Magpaheling nin Mamomoton na Kabootan sa mga Nangangaipo

“Ipaheling sa lambang saro an mamomoton na kabootan.”​—ZACARIAS 7:9.

1, 2. (a) Taano ta maninigo kitang magpaheling nin mamomoton na kabootan? (b) Anong mga hapot an eestudyaran niato?

 SINASADOL kita kan Tataramon ni Jehova Dios na mamoot sa “mamomoton na kabootan.” (Miqueas 6:​8, nota sa ibaba) Nagtatao man iyan sa sato nin mga dahelan kun taano ta maninigo niatong gibohon iyan. An sarong dahelan, “an tawong may mamomoton na kabootan minagibo nin karahayan sa saiyang kalag.” (Talinhaga 11:17) Totoo nanggad iyan! An pagpaheling nin mamomoton na kabootan, o maimbod na pagkamoot, nagbubunga nin mamomoton asin nagdadanay na dayupot na relasyon sa iba. Bilang resulta, magkakaigwa kita nin maimbod na mga katood​—tunay nanggad na sarong mahalagang marhay na balos!—Talinhaga 18:24.

² Apuera dian, an Kasuratan nagsasabi sa sato: “An naglalakaw sa katanosan asin mamomoton na kabootan makanonompong nin buhay.” (Talinhaga 21:21) Iyo, dahel sa paglakaw niato sa mamomoton na kabootan mapapamahal kita sa Dios asin makalilinya kita sa mga magkakamit nin mga bendisyon sa ngapit, kabale an buhay na daing katapusan. Alagad paano kita makapaheheling nin mamomoton na kabootan? Kiisay niato iyan maninigong ipaheling? Asin may kalaenan daw an mamomoton na kabootan sa normal na kabootan nin tawo o sa kabootan sa pankagabsan?

An Kabootan nin Tawo Asin an Mamomoton na Kabootan

3. Ano an kalaenan kan mamomoton na kabootan asin kan kabootan nin tawo?

³ An normal na kabootan nin tawo asin an mamomoton  na kabootan magkalaen sa dakol na paagi. Halimbawa, an mga nagpapaheling nin kabootan nin tawo parateng ginigibo iyan na mayo nin hararom asin personal na pagkadayupot, o relasyon, sa mga indibiduwal na tinatratar ninda nin maboot. Minsan siring, kun kita nagpapaheling nin mamomoton na kabootan sa sarong tawo, mamomoton na irinarani niato an satong sadiri sa tawong iyan. Sa Biblia, an mga kapahayagan nin mamomoton na kabootan nin mga tawo sa kapwa tawo tibaad nakabasar sa dati nang relasyon. (Genesis 20:13; 2 Samuel 3:8; 16:17) O tibaad nakabasar iyan sa relasyon na resulta nin naenot na mga gibo nin kabootan. (Josue 2:​1, 12-14; 1 Samuel 15:6; 2 Samuel 10:​1, 2) Tanganing iilustrar an pagkakalaen na ini, pagkompararon niato an duwang halimbawa sa Biblia, an saro mapadapit sa kabootan asin an saro mapadapit sa mamomoton na kabootan na ipinahayag nin mga tawo sa kapwa tawo.

4, 5. Paano ipinaheheling kan duwang halimbawa sa Biblia na sinitar digdi an pagkakalaen kan kabootan nin tawo asin kan mamomoton na kabootan?

⁴ An sarong halimbawa nin kabootan nin tawo igwa nin koneksion sa sarong grupo nin mga tawong sakay sa sarong nalunod na barko, kabale si apostol Pablo. Sinda iinanod pagilid sa isla nin Malta. (Gibo 27:37–​28:1) Minsan ngani an mga taga Malta mayo man nin dati nang obligasyon sa nasadsad na mga naglalayag o nin dati nang relasyon sa sainda, inistimar kan mga taga isla an mga estranghero, na pinahelingan sinda nin “pambihirang kabootan nin tawo.” (Gibo 28:​2, 7) An saindang pag-istimar maboot, alagad idto nagkanorongod sana asin ipinaheling sa mga estranghero. Kun siring, idto kabootan nin tawo.

⁵ Sa pagkomparar, estudyare an pagkamapag-istimar na ipinaheling ni Hadeng David ki Mefiboset, an aki kan saiyang katood na si Jonatan. Sinabi ni David ki Mefiboset: “Ika mismo dayaday na makakan nin tinapay sa sakuyang lamesa.” Sa pagpaliwanag kun taano ta ginigibo nia an areglong ini, si David nagsabi sa saiya: “Ako daing salto na mapaheling nin mamomoton na kabootan sa saimo huli ki Jonatan na saimong ama.” (2 Samuel 9:​6, 7, 13) An dai nasusudyang pagkamapag-istimar ni David tamang sabihon na sarong kapahayagan nin mamomoton na kabootan, bakong basta kabootan, ta iyan ebidensia kan saiyang kaimbodan sa sarong establisado nang relasyon. (1 Samuel 18:3; 20:​15, 42) Kaagid kaiyan ngonyan, an mga lingkod nin Dios nagpapaheling nin kabootan nin tawo sa mga tawo sa pankagabsan. Pero, sinda nagpapahayag nin dai nasusudyang mamomoton na kabootan, o maimbod na pagkamoot, sa mga tawong kapareho ninda may aprobado nin Dios na relasyon.​—Mateo 5:45; Galacia 6:10.

6. Anong mga karakteristiko nin mamomoton na kabootan na ipinahahayag nin mga tawo sa kapwa tawo an risang marhay sa Tataramon nin Dios?

⁶ Tanganing maaraman kun ano an nagkapira pang karakteristiko nin mamomoton na kabootan, eestudyaran niato sa halipot an tolong pagkasaysay sa Biblia na nagtatampok kan kualidad na ini. Maririsa niato digdi na an mamomoton na kabootan na ipinaheheling nin mga tawo (1) ipinahahayag paagi sa espesipikong mga gibo, (2) itinatao nin gikan sa boot, asin (3) ipinaheheling nangorogna sa mga igwa nin pangangaipo. Apuera dian, ipinaheheling kan mga pagkasaysay na ini kun paano kita makapahahayag nin mamomoton na kabootan ngonyan.

An Sarong Ama Nagpaheling nin Mamomoton na Kabootan

7. Ano an sinabi kan surugoon ni Abraham ki Betuel asin ki Laban, asin anong isyu an pinalataw kan surugoon?

⁷ Isinasaysay kan Genesis 24:28-67 an ibang kabtang kan estorya kan surugoon ni Abraham, na nasambitan sa naenot na artikulo. Pakatapos na makamidbid si Rebeca, sia inimbitaran sa harong kan ama kaini, si Betuel. (Bersikulo 28-​32) Duman detalyadong isinaysay kan surugoon an saiyang paghanap nin aagomon para sa aking lalaki ni Abraham. (Bersikulo 33-​47) Idinoon nia na an kapangganahan na nakamtan nia sagkod kan oras na idto ibinibilang niang sarong tanda gikan ki Jehova, “na naggiya sa sako sa tunay na dalan tanganing kuanon an aking babae kan tugang kan sakong kagurangnan para sa saiyang aking lalaki.” (Bersikulo 48) Daing duwa-duwa na nag-asa an surugoon na an odok sa pusong pagsaysay nia kan pangyayari makakokombensir ki Betuel asin sa aki niang si Laban na si Jehova nasa likod kan misyon na ini. Sa katapustapusi, nagsabi an surugoon: “Kun kamo talagang nagpapaheling nin mamomoton na kabootan asin pagkamapagtitiwalaan sa sakong kagurangnan, sabihon nindo sa sako;  alagad kun dai, sabihon nindo sa sako, tanganing ako makapatoo o makapawala.”​—Bersikulo 49.

8. Ano an nagin reaksion ni Betuel sa mga pangyayari may labot ki Rebeca?

⁸ Si Jehova nagpaheling na nin mamomoton na kabootan ki Abraham. (Genesis 24:​12, 14, 27) Gikan sa boot man daw na gigibohon iyan ni Betuel paagi sa pagtogot ki Rebeca na umiba sa surugoon ni Abraham? Dadagdagan daw nin mamomoton na kabootan nin tawo an mamomoton na kabootan nin Dios? O masasayang sana daw an halawig na lakaw kan surugoon? Siertong nakarangang marhay sa surugoon ni Abraham na madangog si Laban asin Betuel na nagsabing: “Ki Jehova naggikan an bagay na ini.” (Bersikulo 50) Rinekonoser ninda na imbuelto si Jehova sa mga pangyayari asin daing pag-alangan na inako an desisyon nia. Sunod, ipinahayag ni Betuel an saiyang mamomoton na kabootan paagi sa pagsabi pa nin: “Uya si Rebeca sa atubangan mo. Darahon mo sia asin lumakaw ka, asin magin sia agom kan aki kan saimong kagurangnan, siring kan itinaram ni Jehova.” (Bersikulo 51) Si Rebeca gikan sa boot na uminiba sa surugoon ni Abraham, asin dai nahaloy sia an nagin namomotan na agom ni Isaac.​​—Bersikulo 49, 52-​58, 67.

Mamomoton na Kabootan na Ipinaheling nin Sarong Aki

9, 10. (a) Hinagad ni Jacob sa aki niang si Jose na gumibo nin ano para sa saiya? (b) Paano pinahelingan ni Jose nin mamomoton na kabootan an saiyang ama?

⁹ An makoapo ni Abraham na si Jacob nag-ako man nin mamomoton na kabootan. Siring sa pagkasaysay kan Genesis kapitulo 47, si Jacob kaidto nag-eerok sa Egipto, asin “an mga aldaw nagdatong na [sia] magagadan.” (Bersikulo 27-​29) Nahahadit sia ta sia magagadan sa luwas kan daga na ipinanuga nin Dios ki Abraham. (Genesis 15:18; 35:​10, 12; 49:29-​32) Minsan siring, habo ni Jacob na sia ilobong sa Egipto, kaya iinareglo nia na an saiyang bangkay darahon sa daga nin Canaan. Apuera sa saiyang maimpluwensiang aki, si Jose, siisay an nasa mas marahay na kamugtakan tanganing seguradohon na magigibo an saiyang kamawotan?

¹⁰ An pagkasaysay nagsasabi: “Kaya inapod [ni Jacob] an aki niang si Jose asin nagsabi sa saiya: ‘Kun, ngonyan, ako nakakua nin pabor sa saimong pagheling, . . . gibohan mo ako nin mamomoton na kabootan asin pagkamapagtitiwalaan. (Tabi man, dai mo ako ilobong sa Egipto.) Asin mahigda ako kaiba kan sakong mga ama, asin iluluwas mo ako sa Egipto asin ilolobong mo ako sa saindang lolobngan.’” (Genesis 47:​29, 30) Nanuga si Jose na gigibohon an kahagadan na ini, asin dai nahaloy pakatapos kaiyan nagadan si Jacob. An saiyang bangkay dinara ni Jose asin kan iba pang aking lalaki ni Jacob “sa daga nin Canaan asin ilinobong sia sa lungib kan oma ni Macpela, an oma na binakal ni Abraham.” (Genesis 50:​5-8, 12-​14) Sa siring ginibohan ni Jose nin mamomoton na kabootan an saiyang ama.

Mamomoton na Kabootan nin Manugang na Babae

11, 12. (a) Paano pinahelingan ni Rut nin mamomoton na kabootan si Noemi? (b) Sa anong paagi na an “huring pangyayari” kan mamomoton na kabootan ni Rut orog karahay kisa “enot”?

¹¹ An libro nin Rut nagsasaysay kun paano an balong si Noemi pinahelingan nin mamomoton na kabootan kan saiyang manugang na babaeng Moabita na si Rut, na saro man na balo. Kan si Noemi magdesisyon na bumalik sa Betlehem sa Juda, si Rut nagpaheling nin mamomoton na kabootan asin determinasyon, na nagsasabi: “Kun saen ka magduman ako maduman man, asin kun saen ka magtorog duman man ako matorog. An saimong banwaan magigin sakong banwaan, asin an saimong Dios sakong Dios.” (Rut 1:16) Kan huri ipinahayag ni Rut an saiyang mamomoton na kabootan kan sabihon nia na andam siang magpaagom sa mas maedad nang paryente ni Noemi na si Booz. a (Deuteronomio 25:​5, 6; Rut 3:6-9) Sinabi ni Booz ki Rut: “Ipinahayag mo an saimong mamomoton na kabootan nin orog karahay sa huring pangyayari kisa enot na pangyayari, sa dai pagsunod sa mga barobata baga man dukha o mayaman.”​—Rut 3:10.

¹² An “enot na pangyayari” kan mamomoton na kabootan ni Rut nanonongod sa panahon na binayaan nia an saiyang banwaan asin nagdanay sa kaibanan ni Noemi. (Rut 1:14; 2:11) Maski an aktong iyan nalabihan kan “huring pangyayari” nin mamomoton na kabootan​—an pagigin andam ni Rut na magpaagom ki Booz. Si Rut ngonyan makakatao  na nin sarong eredero para ki Noemi, na lampas na sa edad nin pangangaki. Ginibo an kasal, asin kan sa huri mangaki si Rut, an mga babae sa Betlehem nagkurahaw: “Sarong aking lalaki an namundag ki Noemi.” (Rut 4:​14, 17) Si Rut totoo nanggad na sarong “ekselenteng babae,” na huli kaini binalosan sia ni Jehova nin makangangalas na pribilehio na magin apoon ni Jesu-Cristo.​—Rut 2:12; 3:11; 4:18-22; Mateo 1:​1, 5, 6.

Ipinahahayag Paagi sa mga Gibo

13. Paano ipinaheling ni Betuel, Jose, asin Rut an saindang mamomoton na kabootan?

¹³ Narisa daw nindo kun paano ipinahayag ni Betuel, Jose, asin Rut an saindang mamomoton na kabootan? Ginibo ninda iyan bako sanang paagi sa maboot na mga tataramon kundi paagi sa espesipikong mga gibo. Dai sana sinabi ni Betuel na, “Uya si Rebeca” kundi aktuwal na “pinahale [nia] si Rebeca.” (Genesis 24:​51, 59) Dai sana sinabi ni Jose na, “Ako mismo an magibo bilang pag-otob sa saimong tataramon” kundi ginibo ninda kan saiyang mga tugang na lalaki para ki Jacob “an eksaktong ipinagboot nia sa sainda.” (Genesis 47:30; 50:​12, 13) Dai sana sinabi ni Rut na, “Kun saen ka magduman ako maduman man” kundi binayaan nia an saiyang banwaan asin uminiba ki Noemi, kaya “sindang duwa nagpadagos sa paglakaw sagkod na makaabot sinda sa Betlehem.” (Rut 1:​16, 19) Sa Juda, si Rut naghiro giraray “sono sa gabos na ipinagboot sa saiya kan saiyang panugangan na babae.” (Rut 3:6) Iyo, an mamomoton na kabootan ni Rut, arog kan sa iba pa, ipinahayag paagi sa mga gibo.

14. (a) Paano nagpapaheling nin mamomoton na kabootan paagi sa gibo an mga lingkod nin Dios sa presenteng panahon? (b) Anong mga gibo nin mamomoton na kabootan an aram nindo sa tahaw kan mga Kristiano sa saindong lugar?

¹⁴ Nakaoogmang maheling kun paano an mga lingkod nin Dios ngonyan padagos na nagpapahayag nin mamomoton na kabootan paagi sa mga gibo. Halimbawa, isip-isipa an mga nagtatao nin dai nasusudyang emosyonal na pagsuportar sa mga maluya an hawak, may depresyon, o grabe an kamondoan na mga kapagtubod. (Talinhaga 12:25) O horophoropa an dakol na Saksi ni Jehova na fiel na ipinagmamaneho an mga may edad na pasiring sa Kingdom Hall tanganing makaatender sa semanal na mga pagtiripon kan kongregasyon. Si Anna, 82 anyos asin may artritis, nagpapahayag kan mga saboot nin dakol na iba pa kan sia magsabi: “An ipagmaneho ka pasiring sa gabos na pagtiripon sarong bendisyon hale ki Jehova. Pinasasalamatan ko sia gikan sa kairairaromi kan sakong puso sa pagtao sa sako kan siring na mamomoton na mga tugang na lalaki asin babae.” Nakikikabtang daw kamo sa siring na mga gibo sa saindong kongregasyon? (1 Juan 3:​17, 18) Kun iyo, makasisierto kamo na odok na pinahahalagahan an saindong mamomoton na kabootan.

Ginigibo nin Gikan sa Boot

15. Anong karakteristiko kan mamomoton na kabootan an orog pang itinatampok kan tolong pagkasaysay sa Biblia na pinag-olayan niato?

¹⁵ An mga estorya sa Biblia na pinag-olayan niato nagpapaheling man na an mamomoton na kabootan ipinaheheling nin suelto asin gikan sa boot, bakong sa kapiritan. Si Betuel gikan sa boot na nakikooperar sa surugoon ni Abraham, asin iyo man si Rebeca. (Genesis 24:​51, 58) Ipinaheling ni Jose an saiyang mamomoton na kabootan na mayo nin ibang nagtulod sa saiya. (Genesis 50:​4, 5) Si Rut ‘prosegido sa pag-iba ki Noemi.’ (Rut 1:18) Kan isuherir ni Noemi na magduman si Rut ki Booz,  mamomoton na kabootan an nagpahiro sa Moabita na magsabi: “An gabos na sinasabi mo sa sako gigibohon ko.”​​—Rut 3:​1-5.

16, 17. Taano ta espesyalmenteng makahulogan an mamomoton na kabootan ni Betuel, Jose, asin Rut, asin ano an nagpahiro sa sainda na ipaheling an kualidad na ini?

¹⁶ An mamomoton na kabootan na ipinaheling ni Betuel, Jose, asin Rut espesyalmenteng makahulogan huli ta si Abraham, Jacob, asin Noemi mayo sa kamugtakan na piriton sinda. Total, si Betuel mayo nin legal na obligasyon na itao an aki niang babae. Madali sana kutana niang sabihon sa surugoon ni Abraham: ‘Dai, habo kong maparayo sa sako an sakong mahigos na aki.’ (Genesis 24:18-20) Kaagid kaiyan, libre si Jose na magdesisyon kun baga ootobon o dai an kahagadan kan saiyang ama, ta si Jacob gadan na asin dai sia mapipirit kaini na otobon an saiyang sinabi. Sinabi mismo ni Noemi na si Rut puedeng magdanay sa Moab kun gusto nia. (Rut 1:8) Si Rut libre man na magpaagom sa “mga barobata” imbes na sa may edad nang si Booz.

¹⁷ Si Betuel, Jose, asin Rut gikan sa boot na nagpaheling nin mamomoton na kabootan; napahiro sindang gibohon iyan gikan sa puso. Nakamate sinda nin moral na paninimbagan na ipaheling an kualidad na ini duman sa mga may relasyon sa sainda, kun paanong si Hadeng David kan huri nakamateng obligado na ipaheling iyan ki Mefiboset.

18. (a) Ano an aktitud kan Kristianong kamagurangan sa ‘pagpastor sa aripompon’? (b) Paano ipinahayag nin sarong magurang sa kongregasyon an saiyang mga saboot manongod sa pagtabang sa mga kapagtubod?

¹⁸ An mamomoton na kabootan sagkod ngonyan tanda kan banwaan nin Dios, kabale an mga lalaki na nagpapastor sa aripompon nin Dios. (Salmo 110:3; 1 Tesalonica 5:12) An siring na kamagurangan, o mga paraataman, nakakamate nin paninimbagan na otobon an ipinagkatiwala sa sainda kan sinda nombrahan. (Gibo 20:28) Dawa siring, an saindang pagpastor asin iba pang gibo nin mamomoton na kabootan para sa kapakanan kan kongregasyon ginigibo, “bakong sa kapiritan, kundi gikan sa boot.” (1 Pedro 5:2) Pinapastoran kan kamagurangan an aripompon huli ta igwa sinda nin paninimbagan sagkod nin pagmawot na gibohon iyan. Pinahehelingan ninda nin mamomoton na kabootan an mga karnero ni Cristo huli ta dapat nindang gibohon iyan asin boot nindang gibohon ini. (Juan 21:15-17) “Gustong-gusto kong magdalaw sa harong kan mga tugang o apodan sinda tangani sanang ipaheling na narurumdoman ko sinda,” an sabi nin sarong Kristianong magurang sa kongregasyon. “An pagtabang sa mga tugang sarong dakulang gikanan nin kagayagayahan asin satispaksion para sa sako!” An may pagmakolog na kamagurangan sa gabos na lugar bilog na pusong minaoyon dian.

Magpaheling nin Mamomoton na Kabootan sa mga Nangangaipo

19. Anong katunayan manongod sa mamomoton na kabootan an idinodoon kan mga pagkasaysay sa Biblia na tinokar sa artikulong ini?

¹⁹ An mga pagkasaysay sa Biblia na tinokar niato nagdodoon man kan katunayan na an mamomoton na kabootan dapat na ipaheling sa mga may pangangaipo na dai ninda mismo kayang mapanigoan. Tanganing ikapadagos an saiyang linahe, kinaipuhan ni Abraham an kooperasyon ni Betuel. Tanganing madara sa Canaan an saiyang bangkay, kinaipuhan ni Jacob an tabang ni Jose. Asin tanganing magkaigwa nin eredero, kinaipuhan ni Noemi an tabang ni Rut. Dai mapaninigoan ni Abraham, Jacob, o ni Noemi an mga pangangaipong iyan na mayo nin tabang. Siring man ngonyan, an mamomoton na kabootan maninigo na nangorognang ipaheling sa mga nangangaipo. (Talinhaga 19:17) Maninigo niatong arogon an patriarkang si Job, na minangno “an nagsasakit na naghahagad nin tabang, asin an aking lalaki na daing ama patin an siisay man na mayo nin parasurog” saka an “magagadan na.” ‘Pinaogma man ni Job an puso kan balo’ asin sia nagin ‘mga mata kan buta asin mga bitis kan pilay.’​—Job 29:12-15.

20, 21. Sairisay an nangangaipo kan satong mga kapahayagan nin mamomoton na kabootan, asin ano an maninigo na determinadong gibohon kan lambang saro sa sato?

 ²⁰ An totoo, igwa nin ‘mga nagsasakit na naghahagad nin tabang’ sa lambang Kristianong kongregasyon. Tibaad resulta ini kan mga bagay na arog baga kan kapungawan, panluluya nin boot, pakamate nin kadaihan nin halaga, pagkadesganar sa iba, grabeng helang, o pagkagadan nin sarong namomotan. Ano man an dahelan, sinda gabos na mahal niato igwa nin mga pangangaipo na puede asin maninigo na panigoan kan satong gikan sa boot asin dai nasusudyang mga gibo nin mamomoton na kabootan.​—1 Tesalonica 5:14.

²¹ Kaya, kun siring, padagos niatong arogon si Jehova Dios, na “mayaman sa mamomoton na kabootan.” (Exodo 34:6; Efeso 5:1) Magigibo niato iyan paagi sa gikan sa boot na paggibo nin espesipikong lakdang, partikularmente para sa kapakanan kan mga nangangaipo. Asin sierto nanggad na kita magtatao nin onra ki Jehova asin makaeeksperyensia nin dakulang kagayagayahan mantang ‘ipinaheheling niato sa lambang saro an mamomoton na kabootan.’​—Zacarias 7:9.

[Nota sa Ibaba]

Ano an Isisimbag Nindo?

• Ano an kalaenan kan mamomoton na kabootan asin kan kabootan nin tawo?

• Sa anong mga paagi nagpaheling nin mamomoton na kabootan si Betuel, Jose, asin Rut?

• Ano an maninigo na magin aktitud niato sa pagpaheling nin mamomoton na kabootan?

• Sairisay an nangangaipo kan satong mga kapahayagan nin mamomoton na kabootan?

[Mga Hapot Para sa Pag-adal]

[Ritrato sa pahina 18]

Paano ipinaheling ni Betuel an mamomoton na kabootan?

[Ritrato sa pahina 21]

An maimbod na pagkamoot ni Rut sarong bendisyon ki Noemi

[Mga ritrato sa pahina 23]

An mamomoton na kabootan nin tawo ipinaheheling nin gikan sa boot, ipinahahayag paagi sa espesipikong lakdang, asin ipinaheheling sa mga nangangaipo