Mga Hapot Hale sa mga Parabasa

Tama daw sa sarong tunay na Kristiano na umatender sa sarong seremonya sa lobong o kasal sa simbahan?

An satong pakikikabtang sa ano man na klase nin falsong relihion dai nasosonoan ni Jehova asin dapat na likayan. (2 Corinto 6:​14-​17; Kapahayagan 18:4) An seremonya sa lobong sa simbahan sarong serbisyo relihioso na posibleng marhay na kalabot an sarong sermon na nagsusuportar sa bakong sono sa Kasuratan na mga ideya na arog baga kan inmortalidad kan kalag asin langitnon na balos para sa gabos na marahay na tawo. Tibaad kaiba man dian an mga kaugalean na siring kan pangungurus asin pakikiayon sa pamibi kan padi o ministro. An mga pamibi asin iba pang relihiosong mga kaugalean na sarongat sa katokdoan kan Biblia puede man na magin kabtang sa relihiosong seremonya sa kasal na ginigibo sa sarong simbahan o sa iba pang lugar. Mantang kaiba sa sarong grupo na an gabos nagpapartisipar sa salang relihiosong gibo, an sarong Kristiano tibaad madepisilan na labanan an pangigipit na makiayon. Kanigoan na kamangmangan na ibalad an sadiri sa siring na pangigipit!

Ano kun an sarong Kristiano naoobligar na umatender sa sarong seremonya sa lobong o kasal na gigibohon sa simbahan? Halimbawa, an sarong daing pagtubod na agom na lalaki tibaad sadolon an saiyang Kristianang agom na umiba sa saiya sa siring na okasyon. Sia daw puedeng mag-iba sa saiya bilang toninong na paramasid? Huli sa paggalang sa mga kagustohan kan saiyang agom, an agom na babae puedeng magdesisyon na umiba sa saiya, na determinado na dai makikabtang sa ano man na relihiosong mga seremonya. Sa ibong na lado, puede siang magdesisyon na dai mag-iba, na iniisip na puedeng dai nia makaya an emosyonal na pangigipit sa situwasyon na iyan, na tibaad magin dahelan na ikompromiso nia an diosnon na mga prinsipyo. An desisyon nasa saiya. Siertong gusto niang magin trangkilo sa saiyang puso, na igwa nin malinig na konsensia.​​—1 Timoteo 1:19.

Sa paano man, may bentaha para sa saiya na ipaliwanag sa saiyang agom na huli sa konsensia nia dai sia puedeng makikabtang sa ano man na relihiosong mga seremonya o makiayon sa pag-awit nin mga himno o magduko kun namimibi. Basado sa saiyang eksplikasyon, puedeng isipon kan agom na lalaki na an presensia kan saiyang agom puedeng magbunga nin situwasyon na dai nia magugustohan. Puedeng pagmarhayon kan agom na lalaki na magsolo na sana sia huli sa pagkamoot sa saiyang agom na babae, paggalang sa saiyang mga paniniwala, o sa kamawotan na makalikay sa ano man na kasusupgan. Alagad kun iinsistir kan agom na lalaki na mag-iba sia sa saiya, puede siang umiba bilang paramasid sana.

Dai maninigong lingawan an puedeng magin epekto sa mga kapagtubod kan pag-atender niato nin seremonya sa sarong relihiosong edipisyo. Makakokolog daw iyan sa konsensia nin nagkapira? Posible daw na lumuya an saindang paninindogan na rumayo sa pakikikabtang sa idolatriya? ‘Siertohon an orog na mahalagang mga bagay,’ an sadol ni apostol Pablo, “tanganing kamo magin daing depekto asin dai nakapasisingkog sa iba sagkod sa aldaw ni Cristo.”​—Filipos 1:10.

Kun an okasyon kalabot an sarong haraning kadugo, tibaad may dugang pang mga pangigipit nin pamilya. Sa paano man, kaipuhan na maingat na turotimbangon nin sarong Kristiano an gabos na bagay na kalabot. Sa nagkapirang kamugtakan puede niang isipon na mayong mga problema na malataw sa pag-atender sa sarong seremonya sa lobong o kasal sa simbahan bilang paramasid. Minsan siring, puedeng mangyari na huli sa pag-atender, an posibleng kolog sa konsensia mismo nin saro o nin iba mas labi pa kisa posibleng mga pakinabang kan pagigin presente. Ano man an situwasyon, maninigong seguradohon nin Kristiano na an desisyon dai makakaolang sa saiya sa pagpadanay nin marahay na konsensia sa atubangan nin Dios asin nin mga tawo.