 nagsasabi: “Sa panahon na iyan idtong mga nagkakatarakot ki Jehova nag-oorolay-olay, an lambang saro sa saiyang kaibanan, asin si Jehova padagos na nagtao nin atension asin naghinanyog. Asin an sarong libro nin girumdoman pinonan na isurat sa atubangan nia para sa mga natatakot ki Jehova asin para sa mga naghohorophorop sa saiyang ngaran.” Poon ki Abel, garo man sana isinusurat nin Dios sa sarong libro an ngaran kan mga gigirumdomon na puedeng tawan nin buhay na daing katapusan. Si Jehova nagsasabi sa mga ini: “Darahon nindo an gabos na ikasampulong kabtang sa tambobong, tanganing magkaigwa nin kakanon sa sakong harong; asin tabi baloa nindo ako sa bagay na ini . . . kun baga dai ko bukasan sa saindo an mga gaha kan kalangitan asin ulaan ko kamo nin bendisyon sagkod na mayo na nin kulang.”​—Malaquias 3:10.

16, 17. Paano binendisyonan ni Jehova an saiyang banwaan asin an saindang gibohon?

 ¹⁶ Tunay nanggad na binendisyonan ni Jehova an mga naglilingkod sa saiya. Paano? An saro iyo an nag-oorog na pakasabot sa saiyang mga katuyohan. (Talinhaga 4:18; Daniel 12:10) An saro pa iyo an pagtao sa sainda nin makangangalas na mga bunga sa saindang gibohon na paghuhulit. Dakol na tama an kamugtakan nin pusong mga tawo an uminiba na sa sainda sa tunay na pagsamba, asin sinda gabos an minakompuesto sa “sarong dakulang kadaklan . . . hale sa gabos na nasyon asin tribo asin banwaan patin tataramon, . . . asin sinda padagos na nagkukurahaw sa makosog na tingog, na nagsasabi: ‘Utang niato an kaligtasan sa satong Dios, na nagtutukaw sa trono, asin sa Kordero.’” (Kapahayagan 7:​9, 10) An dakulang kadaklan na ini nahayag sa makangangalas na paagi, asin an mga aktibong naglilingkod ki Jehova may bilang na ngonyan na labing anom na milyon sa labing 93,000 na kongregasyon sa bilog na daga!

¹⁷ An bendisyon ni Jehova naheheling man sa bagay na ipinupublikar kan Mga Saksi ni Jehova an pinakamahiwas na iwinawaras na mga publikasyon na basado sa Biblia sa bilog na kasaysayan. Sa presente, 90 milyones na kopya kan magasin na Torrengbantayan asin Awake! an iniimprenta kada bulan, An Torrengbantayan sa 144 lenguahe, an Awake! sa 87 lenguahe. An ginamit sa pag-adal sa Biblia na librong An Katotoohan na Minagiya Pasiring sa Buhay na Daing Sagkod, na ipinublikar kan 1968, ikinawaras sa labing 107 milyones na kopya sa 117 lenguahe. An Puwede Kamong Mabuhay Sagkod Lamang sa Paraiso Digdi sa Daga, na ilinuwas kan 1982, uminabot sa labing 81 milyones sa 131 lenguahe. An librong Kaaraman na Minagiya Pasiring sa Buhay na Daing Katapusan, na ilinuwas kan 1995, nakaimprenta na nin labing 85 milyones sa mga 154 lenguahe. An brosyur na Ano an Kahagadan sa Sato nin Dios?, na ipinublikar kan 1996, ikinawaras na sa 150 milyones na kopya sa 244 lenguahe sagkod sa ngonyan.

18. Taano ta nakakamtan niato an espirituwal na prosperidad sa ibong nin pagtumang?

¹⁸ An espirituwal na prosperidad na ini nakamtan sa ibong kan pinakagrabe asin halawig na  pagtumang kan kinaban ni Satanas. Ipinaheheling kaini an pagigin totoo kan Isaias 54:17: “‘An ano man na armas na gibohon tumang sa saimo dai magkakaepekto, asin an arin man na dila na tumindog tumang sa saimo sa paghokom saimong kokondenaron. Iyo ini an rogaring na panonondon kan mga lingkod ni Jehova, asin an saindang katanosan gikan sa sako,’ an sabi ni Jehova.” Nakararanga nanggad na maaraman kan mga lingkod ni Jehova na an Malaquias 3:17 pangenot nang naootob sa sainda: “‘Sinda magigin nanggad sadiri ko,’ sabi ni Jehova nin mga hukbo, ‘sa aldaw na ako naggigibo nin espesyal na rogaring.’”

Magayagayang Paglilingkod ki Jehova

19. Paano napapalaen an mga naglilingkod ki Jehova asin an mga dai?

¹⁹ An kalaenan kan fiel na mga lingkod ni Jehova asin kan mga nasa kinaban ni Satanas orog na nagigin malinaw sa pag-agi nin panahon. An Malaquias 3:18 naghula: “Maheheling nanggad giraray nindo an kalaenan kan matanos asin maraot, kan naglilingkod sa Dios asin kan dai naglingkod sa saiya.” An saro sa dakol na kalaenan iyo na an mga naglilingkod ki Jehova naggigibo kaiyan na may dakulang kagayagayahan. Kabilang sa mga dahelan kaini iyo an makangangalas na paglaom ninda. Bilog an saindang kompiansa ki Jehova kan magsabi sia: “Uya ako naglalalang nin bagong kalangitan asin sarong bagong daga; asin an dating mga bagay dai na magigirumdoman, ni masabong pa iyan sa puso. Alagad ta mag-ogma kamo, banwaan, asin maggayagaya kamo sagkod lamang sa sakong linalalang.”​—Isaias 65:​17, 18; Salmo 37:​10, 11, 29; Kapahayagan 21:​4, 5.

20. Taano ta kita sarong magayagayang banwaan?

²⁰ Nagtutubod kita sa panuga ni Jehova na an saiyang maimbod na banwaan makaliligtas sa dakulang aldaw nia asin dadarahon pasiring sa bagong kinaban. (Sofonias 2:3; Kapahayagan 7:​13, 14) Asin baga man an nagkapira nin huli sa kagurangan, helang, o aksidente tibaad magadan bago kaiyan, nanunuga si Jehova na bubuhayon nia sinda liwat tanganing tawan nin buhay na daing katapusan. (Juan 5:​28, 29; Tito 1:2) Kaya baga man kita gabos igwa nin mga problema asin kadepisilan, mantang kita nagdadangadang sa aldaw na ini ni Jehova, yaon sa sato an gabos na dahelan na magin an pinakamagayagayang mga tawo sa ibabaw kan daga.

Ano an Isisimbag Nindo?

• Ano “an aldaw ni Jehova”?

• Paano inaarog kan mga relihion sa kinaban an suanoy na Israel?

• Anong mga hula an inootob kan mga lingkod ni Jehova?

• Paano binendisyonan ni Jehova an saiyang banwaan?

[Mga Hapot Para sa Pag-adal]

[Ritrato sa pahina 21]

An Jerusalem kan enot na siglo ‘naglaad siring sa horno’

[Mga ritrato sa pahina 23]

Itinatao ni Jehova an mga pangangaipo kan mga naglilingkod sa saiya

[Mga ritrato sa pahina 24]

Huli sa saindang makangangalas na paglaom, an mga lingkod ni Jehova totoong magayagaya