An Integridad Naggigiya sa mga Tanos
An Integridad Naggigiya sa mga Tanos
“AN TAWO, na namundag sa babae, halipot an buhay asin pano nin kasakitan,” an sabi kan Biblia. (Job 14:1) An kolog asin pagdusa garo ordinaryo na sana sa pag-eksister nin tawo. Tara, dawa an pan-aroaldaw na buhay puedeng magin pano nin mga kahaditan asin grabeng kariribokan! Ano an magiya sa sato na mapangganahan an masakit na mga kamugtakan asin matabang sa sato na papagdanayon an matanos na kamugtakan sa atubangan nin Dios?
Estudyare an halimbawa nin sarong mayaman na lalaki na an ngaran Job, na nabuhay kaidtong mga 3,500 na taon na an nakaagi sa midbid ngonyan na Arabia. Kanigoan na kalamidad an dinara ni Satanas sa matatakton sa Dios na lalaking ini! Nawara an gabos niang ataman na hayop asin nagdusa sa pagkagadan kan saiyang namomotan na marhay na mga aki. Dai nahaloy pakalihis kaiyan, pinasakitan ni Satanas si Job nin nakagagadan na mga pigsa poon sa payo sagkod sa bitis. (Job, kapitulo 1, 2) Dai aram ni Job kun taano ta nangyayari sa saiya an mga kalamidad. Pero, “si Job dai nagkasala sa saiyang mga ngabil.” (Job 2:10) “Sagkod na ako magadan dai ko hahaleon sa sakuyang sadiri an sakuyang integridad!” an sabi nia. (Job 27:5) Iyo, an integridad ni Job naggiya sa saiya sa mga pagbalo sa saiya.
An integridad tinawan nin kahulogan na moral na karahayan o pagigin lubos asin kalabot an pagigin daing katuyawan asin daing sala sa pagheling nin Dios. Minsan siring, dai iyan nangangahulogan nin pagkasangkap sa pagtaram asin gawe-gawe nin bakong sangkap na mga tawo, na imposibleng biyong makaaabot sa mga pamantayan nin Dios. Imbes, an integridad nin tawo nagpaparisa nin pagigin bilog o pagigin lubos kan debosyon nin puso ki Jehova asin sa saiyang kabotan patin katuyohan. An siring na diosnon na debosyon naggigiya sa mga tanos sa irarom nin gabos na kamugtakan asin sa gabos na panahon. Ipinaheheling kan enot na kabtang kan ika-11 kapitulo kan libro sa Biblia na Talinhaga kun paano puedeng gumiya sa sato an satong integridad sa manlaenlaen na kabtang kan buhay asin sinisierto sa sato an mga bendisyon na kasunod kaiyan. Kun siring, may makosog na interes, helingon niato kun ano an nakarekord dian.
An Integridad Naggigiya sa Pagkaonesto sa Negosyo
Itinatampok an prinsipyo nin pagkaonesto, na ginagamit an poetikong mga tataramon imbes na legal na mga termino, si Hadeng Salomon kan suanoy na Israel nagsabi: “An madayang timbangan bagay na makauuyam nin makuri ki Jehova, alagad an bilog na gapong pantimbang nawiwilihan nia.” (Talinhaga 11:1) Ini an enot sa apat na paglataw sa libro nin Talinhaga na ginagamit an timbangan asin pantimbang tanganing iparisa na mawot ni Jehova na an saiyang mga parasamba magin onesto sa saindang pakikipagtransaksion sa negosyo.—Talinhaga 16:11; 20:10, 23.
An prosperidad kan mga naggagamit nin madayang timbangan—o pandadaya—tibaad nakaaakit. Alagad gusto daw talaga niatong talikdan an mga pamantayan nin Dios sa marahay asin maraot paagi sa pagpartisipar sa salang mga gibo sa negosyo? Dai kun ginigiyahan kita nin integridad. Isinisikwal niato an pandadaya huling an bilog na gapong pantimbang, sarong eksaktong pantimbang na nangangahulogan nin pagkaonesto, ikinaoogmang marhay ni Jehova.
“An Kadonongan Yaon sa mga Hababa an Boot”
Si Hadeng Salomon nagpapadagos: “Nag-abot daw an kapangahasan? Kun siring maabot man an kadaihan nin onra; alagad an kadonongan yaon sa mga hababa an boot.” (Talinhaga 11:2) An kapangahasan—baga man iyan nahahayag bilang kapaabhawan, pakisuway, o pagkauri—nagbubunga nin kasusupgan. Sa ibong na lado, an mapakumbabang pagrekonoser sa satong mga limitasyon iyo an madonong na gibohon. Marahayon na iiniilustrar kan mga halimbawa sa Kasuratan an pagigin totoo kan talinhagang ini!
An maurihon na Levita, si Core, nangenot sa rebeldeng pagsururog tumang sa autoridad kan nombradong mga lingkod ni Jehova na si Moises asin Aaron. Ano an nagin resulta kan kapangahasan na idto? ‘Binuka kan daga an ngoso kaiyan asin hinalon’ an nagkapira sa mga rebelde, mantang an iba, kaiba si Core, tinumtom nin kalayo. (Bilang 16:1-3, 16-35; 26:10; Deuteronomio 11:6) Abaang kadaihan nin onra! Konsiderara man si Uza, na may kapangahasan na inabot asin kinapotan an kaban kan tipan tanganing pogolan iyan na dai bumagsak. Ginadan sia nin ensegida. (2 Samuel 6:3-8) Kanigoan kahalaga na isikwal niato an kapangahasan!
An tawong mapakumbaba asin hababa an boot dai napapasupog dawa sia napapasala. Si Job, minsan ngani arogan sa dakol na paagi, bakong sangkap. An mga pagbalo sa saiya naghayag nin sarong seryosong depekto sa saiyang kaisipan. Sa pagdepensa sa saiyang sadiri tumang sa mga nagsasahot sa saiya, si Job medyo nagin bakong timbang. Ipinasentido pa ngani nia na mas matanos pa sia kisa sa Dios. (Job 35:2, 3) Paano ikinorehir ni Jehova an kaisipan ni Job?
Nauunabihan an daga, an dagat, an mabitoon na kalangitan, an nagkapira sa mga hayop, asin iba pang ngangalasan nin paglalang, tinawan ni Jehova nin leksion si Job sa kasaditan nin tawo kun ikokomparar sa kadakulaan nin Dios. (Job, kapitulo 38-41) Mayo man lamang sa saiyang tataramon na sinambit ni Jehova kun taano si Job ta nagdudusa. Dai nia kaipuhan na gibohon iyan. Hababa an boot ni Job. Mapakumbaba niang rinekonoser an dakulang pagkakalaen nia asin nin Dios, kan saiya mismong mga pagkabakong sangkap saka kaluyahan asin kan katanosan saka kapangyarihan ni Jehova. “Binabawi ko an sakuyang isinabi,” sabi nia, “asin ako nagsosolsol sa kabokabo asin abo.” (Job 42:6) An integridad ni Job naggiya sa saiya na akoon nin magian sa boot an pagsagwe. Kumusta man kita? Ginigiyahan nin integridad, magian sa boot daw niatong aakoon an pagsagwe o pagtatanos kun kinakaipuhan?
Si Moises man hababa an boot asin mapakumbaba. Kan sia napapagal na nin labi-labi sa pag-asikaso sa mga problema nin iba, an saiyang panugangan na lalaki, si Jetro, nagtao nin sarong praktikal na solusyon: Maghiras nin paninimbagan sa ibang kualipikadong lalaki. Minimidbid an saiyang sadiring mga limitasyon, madonong na inako ni Moises an suhestion. (Exodo 18:17-26; Bilang 12:3) An tawong hababa an boot dai nag-aalangan na magdelegar nin autoridad sa iba, ni natatakot sia na maski paano mawawaran sia nin kontrol paagi sa paghiras nin angay na mga paninimbagan sa ibang kualipikadong mga lalaki. (Bilang 11:16, 17, 26-29) Imbes, galaga siang tabangan sinda na umoswag sa espirituwal. (1 Timoteo 4:15) Bako daw na maninigo na magin totoo man iyan sa sato?
‘An Dalan kan Daing Katuyawan Tanos’
Minimidbid na an tanos dai man pirmeng pinoprotehiran kan integridad sa peligro o kalamidad, sinasabi ni Salomon: “An integridad kan mga tanos iyo an naggigiya sa sainda, alagad an kabikoan kan mga madaya iyo an mahale kan saindang mga rogaring.” (Talinhaga 11:3) Tunay nanggad na an integridad naggigiya sa mga tanos na gibohon an tama sa pagheling nin Dios, dawa sa irarom nin masakit na mga kamugtakan, asin nagtatao nin pakinabang sa katapustapusi. Nagsayuma si Job na bayaan an saiyang integridad, asin si Jehova ‘binendisyonan an kasagkodan ni Job nin labi pa sa saiyang kapinonan.’ (Job 42:12) An mga nandadaya tibaad magsaboot na sinda napaparahay sa ikararaot nin iba asin tibaad garo baga nag-aasenso pa ngani sa kadikit na panahon. Alagad maabot an panahon an sainda mismong panloloko an malaglag sa sainda.
“An mahahalagang bagay magigin daing kamanungdanan sa aldaw nin kabangisan,” an sabi kan madonong na hade, “alagad an katanosan mismo magliligtas hale sa kagadanan.” (Talinhaga 11:4) Kamangmangan nanggad na magpaoripon sa materyal na pakinabang alagad pinababayaan an personal na pag-adal, pamibi, pag-atender sa mga pagtiripon, asin an ministeryo sa langtad—an mismong mga aktibidad na nagpapararom kan satong pagkamoot sa Dios asin nagpapakosog kan satong debosyon sa saiya! Daing kayamanan na makakapagligtas sa nagdadangadang na dakulang kahorasaan. (Mateo 24:21) Solamenteng an katanosan kan mga tanos an makapagliligtas. (Kapahayagan 7:9, 14) Kun siring, madonong na isapuso ta an pagngayongayo ni Sofonias: “Bago umabot sa saindo an aldaw kan kaanggotan ni Jehova, hanapa nindo si Jehova, kamo gabos na mahoyo sa daga, na naggibo kan Saiyang hudisyal na desisyon. Hanapa nindo an katanosan, hanapa nindo an kahoyoan.” (Sofonias 2:2, 3) Mientras tanto, magin katuyohan niato na ‘tawan nin onra si Jehova paagi sa satong mahahalagang bagay.’—Talinhaga 3:9.
Sa orog pang pagdodoon sa halaga kan pag-aabot sa katanosan, ikinokomparar ni Salomon an kalaenan kan kaaabtan kan daing katuyawan asin kan maraot, na sinasabi: “An katanosan kan daing katuyawan iyo an mapatanos kan saiyang dalan, alagad sa saiya mismong karatan an maraot mapupukan. An Talinhaga 11:5-8) An daing katuyawan dai mapupukan sa saiyang sadiring mga dalan ni masisiod sa saiya mismong mga ginigibo. An saiyang dalan tanos. Sa katapustapusi, an mga tanos an makakalda sa kasakitan. An maraot tibaad garo makapangyarihan, alagad mayo kan siring na pagkakalda an naghahalat sa sainda.
katanosan kan mga tanos iyo an maligtas sa sainda, alagad huli sa saindang labi-labing pagmawot an mga naggigibo nin kadayaan mismo madadakop. Kun an maraot na tawo magadan, an saiyang paglaom nawawara; asin maski an pag-antisipar na nakabasar sa pagigin makapangyarihan nawara. An matanos iyo an kinakalda dawa sa kasakitan, asin an maraot iyo an minasalida sa saiya.” (“Ogmahon an Banwaan”
An integridad kan matanos asin an karatan kan mga paragibo nin maraot igwa man nin epekto sa ibang tawo. “Paagi sa saiyang ngoso an tawong apostata ipinahahamak an saiyang kapwa,” sabi kan hade kan Israel, “alagad ta paagi sa kaaraman na an matanos naliligtas.” (Talinhaga 11:9) Siisay an madehar na an pagpakaraot, nakadadanyar na tsismis, malaswang orolay, asin daing kuentang erestoryahan nakadadanyar sa iba? Sa ibong na lado, an pagtaram kan matanos dalisay, pinag-isipan na marhay, asin makonsiderasyon. Nasasalbar sia paagi sa kaaraman nin huli ta an saiyang integridad nagtatao sa saiya kan mga pangangatanosan na kinakaipuhan tanganing ipaheling na nagpuputik an mga nagsasahot sa saiya.
“Huli sa karahayan kan mga matanos ogmahon an banwaan,” nagpapadagos an hade, “alagad kun an mga maraot nagagadan may magayagayang kurahaw.” (Talinhaga 11:10) Sa pankagabsan an mga matanos namomotan nin iba, asin ginigibo nindang ogmahon an saindang kapwa—maogma asin magayagaya. Mayo talagang magugusto sa “mga maraot.” Kun an mga maraot magadan, sa parate dai sinda pinagmomondoan kan mga tawo sa pankagabsan. Dai na nanggad magkakaigwa nin pagmondo kun ‘pohoon na ni Jehova an mga maraot sa daga asin haleon na dian an mga madaya.’ (Talinhaga 2:21, 22) Imbes, magkakaigwa nin paggayagaya huling hinale na sinda. Alagad kumusta kita? Marahay na estudyaran niato kun an satong paggawe nakagagayagaya sa iba.
“An Banwaan Napamumuraway”
Orog pang ipinaheheling an pagkakalaen kan epekto sa komunidad kan mga matanos asin kan maraot, sinasabi ni Salomon: “Huli sa bendisyon kan mga tanos an banwaan napamumuraway, alagad huli sa ngoso kan mga maraot iyan nagagaba.”—Talinhaga 11:11.
An mga namamanwaan na nagsusunod sa tanos na dalan nagsusuportar sa katoninongan asin ikararahay asin nagpaparigon sa iba sa komunidad. Sa siring, an banwaan napamumuraway—nag-aasenso. An mga nagtataram nin mapagbalobagi, nakadadanyar, asin salang mga bagay nagdadara nin ribok, kamondoan, dai pagkasararo, asin problema. Partikularmenteng totoo ini kun an mga indibiduwal na ini maimpluwensia. An siring na banwaan nagkakaigwa nin pagkadesareglado, karatan, asin pagruro sa moral saka tibaad sa ekonomiya.
An prinsipyo na sinabi sa Talinhaga 11:11 aplikado man sa banwaan ni Jehova mantang nakikiasosyar sinda sa lambang saro sa saindang arog-banwaan na mga kongregasyon. An sarong kongregasyon kun saen an espirituwal na mga tawo—mga tanos na ginigiyahan kan saindang integridad—igwa nin impluwensia sarong katiriponan nin maogma, aktibo, asin matinabang na mga tawo, na nagtataong onra sa Dios. Binebendisyonan ni Jehova an kongregasyon, asin nagtatalubo iyan sa espirituwal. Kun minsan, an pira sana na tibaad disgustado asin deskontento, na nagkikritikar asin nagtataram na may karaotan nin boot manongod sa kun paano ginigibo an mga bagay-bagay, siring sa “nakahihilong gamot” na puedeng makalakop asin makahilo sa iba na kan primero dai apektado. (Hebreo 12:15) An mga siring sa parate gustong magkaigwa nin orog na autoridad asin pagkaprominente. Nagpapalakop sinda nin mga huringhuding na igwa daang inhustisya, daing binabasaran na pagkaanggot etniko, o mga kaagid kaiyan, sa laog kan kongregasyon o sa parte kan kamagurangan. Tunay nanggad, an saindang ngoso puedeng magin dahelan nin pagkabaranga sa kongregasyon. Bako daw na maninigong dai niato pagdangogon an saindang huringhuding asin magmaigot kita na magin espirituwal na mga tawo na nagpapaoswag nin katoninongan asin pagkasararo sa kongregasyon?
Sa pagpapadagos, sinasabi ni Salomon: “An saro na kulang nin puso dinuhagi an saiyang sadiring kapwa tawo, alagad an tawo na may mahiwas na pakamansay saro na nagdadanay na silensio. An saro na naglilibot bilang parapakaraot naghahayag nin hilom, alagad Talinhaga 11:12, 13.
an saro na fiel an espiritu nagtatahob sa bagay.”—Abaa kadakulang danyos an dinadara nin sarong tawo na mayo nin tamang paghusgar, o “kulang nin puso”! Nagtataram sia na daing pakundangan sagkod sa pambabalobagi o pagmuda. Kaipuhan na magin maagap an nombradong kamagurangan na sumpoon an siring na nakararaot na impluwensia. Bakong arog kan “saro na kulang nin puso,” an tawo na may pakamansay nakakaaram kun noarin masilensio. Imbes na ibuyagyag an sarong hilom, tinatahoban nia iyan. Sa pakaaram na an daing ingat na dila puedeng magbunga nin grabeng danyos, an mapagmansay na tawo “fiel an espiritu.” Maimbod sia sa mga kapagtubod asin dai naghahayag nin kompidensial na mga bagay na puedeng magsapeligro sa sainda. Kanigoan na bendisyon sa kongregasyon an siring na mga nagdadanay na may integridad!
Tanganing tabangan kita na maglakaw sa dalan kan mga daing katuyawan, nagtatao si Jehova nin abundang suplay nin espirituwal na pagkakan na inaandam sa pagdirehir kan “fiel asin may diskresion na oripon.” (Mateo 24:45) Nag-aako man kita nin kadakol na personal na tabang paagi sa Kristianong kamagurangan sa satong arog-banwaan na mga kongregasyon. (Efeso 4:11-13) Tunay na nagpapasalamat kita sa mga ini, huling “kun mayo nin ekspertong paggiya, mapupukan an banwaan; alagad igwa nin kaligtasan sa kadakolan nin parahatol.” (Talinhaga 11:14) Ano man an mangyari, magin kitang determinado nin marigon na ‘maglakaw sa satong integridad.’—Salmo 26:1.
[Blurb sa pahina 26]
Kamangmangan nanggad na magpaoripon sa materyal na pakinabang alagad pinababayaan an teokratikong mga aktibidad!
[Mga ritrato sa pahina 24]
Job was guided by his integrity, and Jehovah blessed him
[Ritrato sa pahina 25]
Uzzah died for his presumptuousness