Kaipuhan Niatong Maaraman Kun Siisay an Dios

DAI daw napapalukso an saindong puso na maheling an langit na pano nin bitoon sa daing panganoron na banggi? Bako daw na nakaoogmang marhay an alimyo nin makolor na mga burak? Bako daw na naoogma kamo sa pagdangog sa mga huni nin mga gamgam asin tanog kan ragasras nin mga dahon sa hinuyuhoy nin doros? Asin kanigoan kamakawiwili an mapuersang mga balyena asin iba pang linalang na nag-iistar sa dagat! Dangan yaon an mga tawo na may abilidad nin konsensia asin makangangalas na komplikadong hotok. Paano nindo ikakapaliwanag an pag-eksister kan gabos na makangangalas na bagay na nakapalibot sa sato?

An nagkapira nagtutubod na ini gabos bunga sana nin pagkanorongod. Alagad kun ini totoo, taano ta an mga tawo nagtutubod sa Dios? Taano ta an dai tinuyong kombinasyon nin manlaenlaen na kemikal nakaprodusir nin mga linalang na may espirituwal na pangangaipo?

“An relihion nakagamot nin hararom sa naturalesa nin tawo asin naeeksperyensiahan sa lambang kabtang nin kamugtakan sa pinansial asin inadalan.” Sinumaryo kan mga tataramon na ini an pagsiyasat na iprinesentar ni Alister Hardy sa saiyang librong The Spiritual Nature of Man. An bagong mga eksperimento sa hotok nagmotibar sa nagkapirang neurosientista na magsuherir na an mga tawo tibaad “binugtakan” nin kakayahan na mag-otob nin relihion. An libro na may titulong Is God the Only Reality? nagkokomento: “An paghanap nin kahulogan paagi sa relihion . . . iyo an ordinaryong naeeksperyensiahan sa gabos na kultura asin edad poon kan maglataw an katawohan.”

Estudyare an konklusyon nin sarong may inadalan na tawo kaidtong mga 2,000 na taon na an nakaagi. Isinurat nia: “An lambang harong igwa nin kaggibo, alagad an naggibo kan gabos na bagay iyo an Dios.” (Hebreo 3:4) Sa katunayan, an pinakaenot na bersikulo kan Biblia nagsasabi: “Sa kapinonan linalang nin Dios an kalangitan asin an daga.”​—Genesis 1:1.

Pero, siisay an Dios? Laen-laen an simbag kan katawohan sa hapot na ini. Kan hinapot kun siisay an Dios, an sarong tinedyer na Hapon na an ngaran Yoshi nagsimbag: “Dai ako segurado. Saro akong Budista, asin dai nagin importante sa sako na maaraman kun siisay an Dios.” Pero, inadmitir ni Yoshi na si Buda mismo ginigibong dios kan dakol. Si Nick, sarong negosyante na labi nang 60 anyos, nagtutubod sa Dios asin naniniwala na sia sarong makapangyarihan sa gabos na puersa. Kan hinagad na ipaliwanag kun ano an naaaraman nia manongod sa Dios, si Nick nagsimbag pakalihis nin halawig na pag-ontok: “Depisilon na hapot iyan, amigo. Pero, an masasabi ko lang iyo na igwa nin Dios. Sia nag-eeksister.”

 An nagkapirang tawo “nagsasamba asin naglilingkod sa linalang nin Dios imbes na sa Kaglalang mismo.” (Roma 1:​25, Today’s English Version) Minilyon an nagsasamba sa gadan nang mga apoon, na nagtutubod na an Dios harayong marhay tanganing dolokon. Sa relihion na Hindu, igwa nin dakol na dios asin diosa. Manlaenlaen na dios, arog ni Zeus asin Hermes, an sinamba kan kaaldawan kan mga apostol ni Jesu-Cristo. (Gibo 14:​11, 12) Dakol na iglesia nin Kakristianohan an nagtotokdo na an Dios sarong Trinidad, kompuesto nin Dios Ama, Dios Aki, asin Dios Espiritu Santo.

Tunay nanggad, “igwa nin dakol na ‘mga dios’ asin dakol na ‘mga kagurangnan,’” an sabi kan Biblia. Minsan siring, idinudugang kaiyan: “Sa sato igwa nin sarong Dios na Ama, na sa saiya gikan an gabos na bagay.” (1 Corinto 8:​5, 6) Iyo, igwa nin saro sanang tunay na Dios. Alagad siisay sia? Anong klase sia? Importanteng maaraman niato an simbag sa mga hapot na ini. Si Jesus mismo nagsabi sa saiyang pamibi sa Sarong ini: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) May dahelan na magtubod na an satong daing sagkod na ikararahay minadepende sa pakaaram kan katotoohan manongod sa Dios.

[Ritrato sa pahina 3]

Paano ikakapaliwanag an saindang pag-eksister?

[Credit Line]

Balyena: Sa karahayan nin boot kan Tourism Queensland

 [Picture Credit Line sa pahina 2]

COVER: Index Stock Photography © 2002