Kapitulo Beinte-Singko: An Hade Asin an Saiyang mga Prinsipe
Hula ni Isaias—Liwanag Para sa Bilog na Katawohan I
Kapitulo Beinte-Singko: An Hade Asin an Saiyang mga Prinsipe
1, 2. Ano an masasabi manongod sa teksto kan Balumbon sa Gadan na Dagat ni Isaias?
SA PAGHINANAPOS kan mga taon nin 1940, sarong pambihirang koleksion nin mga balumbon an nadiskobre sa mga kueba na harani sa Gadan na Dagat, sa Palestina. An mga iyan inapod na Mga Balumbon sa Gadan na Dagat asin pinaniniwalaan na isinurat kaidto sa pag-oltanan nin 200 B.C.E. asin 70 C.E. Pinakamidbid sa mga ini an sarong balumbon ni Isaias na isinurat sa Hebreo sa sarong durableng anit. An balumbon na ini haros kompleto, asin an mga teksto kaiyan saditon an pagkakalaen sa mga manuskrito kan teksto Masoretiko na mas huri nin mga 1,000 taon. Sa siring, an balumbon nagpapaheling kan daing kasalasalang pagpaabot kan teksto sa Biblia.
2 An sarong mahalagang marhay na detalye manongod sa Balumbon sa Gadan na Dagat ni Isaias iyo na an kabtang na minakompuesto kan midbid ngonyan na Isaias kapitulo 32 minarkahan nin “X” na isinurat sa marhen nin sarong eskriba. Dai niato aram kun taano ta ginibo nin sarong eskriba an markang iyan, alagad aram niato na may sarong bagay na espesyal sa kabtang na ini kan Banal na Biblia.
Namamahala Para sa Katanosan Asin Hustisya
3. Anong administrasyon an ihinula sa librong Isaias asin Kapahayagan?
3 An Isaias kapitulo 32 nagpopoon paagi sa sarong nakapupukaw sa boot na hula na may pambihirang kaotoban sa satong kaaldawan: “Uya! An sarong hade magrereynar para sa katanosan mismo; asin kun manongod sa mga prinsipe, mamamahala sinda bilang mga prinsipe para sa hustisya mismo.” (Isaias 32:1) Iyo, “Uya!” Ipinagigirumdom kan kagsing na ini an sarong kaagid na kagsing na yaon sa ultimong makahulang libro kan Biblia: “An Saro na nagtutukaw sa trono nagsabi: ‘Uya! ginigibo kong bago an gabos na bagay.’” (Kapahayagan 21:5) An libro sa Biblia na Isaias asin Kapahayagan, na isinurat na may pag-oltanan na mga 900 na taon, pareho nag-aatubang nin nakaoogmang paglaladawan sa sarong bagong administrasyon—“sarong bagong langit,” kompuesto kan Hade, si Cristo Jesus, na pinatukaw sa trono sa kalangitan kan 1914, asin kan 144,000 na kairibang namamahala na “binakal hale sa katawohan”—kaiba an “sarong bagong daga,” sarong panglobo, nagkakasararong sosyedad nin tawo. a (Kapahayagan 14:1-4; 21:1-4; Isaias 65:17-25) An bilog na areglong ini nagin posible huli sa atang na pantubos ni Cristo.
4. Anong nukleo kan bagong daga an yaon na ngonyan?
4 Pakatapos maheling sa bisyon an pangultimong pagtatak kan 144,000 na kairibang namamahala na ini, si apostol Juan nagbabareta: “Ako nagheling, asin, uya! an sarong dakulang kadaklan, na dai nin siisay man na makabibilang, hale sa gabos na nasyon asin tribo asin banwaan patin tataramon, na nagtitindog sa atubangan kan trono asin sa atubangan kan Kordero.” Uya an nukleo kan sarong bagong daga—sarong dakulang kadaklan na minilyon na ngonyan an kabilangan, na natipon sa kampi kan pipira na sana, kadaklan may edad nang mga natatada kan 144,000. An dakulang kadaklan na ini makaliligtas sa marikas an pagdangadang na dakulang kahorasaan asin sa Paraisong daga iibanan kan mga fiel na binuhay liwat asin kan binilyon na iba pa na tatawan nin oportunidad na maggibo nin pagtubod. An gabos na naggigibo nin siring bebendisyonan nin buhay na daing katapusan.—Kapahayagan 7:4, 9-17.
5-7. Ano an kabtang kan ihinulang “mga prinsipe” sa aripompon nin Dios?
5 Minsan siring, sagkod na nag-eeksister an presenteng kinaban na pano nin pagkaongis, an mga miembro kan dakulang kadaklan nangangaipo nin proteksion. Kadaklan kaini itinatao kan “mga prinsipe” na “mamamahala . . . para sa hustisya mismo.” Kanigoan karahay na areglo! An “mga prinsipe” na ini orog pang ilinadawan sa nakaoogmang mga tataramon kan hula ni Isaias: “An balang saro dapat na magin siring sa pailihan sa doros asin tagoan sa bagyong maoranon, siring sa mga sapa nin tubig sa sarong desierto, siring sa limpoy nin tugdok na kantil sa tagiltil na daga.”—Isaias 32:2.
6 Ngonyan mismo sa panahon na ini nin bilog na kinaban na kapurisawan, may pangangaipo para sa “mga prinsipe,” iyo, kamagurangan na ‘mag-iingat sa bilog na aripompon,’ na inaataman an mga karnero ni Jehova asin nagpapaotob nin hustisya kaoyon kan matanos na mga prinsipyo ni Jehova. (Gibo 20:28) An siring na “mga prinsipe” kaipuhan na aboton an mga kualipikasyon na itinao sa 1 Timoteo 3:2-7 asin Tito 1:6-9.
7 Sa saiyang dakulang hula na naglaladawan kan nakapupurisaw na “pagtatapos kan sistema nin mga bagay,” sinabi ni Jesus: “Siertohon nindo na dai kamo matikbahan.” (Mateo 24:3-8) Taano ta dai natitikbahan an mga parasunod ni Jesus sa peligrosong mga kamugtakan nin kinaban ngonyan? An sarong dahelan iyo na an “mga prinsipe”—baga man sinda linahidan o “ibang karnero”—maimbod na pinoprotehiran an aripompon. (Juan 10:16) Daing takot na inaataman ninda an saindang mga tugang na lalaki asin babae, dawa sa atubangan nin makatatakot na marhay na mga pangyayari siring baga nin etnikong mga guerra asin paglaglag sa sarong rasa. Sa kinaban na mayong-mayo sa espirituwal, sinisierto ninda na an mga kalag na nagmomondo nin makuri marepreskohan paagi sa nakaparirigon na mga katotoohan sa Tataramon nin Dios, an Biblia.
8. Paano sinasanay asin ginagamit ni Jehova an “mga prinsipe” na kabilang sa ibang karnero?
8 Durante kan nakaaging 50 taon, nagin risang-risang marhay an “mga prinsipe.” An “mga prinsipe” na kabilang sa ibang karnero sinasanay bilang sarong nagtatalubong grupong “namamayo” tangani na pakatapos kan dakulang kahorasaan, an mga kualipikado sa sainda magigin andam na nombrahan na maglingkod sa administratibong katongdan sa “bagong daga.” (Ezequiel 44:2, 3; 2 Pedro 3:13) Paagi sa pagtao nin espirituwal na paggiya asin karepreskohan mantang nangengenot sinda sa paglilingkod sa Kahadean, pinatutunayan ninda na sinda “siring sa limpoy nin tugdok na kantil,” na nagtatao nin kaginhawahan sa aripompon sa rona nin pagsamba kaiyan. b
9. Anong mga kamugtakan an nagpapaheling kan pangangaipo ngonyan para sa “mga prinsipe”?
9 Sa peligrosong huring mga aldaw na ini kan maraot na kinaban ni Satanas, an nagdusay na mga Kristiano nangangaipong marhay nin siring na proteksion. (2 Timoteo 3:1-5, 13) An makosog na doros nin falsong mga doktrina asin biribid na mga propaganda naghuhuyop. An mga bagyo nagpapasakit sa porma nin mga guerra sa pag-oltanan asin sa laog nin mga nasyon siring man nin direktang pananalakay tumang sa fiel na mga parasamba ki Jehova Dios. Sa kinaban na namara huli sa espirituwal na tigmara, kaipuhan na marhay kan mga Kristiano an mga sapa nin tubig nin dalisay, daing kasalak na katotoohan tangani na mahale an saindang pagkapaha sa espirituwal. Marahay sana ta nanuga si Jehova na an saiyang nagrereynar na Hade, paagi sa saiyang linahidan na mga tugang asin mapagsuportar na “mga prinsipe” na kabilang sa ibang karnero, matao nin pamparigon sa boot asin paggiya sa mga nagmomondo nin makuri asin nanluluya an boot sa panahon na ini nin pangangaipo. Sa siring sisiertohon ni Jehova na mangingibabaw kun ano an matanos asin may hustisya.
Pag-atento Paagi sa mga Mata, Talinga, Asin Puso
10. Anong mga probisyon an ginibo ni Jehova tanganing ‘makaheling’ asin ‘makadangog’ nin espirituwal na mga bagay an saiyang banwaan?
10 Paano naghimate an dakulang kadaklan sa teokratikong areglo ni Jehova? An hula nagpapadagos: “An mga mata kan mga nakakaheling dai magigin pirong, asin an mga talinga kan mga nakakadangog maghihinanyog.” (Isaias 32:3) Sa nag-aging mga taon, si Jehova naggibo nin probisyon tanganing matokdoan asin makaabot sa pagkamaygurang an saiyang mahalagang marhay na mga lingkod. An Teokratikong Paadalan sa Pagmiministro asin iba pang pagtiripon na nagpupunsionar sa mga kongregasyon kan Mga Saksi ni Jehova sa bilog na kinaban; an pandistrito, nasyonal, asin internasyonal na mga kombension; siring man an espesyalisadong pagsasanay sa “mga prinsipe” na trataron an aripompon na may mamomoton na pagmakolog gabos nakakontribwir sa pagparigon sa nagkakasararo, lakop sa globong kasararoan nin minilyon na magturugang. Saen man sa daga an mga pastor na ini, sinda galagang magdangog asin mag-ako kan mga pagliliwat sa pakasabot kan nag-ooswag na tataramon nin katotoohan. Huling may konsensia na sinanay sa Biblia, sinda pirmeng andam na magdangog asin kumuyog.—Salmo 25:10.
11. Taano an banwaan nin Dios ta nagtataram ngonyan na may kompiansa, bakong nagkakamhol huli sa kadaihan nin kasiertohan?
11 Dangan nagtaong patanid an hula: “An puso kan mga pabiglabigla maghohorophorop sa kaaraman, asin pati an dila kan mga kamhol magigin listo sa pagtaram nin malinaw.” (Isaias 32:4) Dai man logod magin pabiglabigla an siisay man sa paggibo nin mga konklusyon manongod sa kun ano an tama asin kun ano an sala. An Biblia nagsasabi: “Nakaheling ka na nin tawo na marikas sa saiyang mga tataramon? Orog na may paglalaomon sa mangmang kisa saiya.” (Talinhaga 29:20; Eclesiastes 5:2) Bago kan 1919, maski an banwaan ni Jehova naatian nin Babilonikong mga ideya. Alagad poon kan taon na iyan, itinao sa sainda ni Jehova an mas malinaw na pakasabot kan saiyang mga katuyohan. Nanompongan ninda na an mga katotoohan na ihinayag nia sa sainda, bakong pabiglabigla, kundi pinag-isipan na marhay, asin sinda ngonyan nagtataram na may kasiertohan nin pagtubod, bakong nagkakamhol huli sa kadaihan nin kasiertohan.
[Mga Nota sa Ibaba]
a An “hade” sa Isaias 32:1 puedeng kan enot nanonongod ki Hadeng Ezequias. Minsan siring, an prinsipal na kaotoban kan Isaias kapitulo 32 may labot sa Hade, si Cristo Jesus.
b Helingon An Torrengbantayan, Marso 1, 1999, pahina 13-18, na ipinublikar kan Watchtower Bible and Tract Society of New York, Inc.
[Mga Hapot Para sa Pag-adal]